Aḍio irọl li siphẹ Izrạl dị ooko ghan torobọ alhạ dị oghol mọ Aḍio Ophomhoghị Awe r’Enhaạn. Ḍio phọ aḍiphẹ phọ, ogbogh opinyọn rikiạ phọ kasighẹ inhạm kụ apinyonọm rikiạ pidị aZihova asạr ikarạph awe phọ abilhenhaạn. Ii, arikiạ inhạm ke/tue egbuurogh ikarạph oye emadạn loor esi dị oye kụ amhạn maạr apu enhạm. Kuolọ, onyọ Izrạl dị makiton kụ aphighirọn ekiạ dị aZihova rawạ, aZihova asạr ghan ni ikarạph odị awilhenhaạn. (Hib. 10:1-4) Arikiạ phọ Enhaạn aḅenhị bọ we Izrạl mọ ophinyọn ghan iḍighi idị awe phọ Izrạl komiịn mọ bidị abuḍighinhom ikarạph. Kuolọ, ighẹn iikolhobian kụ edị aZihova amiteom osạr ikarạph oomo awe owilhenhaạn? Odị aakolhobian dị kosighẹ Oọny phọ odị aphomhoghiạn bọ, ‘opighironọm ekiạ mem bịn’ obọ otue osạr ikarạph ibadị awe obilhenhaạn. (Hib. 9:28) AZizọs asighẹ ghuḍum mọ odị angọ obọ ‘otanyanạm ḍita.’—Mat. 20:28. w25.02 4 ¶9-10

“Edi ni iloghi anyina, kụ asiIoor phọ kụ idugh.” (Mat. 26:41b) Ikpo onhụ phọ iphẹn phọ eḍeenhaan mọ aZizọs alegheri ni mọ yira u/munughan ḅilhẹ mọ yira kotue ni opiomạn. Iphụr kẹn iyira rurụ oghel aḍiitughiạn oḅẹm ghan mọ: Mị akpạr ri, mị ka/tue ameel. Kụ aZizọs agbi bọ oḅạ ikpo onhụ phọ iphẹn phọ ḍughul phọ aḍiphẹ phọ, abumatuạn phọ odị ughaạph ni r’akpọ oḅio mọ bidị koḅạr ri Odẹ-otu phọ abidị. (Mat. 26:35) Ii aḍiitughiạn phọ abidị inhighẹ ni. Kuolọ, bidị u/lọgh elhegh mọ bidị kotue ni odugh mem odẹgh ophogh. Pọ kụ iyaạr phọ aZizọs aphurọm bọ bidị rurụ r’ikpo onhụ phọ edi bọ esi aBaibul phọ arodon. Dị eeph ni iboom, abutelhedom mọ uwilhẹ ni ogon ghan. Mem mọ osiph bọ Zizọs, bidị u/ḅạr nyodị, kparipẹ ghụn bidị uwilhẹ nyodị osuma. Loor iduọn abumatuạn phọ u/gon bọ, bidị u/ḍighi ipẹ bidị oghaạph bọ—bidị uwilhẹ Zizọs osuma.—Mat. 26:56. w24.07 14 ¶1-2

Adạm r’Iv uroph eepoogh oghelhọm aghuḍum k’agee-pọ ḅilhẹ roghelhọm imạ asiya r’Odẹ phọ abidị, Zihova. Emhiighom mọ, Adạm r’Iv uḍighi pakirị eghunotu phọ Enhaạn. (Luk 3:38) Kuolọ, tutụ bidị komiigh bọ emariạ, bidị uḅaạr ri emhụ oghị esi aZihova. Esi iduọn phọ, odị aphorogh ni bidị siphẹ eghunotu ph’odị. (Gen. 3:23, 24; 4:1) Idiphọ anmụny Adạm r’Iv, yira umhoghi ni dị oye kuphomhoghị iyira r’aZihova. (Rom 5:10, 11) Yira omoghi ni oḍighi arighirị odị kparipẹ r’e/pomhoghiạn odị. Kụ eten dị yira u/seere olhoghi, aZihova amiteom iikolhobian dị eḍighi idị iphẹn phọ edugh. Ika? Dị eego esi iikolhobian okpẹ iikpiạ phọ, aZihova amiteom bọ pidị omhạr awe phọ u/munhughan bọ otue oḍighi righirị odị. Odị aḍighi iduọn phọ esi omiteom iyaạr dị eelenyan r’iyaạr phọ Adạm aroph bọ. w25.02 3-4 ¶7-8