Kennis wat ons nader aan God laat kom
Ons Skepper is nie net ’n onpersoonlike krag nie. Hy het goeie eienskappe. En hy wil hê dat ons hom moet leer ken en nader aan hom moet kom (Johannes 17:3; Jakobus 4:8). Dit is hoekom hy so baie oor homself geopenbaar het.
Ons Skepper het ’n persoonlike naam
“Mag mense weet dat u, wie se naam Jehovah is, u alleen die Allerhoogste oor die hele aarde is.” – PSALM 83:18.
Die Bybel leer dat Jehovah die enigste ware God is. Hy is die Skepper van die heelal en van alle lewe. Hy alleen verdien ons aanbidding. – Openbaring 4:11.
Jehovah is ’n liefdevolle God
“God is liefde.” – 1 JOHANNES 4:8.
Jehovah gebruik die Bybel en die dinge wat hy geskep het om vir ons te leer watter tipe persoon hy is. Liefde is sy belangrikste eienskap. Alles wat hy doen, word deur liefde gemotiveer. Hoe meer ons van Jehovah leer, hoe meer sal ons hom liefhê.
Jehovah is ’n God wat bereid is om te vergewe
“U is ’n God wat vryelik vergewe.” – NEHEMIA 9:17.
Jehovah weet dat ons onvolmaak is. Daarom is hy “’n God wat vryelik vergewe”. Wanneer ons vir hom sê dat ons jammer is en hard probeer om nie verkeerde dinge te doen nie, sal hy ons vergewe en nie ons vorige sondes teen ons hou nie. – Psalm 103:12, 13.
Jehovah wil hê dat ons tot hom moet bid
“Jehovah is naby almal wat hom aanroep . . . Hy hoor hulle geroep om hulp.” – PSALM 145:18, 19.
Jehovah vereis geen spesiale rituele of godsdiensvoorwerpe om hom te aanbid nie. Hy luister na ons gebede net soos liefdevolle ouers na hulle kinders luister.