Sapilifokaw to midaˈocay a ˈorip,’ oha paihkal to pakasoˈlinay falocoˈ ci Yisan. (Yohani 3:16-18, 36; 17:3) Cowa ka pihayi ko ˈalomanay to sowal ni Yis, sanay milicay cangra: ‘O manan ko midemakan iso a kasapaan, ho ngaˈay maˈaraw niyam a pakasoˈlin tisowanan hani?’ (Yohani 6:30) Dotoc, masowalay nangra koya lintad ni Mosi, tefadan no Kawas i kakarayan ko mana pakaen to lalitengan nangra. (Nihimiya 9:15; ˈOlic 78:24, 25) ˈArawhan, o sakakomaenaw aca no ˈalomanay, orato i, masowalay ni Yis ko ‘nai kakarayan soˈlinay a kakaenen.’ (Yohani 6:32) Cowa ka hecad to mana koni, wa paira to midaˈocay a ˈorip no tamdaw. Kawra cowa ka pilicay ko ˈalomanay ci Yisan to o manan ko tatodong no sowal ningra, o kaciharatengan no ˈalomanay ono tirengan aca a saali, cowa ka pikihar to sapakafanaˈ ni Yis cangranan a kimad. w24.12 5-6 fiedac 10-11 fatac

Itini i picudadan i, alatak o wawa iso wa mananam ningra, adihayay masangaˈay a dafong mamidofdof to roma a safalod. Tinakoen, o kahacecacecay a soeda, iraay ko masasiromaay a caˈang. Soˈlin oya cicaˈangay a pakayraan, ano icowa i maˈarawayto. Ngaˈay kayaten iso ko wawa misaharaterateng: “Oniya makapahay a coka a safalod o cima ko misaˈosiay hani?” Ano macerid ko wawa miharateng to hatiniay a demak i, oha ngangaˈay ko wawa pakasoˈlin toniya kihcod a dafong o Kawas ko misangaˈay. I matatodongay a tatokian, ngaˈayay licayen iso ko wawa: “Ano misangaˈan no Kawas kita, coko ihkalay mafanaˈ Cingra to misamaan ko kaˈorip ita ngaˈ ira ko lipahak han?” Ikor ngaˈayay pasowalen ko wawa, pafelianto no Kawas kita to Fangcalay Cudad ato ˈakawangay a palinian, oha sapikayataw kitanan to hasaka lipahakaw no nikaˈorip. w24.12 16 fiedac 8 fatac

Mikayatay ko Kawas ci Pawloan patikami to Korinto kasakopang, padengen ko ngangan noya cowa ka pasasiyor a tamdaw nai kasakopang. (1 Korinto 5:13) Sasamaanen no salikaka minengneng koniya tamdaw hani? Sapalimoˈot ni Pawlo cangranan ‘akato cawmaˈen cingra,’ ano ‘kalacafay komaen, cowa ka ngaˈay,’ sanay. (1 Korinto 5:11) Hano mahaen ko sapalimoˈot ni Pawlo hani? Samanen ano kalacafay to tamdaw komaen, wa masasowal cingranan. Tatodong no sowal ni Pawlo, o Korinto kasakopang cowato ka ngaˈay macacawmaˈ toniya tamdaw. Cato ka macacawmaˈ koniya tamdaw, wa madipot ko salikaka ho eca ka mafiyor noniya mararaway tamdaw. (1 Korinto 5:5-7) Roma i, wa mahapinang noniya tamdaw to pakidemay ko raraw no niyah, telocto wa mangodoen a sapipasasiyoraw cingra. w24.08 15 fiedac 4-5 fatac