Desember

In Bybeltye het mense dikwels gasvryheid betoon deur gaste vir ’n ete oor te nooi (Gen. 18:1-8; Rigt. 13:15; Luk. 24:28-30). Dit het gewys dat hulle vriende wou wees en vrede wou hê. Teenoor wie moet ons veral gasvry wees? Teenoor ons broers en susters in die gemeente, wat reeds deel van ons lewe is. Wanneer toestande slegter word, sal ons op mekaar moet staatmaak. Ons sal lojale vriende nodig hê en goed met mekaar oor die weg moet kom. Kringopsieners, en studente van teokratiese skole en vrywilligers op bouprojekte het ook soms plek nodig om te bly. En party gesinne het hulle huis in ’n natuurramp verloor en het blyplek nodig gehad totdat die broers hulle huis kon herbou. Ons moenie dink dat net broers wat groot huise het hulp kan aanbied nie. Hulle het dalk al baie keer in die verlede gehelp. Kan jy vir iemand blyplek gee, al is jou huis miskien nie so groot nie? w18.03 15 ¶6, 9

Wat sal ons help om weer ‘op te staan’? Ons kan dit nie op ons eie doen nie. Ons het die krag van God se gees nodig (Fil. 4:13). Selfbeheersing is ’n aspek van die vrug van die gees. Dit is baie dieselfde as selfdissipline. As ons selfdissipline wil hê, is dit ook belangrik dat ons uit ons hart met Jehovah praat, gereeld die Bybel studeer en nadink oor wat ons gelees het. Maar sê nou dit is vir jou moeilik om die Bybel te studeer of jy hou nie daarvan om te studeer nie? Moenie mismoedig word nie. Onthou, Jehovah sal jou help as jy hom toelaat. Hy kan jou help om “’n verlange na” sy Woord te ontwikkel (1 Pet. 2:2). Bid eers en vra Jehovah vir selfdissipline sodat jy tyd opsy sal sit om sy Woord te studeer. Miskien kan jy begin deur net vir ’n paar minute op ’n slag te studeer. Dit sal later makliker word en jy sal dit baie meer geniet! Die tyd wat jy opsysit om in stilte oor Jehovah se kosbare gedagtes na te dink en daarin verdiep te raak, sal vir jou baie spesiaal word. — 1 Tim. 4:15. w18.03 29 ¶5-6

Voordat ’n student gedoop kan word, moet hy geloof opbou. Hy doen dit deur die waarheid oor God te leer, wat Sy voorneme vir die mensdom is en wat Hy gedoen het om hulle te red (1 Tim. 2:3-6). Sulke geloof help die student om op te hou om dinge te doen wat God haat en om volgens Jehovah se standaarde te lewe (Hand. 3:19). Dit is belangrik, want God sal nie die toewyding van iemand aanvaar wat nog steeds dinge doen wat Hy haat nie (1 Kor. 6:9, 10). Maar ons moet meer doen as om net volgens Jehovah se hoë standaarde te lewe. Iemand wat sy lewe aan Jehovah wil toewy, sal ook vergaderinge bywoon, gereeld die goeie nuus verkondig en ander leer (Hand. 1:8). ’n Student moet eers al hierdie dinge doen. Dan kan hy sy lewe in ’n persoonlike gebed aan Jehovah toewy en gedoop word. w18.03 6 ¶12

Hoekom het Jehovah Maria gekies om Jesus se ma te wees? Dit is omdat sy ’n geestelike mens was. Hoe weet ons dit? Lees wat Maria gesê het toe sy haar familielede Sagaria en Elisabet besoek het (Luk. 1:46-55). Haar woorde wys dat sy baie lief was vir God se Woord en dat sy die Hebreeuse Geskrifte goed geken het (Gen. 30:13; 1 Sam. 2:1-10; Mal. 3:12). Nadat Maria en Josef getrou het, het hulle nie seksuele omgang gehad totdat Jesus gebore is nie. Dit wys dat Jehovah se wil vir hulle belangriker was as hulle eie begeertes (Matt. 1:25). Maria het ook alles opgelet wat in Jesus se lewe gebeur het en het mooi geluister na al die wyse woorde wat hy gesê het. Sy het ongetwyfeld belanggestel in God se belofte oor die Messias. Maria se voorbeeld help ons om te sien hoe ons God se wil eerste in ons lewe kan stel. w18.02 21 ¶11

Hoe kan ons Job se gehoorsaamheid en geloof navolg? Maak nie saak wat ons omstandighede is nie, ons wil altyd seker maak dat Jehovah die belangrikste Persoon in ons lewe is. Ons moet altyd op hom vertrou en hom met ons hele hart gehoorsaam. Ons het selfs meer rede om dit te doen as wat Job gehad het! Ons weet baie meer van Satan en sy aanvalle (2 Kor. 2:11). Omdat ons die verhaal van Job het, weet ons hoekom God toelaat dat ons swaarkry. Daniël se profesie help ons om te verstaan dat God se Koninkryk ’n werklike regering is wat deur Jesus Christus regeer word (Dan. 7:13, 14). En ons weet dat hierdie Koninkryk binnekort alle swaarkry vir ewig sal wegvat. Job se ondervinding leer ons ook dat ons medelye moet hê vir ons broers en susters wat deur moeilike tye gaan. Soos Job sê hulle ook dalk dinge wat hulle nie bedoel nie (Pred. 7:7). Maar ons moet hulle nie oordeel nie. Ons wil eerder vir hulle wys dat ons verstaan en vir hulle omgee. Op hierdie manier volg ons ons genadige en liefdevolle Vader, Jehovah, na. — Ps. 103:8. w18.02 6 ¶16; 7 ¶19-20

Party mense word trots omdat hulle aantreklik, populêr, fisies sterk, goed in musiek is of omdat ander hulle bewonder. Dawid was al hierdie dinge, maar hy het nederig gebly. Nadat Dawid Goliat doodgemaak het, het koning Saul gesê dat Dawid met sy dogter kon trou. Dawid het toe gesê: “Wie is ek . . . dat ek die skoonseun van die koning sou word?” (1 Sam. 18:18). Jehovah se knegte vandag probeer om, net soos Dawid, nederig te wees. Dit is wonderlik om te weet dat Jehovah, die grootste Persoon in die heelal, ook nederig is. Ons probeer hierdie raad toepas: “Beklee julle . . . met die tere geneenthede van medelye, goedhartigheid, ootmoed, sagmoedigheid en lankmoedigheid” (Kol. 3:12). Ons weet ook dat liefde ‘nie grootpraat nie, en nie opgeblase raak nie’ (1 Kor. 13:4). As ons nederig is, sal ander dalk nader aan Jehovah wil kom. w18.01 28 ¶6-7

Ons kan dalk ook gevra word om bydraes te gee vir ’n spesifieke doel (Hand. 4:34, 35; 1 Kor. 16:2). Byvoorbeeld, is daar planne om ’n nuwe Koninkryksaal te bou wat julle gemeente gaan gebruik? Dalk kan ons ’n bydrae maak wanneer ons die volgende streekbyeenkoms bywoon of ons broers help wanneer daar ’n natuurramp is. Ons bydraes word ook gebruik om sendelinge, spesiale pioniers en kringopsieners te ondersteun sowel as dié wat by die wêreldhoofkwartier en takkantore regoor die wêreld werk. Ons almal kan ons deel doen om die werk te ondersteun wat Jehovah se organisasie in hierdie laaste dae doen. Die meeste bydraes word gedoen sonder dat ander sien wie dit gee of hoeveel gegee word. Ons sit geld in die bydraebussies by die Koninkryksaal of ons maak bydraes aanlyn op jw.org. Ons voel dalk dat ons klein bydrae nie ’n groot verskil maak nie. Maar die meeste bydraes wat die organisasie kry, is klein en nie groot bedrae nie. w18.01 19 ¶10-11

’n Christen moet gedoop wees om gered te word en vir ewig te kan lewe (Matt. 28:19, 20). Toe jy gedoop is, het jy vir almal gewys dat jy jou aan Jehovah toegewy het. Jy het Jehovah belowe dat jy hom sal liefhê en sy wil bo enigiets anders sal stel. Dit is nooit die verkeerde besluit om jou lewe in Jehovah se hande te sit nie. Dié wat dit nie doen nie, is deel van Satan se wêreld. En hy gee nie vir hulle of vir jou om nie. Hy sal baie bly wees as jy jou lewe verloor omdat jy sy kant kies en Jehovah se heerskappy verwerp. Dink net aan hoe Jehovah jou geseën het omdat jy besluit het om jouself toe te wy en gedoop te word. Noudat jy jou lewe aan Jehovah gegee het, kan jy met vertroue sê: “Jehovah is aan my kant; ek sal nie vrees nie. Wat kan die mens aan my doen?” (Ps. 118:6). Daar is geen groter voorreg as om aan Jehovah se kant te wees en om te weet dat hy trots is op jou nie. w17.12 23-24 ¶1-3

Daar gaan tye wees wanneer ons broers en susters dinge sê of doen wat ons gaan irriteer, en daar gaan tye wees wanneer ons hulle ook gaan irriteer. Dit kan ’n groot toets wees, maar dit gee ons die geleentheid om te wys dat ons lojaal is aan Jehovah. Hoe kan ons dit doen? Deur in vrede saam met ons broers en susters te werk. Jehovah is lief vir hulle, al is hulle onvolmaak. En ons moet ook lief wees vir hulle. Jehovah keer nie dat sy knegte getoets word nie. Ons leer dit uit die verhaal van Josef. Toe Josef ’n jong man was, het sy halfbroers jaloers op hom geraak. Hulle het hom verkoop en hy is as ’n slaaf na Egipte toe geneem (Gen. 37:28). Jehovah het gesien wat gebeur het en was definitief ontsteld oor hoe sleg hulle Josef, sy getroue kneg en vriend, behandel het. Maar hy het nogtans nie gekeer wat gebeur het nie. Later toe hulle Josef beskuldig het dat hy Potifar se vrou probeer verkrag het en hy in die tronk gegooi is, het Jehovah nog steeds niks gedoen om dit te keer nie. Maar het God Josef ooit verlaat? Nee. Die Bybel sê: “Jehovah was met Josef, en wat hy gedoen het, het Jehovah laat slaag.” — Gen. 39:21-23. w18.01 9-10 ¶12-14

Waarin glo jy? Jy sal sekerlik sê dat Jehovah die Skepper en Lewegewer is. Jy sal seker ook sê jy glo in Jesus Christus, wat as ’n losprys vir ons gesterf het. Jy sal ook die Paradysaarde noem, waar God se knegte vir ewig sal lewe. Maar sou jy sê dat jou geloof in die opstanding ook vir jou kosbaar is? Ons het goeie rede om te sê dat ons geloof in die opstanding vir ons kosbaar is, selfs al het ons die hoop om die groot verdrukking te oorleef en om vir ewig op die aarde te lewe. Die opstanding is belangrik. As Christus nie opgewek is nie, kan hy nie nou as Koning in die hemel regeer nie, en ons boodskap daaroor sal dan niks beteken nie (1 Kor. 15:12-19). Maar ons weet dat Jesus opgewek is. Ons geloof in die opstanding bly sterk. — Mark. 12:18; Hand. 4:2, 3; 17:32; 23:6-8. w17.12 8 ¶1-2

Die Fariseërs het net gefokus op wat die sondaar gedoen het en nie op watter tipe persoon hy was nie. Toe die Fariseërs gesien het dat Jesus in Matteus se huis was en saam met hom geëet het, het hulle Jesus se dissipels gevra: “Waarom eet julle leermeester saam met belastinggaarders en sondaars?” Jesus het hulle gehoor en gesê: “Dié wat gesond is, het nie ’n geneesheer nodig nie, maar dié wat siek is, het wel. Gaan dan en leer wat dit beteken: ‘Ek wil barmhartigheid hê en nie offerandes nie.’ Want ek het nie gekom om regverdiges te roep nie, maar sondaars” (Matt. 9:9-13). Het Jesus vir sondaars verskonings gemaak? Glad nie. Hy wou hê dat hulle berou moes toon. Dit was ’n belangrike deel van die boodskap wat hy verkondig het (Matt. 4:17). Maar Jesus het besef dat party van hierdie “belastinggaarders en sondaars” wou verander. Hulle was nie by Matteus se huis net om te eet nie. Hulle was daar omdat hulle Jesus begin volg het (Mark. 2:15). Ongelukkig het die Fariseërs nie gesien wat Jesus in hierdie mense gesien het nie. w17.11 13 ¶2; 16 ¶15

Ons is baie bly om deel van die Christengemeente te wees. Wat ons uit die Bybel by die vergaderinge leer en die liefdevolle aanmoediging van ons broers en susters help ons om styf vas te hou aan die prys. Maar soms is daar misverstande wat probleme tussen broers en susters in die gemeente kan veroorsaak. As ons nie sulke probleme gou oplos nie, kan ons dalk baie lank kwaad bly (1 Pet. 3:8, 9). As ons lank vir iemand kwaad bly, kan dit veroorsaak dat ons nie die prys wen nie. Paulus het vir die Kolossense gesê: “Beklee julle dan, as God se uitverkorenes, heilig en gelief, met die tere geneenthede van medelye, goedhartigheid, ootmoed, sagmoedigheid en lankmoedigheid. Hou aan om mekaar te verdra en mekaar vryelik te vergewe as iemand rede tot klagte teen ’n ander het. Net soos Jehovah julle vryelik vergewe het, so moet julle ook doen.” — Kol. 3:12, 13. w17.11 27 ¶7-8

Nadat ’n persoon iemand per ongeluk doodgemaak het, moes hy eers sy saak met die ouer manne in die stad waarheen hy gevlug het, bespreek. Hulle moes hom verwelkom. Later het hy teruggegaan na die stad waar hy iemand doodgemaak het sodat daardie ouer manne sy saak kon oordeel (Num. 35:24, 25). Eers nadat die ouer manne besluit het dat die moord nie aspris was nie, kon die vlugteling na die vrystad toe teruggaan. Hoekom moes die vlugteling met die ouer manne gaan praat? Om Israel rein te hou en om die persoon wat iemand per ongeluk doodgemaak het, te help om Jehovah se genade te verkry. ’n Bybelkenner het gesê dat as ’n vlugteling nie na die ouer manne toe gegaan het nie, hy doodgemaak kon word omdat hy nie gedoen het wat God gesê het hy moet doen nie. As hy nie na een van die vrystede gevlug het nie, kon die naaste familielid van die persoon wat hy doodgemaak het, hom doodmaak. w17.11 9 ¶6-7

Jehovah gebruik nog steeds sy engele om sy volk te beskerm en te versterk (Mal. 3:6; Heb. 1:7). Vandat Jehovah se volk in 1919 uit Babilon die Grote vrygelaat is, het ware aanbidding regoor die aarde uitgebrei, al het hulle vyande hard probeer om dit stop te sit (Op. 18:4). Omdat die engele ons beskerm, hoef ons nie bang te wees dat Jehovah se organisasie ooit weer gevangenes van valse godsdiens sal word nie (Ps. 34:7). Ons kan seker wees dat God se knegte sal aanhou om geestelik te groei. Ons het Jehovah se leërmag aan ons kant. Gedurende die groot verdrukking sal die engele God se volk beskerm en almal vernietig wat nie Jehovah se heerskappy aanvaar nie (2 Tess. 1:7, 8). Ons sien baie uit na daardie dag! w17.10 28 ¶10-11

Wanneer ’n familielid uitgesit word of nie meer ’n Getuie wil wees nie, kan dit voel asof iemand jou met ’n swaard gesteek het. Wat kan jou help om deur hierdie moeilike situasie te kom? Dit is belangrik om by jou geestelike roetine te bly. As jy in hierdie moeilike situasie is, moet jy jou geloof sterk hou. Jy kan dit doen deur gereeld die Bybel te lees, vir vergaderinge voor te berei en dit by te woon, velddiens te doen en te bid vir krag om te volhard (Jud. 21). Maar wat as jy al hierdie dinge doen en die pyn wil nog steeds nie weggaan nie? Moenie opgee nie! ’n Goeie geestelike roetine kan jou help om jou gedagtes en gevoelens te beheer. Dink aan wat met die skrywer van Psalm 73 gebeur het. Hy het ook op ’n stadium in sy lewe gesukkel om sy gedagtes en gevoelens te beheer. Maar omdat hy Jehovah bly dien het, het dit hom gehelp om sy denke reg te stel (Ps. 73:16, 17). As jy aanhou om Jehovah te dien, sal dit jou ook help. w17.10 16 ¶17-18

Satan het in die tuin van Eden vir Eva laat dink dat hy net die beste vir haar wou hê, maar sy dade het gewys dat hy selfsugtig en skynheilig was (Gen. 3:4, 5). Agitofel het gewys dat hy nie werklik Dawid se vriend was nie. Hy het Dawid verraai om homself te bevoordeel (2 Sam. 15:31). Vandag gebruik afvalliges, en ander wat die eenheid van die gemeente wil versteur, “mooipraatjies en vleitaal” (Rom. 16:17, 18). Hulle maak asof hulle vir ander omgee, maar eintlik is hulle selfsugtig. Liefde wat nie opreg is nie, is skandelik omdat dit mense bedrieg. Dit kan dalk mense bedrieg, maar nie Jehovah nie. Jesus het gesê dat dié wat skynheilig is, gestraf sal word “met die grootste strengheid” (Matt. 24:51). Daarom moet ons ons afvra: ‘Is my liefde altyd opreg, of is ek selfsugtig en oneerlik?’ w17.10 8 ¶6-8

Wanneer ons vir mense ’n teks uit God se Woord lees, praat Jehovah in werklikheid met die huisbewoner. Die regte teks is baie beter as enigiets wat ons kan sê (1 Tess. 2:13). Vra jou af: ‘Lees ek by elke geleentheid ’n teks uit die Bybel wanneer ek velddiens doen?’ Ons moet natuurlik nie net Bybelverse vir mense lees nie. Die meeste mense verstaan nie regtig die Bybel nie. Dit was in die eerste eeu ’n probleem en dit is vandag nog die geval. Ons moenie dink dat mense ’n teks sal verstaan net omdat ons dit gelees het nie. Nadat ons die teks gelees het, moet ons die hoofgedagte beklemtoon, of dit selfs weer lees, en verduidelik wat dit beteken. As ons dit doen, sal dit mense help om God se Woord te verstaan. — Luk. 24:32. w17.09 25 ¶7-8

As jy Jesus wil navolg, is dit belangrik dat jy medelye vir jou naaste en ook vir jou broers en susters het (Joh. 13:34, 35). Een betekenis van medelye is om ‘saam met ander te ly’. ’n Persoon wat medelydend is, wil ander graag help. Soek na geleenthede om dit te doen! Baie mense het medelye met dié wat deur natuurrampe getref is. Jehovah se knegte help mense graag in tye van nood (1 Pet. 2:17). ’n Suster in Japan het in ’n gebied gewoon wat deur die aardbewing en tsoenami van 2011 getref is. Sy sê dat sy “baie aangemoedig en vertroos” is deur die vrywilligers van Japan en regoor die wêreld wat kom help het om huise en Koninkryksale reg te maak. Sy skryf: “Dit het my laat besef dat Jehovah vir ons omgee. En dat medegelowiges ook vir mekaar omgee. Baie van ons broers en susters van regoor die wêreld bid vir ons.” w17.09 11 ¶12-13

Waarom het jy selfbeheersing nodig? Hier is twee belangrike redes. Eerstens het mense wat hulle gevoelens en emosies in toom kan hou oor die algemeen minder probleme. Hulle maak makliker vriende, hulle word nie gou kwaad nie en lei nie so baie aan depressie en angstigheid soos mense wat oorhaastig optree nie. Tweedens moet jy versoekings weerstaan en slegte begeertes beheer as jy Jehovah se vriend wil bly. Dit is die fout wat Adam en Eva gemaak het (Gen. 3:6). Dink net aan al die probleme wat mense kon vermy het as hulle net selfbeheersing gehad het. Geen onvolmaakte mens kan volmaakte selfbeheersing hê nie. Jehovah weet dit, en hy wil ons help om teen ons sondige neigings te stry. — 1 Kon. 8:46-50. w17.09 3-4 ¶3-4

In vroeër jare was Getuies van verskillende rasse in Suid-Afrika nie toegelaat om saam te vergader nie. Maar op Sondag 18 Desember 2011 het meer as 78 000 broers en susters van verskillende rasse by die grootste stadion in Johannesburg bymekaargekom om saam ’n geestelike program te geniet. Hulle het van regoor die hele Suidelike Afrika gekom. Dit was wonderlik om te sien. Een van die stadion se bestuurders het gesê: “Ek het nog nooit ’n skare met sulke goeie maniere in hierdie stadion gesien nie. Almal was netjies aangetrek. En julle het die stadion so mooi skoongemaak. Ons kan sien dat julle werklik verenig is.” Sulke kommentare deur mense wat nie Getuies is nie wys dat ons broederskap werklik uniek is (1 Pet. 5:9). Waarom is ons organisasie so uniek? Met die hulp van God se Woord en sy heilige gees, werk ons hard om ‘die ou persoonlikheid af te lê’. In die plek daarvan ‘beklee ons ons met die nuwe persoonlikheid’. — Kol. 3:9. w17.08 17-18 ¶2-3  

Volgens die Bybel is lankmoedigheid, of geduld, ’n eienskap wat deur die heilige gees voortgebring word. Sonder God se hulp is dit baie moeilik vir onvolmaakte mense om geduldig te wees. Geduld is ’n gawe van God en as ons geduldig is, wys ons dat ons Jehovah en ander mense liefhet. As ons altyd ongeduldig is, verswak dit die liefde tussen Christene, maar geduld versterk dit (1 Kor. 13:4; Gal. 5:22). Wat beteken dit om geduldig te wees? Dit beteken onder andere dat ons tydens moeilike omstandighede met ’n positiewe gesindheid sal volhard (Kol. 1:11; Jak. 1:3, 4). Geduld help ons ook om getrou aan Jehovah te bly, kom wat wil. Dit sal ons help om nie kwaad met kwaad te vergeld nie. Die Bybel sê ook dat ons bereid moet wees om te wag. Dit word beklemtoon in Jakobus 5:7, 8. w17.08 4 ¶4

Jongmense stem seker saam dat ons moet weet waarheen ons wil gaan voordat ons ’n reis aanpak. Die lewe is soos ’n reis, en jy moet daarvoor beplan terwyl jy nog jonk is. Dit is natuurlik nie maklik om sulke planne te maak nie. Maar skep moed. Let op wat Jehovah in vandag se teks sê. Jehovah spoor jou aan om jou toekoms versigtig te beplan (Pred. 12:1; Matt. 6:20). Hy wil hê dat jy gelukkig moet wees. Die pragtige dinge wat ons in die skepping kan sien, hoor en proe, oortuig ons hiervan. Dink ook oor hoe hy vir ons sorg en ons leer wat die beste vir ons is. Jehovah sê vir almal wat nie na hom luister nie: “Julle het . . . gekies wat my glad nie behaag het nie . . . Kyk! My knegte sal bly wees, maar julle sal beskaamd staan. Kyk! My knegte sal met vreugde uitroep weens die goeie toestand van die hart” (Jes. 65:12-14). Dit maak Jehovah bly as ons goeie besluite neem. — Spr. 27:11. w17.07 22 ¶1-2

Die God wat weet waar elke ster is, ken jou ook. Hy weet presies waar jy is, presies hoe jy voel en wat jy elke oomblik nodig het! Jehovah weet wat jy deurmaak, en hy kan jou met jou probleme help (Ps. 147:5). Jy voel dalk dat jou probleme net te veel raak en te moeilik is om te verduur. God weet dat ons perke het en hy weet “dat ons stof is” (Ps. 103:14). Ons is onvolmaak en ons maak dikwels dieselfde foute oor en oor. Ons is so jammer oor verkeerde dinge wat ons gesê het, verkeerde begeertes wat ons gehad het en dat ons op ander mense jaloers was! Jehovah maak nie sulke foute nie, maar hy verstaan hoe ons voel! (Jes. 40:28). Miskien het jy al self gesien hoe Jehovah jou gehelp het om ’n moeilike situasie te verduur. — Jes. 41:10, 13. w17.07 18 ¶6-8

’n Broer wat ’n huis in Sri Lanka het, het dit vir vergaderinge en byeenkomste beskikbaar gestel. Daar bly ook ’n paar voltydse dienaars in die huis. Dit is ’n geldelike opoffering vir die broer, maar dit help die plaaslike broers wat nie baie geld het nie. In ’n land waar daar beperkings op ons werk is, gebruik die broers hulle huise as Koninkryksale en dit beteken dat pioniers en broers wat arm is nie ’n vergaderplek hoef te huur nie. ’n Suster wat gereelde bydraes aan die Koninkrykswerk maak, vertel van ’n seëning wat sy ontvang het: “Deur vrygewig te wees, het ek iets baie interessants in my lewe ondervind. Hoe vrygewiger ek met materiële dinge is, hoe vrygewiger voel ek oor die algemeen. Ek vergewe mense vryeliker, ek is geduldiger en ek aanvaar teleurstellings en raad makliker.” w17.07 9 ¶9-10

Al het Job later beter verstaan waarom hy beproef is, het hy dalk gewonder waarom hy so vreeslik moes ly. Indien dit die geval was, kon hy nog steeds oor God se raad nadink. Dit sou hom help om die regte beskouing te hê en sou hom ook vertroos het (Ps. 94:19). Job se ondervinding kan ons ook help om die regte beskouing te hê en dit kan ons vertroos. Jehovah het dit “tot ons onderrigting geskryf, sodat ons deur ons volharding en deur die vertroosting van die Skrif hoop kan hê” (Rom. 15:4). Watter les leer ons hieruit? Ons moenie so behep wees met ons eie lewe dat ons nie meer hierdie groot geskil — die regverdiging van Jehovah se soewereiniteit — kan raaksien nie. Ons moet ook nie vergeet dat ons net soos Job getrou moet bly nie, al is dit hoe moeilik. w17.06 24 ¶9; 25 ¶13-14

Jesus het geweet dat mense rus nodig het. Byvoorbeeld, nadat hulle hard gewerk het in die predikingswerk, het Jesus vir sy dissipels die woorde hierbo gesê. Vermaak en ontspanning het ook sy plek. Maar ons moet versigtig wees dat dit nie die belangrikste ding in ons lewe word nie. In die eerste eeu het baie die gesindheid gehad: “Laat ons eet en drink, want môre gaan ons sterf” (1 Kor. 15:32). Vandag het baie mense ook hierdie gesindheid. Hoe weet ons of ons ’n gebalanseerde beskouing van ontspanning het? Kies ’n week en skryf die aantal ure neer wat jy aan geestelike dinge spandeer. Skryf dan neer hoeveel ure jy in dieselfde week aan ontspanning soos sport, stokperdjies, televisie en videospeletjies bestee. Wat sien jy as jy die aantal ure met mekaar vergelyk? Dalk moet jy minder tyd aan ontspanning bestee. — Ef. 5:15, 16. w17.05 24-25 ¶11-13

In Jesus se illustrasie het die handelaar ’n pragtige pêrel gevind. Hy wou dit so graag hê dat hy alles verkoop het om dit te kry. Kan jy jou voorstel hoe kosbaar daardie pêrel vir hom was? Die waarheid omtrent God se Koninkryk is soos daardie kosbare pêrel. As ons so lief vir die Koninkryk is soos daardie handelaar vir die pêrel was, sal ons bereid wees om alles prys te gee om onderdane van die Koninkryk te word en te bly (Mark. 10:28-30). Saggeus het byvoorbeeld op ’n oneerlike manier ryk geword (Luk. 19:1-9). Maar toe hy hoor wat Jesus oor die Koninkryk sê, het hy besef hoe waardevol dit is en hy het dadelik iets daaromtrent gedoen. Hy het gesê: “Kyk! Die helfte van my besittings, Here, gee ek vir die armes, en wat ek ook al deur valse beskuldiging van iemand afgepers het, gee ek viervoudig terug.” Hy was bereid om al die geld wat hy op ’n oneerlike manier gemaak het terug te gee en om nie meer geldgierig te wees nie. w17.06 9-10 ¶3-5

As ouers jou vra om hulle kinders te help, moet jy die kinders help om respek vir hulle ouers te hê. Jy moet positief van hulle ouers praat en nie probeer om die rol van die ouers oor te neem nie. Jy moet ook enigiets vermy wat dit vir mense binne of buite die gemeente kan laat lyk of jy met verkeerde dinge besig is (1 Pet. 2:12). Ouers moenie die geestelike opleiding van hulle kinders aan ander oorlaat nie. Hulle moet ’n oog hou oor die hulp wat die broers en susters gee en moet nog steeds hulle kinders self leer. Ouers, bid dat Jehovah julle moet help en doen julle bes (2 Kron. 15:7). Julle moet julle kind se vriendskap met Jehovah bo julle eie belange stel. Doen alles in julle vermoë om seker te maak dat God se Woord julle kind se hart bereik. Julle moet nooit dink dat julle kind nie ’n getroue aanbidder van Jehovah sal word nie. w17.05 12 ¶19-20

Stel jou die volgende toneel voor. Twee slegte mans beskuldig ’n man valslik van ’n baie ernstige oortreding. Sy vriende en familie is geskok om te hoor dat hy skuldig bevind is en doodgemaak gaan word. Almal wat geregtigheid liefgehad het, was baie gegrief toe die onskuldige man en sy seuns gestenig is. Dit is presies wat met Jehovah se getroue kneg Nabot gebeur het. Hy het gedurende die heerskappy van koning Agab van Israel gelewe (1 Kon. 21:11-13; 2 Kon. 9:26). Toe Agab Nabot se wingerd wou koop of dit vir ’n beter een wou ruil, het Nabot nie sy aanbod aanvaar nie. Waarom nie? Hy het geweier, want Jehovah se wet aan Israel het hulle nie toegelaat om hulle erfdeel permanent te verkoop nie (Lev. 25:23; Num. 36:7). Nabot wou gehoorsaam aan Jehovah wees. w17.04 23 ¶1; 24 ¶4

Wie sal op die aarde oorbly nadat die goddeloses vernietig is? Jehovah maak hierdie pragtige belofte: “Die sagmoediges sal die aarde besit, en hulle sal hulle inderdaad verlustig in die oorvloed van vrede.” Later in dieselfde psalm lees ons: “Die regverdiges sal die aarde besit, en hulle sal vir ewig daarop woon” (Ps. 37:11, 29). Wie is “die sagmoediges” en “die regverdiges”? Die sagmoediges is dié wat nederig Jehovah se leiding en onderrigting aanvaar; die regverdiges is dié wat daarvan hou om te doen wat reg is in Jehovah se oë. Vandag is daar baie meer goddelose mense as regverdiges. Maar in die nuwe wêreld sal die sagmoediges en die regverdiges nie in die minderheid of die meerderheid wees nie; hulle sal die enigste mense op die aarde wees. As sulke mense op die aarde woon, sal die aarde ’n paradys wees! w17.04 10-11 ¶5-6

“Die liefde vir God” dwing ons om ons broers lief te hê, veral as hulle swaarkry (1 Joh. 3:17, 18). Toe daar in die eerste eeu ’n hongersnood was, het die gemeente kos aan die Christene in Judea voorsien (Hand. 11:28, 29). Paulus en Petrus het die Christene aangespoor om gasvry te wees (Rom. 12:13; 1 Pet. 4:9). As Christene besoekers moes verwelkom, hoeveel te meer dan nie mede-Christene wie se lewe in gevaar is of wat vir hulle geloof vervolg is nie! Duisende Getuies van Jehovah moes onlangs vlug weens die oorlog en vervolging in oostelike Oekraïne. Party van hulle is ongelukkig in die oorlog dood. Maar die meeste is deur broers in ander dele van Oekraïne versorg en ander het in Rusland by broers gaan bly. In albei lande bly die broers neutraal en is hulle “geen deel van die wêreld” nie, en hulle hou aan om ywerig “die goeie nuus van die woord bekend” te maak. — Joh. 15:19; Hand. 8:4. w17.05 4 ¶6-7