Jesus se lewe en bediening
’n Tiran se plan misluk
WAAROM maak Josef vir Maria in die middel van die nag wakker? ‘Jehovah se engel het nou net aan my verskyn’, sê Josef vir haar. ‘En hy het gesê ek moet jou en die kind neem en na Egipte vlug, want Herodes gaan Jesus soek om hom dood te maak.’
Daarop vlug die drie. En dit is ook net betyds, want Herodes het uitgevind dat die sterrewiggelaars hom mislei en die land verlaat het. Onthou, hulle was veronderstel om na hom toe terug te gaan nadat hulle Jesus gevind het. Herodes is smoorkwaad. In ’n poging om Jesus om die lewe te bring, gee hy bevel dat al die seuntjies van twee jaar en jonger in Betlehem en sy distrikte doodgemaak moet word. Hy bereken hierdie ouderdom volgens die inligting wat hy vroeër van die sterrewiggelaars ontvang het. Die slagting van al die seuntjies is afgryslik! Herodes se soldate breek in een huis na die ander in. En wanneer hulle ’n seuntjie vind, gryp hulle hom uit sy moeder se arms. Ons het geen idee hoeveel babas gedood word nie, maar die groot geween en gekerm van die moeders vervul ’n Bybelprofesie van God se profeet Jeremia.
In die tussentyd het Josef en sy gesin veilig in Egipte aangekom, en hulle woon nou daar. Maar een nag verskyn Jehovah se engel weer in ’n droom aan Josef. ‘Staan op en neem Jesus en sy moeder terug na Israel toe’, sê die engel, ‘want die wat hom om die lewe probeer bring het, is dood.’ Die gesin keer toe na hulle vaderland terug, ter vervulling van ’n ander Bybelprofesie wat sê dat God se Seun uit Egipte geroep sou word.
Josef wil skynbaar teruggaan na Judea, waar hulle gewoon het voor hulle na Egipte gevlug het. Maar hy hoor dat Herodes se goddelose seun Archelaüs nou die koning van Judea is, en Jehovah waarsku hom in nog ’n droom teen die gevaar. Josef en sy gesin gaan toe na die noorde en vestig hulle in die dorp Nasaret. Jesus word in hierdie gemeenskap groot, ver van die middelpunt van die Joodse godsdienslewe af. Mattheüs 2:13-23; Jeremia 31:15; Hosea 11:1.
♦ Watter verskriklike ding het koning Herodes gedoen toe die sterrewiggelaars nie teruggekom het nie, maar hoe is Jesus beskerm?
♦ Hoekom het Josef nie weer in Betlehem gaan woon toe hy van Egipte af teruggekeer het nie?
♦ Watter Bybelprofesieë is gedurende hierdie tydperk vervul?