’n Huwelik word gered

“’n Jaar gelede was ons op die rand van ’n egskeiding”, vertel ’n man in Nieu-Caledonië. Die rede? ’n Gebrek aan kommunikasie, botsende geaardhede, gesondheidsprobleme en die vrou se senukwaal. Na tien jaar het albei gedink dat hulle huwelik op die rotse is.

Een oggend het die vrou haar probleme met ’n buurvrou bespreek. Die buurvrou, wat toevallig een van Jehovah se Getuies was, het haar vertel hoe die praktiese advies in die Bybel gesinsprobleme kan oplos. Toe die man later hiervan hoor, het dit hom koud gelaat. Niks kon sy vrou se humeur en persoonlikheid verander nie, het hy gedink. Die vrou het nietemin die Bybel saam met Jehovah se Getuies begin bestudeer. Sy het goed geluister na die Bybelbeginsels wat aan haar verduidelik is en het probeer om hulle in haar lewe toe te pas.

Die man vertel: “Binne ’n paar weke het ek veranderinge in haar persoonlikheid begin opmerk.” Uit nuuskierigheid het hy ingestem om ’n streekbyeenkoms by te woon en te sien wat daaragter steek. Die toesprake het hom diep geraak. Hy het sy vrou se Bybelstudie begin bywoon en erken: “Nou het ons die grondslag van waarlik gelukkige gesinslewe gevind. En ek en my vrou is baie bly dat ons hierdie oplossing vir gesinsprobleme—trouens, vir al die probleme waarmee mense vandag te kampe het—met ander kan deel.”