‘Jejeɛ Agbla Keŋ Anyi Amɛshinshin’

1. Nyi Yehowa jijiɛ so mì shiɔ?

ÐEKA le hwenu dojijɔnamɛ asu koɖo ashiwo tɔ mɛ yí nyi hwenu woji evi. Vɔ nɔ jila lɔwo lɔn wowo vi vevi yoyu lɔ can ɔ, wodejinɔ mɔ yɛakpɔtɔ anyi vihwɛ tɛgbɛɛ o. Le nyɔnɔnwi mɛɔ, nɔ ɖeviɛ deshinshin ɛɔ, woxanɔ le wowoɖekiwo mɛ sugbɔ. Ahanke, ejɔnɔ eji nɔ Yehowa nɔ mìɖe afɔ ŋkɔtɔwo yí kplɔ Yesu do, vɔ Deji mɔ mìasɛn enɔ o alo akpɔtɔ anyi vifinwo le gbɔngbɔnmɛ o. (1 Kor. 3:1) Ewaɖeɔ, éji mɔ mìatrɔsun Kristotɔ “amɛshinshinwo.”—1 Kor. 14:20.

2. Nyi mìakpɔ le nyɔta cɛ mɛɔ?

² Woatrɔsun Kristotɔ amɛshinshin gɔnmɛ ɖe? Lé mìanyi Kristotɔ amɛshinshinwo doɔ? Lé ŋɖuɖu sɛnŋ ɖuɖu le gbɔngbɔn mɛ atɛnŋ ana mìashin doɔ? Yí nyi yí taɖo mìdeɖo akannɔdo mìwoɖekiwo ji ɖoɖuɔ? Mìakpɔ ɖoŋci nɔ nyɔbiɔse cɛwo le nyɔta cɛ mɛ.

WOATRƆSUN KRISTOTƆ AMƐSHINSHIN GƆNMƐ ÐE?

3. Woanyi Kristotɔ ci yí shin le gbɔngbɔn mɛ keŋkeŋ gɔnmɛ ɖe?

³ Le Bibla mɛɔ, Grɛki nyɔgbe ci gɔnmɛ woɖe mɔ woanyi ‘amɛ ci yí shin keŋkeŋ’ gɔnmɛ tɛnŋ gbenyi mɔ “mɛganxoxu.”a (1 Kor. 2:​6, Ezoɖuɖu Yoyu Wema.) Shigbe lé ɖevi ɖe shinnɔ keke vanyinɔ mɛganxoxu nɛɔ, mìwo can, mìɖo akpɔtɔ ana yí ekacaca ci yí le mìwo koɖo Yehowa gblamɛ asɛnsɛnŋ doji, eyi mìavanyi Kristotɔ ŋsu alo nyɔnu ciwo yí shin le gbɔngbɔn mɛ. Vɔ nɔ mìvaɖo enu ci mìdrɔdrɔ ŋtɔ́ gbɔ can ɔ, mìdeɖo ami ŋkɔyiyi le gbɔngbɔn mɛ gbeɖe o. (1 Tim. 4:15) Mìwo pleŋ, mɛ ciwo yí nyi jajɛwo can átɛnŋ anyi Kristotɔ ciwo yí shin le gbɔngbɔn mɛ. Vɔ nyi yí danasɛ mɔ Kristotɔ ɖe shinshin ɛ le gbɔngbɔn mɛɔ?

4. Nyi yí danasɛ mɔ mɛɖe nyi Kristotɔ ci yí shin ɔ?

⁴ Kristotɔ ɖe ci yí shin le gbɔngbɔn mɛ nɔnɔ agbe esɔnɔ koɖo Mawu sewo pleŋ, yí detranɔ wo mɛ yí awa do ciwo yí jɔ eji ni ji o. Le nyɔnɔnwi mɛɔ, ci enyi nuvɔnmɛɔ, áwa afɛnwo. Vɔ édanasɛ le gbeshiagbe gbenɔnɔ yitɔ mɛ mɔ yebunɔ tamɛ yí gbewanɔ nu esɔnɔ koɖo Mawu dro. Édo amɛnyinyi yoyu lɔ yí jenɔ agbla gashiagamɛ mɔ yeawɛ keŋ nɔ ye susuwo asɔ koɖo Mawu susu. (Efe. 4:​22-24) Énanɔ kpla yiɖeki keŋ sɔnɔ gbeta nywi ciwo sɔnɔgbe koɖo ese koɖo gɔnmɛɖose Yehowa tɔwo yí deʒan mɔ woado sewo ni gblɛlɛlɛ gbɔxwe anya enu ci awa o. Éjenɔ agbla veviɖe keŋ awa do gbeta ci esɔ ji.—1 Kor. 9:​26, 27.

5. Afɔku ciwo yí Kristotɔ ciwo yí deshin le gbɔngbɔn mɛ donɔ goɔ? (Efezitɔwo 4:​14, 15)

⁵ Le akpa bu jiɔ, amɛwo atɛnŋ asɔ wowo “yewawawo” koɖo “enukplamɛnyɔ dɔndɔnwo” asɔ ble Kristotɔ ci yí deshinshin ɛ le gbɔngbɔn mɛ fafɛɖe yí atɛnŋ akando ŋsunyɔ ciwo wokakanɔ le hladio, Televiʒiɔn koɖo Ɛntɛnɛti ji yí agbetashi yiɖeki ɖɛ yí xɔsegbetɔwo abli.b (Hlɛn Efezitɔwo 4:​14, 15.) Étɛnŋ hwannɔŋ mɛbuwo fafɛɖe, adodoɔ dobo, adonɔ dɔmɛzi fafɛɖe alo awanɔ enudɔndɔnwo nɔ éɖo tetekpɔ mɛ.—1 Kor. 3:3.

6. Nyi woatɛnŋ asɔ shinshin le gbɔngbɔn mɛ sɔ sɔ koɖoɔ? (Kpɔ foto lɔ hɛnnɛ.)

⁶ Shigbe lé mìnui vayi nɛɔ, Enuŋwlɛŋwlɛ lɔwo sɔ lé woshinnɔ le gbɔngbɔn mɛ sɔ sɔ koɖo lé woshinnɔ keke vanyinɔ mɛgaxoxu do. Ðevihwɛ denyanɔ ŋɖe o, eyi taɖo eʒan mɔ mɛ ci yí shin aglɔn ta ni yí akpɔ ji. Le kpɔwɛ mɛ, vinɔ̀ ɖe tɛnŋ nu nɔ eviɛ nyɔnuvihwɛ mɔ yɛ le lé alɔ nɔ ye hwenu wojikɔ aso emɔ mɛ. Nɔ nyɔnuvi lɔ vashinshin ɛɔ, enɔ̀lɔ tɛnŋ tashi nɔ yiŋtɔ aso emɔ mɛ, vɔ áɖonɔ ŋwi ni mɔ yɛle kpɔnɔ ɖushi koɖo miɔmɛ gbɔxwe asonɔ emɔ mɛ. Nɔ ɖeviɛ vashin ɔ, yiŋtɔ vanyanɔ lé azenɔ nɔ afɔkuwo do. Shigbe lé ɖevi ɖe ʒannɔ mɛganxoxu kpekpedonu gbɔxwe aze nɔ afɔku ɖe nɛɔ, ahanke Kristotɔ ciwo yí deshin le gbɔngbɔn mɛ o, ʒan nɔ Kristotɔ ciwo shin le gbɔngbɔn mɛ kpekpedonu gbɔxwe aze nɔ gbɔngbɔn mɛ fɔkuwo keŋ asɔ gbeta nywiwo. Vɔ nɔ Kristotɔ ci yí shin le gbɔngbɔn mɛ jikɔ asɔ gbeta ɖeɔ, ébunɔ tamɛ kpɔ so Bibla gɔnmɛɖosewo nu keŋ akpɔ Yehowa susu so nyɔ lɔ nu yí awa do ji.

7. Kristotɔ ciwo yí shin le gbɔngbɔn mɛ ʒan mɛbuwo kpekpedonua?

⁷ Ecɛ dasɛ mɔ Kristotɔ ci yí shin le gbɔngbɔn mɛ degbeʒan mɛɖe kpekpedonu gbeɖe yɔa? Oo. Hweɖewonuɔ, mɛ ciwo yí shin le gbɔngbɔn mɛ atɛnŋ ʒannɔ kpekpedonu hɛnnɛ. Vɔ mɛ ci yí deshin le gbɔngbɔn mɛ átɛnŋ aji mɔ mɛbuwo le nu ŋci yeɖo awa nɔ ye alo asɔ gbeta do nu nɔ ye, vɔ Kristotɔ ci yí shin le gbɔngbɔn mɛ kplanɔ nu so mɛ ciwo yí nya ŋɖɛ, yí to enuwo mɛ le agbe mɛ gbɔ yí nyanɔ mɔ Yehowa jijiɛ mɔ “amɛ ɖeka ɖeka a dro yi gban.”—Gal. 6:5.

8. Emɔ ciwo nu mɛ ciwo yí shin le gbɔngbɔn mɛ to akpo nɔ wowonɔnɔwo leɔ?

⁸ Shigbe lé mɛganxoxuwo deɖyinɔ nɔnɔ pleŋ nɛɔ, ahanke Kristotɔ ciwo yí shin le gbɔngbɔn mɛ can ɖonɔ nɔnɔmɛ hamɛhamɛwo nɛ. Mɛɖewo nyanɔ ŋɖɛ sɔwu, mɛɖewo gbenɔ dɔn sɔwu, mɛɖewo nanɔ enu amɛ sɔwu yí mɛɖewo gbesenɔ vevi do amɛ nu sɔwu. Ci enyi ahan ɔ, nɔ Kristotɔ ciwo yí shin le gbɔngbɔn mɛ amɛve do go nɔnɔmɛ ŋmɛɖekɛɔ, woatɛnŋ asɔ gbeta ciwo yí sɔ koɖo Enuŋwlɛŋwlɛ lɔwo vɔ yí ato akpo. Ecɛ jɔnɔ blaŋblaŋ nɔ Kristotɔwo ɖo asɔ ayexa wowotɔ keŋ asɔ sɔ gbeta. Ci wonya ahan ɔ, wodedonɔ ehwɛ wowonɔnɔwo nɔ gbeta ci wosɔ to akpo nɔ nɔnɔ o. Ewaɖeɔ, wosɔnɔ susu ɖonɔ lé woawɛ yí egbe akpɔtɔ ale eju nɔ wo ji.—Rɔm. 14:10; 1 Kor. 1:10.

LÉ MÌVANYINƆ KRISTOTƆ AMƐSHINSHINWO DOƆ?

9. Shinshin le gbɔngbɔn mɛ vanɔ le yiɖeki shia? Ðe mɛ.

⁹ Nɔ hwenuwo vayikɔɔ, mìshinnɔ le jɔjɔmɛnu yí anyi mɛganxoxu, vɔ mɛɖe deshinnɔ le gbɔngbɔn mɛ agblamaje o. Le kpɔwɛ mɛ, nɔviŋsu koɖo nɔvinyɔnu ciwo yí le Korɛnti xɔ eŋɛnywi lɔ, wa ʒinʒindoshimɛ, xɔ gbɔngbɔn kɔkɔɛ, yí gbekpɔkɔ nyɔna so apotru Pɔlu nukplamuwo mɛ. (Edɔ. 18:​8-11) Ele ahan gan, amɛ sugbɔ gbekpɔtɔ nyi vifinwo le gbɔngbɔn mɛ, ci wowa ʒinʒindoshimɛ exwe ɖewo ke can. (1 Kor. 3:2) Lé mìawɛ nɔ enu cɛ ŋgbejɔ do mì jiɔ?

10. Nyi mìɖo awa keŋ ashin ɔ? (Ʒuda 20)

¹⁰ Gbɔxwe mìanyi amɛshinshinwo le gbɔngbɔn mɛɔ, mìwoŋtɔwo yí aɖo edro lɔ. Mɛ ciwo yí nyi “ŋɖɛmanyatɔwo” jinɔ mɔ yewoakpɔtɔ anyi vifinwo le gbɔngbɔn mɛ yí wodejinɔ mɔ yewoawa ŋkɔyiyi o. (Elo. 1:​22, NWT) Mìdeji mɔ mìaɖyi mɛ ciwo yí shin nywiɖe le gbaza mɛ gan yí kpɔtɔ yí kpɔkɔ emɔ mɔ yewo jilawo asɔ gbeta do nu nɔ yewo o. Ewaɖeɔ, mìji mɔ mìasɔ mìwoŋtɔwo gban ci yí nyi mɔ mìashinshin ɛ le gbɔngbɔn mɛ. (Hlɛn Ʒuda 20.) Nɔ èkpɔtɔ yí jejeɛ agbla keŋ ashin le gbɔngbɔn mɛɔ, do gbe ɖaɖa nɔ Yehowa nɔ ana eo ‘edro lɔ koɖo ŋsɛn lɔ nɔ nawa enu ci yí jɔnɔ ji ni.’—Fili. 2:13 NWT.

11. Nyi Yehowa na mì asɔ kpedo mì nu nɔ mìashinshin ɛɔ? (Efezitɔwo 4:​11-13)

¹¹ Yehowa dekpɔkɔ emɔ mɔ mìashin le gbɔngbɔn mɛ mìwoŋtɔwo o. Wona kpla mɛ ciwo yí nyi lɛngbɔkplɔtɔwo koɖo enukplamɛtɔ ciwo yí le Kristotɔwo hamɛ lɔ mɛ nɔ woakpedo mì nu le gbɔngbɔn mɛ nɔ “[mìashinkɔ] keke a shin vɛ shigbe mɛgan xoxuwo ɛnɛ yí a vá ɖó nɔnɔmɛ ploploplo ci yí le [Kristo] lɔ shi hanci.” (Hlɛn Efezitɔwo 4:​11-13 Ezoɖuɖu Yoyu Wema.) Yehowa gbenanɔ mì yi gbɔngbɔn kɔkɔɛ lɔ yí ekpenɔdo mì nu mìɖonɔ “Kristo susu.” (1 Kor. 2:​14-16) Gbesɔ kpe niɔ, Mawu na yí woŋwlɛ Eŋɛnywi wema amɛnɛ lɔwo yí wodasɛ lé Yesu bunɔ tamɛ do, xonɔ nuxu yí gbewanɔ nu do le kunuɖeɖedɔ ci ewa le nyigban ji mɛ. Nɔ èsrankɔ lé Yesu bunɔ tamɛ yí gbewanɔ enuwo doɔ, àsun ji yí avanyi Kristotɔ ci yí shin le gbɔngbɔn mɛ.

EDƆ CI YÍ GBƆNGBƆNMƐŊÐUÐU SƐNŊ WANƆ

12. Nyi yí nyi “gɔnmɛjeje nukplakpla so Kristo nuɔ”?

¹² Gbɔxwe mìanyi amɛshinshinwoɔ, mìɖo “[agbeze to] gɔnmɛjeje nukplakpla ciwo yí kudo Kristo nu” ciwo yí nyi enu ŋkɔtɔ ciwo yí Kristotɔwo kplanɔ. Gɔnmɛjeje nukplakpla kpɔwɛ lɔ ɖewo yí nyi jimɛtrɔtrɔ, xɔse, ʒinʒindoshimɛ wawa koɖo fɔnfɔnsoku. (Ebre. 6:​1, 2) Enukplakpla ŋtɔ́wo nyi gɔnmɛɖokpe nɔ enu ciwo ji Kristotɔwo xɔse. Eyi dɔ yí apotru Piɛ xo nuxu so wo nu, hwenu edrakɔ eŋɛnywi lɔ nɔ amɛwo le Pantekoti ŋkeke lɔ ji. (Edɔ. 2:​32-35, 38) Mìɖo axɔ gbe do gɔnmɛjeje nukplakpla ŋtɔ́ ji gbɔxwe anyi Kristo nukplaviwo. Le kpɔwɛ mɛ, Pɔlu kanxle mì mɔ mɛɖekpokpui ci yí agbe fɔnfɔnsoku nukplakpla lɔɔ, égbe Kristotɔwo xɔse lɔ keŋkeŋ. (1 Kor. 15:​12-14) Vɔ, enukplakpla gɔnmɛjeje tɔ so nyɔnɔnwi lɔ nu jejeshi ɖekɛ desun o.

13. Nyi mìɖo awa akpɔ nyɔna so gbɔngbɔnmɛŋɖuɖu sɛnŋ ci nyɔ wonu le Ebretɔwo 5:14 mɛɔ? (Kpɔ foto lɔ hɛnnɛ.)

¹³ To akpo nɔ gɔnmɛjeje nukplakplawoɔ, gbɔngbɔnmɛŋɖuɖu sɛnŋ ci yí lɔ Yehowa sewo koɖo yi gɔnmɛɖosewo do mɛ akpedo mì nu mìamɔŋje yi susuwo mɛ. Nɔ mìakpɔ nyɔna so ŋɖuɖu cɛ mɛɔ, mìɖo akplanɔ nu, abunɔ tamɛ yí awanɔ do Mawu Nyɔ lɔ ji nywiɖe. Nɔ mìwɛ ahan ɔ, mìnana ekpla mìwoɖekiwo keŋ asɔ gbeta ciwo yí ajɔ eji nɔ Yehowa.c—Hlɛn Ebretɔwo 5:14.

14. Lé Pɔlu kpedo Korɛntitɔwo nu nɔ woashin doɔ?

¹⁴ Nɔ Kristotɔ ciwo yí deshin le gbɔngbɔn mɛ o, do go nɔnɔmɛ ciwo mɛ yí woɖo abu tamɛ kpɔ so Bibla gɔnmɛɖosewo nu keŋ awa do wo jiɔ, égbɔnnɔnu nɔ wo haan. Nɔ Bibla dedo ese ɖe do ŋɖe ŋciɔ, mɛɖewo kpɔɛni mɔ yewoawa enu ci yí dro yewo. Mɛɖewo aji mɔ woado esewo, nɔ deʒan mɔ woado ese can. Le kpɔwɛ mɛ, ewa mɔ, Kristotɔ ciwo yí le Korɛnti nu nɔ Pɔlu mɔ yi le do ese ɖe nɔ yewoanya nɔ yewoatɛnŋ aɖu ŋɖuɖu ci wosɔ sa avɔn nɔ vojuwo ma. Vɔ Pɔlu denu enu ci woɖo awa nɔ wo o, ékpedo wo nu wonya mɔ amɛɖekamɛɖeka ɖo “acɛ” yí awa nu asɔ koɖo ayexa yitɔ. Éxo nuxu so Bibla gɔnmɛɖose ɖewo ciwo yí atɛnŋ akpedo wo nu woasɔ gbeta ciwo yí ana ayexa wowotɔ dado ehwɛ wo o, yí wodavado afɔbli mɛbuwo o. (1 Kor. 8:​4, 7-9) Pɔlu kpekpeɛdo Korɛntitɔwo nu nɔ woashin le gbɔngbɔn mɛ yí asun ji azannɔ nugɔnmɛsese ŋsɛn wowotɔ, wodakplɔnɔ mɛbuwo do kpoŋ o, alo ajijiɛ mɔ wo le do ese do enuwo pleŋ nu o.

15. Lé Pɔlu kpedo Kristotɔ Ebretɔwo nu nɔ woawakɔ ŋkɔyiyi le gbɔngbɔn mɛ doɔ?

¹⁵ Mìkpla enuvevi ɖeka le wema ci Pɔlu ŋwlɛ ɖaɖa Kristotɔ Ebretɔwo mɛ. Mɛɖewo dekpɔtɔ yikɔ ŋkɔ le gbɔngbɔnmɛ o; “[woʒan gbɔngbɔnmɛŋɖuɖu] sɛnŋsɛnŋwo sasa . . . yí é nyi anɔshu wo a gbe kpɔtɔ a nakɔ” wo. (Ebre. 5:12) Wodelɔnkɔ do nyɔnɔnwi ciwo Yehowa kplakɔ wo vivivi to hamɛ lɔ ji o. (Elo. 4:18) Le kpɔwɛ mɛ, ci Kristo vɔnsa lɔ cu nu do Moizi Se lɔ keke ewa exwe 30 vayiɔ, Ʒuifu sugbɔtɔ gbekpɔtɔ kplɔkplɔ Moizi Se lɔ do. (Rɔm. 10:4; Titu 1:10) Exwe 30 ŋtɔ́wo sun nɔ Ʒuifu Kristotɔwo nɔ woamɔje mɛ mɔ yewodeɖo akpɔtɔ akplɔkplɔ Moise Se lɔ do o! Amɛɖekpokpui ci yí ahlɛn wema ci yí Pɔlu ŋwlɛ ɖaɖa Ebretɔwo atɛnŋ aɖo kpe yi ji mɔ gbɔngbɔnmɛŋɖuɖu sɛnŋ le wo mɛ nyao. Wema cɛ akpedo wo nu woakpɔɛ mɔ emɔ yoyu ci ji woato asɛn Yehowa toto Yesu ji nyɔ sɔwu, agbena wo dɔngbegbe nɔ woakpɔtɔ aɖekɔ kunu, nɔ Ʒuifuwo cikɔ yumɛ nɔ wo can.—Ebre. 10:​19-23.

MÌDEÐO AKANNƆDO MÌWOÐEKIWO JI ÐOÐU O

16. Nyi mìɖo awa asɔ kpe nɔ ŋkɔyiyi le gbɔngbɔn mɛɔ?

¹⁶ Mìɖo aje agbla yí anyi amɛshinshinwo le gbɔngbɔn mɛ yí agbekpɔtɔ yí anyi amɛshinshinwo. Vɔ mìɖo awa blɛwu nɔ mìŋgbekannɔdo mìwoɖekiwo ji ɖoɖu o. (1 Kor. 10:12) Mìɖo ‘akpɔtɔ adokɔ mìwoɖekiwo kpɔ’ yí akpɔ mɔ mìkpɔtɔ yí wakɔ ŋkɔyiyiwo ma.—2 Kor. 13:5.

17. Lé wema ci yí Pɔlu ŋwlɛ ɖaɖa Kolosetɔwo dasɛ lé ele veviɖe do mɔ, woɖo akpɔtɔ ashinshin ɛ le gbɔngbɔn mɛɔ?

¹⁷ Le wema ci Pɔlu ŋwlɛ ɖaɖa Kolosetɔwo mɛɔ, étɛgbe do enu ci yí taɖo ele veviɖe mɔ woakpɔtɔ anyi amɛshinshinwo. Ci wovanyi Kristotɔ ciwo yí shin le gbɔngbɔn mɛ can ɔ, Pɔlu kanxle wo mɔ woŋgbena nɔ xexe lɔ susu adɔn wo o. (Kol. 2:​6-10) Epafra ci yí jeshi hamɛ lɔ ɖɛ nywiɖe can fannɔkui do ta nɔ wo tɛgbɛɛ nɔ “woashin le gbɔngbɔn mɛ,” alo anyi amɛshinshinwo. (Kol. 4:12) Nyi mìatɛnŋ akpla so nyɔ cɛ mɛɔ? Pɔlu koɖo Epafra mɔŋje mɛ mɔ gbɔxwe woakpɔtɔ anyi amɛshinshin ɔ, eʒan mɔ amɛ ŋtɔ aje agbla yí Mawu agbekpedo amɛ nu. Woji mɔ Kolosetɔwo lé kpɔtɔ anyi Kristotɔ ciwo yí shinshin ɛ le gbɔngbɔn mɛ alo ashin vɛ, nɔ wodokɔ go cukaɖa ɖekpokpui can.

18. Nyi yí atɛnŋ ajɔ do Kristotɔ ci yí shin le gbɔngbɔn mɛ jiɔ? (Kpɔ foto lɔ hɛnnɛ.)

¹⁸ Pɔlu kanxle Ebretɔwo mɔ Mawu hɛn agbe Kristotɔ shinshin ɖe tɛgbɛ dru yí yi nu dagbekpe ni o. Nɔ Kristotɔ ɖe gbe mɔ yedaɖo eto Yehowaɔ, étɛnŋ te le azɔge ni keke dasun ji atrɔ ji mɛ yí Mawu asɔ yi nuvɔn sɔ ki o. Mawu wɛ yí Ebretɔwo devaje nɔnɔmɛ ŋtɔ́ mɛ o. (Ebre. 6:​4-9) Vɔ mɛ ciwo yí li gbɛ yí womi kunuɖegbe yiyi koɖo bɔbɔwo yiyi alo woɖe wo ti le hamɛ lɔ mɛ yí le yiyimɛɔ, wotrɔ ji mɛ yɛ ɖe? Lé wosɔ wowoɖekiwo hwe yí trɔ ji mɛ do dasɛ mɔ woto akpo xesexese nɔ mɛ ciwo nu Pɔlu ŋwlɛ nu so. Vɔ nɔ wotrɔva Yehowa gbɔɔ, eʒan mɔ woaxɔ kpekpedonu ci yí so gbɔ. (Eze. 34:​15, 16) Hamɛmɛshinshinwo tɛnŋ wa toto keŋ nɔ Kunuɖetɔ ɖe ci yí shin le gbɔngbɔn mɛ akpedo wo nu nɔ woagbetrɔ akpɔ ŋsɛn le gbɔngbɔn mɛ.

19. Tajinu ci mìɖo aɖoɔ?

¹⁹ Nɔ èkpɔtɔ yí jejeɛ agbla mɔ yeanyi Kristotɔ ci yí shin le gbɔngbɔn mɛɔ, àtɛnŋ aɖo enu ci èdrɔdrɔ lɔ gbɔ! Kpɔtɔ aɖuɖuɔ gbɔngbɔnmɛŋɖuɖu sɛnŋ yí awɛ nɔ ao susuwo asɔ sɔ koɖo Yehowa tɔwo. Yi nɔ èshin vɔɔ, kpɔtɔ anɔ te goguiɖe yí anyi Kristotɔ ci yí shin le gbɔngbɔn mɛ vɛ keŋkeŋ.