Números

15 Chau Jehová huiño dungufi ta Moisés, feipifi: 2 “Dungufinge pu Israel che, feipifinge: ‘Iñche eluhuaiñ quiñe mapu tamün müleam. Fei conülmün, 3 cütral mu chalintuculelafimün ta Chau Jehová quiñe huaca* cam quiñe ufisa.* Rume cüme nümün-ngeai* Chau Jehová mu. Quiñe lüpümngeelchi chalintucun-ngeafui, quiñe chalintucun* tamün femal chem tamün feipicünuel,* quiñe chalintucun tamün hulün eimün tamün pin meu cam quiñe chalintucun tamün hulquen feitichi fiesta femngequelu fill tripantu. 4 Ti che hul-le quiñe chalintucun ca mülei ñi chalintuculelafiel ta Chau Jehová quiñe fün chalintucun nielu quiñe kilo* cüme rüngo reyülelu* quiñe litro* aceite engu. 5 Cafei hultuculmi quiñe lüpümngeelchi chalintucun cam chalintucufilmi caque quiñeque cordero, ca mülei tami hulal quiñe hutrulngeelchi* chalintucun nielu quiñe litro* pulcu. 6 Huelu hultuculmi quiñe caniru,* mülei tami hulal quiñe fün chalintucun nielu epu kilo* cüme rüngo reyülelu* doi quiñe litro* aceite engu. 7 Cafei hulaimi quiñe hutrulngeelchi chalintucun nielu doi quiñe litro* pulcu, rume cüme nümün-ngeai Chau Jehová mu.

8 Huelu elufilmi quiñe toro ta Chau Jehová tami hulal quiñe lüpümngeelchi chalintucun, quiñe chalintucun quiñentrür ingequelu cam quiñe chalintucun tami femal chem tami feipicünuel, 9 ca mülei tami hulal ti toro engu quiñe fün chalintucun nielu cüla kilo ca rangiñ* cüme rüngo reyülelu* epe epu litro* aceite engu. 10 Cafei mülei tami hulal epe epu litro* pulcu quiñe hutrulngeelchi chalintucun mu, quiñe chalintucun cütral mu cüme nümün-ngelu Chau Jehová mu. 11 Tüfa ta hulaimi chalintucufilmi caque quiñeque toro, caque quiñeque caniru, caque quiñeque cordero ca caque quiñeque chifu.* 12 Tunten culliñ rume chalintuculmün, femngechi femaimün caque quiñeque culliñ meu. 13 Com pu Israel che femngechi mülei ñi hulal chalintucun cütral mu ñi cüme nümün-ngeal Chau Jehová mu.

14 Quiñe ca cüpanche fentren tripantu yenielu eimün meu cam pichiñma mu mülealu hul-le quiñe chalintucun cütral mu cüme nümün-ngelu Chau Jehová mu, femngechi mülei ñi femal eimün reque. 15 Eimün, pu Israel che, ca pu ca cüpanche, quiñe huercün dungu müten mülei tamün inanieafiel. Tüfachi huercün dungu elcünungei ñi amulerpual, com tamün pu cüpanche mülei ñi inanieafiel. Chau Jehová ñi adquiñ mu, pu ca cüpanche trürcüleai eimün meu. 16 Eimün ca tati pu ca cüpanche mülelu eimün meu quiñe ley ca quiñe huercün dungu müten mülei tamün inanieafiel’”.

17 Fei Chau Jehová feipifi ta Moisés: 18 “Dungufinge pu Israel che, feipifinge: ‘Conülmün feichi mapu tamün yeniefiel, 19 iyaimün chem ñi hulün ti mapu,* fei quiñe chalintucun mülei tamün eluafiel ta Chau Jehová. 20 Ti hunen rüngo* tamün hunen cosecha meu deumayaimün cofque rangiñ mu huechodcülelu. Tüfa tamün chalintucual. Hulafimün chumngechi femqueimün feiti chalintucun entungequelu cheu ñi liftungequen fün. 21 Tamün hunenque cosecha meu, entuaimün tamün hunen rüngo, fei quiñeque troquiñ chalintuculelafimün ta Chau Jehová, com tamün pu cüpanche mülei tañi femal.

22 Iñche, Chau Jehová, elufiñ ta Moisés huercün dungu. Huelu eimün huelulcayafuimün chi, fei inalayafuimün. 23 Com feitichi huercün dungu iñche, Chau Jehová, tamün elufiel Moisés meu, iñche Chau Jehová, eluhuiyiñ ta eimün ca com tamün pu cüpanche. 24 Huelulcahulmün fei tamün quimnon mu, com eimün mülei tamün hulal quiñe lüpümngeelchi chalintucun. Quiñe hue toro hulngeai, cüme nümün-ngeai Chau Jehová mu. Cafei hulngeai quiñe fün chalintucun, quiñe hutrulngeelchi chalintucun, hulngeai chumngechi ñi femngequen. Ca hulngeai quiñe chalintucun culpan dungu mu,* quiñe pichi capüra. 25 Ti sacerdote hulai feitachi chalintucun ñi perdonangeal com pu Israel che. Tañi huelulcan mu cüpalingün Chau Jehová ñi adquiñ meu quiñe chalintucun ñi eluafiel ta Chau Jehová cütral mu ca quiñe chalintucun culpan dungu mu.* 26 Com pu che huelulcai, feimu com pu Israel che ca pu ca cüpanche mülelu fei engün mu perdonangeai.

27 Quiñe che culpale* fei ñi ngüneduamnon mu, mülei ñi hulal quiñe chalintucun culpan dungu mu, quiñe pichi capüra quiñe tripantu nielu. 28 Feitichi che huelulcahui, Chau Jehová ñi adquiñ mu culpai* fei ñi ngüneduamnon mu. Feimu ti sacerdote hulai ti chalintucun ñi rulpacünuñmangeal ti che ñi culpan, fei perdonangeai. 29 Quiñe che culpale* fei ñi ngüneduamnon mu, quiñe ley müten mülei ñi inanieafiel pu Israel che ca ti ca cüpanche mülelu fei engün mu.

30 Quiñe Israel che cam ca cüpanche quisu tañi pin meu culpale,* ca huesa dunguyefile ta Chau Jehová, feimu mülei tañi langümngeal. 31 Tüfachi che quiñepülecünufilu cai Chau Jehová ñi feipin ca inalafi tañi huercün dungu, mülei tañi langümngeal. Culliai tañi huelulcan meu’”.

32 Pu Israel che miyaulu ti huellin mapu mu,* peingün quiñe huentru ñi ñimitumequen* mamüll ürcütun antü mu.* 33 Fei ti pu che pefilu ti huentru ñi ñimitumequen mamüll yefingün cheu ñi mülen Moisés, Aarón ca com ti pu che. 34 Quimngelai chem ñi chumafiel ti huentru, feimu elungerquelai tañi amutual.

35 Chau Jehová feipifi ta Moisés: “Feiti huentru mülei ñi layal. Com ti pu che ütrüftuafi cura mu huecun cheu ñi mülenon tolto ruca”.* 36 Fei com ti pu che entufi ti huentru huecun cheu ñi mülenon che, fei ütrüftufingün cura mu, femngechi langümfingün. Femingün chumngechi Chau Jehová ñi feipicünufiel ta Moisés.

37 Chau Jehová cafei feipifi ta Moisés: 38 “Dungufinge pu Israel che, feipifinge: ‘Eimün ca com tamün pu cüpanche mülei tamün tuculelafiel chiñai* com tamün tacun nageltu püle. Huente feitichi chiñai mu tuculelafimün callfü füu. 39 Pefilmün feitichi chiñai, raquiduamelaimünmeu Chau Jehová tañi huercün dungu, fei inayafimün. Inanielayafimün tamün piuque ca chem tamün pequeel, tüfa yeniequeimünmeu tamün poyemuhuenoafiel.* 40 Tüfa quelluaimünmeu tamün raquiduamtucunieafiel iñche tañi huercün dungu, fei inayafimün ca lif chengeaimün Chau Dios ñi adquiñ mu. 41 Iñche tamün Chau Dios Jehová, entuhuiyiñ Egipto mapu meu iñche tamün Chau Dios ngeal. Iñche tamün Chau Dios Jehová’”.