Èle Gbesɔsɔ Asɔ Eoɖeki na Yehowaa?

1-2. Nyi mɛɖe ɖo awa gbɔxwe yí awa ʒinʒindoshimɛɔ?

LE EXWE amatɔn ciwo yí vayi mɛɔ, agbetɔ ciwo yí wu miliɔn ɖeka han wa ʒinʒindoshimɛ yí trɔ Yehowa Kunuɖetɔwo. Amɛ sugbɔ le wo mɛ yí le shigbe Timɔte nɛ, ci yí nyi nukplavi le exwe sanŋdi ŋkɔtɔ mɛ yí wokpla nyɔnɔnwi lɔwo wo so keke “ɖevi mɛ.” (2 Tim. 3:​14, 15) Mɛɖewo shin gbɔxwe yí kpla nu so Yehowa nu, yí ɖewo ku nyɔxo gbɔxwe yí va wɛ. Zaanɖe vayi yɛɔ, nyɔnu ɖeka ci yí kpla Bibla koɖo Yehowa Kunuɖetɔwo wa ʒinʒindoshimɛ hwenu eɖo exwe 97!

² Nɔ ènyi Bibla nukplavi alo jila ciwo yí nyi Yehowa kunuɖetɔwo vi ènyi ɖe, èbubuɔ tamɛ kpɔ so ʒinʒindoshimɛ wawa nua? Tajinu nywi enyi! Vɔ keŋ gbɔxwe àwa ʒinʒindoshimɛɔ, ele mɔ asɔ eoɖeki na Yehowa. Enyɔta cɛ adre ŋci yí amɛɖekisɔsɔna Mawu nyi, agbekpedo eo nu nakpɔ ŋci yí taɖo deɖo asɔ amɛɖekisɔsɔna koɖo ʒinʒindoshimɛ wawa ɖoɖoɔ esɔesɔ, nɔ èle gbesɔsɔ awɛ can o.

NYI AMƐÐEKISƆSƆNA NYIƆ?

3. Nà Bibla mɛ kpɔwɛ ciwo yí xo nuxu so mɛ ciwo yí sɔ wowoɖekiwo na Yehowa nu.

³ Le Bibla mɛɔ, amɛɖekisɔsɔna gɔnmɛ yí nyi mɔ woasɔ mɛɖe do akpo, nɔ awa edɔ kɔkɔɛ vevi ɖeka. Izraɛliviwo nyi jukɔn ɖeka ci yí sɔ yiɖeki na Yehowa. Vɔ mɛɖewo le jukɔn lɔ mɛ yí gbetrɔ yí sɔ wowoɖekiwo na Yehowa keŋ awa edɔ vevi ɖe ni. Le kpɔwɛ mɛ, Aarɔn donɔ “amɛɖekisɔsɔna jeshidu kɔkɔɛ” ɖeka ci yí nyi shikaga flakpɛ ɖeka ci yí kɔnɔ ga le ŋgonu nɔ tablanu yitɔ. Shikaga flakpɛ ŋtɔ́ danasɛ mɔ, wosɔɛ do akpo nɔ awa edɔ vevi ɖeka shigbe Izraɛli avɔnsatɔ gantɔ nɛ. (1 Ese. 8:​9, NWT) Naziritɔwo can sɔ wowoɖekiwo na Yehowa yí awa edɔ vevi ɖeka ni. Enyɔgbe “Naziritɔ,” so Ebre nyɔgbe nazir mɛ, ci gɔnmɛ yí nyi mɔ “Mɛ ci Wosɔ do akpo,” alo “Mɛɖe ci yí sɔ yiɖeki na.” Naziritɔwo ɖo agbe ŋɖekawo nɔ wowoɖekiwo sɔgbe koɖo Moizi Se lɔ.—Amh. 6:​2-8.

4. (a) Nɔ èsɔ eoɖeki na Yehowa ɖe, nyi yí anyi enuvevitɔ nɔ eo le agbe mɛɔ? (b) ‘Woaŋlɔbe amɛ ŋtɔ drowo’ gɔnmɛ ɖe? (Kpɔ foto lɔ hɛnnɛ.)

⁴ Nɔ èsɔ eoɖeki na Yehowaɔ, anyi èɖui mɔ yeanyi Yesu nukplavi yí Mawu dro wawa anyi enuvevitɔ nɔ eo le agbe mɛ. Nyiwo yí àwawa yí adasɛ mɔ yenyi Kristotɔ ci yí sɔ yiɖeki na Mawuɔ? Yesu nu mɔ: “Nɔ́ amɛɖe jí mɔ́ ye a kplɔ ŋ do ɔ, é ɖo a ŋlɔbe yiŋtɔ drowo yí a dró [efuntrenamɛ ci yitɔ] keŋ yí a kplɔ ŋ do.” (Mat. 16:​24, Ezoɖuɖu Yoyu Wema) Grɛki nyɔfɔkpe ci gɔnmɛ woɖe mɔ “a ŋlɔbe yiŋtɔ drowo” tɛnŋ gbenyi mɔ “dagbenɔ agbe nɔ yiɖeki o.” Ci èsɔ eoɖeki na Yehowaɔ, éʒan mɔ àgbe ŋɖekpokpui ci yí desɔgbe koɖo Mawu dro o. (2 Kor. 5:​14, 15) Édasɛ mɔ èɖo agbe “enuvɔn ciwo . . . gbaza wanɔ” shigbe gbɔdɔndɔn masɔkoɖose hannɛ (Gal. 5:​19-21; 1 Kor. 6:18) Wawa do ese ŋtɔ́wo ji adɔ yí agbe lɔ agbɔnnu nɔ eoa? Nɔ èlɔn Yehowa yí kando ji mɔ yeŋtɔ nyɔna yí dɔ Yehowa do se lɔwoɔ, dagbɔnnu nɔ eo o. (Eha. 119:97; Ezai 48:​17, 18) Nɔviŋsu ci yí tɔ mɔ Nicholas nu mɔ: “Ètɛnŋ kpɔ Yehowa sewo shigbe gakpa ɖe ci yí xexeɛ mɔ nɔ eo yí datɛnŋ awa ŋci yí dro eo hannɛ, alo gaja ɖe ci yí xexeɛ mɔ nɔ janŋtan ɖe nɔ ŋgbeva drɛn eo ɖu hannɛ.”

5. (a) Lé àsɔ eoɖeki na Yehowa doɔ? (b) Vovototo ci yí le gblamɛ nɔ amɛɖekisɔsɔna Yehowa koɖo ʒinʒindoshimɛ wawaɔ? (Kpɔ foto lɔ hɛnnɛ.)

⁵ Lé àsɔ eoɖeki na Yehowa doɔ? Àɖo gbe ni le gbedoɖa mɛ mɔ, yeasɛn yiɖekɛ kpaŋ yí asɔ yi dro wawa do texwe ŋkɔtɔ le ye gbe mɛ. Le nyɔnɔnwi mɛɔ, èɖoɖoɔ gbe nɔ Yehowa mɔ yeakpɔtɔ aluinkɔ yí asin ‘koɖo ao ji pleŋ, ao gbe pleŋ, ao susu pleŋ koɖo ao ŋsɛn pleŋ.’ (Maki 12:30) Eoɖekɛ yí aɖo amɛɖekisɔsɔna gbe lɔ yí ale eo koɖo Yehowa gblamɛ. Vɔ, ʒinʒindoshimɛ yɛ nyi ŋci yí àwa le jugbaja yí adasɛ nɔ mɛbuwo mɔ èsɔ eoɖeki sɔ na Mawu. Enu kɔkɔɛ yí amɛɖekisɔsɔna gbe ci èɖo lɔ nyi, yí Yehowa jijiɛ mɔ eo le nɔ agbe nɔ asɔ koɖo egbe ŋtɔ́ ci èɖo nɔ ye.—Ŋun. 5:​4, 5.

NYI YÍ TAÐO ÈÐO ASƆ EOÐEKI NA YEHOWAƆ?

6. Nyi yí dɔ yí mɛɖe sɔnɔ gbeta yí sɔ yiɖeki nanɔ Yehowaɔ?

⁶ Susu vevitɔ ci yí dɔ èsɔ eoɖeki na Yehowa yí nyi mɔ èluin. De lé enu wakɔ do nɔ eo ɖekɛ yí dɔ èluin o. Ewaɖeɔ, enu ciwo èkpla so Yehowa nu, “enujejeshi adodwitɔ” koɖo “enugɔnmɛsese gbɔngbɔn mɛ tɔ” na yí lɔnlɔn ci èɖo ni shinshin ɛ doji. (Kol. 1:​9, NWT) Enu ciwo yí èkpla le Enuŋwlɛŋwlɛ lɔwo mɛ na yí èkando ji mɔ (1) Yehowa nyi amɛ ŋtɔŋtɔ, (2) Bibla nyi yi Nyɔ, yí (3) ézankɔ yi habɔbɔ lɔ keŋ ana edro yitɔ anyi wawa.

7. Nyi mìɖo awa gbɔxwe asɔ mìwoɖekiwo na Mawuɔ?

⁷ Amɛ ciwo yí sɔ wowoɖekiwo na Yehowa ɖo anya enukplakpla gɔnmɛjejetɔ ciwo yí le Mawu Nyɔ lɔ mɛ yí anɔ agbe asɔnɔ koɖo yi se lɔwo. Wowanɔ ci ji wokpe yí xonɔ nuxu nɔ mɛbuwo so ŋci wokpla nu nɔ nɔnɔmɛ lɔ vlɛ yí ɖe emɔ nɔ wo. (Mat. 28:​19, 20) Lɔnlɔn ci woɖo nɔ Yehowa vasɛnnɔŋ doji yí wogbejinɔ veviɖe mɔ, Yehowa ɖekɛ kpaŋ yí yewoasɛn. Ahan enyi nɔ eo can nɛa? Nɔ èɖo lɔnlɔn ŋtɔ́ han ɔ, dakpɔnɔ amɛɖekisɔsɔna koɖo ʒinʒindoshimɛ wawa shigbe mɔ ŋɖe ci èjikɔ awa kpoŋ asɔ do jijɔ nɔ mɛ ci yí kplakɔ Bibla koɖo eo alo ao jilawo o, yí danyi èwɛ ɖo ao xlɔwo can wɛ taɖo yɔ o.

8. Lé àdasɛ enujeŋnɔamɛ aotɔ nɔ Yehowa yí asɔ eoɖeki sɔ ni doɔ? (Ehajiji wema 116:​12-14)

⁸ Nɔ èbu tamɛ kpɔ so enu ciwo pleŋ Yehowa wa nɔ eo nuɔ, eoŋtɔ yí asɔ gbeta mɔ yeasɔ yeɖeki sɔ ni. (Hlɛn Ehajiji Wema 116:​12-14.) Enyɔ jɔ yí Bibla mɔ Yehowa gbɔ yí “enunana nywiwo pleŋ koɖo enunana kpɛnkpinwo pleŋ so.” (Ʒaki 1:17) Enunana ci yí kpɛn wu yí gangan wu kpɛtɛwo yí nyi Eviɛ Yesu Kristo vɔnsa lɔ. Bui kpɔ! Tafɛn lɔ hun mɔ nɔ eo nɔ natɛnŋ anyi exlɔ vevi koɖo Yehowa. Yí Yehowa hun mɔ nɔ eo mɔ àvanɔ agbe. (1 Ʒan 4:​9, 10, 19) Nɔ èsɔ eoɖeki na Yehowaɔ, anyi èdadasɛ mɔ lɔnlɔn gangantɔ ci Yehowa ɖo nɔ eo, sɔ kpe nɔ shicu bu ciwo yí ena mì jeŋ nɔ ye. (2 Ese. 16:17; 2 Kor. 5:15) Wonu enu ciwo yí àwa yí asɔ dasɛ enujeŋnɔamɛ aotɔ do enukplakpla 46 tɔ, hlɛnhlɛnmɛ 4, nɔ Se Vivi nɔ Agbe lɔ Sɔyi Mavɔ! Wema lɔ ci mɛ yí minici amɛtɔn video ci nyɔta yí nyi: Nanɔ Nuwo Mawu le.

ÈLE GBESƆSƆ ASƆ EOÐEKI NA YÍ AWA ƷINƷINDOSHIMƐA?

9. Nyi yí taɖo mɛɖe deɖo avɔnvɔn nɔ amɛɖekisɔsɔna Mawuɔ?

⁹ Etɛnŋ wa nɔ eo mɔ yedele gbesɔsɔ yí asɔ yeɖeki na yí awa ʒinʒindoshimɛ o. Taŋfuin éʒan mɔ àwa trɔtrɔwo nɔ ao gbe asɔ koɖo Yehowa drowo, alo taŋfuin èʒan gamɛ sugbɔ keŋ asɔ do ŋsɛn ao xɔse. (Kol. 2:​6, 7) Enukplaviwo pleŋ dewanɔ ŋkɔyiyi do alɔ ɖekɛ ŋmɛ ji o. ahanke jajɛwo pleŋ denɔnɔ gbesɔsɔ asɔ wowoɖekiwo na awa ʒinʒindoshimɛ nɔ woɖo xwe ɖekɛ ŋmɛwo nɛ. Sɔ ao ŋkuvi do ŋci ji àsun awa ji yí akpɔ lé èwakɔ ŋkɔyiyi le gbɔngbɔnmɛ do yí ŋgbesɔ eoɖeki sɔnɔ kpɔ koɖo mɛbuwo o.—Gal. 6:​4, 5.

10. Nyi àtɛnŋ awa nɔ èvakpɔɛ mɔ yedele gbesɔsɔ yí asɔ yeɖeki na Mawu yí awa ʒinʒindoshimɛɔ? (Gbekpɔ dakavi ci yí nyi “Nɔ mɛ ciwo yí wohɛn le nyɔnɔnwi lɔ mɛ.”)

¹⁰ Nɔ èkpɔ mɔ yedele gbesɔsɔ asɔ yeɖeki na Yehowa can ɔ, le kpɔtɔ anyi tajinu nɔ eo. Do gbe ɖaɖa nɔ Yehowa nɔ acu shi do agbla ciwo yí èjejeɛ ji keŋ awa trɔtrɔ ciwo yí ʒanwo. (Fili. 2:13; 3:16) Àtɛnŋ akando ji mɔ Yehowa ase gbedoɖa aotɔ lɔwo yí aɖo ŋci nɔ eo.—1 Ʒan 5:14.

ŊCI TAÐO MƐÐEWO VƆNKƆ YÍ SƆ ÐOÐOƆ ESƆESƆ

11. Lé Yehowa akpedo mì nu mìakpɔtɔ anɔ gbeji niɔ?

¹¹ Mɛɖewo ciwo yí le gbesɔsɔ asɔ wowoɖekiwo na keŋ awa ʒinʒindoshimɛ can gbevɔnkɔ yí sɔ ɖokɔ esɔesɔ. Taŋfuin wobiɔbiɔ wowoɖekiwo se mɔ, ‘nɔ ŋvawa nuvɔn gangan ɖe yí woɖe ŋti le hamɛ yɛ ɖe?’ Nɔ ŋtɔ́ yí dɔ èvɔnvɔn nɛɔ, kandoji mɔ Yehowa ana ye ŋɖekpokpui ci èʒan “yí a zɔn do emɔ ci yí a hɛn bubu va nɔ Axwetɔ yí a do jijɔ ni le emɔ ɖeshaɖe nu.” (Kol. 1:10) Átɛnŋ agbedo ŋsɛn eo yí nawa ŋci yí nyɔ. Ékpedo amɛ sugbɔ buwo nu vayi vɔ yí agbewɛ nɔ eɔ can hɛnnɛ. (1 Kor. 10:13) Susu ɖeka ci yí dɔ mɛɖewo sonɔ le Kristotɔwo hamɛ lɔ mɛ nɛ. Yehowa kpenɔdo yi mɛwo nu nɔ woakpɔtɔ anɔ gbeji.

12. Nyi mìatɛnŋ awa yí aze nɔ nuvɔn gangan wawaɔ?

¹² Nuvɔn nyinɔ tetekpɔ nɔ agbetɔ nuvɔnmɛwo pleŋ. (Ʒaki 1:14) Vɔ nɔ èle tetekpɔ mɛɔ, eoŋtɔ yí asɔ gbeta yí awa ŋɖe. Enyɔ lɔ yí nyi mɔ eoŋtɔ yí asɔ gbeta so lé anɔ agbe do nu. Mɛɖewo nunɔ mɔ lé enu wanɔ do nɔ yewoɔ, yewodatɛnŋ aɖu yewoɖekiwo ji o. Vɔ àtɛnŋ akplɛ yí aɖu ao dro vɔnwo ji. Nɔ droamu vwin ɖewo va susu mɛ nɔ eo can ɔ, àtɛnŋ asɔ gbeta mɔ yedawa do wo ji o. Nubu ci yí akpedo eo nu yí nyi mɔ, donɔ gbe ɖaɖa ŋkeŋke. Mawu Nyɔ lɔ kplakpla le nyi enumamɛ nɔ eo. Yinɔ Kristotɔwo bɔbɔwo. Xonɔ nuxu so ao jixɔsewo nu nɔ mɛbuwo. Enu cɛwo wawa gashagamɛ akpedo eo nu nàkpɔ ŋsɛn anɔ agbe asɔ koɖo amɛɖekisɔsɔna gbe ci yí èɖo. Yí ŋgbe ŋlɔbe gbeɖe mɔ Yehowa akpedo ye nu o.—Gal. 5:16.

13. Kpɔwɛ nywi ci Ʒozɛfu ɖo ɖɛ nɔ mìɔ?

¹³ Átɛnŋ anɔ fafɛɖe nɔ eo mɔ awa do amɛɖekisɔsɔna gbe ci yí èɖo ji nɔ èsɔ gbeta doŋkɔ so enu ci àwa nɔ èdo go tetekpɔ ɖe nu. Bibla xo nuxu so mɛɖewo ciwo yí tɛnŋ wɛ ahan nu nɔ mì, ci wonyi agbetɔ nuvɔnmɛwo can. Le kpɔwɛ mɛ, Potifa ashiɛ teteɛkpɔ gbɛmɛgbɛmɛ yí wawa ŋkuvi nɔ Ʒozɛfu mɔ yɛ le ji ye, vɔ Ʒozɛfu nya lé awa nu do daɖɛ xoxoxo. Bibla nu nɔ mì mɔ “Ʒozɛfu gbe,” eyi enu mɔ: “Enu vɔn yɔ Agɔjeje do Mawu yɔ.” (Gɔnm. 39:​8-10) Eze petii mɔ, Ʒozɛfu nya lé awa nu do doŋkɔ gbɔxwe yí nyɔnu lɔ va ti kpɔ. Ecɛ vale fafɛɖe ni nɔ awa ŋci yí sɔgbe hwenu evale tetekpɔ mɛ.

14. Lé mìawɛ amɔ oo nɔ enudɔndɔn wawaɔ?

¹⁴ Lé àwɛ awa Ʒozɛfu tɔ han yí aɖui koŋ yí akpɔtɔ ale gbeji nɔ Mawu nɔ wote eo kpɔɔ? Àtɛnŋ asɔ gbeta kakacɛ so lé àwa nu do nu nɔ tetekpɔ ɖe vava. Kpla lé àmɔ oo zeɖeka le afɔdumɛ nɔ ŋciwo Yehowa gbe.Yí ŋgbe bu tamɛ kpɔ so wo nu can hɛnnɛ o. (Eha. 97:10; 119:165) Ecɛ tɛnŋ dɔ yí dawa nuvɔn nɔ èɖo tetekpɔ mɛ o. Ðo ènya lé awa nu do daɖɛ vɔ yí gbenya enyɔ ci yí ànu.

15. Lé ŋsu ɖe alo nyɔnu ɖe átɛnŋ adasɛ mɔ ‘yejikɔ’ Yehowa ‘nyɔnɔnwitɔɔ’? (Ebretɔwo 11:6)

¹⁵ Taŋfuin ènya mɔ nyɔnɔnwi lɔ ke, yí èji mɔ yeasɛn Yehowa koɖo ao ji pleŋ, vɔ ŋɖeka na yí èsɔ amɛɖekisɔsɔna koɖo ʒinʒindoshimɛ wawa sɔ ɖoɖoɔ esɔesɔ. Àtɛnŋ awa enu ci han yí Efyɔ Davidi wa. Àtɛnŋ ado gbe ɖaɖa nɔ Yehowa mɔ: “Tɔhonɔ, glo ŋ kpɔ yí a nya anyi ji mɛ. Te ŋ kpɔ yí a jeshi anyi susuwo. Kpɔ mɔ ŋ ɖo susu vɔn ɖewo ma. jɔ ŋ le emɔ ci yí kpɔtɔ li keke a sɔyì mavɔ mavɔ ji.” (Eha. 139:​23, 24) Yehowa cunɔ shi nɔ mɛ ciwo yí ‘jikɔ nyɔnɔnwitɔ.’ Nɔ èjekɔ agbla mɔ yeawa do ŋciwo èdrɔdrɔ mɔ yeawa ji ciwo yí nyi amɛɖekisɔsɔna koɖo ʒinʒindoshimɛ wawaɔ, édasɛ mɔ èwakɔ do enyɔ cɛ ji.—Hlɛn Ebretɔwo 11:6.

KPƆTƆ ATETEƐ GOGO YEHOWA

16-17. Lé enyi mɔ Yehowa yí dɔn mɛ ciwo wohɛn le nyɔnɔnwi lɔ mɛ va yiɖeki gbɔ doɔ? (Ʒan 6:44)

¹⁶ Yesu nu mɔ Yehowa yí dɔn yi nukplaviwo va ye gbɔ. (Hlɛn Ʒan 6:44.) Bu tamɛ veviɖe so nyɔ cɛ nu koɖo lé ekan eo do nu. Yehowa kpɔ enunywi ɖeka le mɛɖekamɛɖeka mɛ yí dɔn wo va yiɖeki gbɔ. Ékpɔnɔ mɛɖekamɛɖeka shigbe “yi mɛ vevi,” alo “yitɔ ɖekɛ ɛnɛ.” (2 Ese. 7:6.) Ahan yí ekpɔnɔ eo can nɛ.

¹⁷ Vɔ etɛnŋ nyi mɔ, ènyi jajɛ yí ao jilawo nyi Yehowa Kunuɖetɔwo. Étɛnŋ wa nɔ eo kpoŋ mɔ ci enyi ao jilawo yí sɛnsɛn Yehowa yí dɔ èsinsin ɛ, yí denyi Yehowa yí dɔn eo va yiɖeki gbɔ o. Vɔ Bibla nu mɔ: “Mí gogo Mawu nɔ Mawu á gogo mí.” (Ʒaki 4:8; 1 Kro. 28:9) Nɔ eoŋtɔ èsɔ gbeta yí te gogo Yehowaɔ, yɛ can ate gogo eo. Yehowa dekpɔnɔ eo mɔ eo le gbɛbɔbɔ ɖe mɛ kpoŋ o. Édɔn mɛɖekamɛɖeka va yiɖeki gbɔ, mɛɖekamɛɖeka ci woji le nyɔnɔnwi lɔ mɛ can le mɛ. Nɔ mɛɖe vlɛ yí sɔ gbeta yiŋtɔ yí te gogo Yehowaɔ, Áɖoŋci ni, shigbe lé mìkpɔɛ le Ʒaki 4:8 mɛ nɛ.—Sɔ sɔ koɖo 2 Tɛsalonikitɔwo 2:13.

18. Nyi nu mìaxo nuxu so le nyɔta ci yí akplɔɛdo mɛɔ? (Ehajiji wema 40:8)

¹⁸ Nɔ èsɔ eoɖeki na Yehowa yí wa ʒinʒindoshimɛɔ, anyi èɖoɖoɔ Yesu susu. Éle gbesɔsɔ yí awa enuɖekpokpui ci Edalɔ mɔ yɛ le wa (Hlɛn Ehajiji wema 40:8; Ebre. 10:7) Le nyɔta ci yí akplɔ cɛ do mɛɔ, mìaxo nuxu so ŋci yí akpedo mì nu mìakpɔtɔ asɛnsɛn Yehowa le egbejinɔnɔ mɛ le ʒinʒindoshimɛ wawa godu.