¿Iney am feychi fentren pu che ñi peel Juan?

 1. Ti apostol Juan, ¿chem rupamekefuy 95 tripantu püle?

FÜTRA kuyfi mu, 95 tripantu püle taiñ mülen antü mew, ti apostol Juan wedake dungu rupamekefuy. Füchalefuy, püresulefuy Patmo pingechi wapi mu ka kidu müten peno mongelewefuy kom pu apostol mew (Apok. 1:⁠9). Juan kimniefuy tati pu kristiano elkünulu ti rüf dungu welurakiduamelkefi tati pu trawünche ka püntülkamekefi engün. Pichin mu mülewetunoalu tati pu rüfngechi kristiano kechilekefuy (Juda 4; Apok. 2:⁠15, 20; 3:⁠1, 17).

 2. Tañi feypilen Apokalipsi 7:⁠9-14, ¿chem afmatun dungu pey ta Juan? (Inaduamnge ti adentun wenulelu).

² Feychi antü mew, Ngünechen pengelelfi ta Juan afmatufalchi dungu. Feyti mu, Juan pey meli kümeke püllü feypingelu ñi katrütunieafiel ti kürüf ñi küpalal tati fütra kutrankawün, mülefuy ñi femal tüfa tukulelngele wüla ti inan sellu kiñe trokiñche poyekefilu ta Ngünechen (Apok. 7:⁠1-3). Tüfachi trokiñche fey tati 144.000 kristiano ngüneniealu Jesus engu wenu mew (Luka 12:⁠32; Apok. 7:⁠4). Fey Juan pey kangelu trokiñche fentren che koneltulelu, feymu feypi: “Pefiñ ta fentren pu che kom trokiñke mapu tuwlu, kakerume tuwünngelu, kakerume dungun nielu. Witrawitraley engün tati longko ülmen mülewe ñi fül mew ka tati Korderu ñi adkiñ mew, fey rume fentrenngelu engün am, iney no rume ta pepi rakilaeyew” (papeltunge Apokalipsi 7:⁠9-14). Rume ayüwmapelay Juan ñi kimürpun fentren che ñi poyeafiel ta Jewba küpalechi antü mu.

 3. 1) Ñi peel ta Juan, ¿chumngelu (chemu) kellukeeiñmew iñchiñ? 2) ¿Chem ngüneduamaiñ tüfachi chillkatun mu?

³ Feley llemay, tañi peel ta Juan kellueyew ñi doy maneluwal Chaw Dios mu. Tañi peel ta kidu femtripamekey famülke mu, feymu doyelchi may kellukeeiñmew iñchiñ. Fantepu mu fentren che konelturpuy Jewba ñi trokiñche mu, fey maneluwkey ñi mongetripayal ti fütra kutrankawün mew ka ñi rumel mongeleal engün Mapu mu. 1935 tripantu mu, Jewba tañi pu che kimürpuy iney ñi koneltulen feychi fütra trokiñche mu ñi peel ta Juan. Tüfachi chillkatun mu, ngüneduamaiñ Jewba ñi chumngechi kimelelfiel tüfa tañi pu che. Kafey peaiñ feytachi trokiñche mu ñi koneltulen fentren che wall Mapu püle tuwlu. Ngüneduamal tüfa, kelluafi kom pu koneltulelu feychi fütra trokiñche mu tañi doy maneluwal Jewba mu.

 4. 1) ¿Chem falin dungu kimeltukelayngün pu koylake religion? 2) ¿Chem kimürpuyngün feychi trokiñche Chillkatukelu Biblia?

⁴ Epe kom pu koylake religion kimeltukelay pu kümeke che ñi rumel müleal Mapu mu, chumngechi ñi feypikeel tati Biblia (2 Kor. 4:⁠3, 4). Doy may, fentren koylake religion kimeltukey kom pu kümeke che ñi müleputual wenu mu lale engün. Welu femngechi feyentukelafuy kiñe pichi trokiñche, pu Chillkatukelu Biblia pingekefuy.b Tüfa engün dewmarpuyngün ti chillka Ti Werken pingetulu fantepu mew. Kidu engün kimürpuyngün kom pu che ñi mülepunoal wenu mapu mu, doy may kimürpuyngün Chaw Ngünechen ñi küme mülewe künutuafiel ti Mapu ka fentren kümeke che ñi müleal feyta mew. Welu kimürpulu rume feychi falin dungu, alüñmayngün ñi kimal iney ngeal feychi kümeke che (Mat. 6:⁠10).

 5. Pu Chillkatukelu Biblia, ¿chem kimürpuyngün pu 144.000 kristiano ngelu?

⁵ Pu Chillkatukelu Biblia ka kimürpuyngün ñi dullingeal kiñe pichi trokiñche ñi ngünenieal Jesus engu wenu mapu mew, chumngechi ñi kimeltukeel tati Biblia (Apok. 14:⁠3). ¿Iney engün am koneltuley feychi trokiñche mu? 144.000 kristiano eluwlu ñi poyeafiel ta Jewba kom tañi piwke mu petu ñi mülen engün Mapu mew. Welu, ¿iney engün am koneltuley feychi fütra trokiñche ñi peel ta Juan?

 6. Pu Chillkatukelu Biblia, ¿chem rakiduamkefuyngün ti fütra trokiñche mu?

⁶ Juan ñi peel mu, feychi fütra trokiñche “witrawitraley engün tati longko ülmen mülewe ñi fül mew ka tati Korderu ñi adkiñ mew” (Apok. 7:⁠9). Tañi feypiel mu tüfachi texto, pu Chillkatukelu Biblia rakiduamingün ñi kiñentrür mülepual wenu mew ti fütra trokiñche ka ti pichi trokiñche. Welu, ¿chem dungu mu trürkülelafuy tüfachi epu trokiñche? Pu Chillkatukelu Biblia rakiduamkefuyngün ti fütra trokiñche mu koneltuley pu kristiano wenche piwke mu poyekefilu ta Jewba. Kafey rakiduamkefuyngün ñi koneltulen kiñeke che küme yenielu ñi mongen, welu famentunofilu ti koylake religion. Feymu pu Chillkatukelu Biblia rakiduamürpuyngün feychi pu che fente küme poyenofilu ta Chaw Dios, elungelayafuy ñi ngünenieal Jesus engu. Feymu witrawitraleafuy engün müten tati longko ülmen mülewe ñi fül mew, anülayafuyngün feyti mu chumngechi ñi femal pu 144.000 kristiano.

 7. 1) Pu Chillkatukelu Biblia, ¿iney rakiduamkefuyngün ñi mongeleal Mapu mu petu ñi ngüneniemeken ta Kristo? 2) Pu Chillkatukelu Biblia, ¿chumngechi rakiduamkefuyngün ñi felerpual kiñeke che poyekefilu ta Jewba petu ñi küpanon Kristo?

⁷ Feymu, ¿iney engün am mongelerkeafulu Mapu mew? Pu Chillkatukelu Biblia rakiduamkefuyngün dew mülepule wenu mapu mu pu 144.000 kristiano ka ti fütra trokiñche, rume fentren che elungerkeafuy ñi müleal Mapu mu ñi kümelkayaetew Kristo ñi ngünenieal. Feychi pu che poyerkelayafuy ta Chaw Jewba petu ñi akunon Kristo ñi ngünenieel, doy may kimeltungerkeafuyngün Jewba ñi dungu dew ngüneniefile Jesus ti Mapu. Rupale tüfa, pu che eluwlu ñi inayafiel Jewba ñi werküel rumel mongelerkeafuyngün Mapu mew, welu pu pinolu ñi allkütuafiel ta Ngünechen apümngerkeafuyngün. Feychi antü mu ka mülerkeafuyngün principe Mapu mu, ¿chem rakiduamkefuyngün pu Chillkatukelu Biblia kidu engün mew? Kidu engün rakiduamkefuy kiñeke principe ñi rumel mongelepual wenu mapu mu dew afle ti warangka tripantu ñi ngünenieal ta Jesus. Feychi pu principe mu ka koneltulefuy kiñeke kümeke che poyekefilu ta Jewba petu ñi küpanon Kristo Mapu mew (Sal. 45:⁠16).

 8. Pu Chillkatukelu Biblia, ¿chem küla trokiñche rakiduamkefuyngün ñi mülerkeafel?

⁸ Feymu pu Chillkatukelu Biblia rakiduamkefuyngün ñi mülen küla trokiñche: 1) pu 144.000 kristiano ñi ngünenieal Jesus engu wenu mew, 2) ti fütra trokiñche poyekefilu ta Jewba wenche piwke mu, tüfa engün witrawitraleafuyngün tati longko ülmen mülewe ñi fül mew ka Kristo ñi adkiñ mew, ka 3) rume fentren che ñi kimeltulelngeal Jewba ñi werkün dungu Mapu mew, petu ñi ngüneniemeken ta Kristo.c Rupalu kiñeke tripantu, Jewba kellufi tañi pu che ñi doy küme adümal tüfachi falinke kimeltun (Prov. 4:⁠18).

 9. 1) Tati fütra trokiñche, ¿chumngechi witrawitraleafuyngün reke Ngünechen tañi “longko ülmen mülewe ñi fül mew”? 2) ¿Chumngechi witrawitraleafuyngün reke “tati Korderu ñi adkiñ mew? 3) ¿Chumngelu doy adümfali chumngechi taiñ kimürpun Apokalipsi 7:⁠9?

⁹ Puwlu 1935 tripantu, pu Dungukelu Iney Ngen Jewba doy küme kimürpuyngün ñi iney ngen feychi fentren pu che ñi peel ta Juan. Kimtukuyngün kiñe adentun müten tati Biblia ñi feypin tüfachi fentren pu che ñi ‘witrawitraleal engün tati longko ülmen mülewe ñi fül mew ka tati Korderu ñi adkiñ mew’, tüfa feypilelay ñi rüf mülepual engün wenu mapu mew. Fey, ¿chem adentuley kay? Tüfachi fentren pu che mülerkeafuy Mapu mew, fey ¿chumngechi witrawitraleafuyngün Ngünechen tañi “longko ülmen mülewe ñi fül mew” reke? Müley ñi ngüneduamal Ngünechen ñi ngünenien kom ti müleyelu ka eluwal tañi adnieaetew (Is. 66:⁠1). Kafey tüfachi fütra trokiñche feyentule Jesus ñi lan iñchiñ mu, witrawitraleafuyngün reke “tati Korderu ñi adkiñ mew”. Matew 25:⁠31, 32 kellukeeiñmu taiñ adümal kiñe adentun reke ñi feypin Apokalipsi 7:⁠9. Matew feypi “kom chüf mapu mülechi pu che”, pu wedake che kafey, trawüluway Jesus tañi adkiñ mew ka tañi afmafalchi ülmen mülewe mew. Kimfali may tüfachi pu che ñi mülenon wenu mapu mu. Feley llemay, doy adümfali chumngechi ñi kimeltungeel 1935 tripantu mu ñi feypin Apokalipsi 7:⁠9. Doy küme kimürpukeiñ chumngelu Biblia feypikelay tüfachi fütra trokiñche ñi mülepual wenu mu. Doy may feypi pu 144.000 kristiano müten elungeay ñi rumel mongeleal wenu mu, fey ñi ngünenieafiel ti Mapu Jesus engu (Apok. 5:⁠10).

10. Ti fütra trokiñche, ¿chumngelu müley ñi kimnieal Jewba tañi werkün dungu petu ñi akunon Kristo tañi ngünenieal?

¹⁰ Feychi 1935 tripantu ta fantepu mew, kimnieiñ ñi iney ngen feychi fentren pu che ñi peel ta Juan: tüfa ta pu nor kristiano maneluwlu ñi rumel mongeleal Mapu mu. Tüfachi pu kristiano müley ñi kimnieal Jewba tañi werkün dungu ka küme feyentuleal kidu mu petu ñi akunon Kristo tañi ngünenieal, femngechi montuluwayngün akule ti fütra kutrankawün ka “kom tati küpalechi dungu” (Luka 21:⁠34-36).

11. Pu Chillkatukelu Biblia rakiduamkefuyngün kiñeke che nor piwkeyefilu ta Jewba fütra kuyfi mu ñi mülepual wenu mu, ¿chumngelu chi?

¹¹ Chumngechi taiñ ngüneduampeel parrafo 7 mu, kiñeke Chillkatukelu Biblia rakiduamkefuyngün afle Kristo tañi ngünenieal warangka tripantu ñi amurkeafel wenu mapu mew kiñeke kümeke che poyekefilu Jewba petu ñi mülepanon Jesus Mapu mew. Feychi kimeltun tripay 15 konchi febrero 1913 tripantu mu, ti chillka Ti Werken pingetulu. ¿Chumngelu femngechi rakiduamkefuyngün? Feychi tripantu mu, pu Chillkatukelu Biblia rakiduamkefuyngün kiñeke che wenche piwke mu poyekefilu ta Jewba ñi mülepual wenu mu, feymu feypikefuyngün chi: “Doyelchi may mülepuay wenu mu kiñeke che nor piwkeyefilu ta Jewba petu ñi mülepanon Jesus”. Welu tüfachi rakiduam entungey epu welulkalechi kimeltun ñi niekefel engün: 1) ti fütra trokiñche mülerkeafuy wenu mu, ka 2) ti fütra trokiñche ñi peel Juan koneltuley pu kristiano wenche piwke mu poyekefilu ta Jewba.

12, 13. Pu dullingelu ka ti fütra trokiñche, ¿chem kimtukukeyngün?

¹² Chumngechi taiñ ngüneduampeel parrafo 10 mu, 1935 tripantu mu kimürpuiñ iney ngen feychi fentren pu che ñi peel ta Juan, fey tüfa lle pu montutripayalu Armagedon mu. Tüfa engün mongetripayayngün ti fütra kutrankawün Mapu mew, ka newentu wirarayngün: “¡Iñchiñ taiñ Ngünechen, tati anülelu ta longko ülmen wangku mew, ka femngechi tati Korderu montuleiñmew!” (Apok. 7:⁠10, 14). Kafey Biblia feypi pu wiñomongetualu wenu mu, “kiñe doy küme dungu” llowayngün kakelu che mu poyekefilu ta Jewba fütra kuyfi mew. Feymu pu Chillkatukelu Biblia kimtukuyngün feychi pu che poyekefilu ta Jewba petu ñi küpanon Jesus ñi amunoal engün wenu mu, doy may ñi rumel mongeleal Mapu mew (Eb. 11:⁠40). Tüfachi we kimeltun mu, taiñ pu peñi ka pu lamngen doy eluwi ñi kimeltulelafiel tati pu che Jewba tañi kümeke dungu, femngechi ñi maneluwküleal engün tañi rumel mongeleal Mapu mew.

¹³ Tati fütra trokiñche rume ayüwülkeeyew engün tañi maneluwün. Kidu engün kimnieyngün Jewba dullikey iney tañi müleal wenu mu ka iney tañi müleal Mapu mew. Pu dullingelu ka ti fütra trokiñche kimtukukeyngün kidu ñi duam mu elungekelayngün tañi maneluwün, doy may Jewba tañi kutranpiwkeyechen mu wülkünuy ta Jesus tañi montulcheal (Rom. 3:⁠24).

14. ¿Chumngelu pu peñi ka pu lamngen ramtuwkefuyngün chumngechi ñi fentren-ngeal ti trokiñche ñi peel ta Juan?

¹⁴ Dew adümngerpulu rume 1935 tripantu mu iney ngen feychi fütra trokiñche ñi peel ta Juan, pütrün peñi ka lamngen ramtuwkefuyngün chumngechi ñi fentren-ngeal feychi trokiñche ñi müleal Mapu mew. Ngüneduamnge ñi feypin taiñ peñi Ronald Parkin pingelu, 1935 tripantu mu kidu niefuy 12 tripantu. Fey feypi: “Feychi tripantu mu, mülefuy 56.000 amuldungukelu wall Mapu püle. Fentren engün maneluwkefuy ñi mongeleal wenu mu, epe kom engün chi. Feymu pichilelu kechilekefuy tati fütra trokiñche”.

15. ¿Chumngechi fentren-ngerpuy tati fütra trokiñche?

¹⁵ Amulechi tripantu mu, fentren peñi ka lamngen werküngey ñi amuldungual kake mapu mu, fey fentren-ngerpuy pu Dungukelu Iney Ngen Jewba. Kafey 1968 tripantu dewmangey ti lifru La verdad que lleva a vida eterna, fey ñi kimeltulelafiel pu che Biblia ñi rüf dungu. Tüfachi lifru rume küme kimeltukefuy Biblia ñi kimeltukeel, feymu fentren che eluwi ñi doy kimafiel ta Jewba. Meli tripantu müten, doy 500.000 che fawtisawi. Kafey pu che mülelu America Latina ka kakelu trokiñ mapu mu ñochikechi eluw-welay ñi adnieaetew tati Iglesia catolica, feymu fentren che kimürpufi ta Jewba ka fawtisawingün. Ka femngechi dungu rupay Europa Oriental ka kiñeke trokiñ mapu Africa mew mülelu katrütungewenolu taiñ küdaw (Is. 60:⁠22). Rupalechi tripantu mu, Jewba tañi adkünuelchi trokiñche entuy fillke kellu ñi kimeltulelafiel pu che Biblia ñi dungu. Feley llemay, fentren-ngetuy tati fütra trokiñche, doy pura millon che koneltuley fantepu mew.

16. Feychi fentren pu che ñi peel Juan, ¿chem tuwün-ngey?

¹⁶ Juan feypi feychi fentren pu che ñi peel ‘kom trokiñke mapu tuwi, kakerume tuwünngey, kakerume dungun niey’. Ka femngechi dungu feypikünuy ti pelon wentru Sakaria, kidu wirintukuy: “Feychi antü mu, mari wentru fillke kewün dungu nielu nünieafingün, fey llemay, nünieñmayafingün kiñe judio ñi takun, ka feypiayngün: ‘Küpa amuiñ eymi mu, allkütulu kay iñchiñ Ngünechen ñi mülen eymün mu’” (Zac. 8:⁠23).

17. ¿Chumngechi kellungekey pu che kakerume dungun nielu?

¹⁷ Ñi trawülngeal pu che kakerume dungun nielu, duamfali ñi amuldungungeal engün kiduke ñi kewün dungu mew. Iñchiñ küme kimnieiñ tüfa, feymu dew yenieiñ 130 tripantu taiñ rulpadunguken fillke papel ka lifru. Fewla rulpadungukeiñ doy 900 kewün dungu mu, turpu mülekelay femngechi küdaw ñi rulpadungungeel. Kimfali may Jewba ñi trawülmekefiel pu che kakerume tuwün-ngelu, ¡afmatufali llemay! Ti Biblia, taiñ fillke papel, lifru ka video müley fentren kewün dungu mu, feymu Jewba tañi pu che kiñewküley kakerume tuwün-ngele rume. Kafey kimniengey ñi ayüwünkechi amuldungucheken engün ka ñi welukonke piwkeyewken. Pefiel mu tüfa iñchiñ, doy maneluwkeiñ Chaw Jewba mu (Mat. 24:⁠14; Juan 13:⁠35).

18. 1) Isaías 46:⁠10, 11 ñi feypilen, ¿chumngelu afmatulkelaeiñmu Jewba ñi femtriparpun ti pelon dungu? 2) Pu che maneluwkelu ñi mongeleal Mapu mew, ¿chumngelu kiñepülekünungelu trokiwkelayngün?

¹⁸ ¡Rume ayüwmapiwkekeeiñmu ñi peel ta Juan! Afmatulkelaeiñmu Jewba ñi femtriparpun tüfachi pelon dungu, ¿chumngelu kay? Biblia feypi: “Ellaka mu feypikünun chem ñi rupayal, ka fütra kuyfi chi dungu ñi femngekenon; Iñche feypin: ‘Iñche kidu ñi ngülam rumel müleay, ka itrokom ñi ayükeel feman’. Iñche mütrümmekefiñ kiñe ilotufe üñüm tripawe antü mu, mütrümmekefiñ kiñe wentru alü kamapu mu ñi wechurpual iñche ñi dulliel. Iñche feypikünun, fey wechunentuafiñ. Iñche dew feypikünun, fey femtripayay” (Isaías 46:⁠10, 11). Tati fütra trokiñche rume mañumkefingün ta Jewba tañi eluetewchi maneluwün mu. Kidu engün dullingelayngün ñi mülepual wenu mu Jesus engu, welu kiñepülekünungelu trokiwkelayngün. Biblia feypi fentren kümeke che ka domo ñi adnieetew Jewba tañi newen, welu koneltulelayngün pu 144.000 kristiano mu. Kiñeke tüfa ta Juan ti Fawtisachefe ka David (Mat. 11:⁠11; Hecho 2:⁠34). Kidu engu ka fentren kakelu che wiñomongetuayngün küme mülewe ngetule ti Mapu. Kom engün ka tati fütra trokiñche ñi peel ta Juan, pengelelafingün ta Jewba ñi nor piwkeyefiel ka ñi eluwkülen engün tañi adnieaetew.

19. Adümfiliyiñ ñi peel ta Juan, ¿chumaiñ?

¹⁹ Chaw Jewba turpu femngechi trawülkelafuy che kakerume tuwün-ngelu tañi poyeaetew. Chem maneluwün rume nieliyiñ, kom iñchiñ müley taiñ kelluafiel fentren che ñi koneltuleal ti fütra trokiñche mu, “kakelu ufisa” reke felelu (Juan 10:⁠16). Pichilewechi antü mu, Jewba küpalafi tati fütra kutrankawün, fey apümkangeay kom pu gobierno ka pu religion fente ñi kutrankakefiel tati pu che. Pu koneltulelu ti fütra trokiñche mu elungeay kiñe müna küme dungu, fey rumel poyeafingün ta Jewba Mapu mew (Apok. 7:⁠14).