’n Openbaring aan Johannes

9 Die vyfde engel het op sy trompet geblaas.+ En ek het ’n ster gesien wat uit die hemel op die aarde geval het, en die sleutel van die skag* van die afgrond+ is vir hom gegee. 2 Hy het die skag van die afgrond oopgemaak, en rook het daaruit opgegaan soos die rook van ’n groot oond, en die son en die lug het donker geword as gevolg van die rook.+ 3 En sprinkane het uit die rook op die aarde verskyn,+ en gesag is aan hulle gegee, dieselfde gesag as wat die skerpioene van die aarde het. 4 Daar is vir hulle gesê om nie die plantegroei van die aarde of enige groen plant of enige boom te beskadig nie, maar net die mense wat nie die seël van God op hulle voorkoppe het nie.+

5 Die sprinkane is nie toegelaat om hulle dood te maak nie, maar wel om hulle vyf maande lank te pynig, en hulle pyn was soos wanneer ’n skerpioen+ ’n mens steek. 6 En in daardie dae sal mense die dood soek, maar hulle sal dit glad nie vind nie, en hulle sal graag wil sterf, maar die dood sal van hulle af wegvlug.

7 Die sprinkane het gelyk soos perde wat gereedgemaak is vir oorlog,+ en op hulle koppe was iets wat soos goue krone gelyk het, en hulle gesigte was soos dié van mense, 8 maar hulle hare was soos dié van vrouens. En hulle tande was soos dié van leeus,+ 9 en hulle het borsplate soos ysterborsplate gehad. En die geluid van hulle vlerke was soos die geluid van strydwaens met perde wat in ’n geveg in jaag.+ 10 Hulle het ook sterte en angels soos skerpioene, en hulle krag om die mense vyf maande lank seer te maak, is in hulle sterte.+ 11 Hulle het ’n koning oor hulle, die engel van die afgrond.+ In Hebreeus is sy naam Abadʹdon,* maar in Grieks het hy die naam Apolʹlion.*

12 Die een vreeslike gebeurtenis is verby. Kyk! Nog twee+ kom ná hierdie dinge.

13 Die sesde engel+ het op sy trompet geblaas.+ En ek het een stem gehoor wat van die horings van die goue altaar+ wat voor God is, gekom het. 14 Dit het vir die sesde engel, wat die trompet gehad het, gesê: “Maak die vier engele los wat by die groot rivier, die Eufraatrivier,+ vasgebind is.” 15 En die vier engele, wat gereedgemaak is vir die uur en dag en maand en jaar, is losgemaak om ’n derde van die mense dood te maak.

16 Die aantal perderuiters van die leërmagte was 2 maal 10 000 maal 10 000.* Ek het gehoor hoeveel daar was. 17 En so het die perde en dié wat op hulle sit, in die visioen vir my gelyk: Hulle het borsplate gehad wat rooi soos vuur was, blou soos hiasint en geel soos swael. Die koppe van die perde was soos dié van leeus,+ en vuur en rook en swael het by hulle bekke uitgekom. 18 ’n Derde van die mense is deur hierdie drie plae doodgemaak, deur die vuur en die rook en die swael wat by hulle bekke uitgekom het. 19 Want die krag van die perde is in hulle bekke en in hulle sterte, want hulle sterte is soos slange en het koppe, en daarmee rig hulle skade aan.

20 Maar die res van die mense wat nie deur hierdie plae doodgemaak is nie, het nie berou gehad oor die werke van hulle hande nie. Hulle het nie opgehou om die demone te aanbid nie, en ook nie die afgode van goud en silwer en koper en klip en hout, wat nie kan sien of hoor of loop nie.+ 21 Hulle het nie berou gehad oor hulle moorde of hulle spiritistiese gebruike of hulle seksuele onsedelikheid* of hulle diefstal nie.