Bloedfraksies en chirurgiese prosedures

Bloedfraksies. Fraksies word verkry uit die vier primêre bloedkomponente—rooi selle, wit selle, bloedplaatjies en plasma. Byvoorbeeld, rooi selle bevat die proteïen hemoglobien. Produkte wat gemaak word uit die hemoglobien van mense of diere, word gebruik om pasiënte te behandel wat akute bloedarmoede het of baie bloed verloor het.

Plasma—wat 90 persent water is—bevat tientalle hormone, anorganiese soute, ensieme en voedingstowwe, wat minerale en suikers insluit. Plasma bevat ook stollingsfaktore, teenliggaampies wat siektes bestry, en proteïene soos albumien. As iemand aan ’n sekere siekte blootgestel is, sal dokters dalk inspuitings van gammaglobulien voorskryf wat onttrek is uit die plasma van mense wat reeds immuniteit opgebou het. Wit bloedselle kan ’n bron wees van interferons en interleukiene, wat gebruik word om party virusinfeksies en kankers te behandel.

Mag Christene terapieë aanvaar waarin bloedfraksies gebruik word? Die Bybel gee nie spesifieke besonderhede nie; gevolglik moet elkeen sy eie besluit voor God neem in ooreenstemming met sy gewete. Party sal alle fraksies weier omdat hulle redeneer dat God se Wet aan Israel vereis het dat bloed wat uit ’n lewende wese gekom het, “op die grond [uitgegiet]” moet word (Deuteronomium 12:22-24). Ander sal moontlik behandelings aanvaar waarby ’n fraksie betrokke is, terwyl hulle oortappings van heelbloed of die vernaamste komponente daarvan sal weier. Hulle redeneer dalk dat fraksies wat uit bloed onttrek is, op die een of ander stadium nie meer die lewe van die wese waaruit die bloed geneem is, verteenwoordig nie.

Dink aan die volgende vrae wanneer jy ’n besluit neem oor bloedfraksies: Besef ek dat as ek alle bloedfraksies weier, dit beteken dat ek sekere geneesmiddels nie sal aanvaar nie, wat produkte insluit wat siektes bestry of wat die bloed kan help stol om bloeding te stop? Kan ek aan ’n dokter verduidelik waarom ek een of meer bloedfraksies weier of aanvaar?

Chirurgiese prosedures. Dit sluit bloedverdunning en selherwinning in. In bloedverdunning word bloed uit die liggaam gelei, met ’n volume-uitdyer vervang en later na die pasiënt teruggevoer. By selherwinning word bloed wat tydens ’n operasie verloor word, opgevang en teruggevoer. Bloed word uit ’n wond of liggaamsholte herwin, dit word gewas of gefiltreer en dan na die pasiënt teruggevoer. Omdat dokters hierdie tegnieke op verskillende maniere toepas, moet ’n Christen uitvind wat sy dokter in gedagte het.

Wanneer jy besluite oor hierdie prosedures moet neem, vra jou af: ‘As van my bloed uit my liggaam gelei word en die vloei dalk selfs ’n ruk lank onderbreek word, sou my gewete my toelaat om hierdie bloed nog as deel van my te beskou, wat nie sal vereis dat dit “op die grond [uitgegiet]” moet word nie? (Deuteronomium 12:23, 24). Sou dit my Bybelopgeleide gewete kwel as van my eie bloed gedurende ’n mediese prosedure getrek, gewysig en dan weer in my liggaam teruggesit word? Besef ek dat as ek alle mediese prosedures weier waartydens my eie bloed gebruik word, dit beteken dat ek nie sal toestemming gee vir ’n bloedtoets, hemodialise of die gebruik van ’n hart-long-masjien nie?’

’n Christen moet self besluit hoe hy sal toelaat dat sy eie bloed gedurende ’n chirurgiese prosedure hanteer word. Dit geld ook vir mediese toetse en huidige terapieë wat behels dat ’n bietjie van ’n mens se eie bloed getrek word, dat dit moontlik op die een of ander manier gewysig word en dan weer teruggesit word.