Piuqueyen mu amuldunguleaiñ

 1. ¿Chem quimiyiñ tati falin trahun 2023 tripantu mu?

TATI falin trahun 2023 tripantungelu doi cüme adümfiyiñ quiñeque taiñ feyentun, ca feipingeiñ hueque dungu nüucülelu taiñ amuldungun mu.a Quimiyiñ quiñeque che elungeafui chi ñi poyeafiel Jehová deu apümcangele hula tati Fütra Babilonia. Ca quimiyiñ conlu noviembre cüyen 2023 tripantu, pu amuldunguquelu trahunche mu ngelai tañi feipial tunten hora ñi amuldunguquen engün. Tüfa ñi caletun mu, ¿pengeli ñi doi falihuenon taiñ amuldungun? ¡Femlai llemai!

 2. ¿Chumngelu am rume falin-ngei taiñ amuldunguleal? (Marcos 13:10).

² Pichilehuei ñi afal com huesaque dungu, feimu doi falin-ngei taiñ amuldunguleal. Peaiñ ñi chem pin Jesús taiñ amuldungun afaelchi antü meu (papeltunge Marcos 13:10). Tañi pengelün Mateo pingechi Evangelio, Jesús feipi tati cümeque dungu amuldungungeai huall mapu püle petu ñi afnon mapu meu müleyechi dungu (Mat. 24:14). Tüfa feipilei ñi afal com ñi ngünenieel ta Huecüfü. Chau Jehová deu quimniei “chem antü ca chem hora” ñi rupayal tüfa (Mat. 24:36; 25:13; Hech. 1:7). Doi püllelepai feichi antü (Rom. 13:11). Feimu petu ñi acunon, mülei taiñ amuldunguleal.

 3. ¿Chumngelu amuldunguqueiñ?

³ Cümeafui taiñ ramtuhual: ¿Chumngelu am amuldunguqueiñ? Taiñ piuqueyen mu femqueiñ. Amuldungun mu pengelqueiñ taiñ piuqueyefiel Chau Ngünechen ñi cümeque dungu, taiñ piuqueyechequen ca doi mai pengelqueiñ taiñ piuqueyefiel Chau Ngünechen ca tañi üi. Feula inaduamaiñ tüfachi cüla dungu.

PIUQUEYEFIYIÑ CHAU DIOS TAÑI CÜMEQUE DUNGU

 4. ¿Chum duamnagqueiñ allcütulu cümeque dungu?

⁴ ¿Chum duamnagimi allcütulu quiñe cüme dungu? Por ejemplo, quiñe tami pu che choyüfile quiñe pichiche cam lloulu eimi quiñe cüdau tami duamnieel, ayüucülen cüpa nütramcaquefimi tami pu hueni ca tami pu che. ¿Ca femngechi fempelaimi hue allcütulu Chau Dios ñi cümeque dungu?

 5. Hue quimfilu eimi Chau Dios ñi Dungu, ¿chum duamnagimi? (Ca inaduamnge ti adentun).

⁵ ¿Acordaimi tami chumngentufiel hue quimfilu Chau Ngünechen ñi dungu? Quimimi tami Huenu Chau tami piuqueyeteu ca ayüniei tami coneltual quisu ñi troquiñche mu. Cafei quimimi quisu ñi apümcayafiel com cutrancahun ca tami huiño petuafiel tami layechi pu che hue mapu mu ca fentren caquelu cümeque dungu (Mar. 10:29, 30; Juan 5:28, 29; Rom. 8:38, 39; Apoc. 21:3, 4). Tami quimürpuel rume ayühueleimu (Luc. 24:32). Piuqueyefimi tami quimürpuel, ca com pu che cüpa nütramcafimi (ca ngüneduamafuimi Jeremías 20:9).

 6. ¿Chem quimeltueiñmu ñi rupan Ernest engu Rose?

⁶ Peaiñ ñi rupan quiñe peñi Ernest pingelu.b Nielu mari tripantu, lai tañi chau. Ernest feipi: “Ramtuuquefun: ‘Tañi chau, ¿amupei mai huenu? ¿Cam turpu pehuelayafiñ?’. Ütrirquefuiñ caquelu pichiqueche nielu tañi chau”. Ernest rumel amuquefui eltun mu, lucutupuquefui cheu ñi rüngalcülen tañi chau, fei llellipuquefui ta Chau Dios: “Füreneen, feipien cheu ñi mülen tañi chau”. Rupalu 17 tripantu peno deu lalu tañi chau, feipingei ñi chillcatual Biblia, fei allmalltui ñi femal. Quimürpui ti pu la ñi quimhuetuquenon chem dungu no rume, umaucülelu reque feleingün ca tañi huiñomongelngetual engün. Quimün mu tüfa, rume ayühuelmaeyu tañi piuque (Ecl. 9:5, 10; Hech. 24:15). Biblia huiñoldungueyu com tañi ramtuuquefel alün tripantu mu. Rose, tañi domo, ca chillcatui Biblia ca rume ayühueleyu ñi quimürpuel Chau Dios tañi Dungu. Fei 1978 tripantu mu, tüfachi curehuen fautizahuingu. Fei engu com nehuen mu amuldungulelfingu tañi familia, tañi pu hueni ca caquelu che. Feimu quellufingu doi 70 che ñi quimafiel ta Jehová ca fautizahual.

 7. Piuqueyefiel mu Biblia tañi dungu, ¿chumaiñ? (Lucas 6:45).

⁷ Piuqueyefiel mu Biblia tañi feipin, ayüqueiñ taiñ feipiafiel com pu che (papeltunge Lucas 6:45). Iñchiñ ca femqueiñ Jesús tañi pu discipulo reque feipilu: “Iñchiñ fentecünulayaiñ taiñ huldungual chem taiñ peel ca chem taiñ allcütuel” (Hech. 4:20). Fente taiñ piuqueyefiel Biblia ñi rüf dungu, amuldungulelquefiyiñ fentrenque che.

PIUQUEYEFIYIÑ TA PU CHE

 8. ¿Chumngelu am cüpa amuldungulelquefiyiñ ta pu che? (Inaduamnge ti huichulechi dungu “Piuqueyenquechi quimeltucheaiñ”; ca inaduamnge ti adentun).

⁸ Jehová ca Jesús reque, iñchiñ ca piuqueyefiyiñ tati pu che (Prov. 8:31; Juan 3:16). Cutranpiuqueyequefiyiñ pu quimnofilu ta Chau Dios ca nienolu maneluhun (Efes. 2:12). Fente tañi huesa rupamequen engün, fütra rüngan mu tranaconcüleingün reque. Huelu Chau Dios tañi cümeque dungu quiñe llasu reque felei tañi entuaeteu engün. Taiñ piuqueyefiel mu yafüluhuaiñ taiñ yelelafiel tüfachi cümeque dungu. Allcütule engün, nieaingün maneluhun ca ayühun mongen feula, ca cüpalechi antü mu llohuaingün rumel mongen ti hue mapu mu, tüfa “tati rüfngechi mongen” (1 Tim. 6:19).

 9. ¿Chem ngüfetun dungu am feipiquefiyiñ pu che tañi rupayal? ¿Chumngelu am? (Ezequiel 33:7, 8).

⁹ Taiñ piuqueyefiel mu pu che, ngüfetuquefiyiñ ñi fülcülepan ti antü ñi apümcangeal mapu meu müleyechi huesaque dungu (papeltunge Ezequiel 33:7, 8). Pu che ca taiñ familia poyequenofilu ta Jehová quimlaingün chem ñi rupayal pichiñma mu, feimu cutranpiuqueyefiyiñ engün. ¿Chem dungu rupayai? Acuai ti “fütra cutrancahun. Hue deumangelu pu che ca fanten mu, turpu mülequelafui femngechi cutrancahun ca huiño mülehuetulayai” (Mat. 24:21). Iñchiñ ayünieiñ tañi quimal engün chem dungu ñi rupayal. Hune, com coilaque religion apümcangetuai. Fei hula, mapu müleyechi huesaque dungu apümcünungetuai Armagedón mu (Apoc. 16:14, 16; 17:16, 17; 19:11, 19, 20). Llellipuqueiñ com pu che mu ñi allcütual engün taiñ ngüfetuquefiel, fei ñi poyeafiel Jehová quiñehun iñchiñ mu. Huelu pu che ca taiñ familia allcütunoeliyiñmu taiñ ngüfetufiel, ¿chem rupayaingün?

10. ¿Chumngelu am fente falin-ngei taiñ ngüfetunieafiel pu che chem ñi rupayal?

¹⁰ Chumngechi peiñ deu rupachi chillcatun meu, quiñeque che deu ñi pefiel ñi apümcangen ti Fütra Babilonia, eluhuafui chi ñi poyeafiel ta Jehová, fei Jehová montulafeyu engün. Femngechi felefule, doyelchi mai amuleaiñ taiñ ngüfetufiel pu che chem tañi rupayal. Raquiduamaiñ tüfa mu: taiñ feipifiel pu che fachantü acordayafuingün cüpalechi antü (ca ngüneduamafuimi Ezequiel 33:33). Quisu engün acordayaingün chi taiñ ngüfetufiel ca cüpa poyeafuingün Jehová quiñentrür iñchiñ mu. Raquiduamaiñ ñi rupan ti soltau Filipo huaria mu, deu rupalu “quiñe fütra nüyün”, eluhui ñi quimafiel ta Jehová. Ca femngechi famülque mu pu feyentuquenolu cacünutuafui ñi raquiduam engün pefile hula ñi apümcangen ti Fütra Babilonia (Hech. 16:25-34).

PIUQUEYEFIYIÑ JEHOVÁ CA TAÑI ÜI

11. ¿Chumngechi püramyequefiyiñ ca yamquefiyiñ ta Chau Jehová? (Apocalipsis 4:11; ca inaduamnge ti adentun).

¹¹ ¿Chem dungu am doi nengümqueiñmu taiñ amuldunguleal? Taiñ piuqueyequefiel Jehová ca tañi üi. Amuldungun mu püramyequefiyiñ ta Jehová. Iñchiñ ca raquiduamqueiñ pu cümeque püllü reque ülcantulelfilu ta Chau Jehová: “Mülei tami püramyengeal ca yamniengeal” (papeltunge Apocalipsis 4:11). ¿Chumngechi püramyequefiyiñ ta Jehová ca yamniequefiyiñ? Quimeltuquefiyiñ pu che ñi deumafiel “com tati mülelu” ca taiñ elueteu mongen. Ca hultucuqueiñ taiñ tiempo, taiñ nehuen ca com taiñ nieel taiñ amuldungucheal tunte taiñ pepi femel (Mat. 6:33; Luc. 13:24; Col. 3:23). Ayühueleiñmu taiñ piuque amuldungual Chau Jehová mu. Ca cüpa quimeltuquefiyiñ ta pu che ñi chumngen ta Chau Dios ca tañi üi. ¿Chumngelu am?

12. ¿Chumngechi yamniefiyiñ Chau Dios tañi üi amuldungun meu?

¹² Taiñ piuqueyefiel mu ta Chau Jehová yamüñmaquefiyiñ tañi üi (Mat. 6:9). Feipiquefiyiñ pu che com tañi feipiqueel Huecüfü Chau Jehová mu, re coila tati (Gén. 3:1-5; Job 2:4; Juan 8:44). Amuldungun mu, quimeltuquefiyiñ com ti pu ayülu ñi allcütual ti rüf dungu Chau Jehová mu. Ayünieiñ com pu che tañi quimal Chau Dios ñi piuqueyechefengen ca norngei chumngechi tañi ngünenien. Cafei ngünenietule mapu, apümafi com cutrancahun ca com pu che ayüucületuai ca tüngcületuai (Sal. 37:10, 11, 29; 1 Juan 4:8). Feipifiliyiñ pu che tüfachi dungu, quelluntucuqueiñ ñi yamniengeal Chau Jehová tañi üi. Cafei femngechi pengelqueiñ taiñ Dunguquelu Ineingen Jehová ngen, fei tüfa ayühuelqueiñmu.

13. ¿Chumngelu falintuquefiyiñ taiñ Dunguquelu Ineingen Jehová pingeal? (Isaías 43:10-12).

¹³ Chau Jehová dullieiñmu taiñ dungual quisu meu (papeltunge Isaías 43:10-12). Quiñeque tripantu cuifi mu, ti Troquiñ Adniechequelu feipi: “Taiñ pu Dunguquelu Ineingen Jehová pingeal, fei tati doi falin dungu taiñ elungeel”.c ¿Chumngelu? Raquiduamnge tüfa, feipintucungelmi tami femün quiñe huesa dungu, huelu rüfngelai, feimu duamnieimi quiñe che tami incañpeaeteu. ¿Inei am ta dulliafuimi? Quiñe che tami quimniefiel, manelfiel ca yamfalngelu, femngechi caquelu che feyentuai ñi feipin. Ca femngechi taiñ dullieteu Jehová pengeli taiñ cüme quimnieteu. Fente tañi maneluucülen iñchiñ mu, elfalcünueiñmu quimeltucheal quisu ñi rüf Ngünechen ngen. Rume falintuquefiyiñ taiñ testigongeal. Feimu cheu püle rume miyauliyiñ, nütramcayaiñ quisu tañi üi meu ca quimfalcünuqueiñ com tañi dalluntucungeel re coila dungu tati. Femngechi com taiñ femqueel mu, quimfali taiñ Dunguquelu Ineingen Jehová ngen (Sal. 83:18; Rom. 10:13-15).

AMULDUNGULEAIÑ FENTEPUHUI PILE HULA JEHOVÁ

14. ¿Chem üngümnieiñ ñi rupayal cüpalechi antü mu?

¹⁴ Rume ayünieiñ taiñ peal chem ñi rupayal cüpalechi antü mu. Jehová ñi duam mu üngümnieiñ doi fentren che ñi poyerpuafiel Jehová petu ñi acunon ti fütra cutrancahun. Cafei doi fentren che conafui chi Jehová ñi troquiñche mu petu rupamequele ti fütra cutrancahun. Ayühunquechi üngümcüleiñ ñi femngechi rupayal (Hech. 13:48).

15, 16. ¿Chem mülei taiñ femmequeal feula? Ca, ¿tuntepuhuai chi cüdau?

¹⁵ Petu nieiñ quiñe falin cüdau taiñ femal: amuldungual Chau Dios ñi cümeque dungu com huall mapu. Tüfa chumcaunorume femngehuelayai. Mülei taiñ ngüfetudunguafiel pu che chem ñi rupayal pichin antü mu. Pu che duamniei ñi quimal pichilehuen Huecüfü ñi ngünenieafiel tüfachi mapu. Acule feichi antü, fei quimaingün Chau Ngünechen mu ñi cüpan taiñ amuldungulelfiel (Ezeq. 38:23).

¹⁶ Feimu, ¿chem eluucüleiñ taiñ femal? Amuldunguleaiñ com taiñ nehuen mu ca com taiñ piuque mu. ¿Chumngelu am femaiñ? Fente taiñ piuqueyefiel Biblia ñi dungu, tati pu che ca doyelchi mai taiñ piuqueyefiel ta Chau Dios ca tañi üi. Ca, ¿tuntepuhuai tüfachi cüdau? “Fentepui” pile hula Jehová.