Вторник, кичӱ изӱ ай 30
Санааркаш јӱректи сыстадат, је јакшы сӧс јӱректи сӱӱндирет (Укаа 12:25).
Павелдиҥ айтканыла, улустыҥ кӱӱнин кӧдӱретен молјулу да улус кӱӱн кӧдӱретен сӧстӧр угарга кӱӱнзейт. Римдеги христиандарга ол мындый сӧстӧр бичиген: «Агару Тыннаҥ алган јайалтаны берейин, слерди тыҥыдайын деп, слерди кӧрӱксеп јадым. Ӧскӧртӧ айтса, ортогордо болзом, бӱдӱп турганыс ажыра бой-бойыстаҥ кӧкӱдӱ аларыс, слер менеҥ, мен слердеҥ аларым» (Рим. 1:11, 12). Керек дезе улустыҥ кӱӱнин јаантайын кӧдӱрип турган Павелге де кезикте болуш керек болгон (Рим. 15:30—32). Кудайдыҥ ижине бойын килебей иштенип тургандардыҥ ончозын мактаар керек. Эш-нӧкӧри «Кайракандыйы болор учурлу» деген јакаруны угуп, биле тӧзӧбӧй турган ака-эјелердиҥ кӱӱнин база кӧдӱрер керек (1 Кор. 7:39). Кӱӱн кӧдӱрер сӧстӧр истежӱлерге эмезе ооруга табартып, је Кудайга чындык арткан улуска да керек болот (2 Фес. 1:3—5). w18.04 22 б., 3—5
Среда, јаан изӱ ай 1
Кайраканныҥ кӱӱни незинде болгонын оҥдоп алыгар (Еф. 5:17).
Бӱгӱнги кӱнде бис коркышту «уур-кӱч ӧйлӧрдӧ» јададыс. Је бу калју телекейдиҥ јоголтыларынаҥ ла јердиҥ ӱстинде чын амыр болорынаҥ озо, јӱрӱм оноҥ кӱч болор (2 Тим. 3:1). Оныҥ учун бойыска: «Мен болушты эмезе јӧпти кайдаҥ бедирейдим?» — деген сурак берер керек. Бисте кӱчтер болуп турза, биске Кудайга кӧрӧр керек деп, сарнаачы канча чактар кайра бичип салган (Сар. 123:1—4). Оныҥ сӧстӧриле болзо, бис Иеговага, кул бойыныҥ ээзине кӧргӧни чилеп, кӧрӱп јадыс. Мыны канайып оҥдоор? Кул бойыныҥ ээзине, ол оны јаҥыс ла азырап ла корулап турганы учун эмес, је ээзиниҥ кӱӱнин билип аларга ла оныҥ табын капшай ла бӱдӱрерге ого кӧрӧт. Анайып ла бис, Иегова бистиҥ кажыбыстаҥ ла нени сакып турганын билип аларга ла оныҥ табын бӱдӱрерге, Кудайдыҥ Сӧзин кӱнӱҥ ле шиҥдеерге албаданадыс. Ол тушта Иегова кӱч ӧйдӧ болужар деп, бис алаҥзыбас аргалу. w18.07 9, 10 б., 1, 2
Четверг, јаан изӱ ай 2
Уулы слерди јайымдаза, чын јайым болгоныгар ол (Иоанн 8:36).
Иисус эҥ коркышту базыныштаҥ — кинчектиҥ кулданыжынаҥ айрылары керегинде айткан (Иоанн 8:34). Кинчектеҥ улам бис јаман керектер эдедис ле чын јӱрӱп болбойдыс, анайда ок кинчек јаман јанысла тартыжарга чаптыгын јетирет. Оныҥ учун бис кинчектиҥ кулдары болодыс. Мынаҥ улам шыралайдыс, чӧкӧйдис, оорыйдыс ла учы-учында божоп каладыс (Рим. 6:23). Бис ада-ӧбӧкӧлӧристий ок чын јайымды јӱк кинчектиҥ олјозынаҥ айрылган кийнинде аларыс. Иисус: «Мениҥ сӧзимнеҥ чыкпай јӱрзегер» — деп сӧстӧриле јайымдалыш аларга турган улус библиялык некелтелерге келижип турар учурлу деп айткан (Иоанн 8:31). Христиандар болгон кийнинде, бис бойыстаҥ мойноп, Христостыҥ ӱредӱлеринеҥ тудунып јӱрерге шӱӱп алганыс (Матф. 16:24). Иисустыҥ берген сӧзиле болзо, бастыра кижилик оныҥ толынты тайылгазыныҥ тузазын бӱткӱлинче алган кийнинде, чыннаҥ јайым болор. w18.04 8 б., 14—16