Иисустыҥ азыраган улузы јӱк ле кара кардын сананган. Нениҥ учун анайып айдарга јараар? Эртезинде Иисусты ла оныҥ ӱренчиктерин таппай калала, олор Тивериаданаҥ келген кемелерге отурып, Иисусты бедиреп, Капернаум бардылар (Иоанн 6:22—24). Олор Кудайдыҥ Башкарузы керегинде кӧптӧдӧ билип аларга турган болор бо? Јок. Олор Иисустаҥ курсак ла аларга болуп баргылаган. Бис мыны кайдаҥ билерис? Улус Иисусты Капернаумныҥ јанында табып аларда, не болгонын кӧрӱп ийектер. Олор Иисусты курсакка болуп бедиреген деп, ол чике айткан. Нениҥ учун дезе олор «калаш јип [тойгылаган]». Олор «ӱрелер курсак учун» андый кӧп албаданган, је оныҥ ордына, олорго «ӱргӱлји јӱрӱм берер курсак учун» албаданар керек болгон (Иоанн 6:26, 27). Андый курсакты Ада берер деп, Иисус айткан. w24.12 5, абз. 8, 9

Кару ака, сен сценадаҥ ӱредип јатсаҥ эмезе кемге-кемге јӧп берип јатсаҥ, сӧстӧриҥ Кудайдыҥ Сӧзине тӧзӧлӧнӧр учурлу деп ундыба. Агару Бичикти ле бистиҥ бичиктерди јазап шиҥдеп тур (Укаа 15:28). Агару Бичикти шиҥдеген ӧйдӧ, библиялык ӱлгерлер канайып јарталып турганын кӧр. Ол тушта сен оны чын тузаланарыҥ. Улусты ӱредип тура, олордыҥ јӱрегин томултарга албадан. Јакшы ӱредӱчи болорго, ченемелдӱ аксагалдардаҥ сеге не јанынаҥ иштеер керек деп сурап, олордыҥ јӧптӧрин тузалан (1 Тим. 5:17). Аксагалдарга ака-эјелердиҥ кӱӱнин кӧдӱрер керек. Је кезикте олор јӧптӧр берип јат, керек дезе олордыҥ јастыразын илезине де чыгарат. Андый да болзо, аксагалдар јаантайын јалакай болор учурлу. Сен улуска јымжак, сӱӱштӱ баштанып турган болзоҥ, анайда ок олорды Агару Бичикке тайанып ӱредип турган болзоҥ, Улу ӱредӱчинеҥ, Иисус Христостоҥ, тем алып турганыҥды кӧргӱзедиҥ. Анайып, сен јакшы ӱредӱчи болуп каларыҥ (Матф. 11:28—30; 2 Тим. 2:24). w24.11 24, абз. 16

Бис Иегова керегинде улуска куучындаганысла, оны мактайдыс. Агару Бичик бисти «Иеговага кожоҥдогор», «оныҥ адын мактагар», «ол албатызын канайып аргадап турганы керегинде сӱӱнчилӱ јарды... јарлагар», «албатылар ортодо оныҥ магын куучындагар» деп кӱӱнзедет (Сар. 96:1—3). Бу ончо неме теҥериде Адабысты мактайтан башка-башка аргалар (Ап. ижи 4:29). Анайда ок бис Иегованы акту јӱрегистеҥ берген сыйларысла мактайдыс. Јебрен ӧйлӧрдӧҥ бери Кудайдыҥ ишчилери Иегованы баалу немелериле мактаган (Укаа 3:9). Темдектезе, израильтяндар ӧргӧӧни тударга ла јазаарга, сый эдип акча бергилеген (2 Каан. 12:4, 5; 1 Лет. 29:3—9). А Христостыҥ кезик ӱренчиктери Иисуска ла апостолдорго болужарга, «бары-јогыла» ӱлешкен (Лука 8:1—3). Анайда ок баштапкы чактыҥ христиандары болуш керексинип турган ака-эјелерге база јӧмӧшкӧн (Ап. ижи 11:27—29). Бӱгӱнги де кӱнде бис бойыстыҥ кӱӱнисле сый эдип акча бергенисле, Иегованы мактайдыс. w25.01 4, абз. 8; 5, абз. 11