Chumngelu amuleaiñ taiñ wülal “fentren fün”

 1. Feychi pun petu ñi lanon Jesus, ¿chem nütramkafi tañi pu apostol engün?

FEYCHI pun petu ñi lanon, Jesus alüñma nütramkay tañi pu apostol engün. Feypifi engün fente ñi piwkeyefiel, ka nütrami ti anüm ofad mu, chumngechi ngüneduamiyiñ rupachi chillkatun mu. Jesus feypifi tañi pu apostol ñi wülal “fentren fün”. Tüfachi dungu griego kewün mu, pengeli Jesus ñi yafültukufiel tañi fentekünunoal engün ñi wülken fün, fey ñi amuleal tañi amuldungun Ngünechen ñi Ngünenien mu (Juan 15:8).

 2. 1) Longkontukuaiñ chumngelu müley taiñ amuldungual, ¿chumngelu fente falin-ngey femal tüfa? 2) ¿Chem inaduamaiñ tüfachi chillkatun mu?

² Jesus feypifi tañi pu apostol chem ñi femal ka chumngelu müley ñi amuleal tañi amuldungun. Famülke mu ka falin-ngey taiñ longkontukual tüfa. Femngechi afeluwlayaiñ taiñ kimeltuafiel “kom trokiñke mapu mew mülechi pu che” (Matew 24:13, 14). Tüfachi chillkatun mu inaduamaiñ meli dungu Biblia mu, tüfa kimeltuaeiñmew chumngelu taiñ amuldungual. Ka inaduamaiñ meli yewün taiñ eluetew Jewba, tüfa kellukeeiñmu ñi amuleal taiñ amuldungun.

 3. 1) Juan 15:8 ñi feypin mu, ¿chem doy falin dungu nieiñ taiñ amuldungual? 2) Jesus ñi nütram mu, ¿chem am tati ofad? ¿Chumngelu kümey ñi femngechi trürümfalngen?

³ Fillke dungu nieiñ taiñ amuldungual, fey tüfa tati doy falin-ngelu: femngechi ñi püramyengeal Jewba ka ñi yamniengeal tañi üy (papeltunge Juan 15:1, 8). Jesus nütramkalu ti anüm ofad mu, feypi tati dapikefilu ti anüm ofad fey ta Jewba, tati anüm ofad fey ta Jesus, ka tati row fey tañi pu disipulu (Juan 15:5). Feymu ti ofad fey tati pu disipulu ñi amuldungun, tüfa am fün reke trürümfalngelu. Jesus feypifi tañi pu inanieetew: “Iñche ñi Chaw llowkey püramyen femngechi wülimün ta eymün fentren fün”. Wülün mu kümeke fün ti anüm ofad, tañi dapikeetew sakingekey. Ka femngechi eluwlu iñchiñ taiñ amuldungual Ngünechen ñi Ngünenien mu, Jewba sakingekey ka püramyengekey (Matew 25:20-23).

 4. 1) ¿Chumngechi kellukeiñ ñi yamniengeal Jewba tañi üy? 2) Elungelu am tami kellual ñi yamniengeal Jewba tañi üy, ¿chumngechi duamküleymi?

⁴ Chaw Dios ñi üy yamfali, feymu chem rume femlayafuiñ tañi doy yamfalngeal. Welu taiñ amuldungun mu, ¿chumngechi kelluafuiñ ñi yamniengeal Jewba tañi üy? Ti pelon wentru Isaia feypi ñi yamfalngelu trokingeal Jewba tañi üy (Isaías 8:13). Feymu taiñ kellual ñi yamniengeal Jewba tañi üy, doykülelu am, femngechi pekefiyiñ iñchiñ ka kimeltuafiyiñ pu che ñi yamfalngen (Matew 6:9). Feymu kimeltufilu iñchiñ tati pu che Jewba ñi küme chumngen ka ñi ayükeel taiñ rumel mongeleal kiñe küme mülewe Mapu mu, kellukefiyiñ engün ñi ngüneduamal tañi koylangen Weküfü ñi dalluntukun (Génesis 3:1-5). Kafey taiñ kellual ñi yamniengeal Jewba tañi üy, müley taiñ kimeltuafiel tati pu che tüfachi rüf dungu: Jewba feley ñi “llowael kom küme püramyen, kom yamün ka pepiluwün” (Apokalipsi 4:11). Ngüneduamnge ñi feypin kiñe peñi 16 tripantu wünelelu amuldungun mu, Rene pingelua (inaduamnge ti kimal dungu). Kidu feypi: “Elungen ñi dungual iney ngen Jewba, tati Dewmalu itrofill mülelu. Kimfiel tüfa, kelluenew ñi mañumküleal ka ñi küpa amuleal tañi amuldungun mu”.

 5. 1) Juan 15:9, 10 ñi feypin mu, ¿chumngelu amuldungukeiñ? 2) Jesus, ¿chumngechi kimeltufi tañi pu apostol ñi duamfalngen tañi afeluwnoal?

⁵ (Papeltunge Juan 15:9, 10). Kafey amuldungukeiñ Ngünechen ñi Ngünenien fente taiñ piwkeyefiel ta Jewba ka Jesus (Marku 12:30; Juan 14:15). Jesus feypifi tañi pu apostol: “Müleaymün iñche ñi piwkeyen mew”. ¿Chumngelu feypifi tüfa? Pu disipulu duamniealu am ñi afeluwnoal tañi küme yenieal ñi kristianongen, Jesus kimniefuy tüfa. Feymu Juan 15:4-10 mu, Jesus feypifi tañi pu apostol “amulemün” ka kakelu femngechi dungu, fey ñi kimal engün tañi duamfalngen ñi afeluwnoal.

 6. ¿Chumngechi pengelkeiñ taiñ küpa mülen Jesus ñi piwkeyen mu?

⁶ Küpa müleiñ Jesus ñi piwkeyen mu ka küpa ayüwülkefiyiñ. ¿Chumngechi pengelkeiñ tüfa? Inanieafiyiñ Jesus ñi werkün dungu. Ngüneduamnge kidu ñi feypin: ‘Iñche inaniefiñ ta Chaw ñi werkün dungu ka mülen kisu ñi piwkeyen mew’ (Juan 15:10). Jesus feypieiñmew taiñ ka femngechi femal, kidu am taiñ elkünuetew kiñe inayentufal (Juan 13:15).

 7. Taiñ feyentual, ¿chumngelu müley taiñ nieal piwkeyen?

⁷ Taiñ feyentual, müley taiñ nieal piwkeyen. Jesus küme pengeli tüfa, feymu feypi: ‘Tati llowfilu iñche ñi werkün dungu ka inaniefilu, fey ta kimfali rüf mew ñi piwkeyenieetew’ (Juan 14:21). Jesus ñi werkün dungu Jewba mu küpay, feymu amuldunguliyiñ, chumngechi taiñ werküetew Jesus, fey pengelaiñ taiñ piwkeyefiel ta Chaw Jewba (Matew 17:5; Juan 8:28). Kafey pengel-liyiñ taiñ piwkeyefiel ta Jewba ka Jesus, kidu engu kelluaeiñmu taiñ müleal ñi piwkeyen mu, fey piwkeyeaeiñmu llemay.

 8. ¿Chumngelu amuldungukeiñ?

⁸ Kafey iñchiñ amuldungukeiñ taiñ ngüfetuafiel pu che epe akulu am Jewba tañi antü. Biblia feypi ñi chumün Noe: “Wewpikefuy ta che ñi nieafel lif mongen” (papeltunge 2 Pedro 2:5). Noe amuldungufi pu che petu ñi küpanon ti Fütra Mangin Ko, fey ngüfetupelafi ñi pürüm apümngeal ti wedake dungu. Rakiduamafuiñ tüfa Jesus feypilu kay: “Feychi tripantu mew petu ngenolu tati fütra tripakon, tati pu che ikawmekey ka putumekey ka kureyewmekey engün. Fey konlu wüla ta Noe tañi wampo ruka mew, fentepuy engün ñi fill meken. Welu petu tañi chem rakiduamkülenon engün, akuy tati tripakon [feyentulayngün akulu wüla ti Fütra Mangin Ko, Traducción del Nuevo Mundo (TNM)], fey kom ürfi engün. Ka femngechi femay ta wiñometule Ngünechen ñi Fotüm” (Matew 24:38, 39). Pu che allkütulafi ta Noe, welu kidu fentekünulay ñi amuldungucheal tañi feypietew Jewba.

 9. Ñi feypin Ezequiel 3:18, 19 ka 18:23, ¿chumngechi kellukeeiñmu ñi amuleal taiñ amuldungun?

⁹ Famülke mu, amuldungucheliyiñ Ngünechen ñi Ngünenien mu, pu che kimürpuafuy ñi chumafel Chaw Dios küpalechi antü mu tañi kümelkayafiel pu che. Jewba reke rakiduamkeiñ, kidu feypi: “¿Ayüwülkeenew am kiñe weda che ñi lan? [...] ¿Ayülayafun am ñi elkünual tañi rüpü, femngechi ñi mongeleal?” (Ezequiel 18:23). Feymu ayüleiñ pu che taiñ allkütuaetew, fey ñi lanoal. Kafey Jewba ngüfetueiñmew: “Iñche feypifili kiñe weda che: ‘Rüfkünu may layaymi’, welu eymi kimeldungunofilmi, ka dungunofilmi ñi ngüfetuafiel tati weda che ta elkünutual ñi weda miyawken, fey ñi mongelekayal, feymu tañi welulkan mu layay wedañmangelu kay, welu iñche ramtukadunguaeyu tati weda che ñi mollfüñ mu. Welu eymi kimeldungufilmi tati weda che, fey kidu elkünutunole ñi weda femün ka tañi weda miyawken, kidu ñi welulkan mu layay, welu rüfkünu may kidu tami mongen montulaymi” (Ezequiel 3:18, 19). Feymu amuldungulu iñchiñ fill ruka püle kam chew ñi rupaken fentren che, ngüfetukefiyiñ tunten che taiñ pefiel, fey engün ñi kimal tañi küpayal Chaw Ngünechen ñi Ngünenien ka ñi apümkangeal ti wedake dungu (Daniel 2:44; Apokalipsi 14:6, 7).

10. 1) Matew 22:39 ñi feypin mu, ¿chumngelu amuldungukeiñ? 2) Filipo mew Pablo ka Silas, ¿chumngechi kellufingu ti longkolelu karsel mu?

¹⁰ Kafey fentekünukelaiñ taiñ amuldungun fente taiñ piwkeyefiel pu che (Matew 22:39). Feymu amuleiñ taiñ amuldungun mu, kimnielu kay iñchiñ pu che taiñ allkütuafetew rupale engün wedake dungu mu. Rakiduamnge tüfa, pu kayñetufilu ta Pablo ka Silas karseltukufi Filipo waria mu. Welu pun mew rupay kiñe fütra nüyün, fey nülankepi karsel ñi wülngiñ. Ti longkolelu karsel mew müna llükay, rakiduamlu am pu püresu ñi kom lefmawün engün, feymu langümuwafulu. Welu Pablo katrütueyew ka feypieyew: “¡Chem wesa femuwkilnge rume!”. Fey ti longkolelu karsel mu ramtufi: “¿Chuman am tañi montuam?”. Fey Pablo ka Silas wiñoldungueyew: “Feyentuaymi ta Ñidol Jesus mew. Femngechi montuaymi” (Hecho 16:25-34).

11. Ñi rupan ti longkolelu karsel mu, ¿chem kimeltueiñmew ti amuldungun mu?

¹¹ Tüfachi nütram, ¿chem kimeltueiñmew ti amuldungun mu? Ngüneduamnge tüfa: dew rupalu ti fütra nüyün, fey müten ti longkolelu karsel mu küme elkünutuy ñi rakiduam ka eluwi ñi kellungeal. Ka femngechi famülke mu, kiñeke che rupalu wedake dungu mu, küme elkünutuafuy ñi rakiduam ka eluwafuy taiñ allkütuaetew. Kiñeke che weda duamküleyngün niewenolu am tañi küdaw kam püntüwlu ñi afkadi mu. Kakelu rume weñangküleyngün kimlu ñi weda kutrankülen kam lalu kiñe tañi pu che. Rupalu tüfa, pu che ramtuwafuy fentren falinke dungu turpu ñi ramtuwkenofel. “¿Chuman am tañi montuam?”, ramtuwafuyngün kütu. Fey küpa allkütuafeiñmu chi, turpu ñi femnofel rume.

12. ¿Chumngelu küpa amuleiñ taiñ amuldungun mu?

¹² Feymu amuleliyiñ taiñ amuldungun mu, pepikawküleaiñ eluwle pu che ñi llowal taiñ werkün dungu yafültukuchekelu (Isaías 61:1). Kiñe lamngen doy 38 tripantu wünelelu amuldungun mu, Carla pingelu, feypi: “Pu che ngünam yeniey ñi mongen. Feymu duamniey ñi allkütual ti kümeke dungu taiñ amuldungukeel”. Kangelu lamngen 34 tripantu wünelelu amuldungun mu, Eva pingelu, feypi: “Famülke mu, pu che rume weda duamkülekey. Rüfkünu küpa kellukefiñ engün. Feymu amuldunguken”. Feley tati, taiñ piwkeyechen yafültukuaeiñmu taiñ amuleal amuldungun mu.

13, 14. 1) ¿Chem yewün pengeli Juan 15:11? 2) ¿Chumngechi llowafuiñ Jesus ñi ayüwün? 3) Ti ayüwün, ¿chumngechi kellukeeiñmu taiñ amuldungual?

¹³ Feychi pun petu ñi lanon, Jesus feypi kiñeke yewün ñi llowal pu apostol, tüfa kellueyew ñi amuleal tañi amuldungun mu. ¿Chemke yewün am chi? Tüfa, ¿chumngechi kelluafeiñmu famülke mu?

¹⁴ Ayüwün. ¿Nüngayelkeeiñmew ti amuldungun? Femlay llemay. Jesus nütramkalu ti anüm ofad mu, feypi taiñ ayüwülkeetew ti amuldungun (papeltunge Juan 15:11). ¿Chumngechi am? Rakiduamnge Jesus ñi nütram mu, tüfa feypi tati anüm ofad fey ta Jesus, ka ti row fey tañi pu disipulu. Feymu tati row ñi llowal ti ko ka kakelu dungu tañi küme tremal, duamniey ti anüm ofad. Ka femngechi iñchiñ taiñ llowal ayüwün, duamnieiñ kiñewküleal Jesus iñchiñ ka inayentuñmayafiel ñi femelchi dungu. Jesus niey ayüwün femlu kay Jewba ñi ayükeel, iñchiñ ka femafuiñ (Juan 4:34; 17:13; 1 Pedro 2:21). Kiñe lamngen doy 40 tripantu wünelelu amuldungun mu, Ana pingelu, feypi: “Rumel ayüwülkeenew ti amuldungun, fey tüfa yafültukuenew ñi amuleal tañi poyefiel ta Jewba”. Ti ayüwün newentukuaeiñmu ñi amuleal taiñ amuldungun, allkütunoeliyiñmu rume pu che (Matew 5:10-12).

15. 1) ¿Chem yewün pengeli Juan 14:27? 2) Ti tüngün, ¿chumngechi kellukeeiñmu ñi amuleal taiñ amuldungun mu?

¹⁵ Tüngün (papeltunge Juan 14:27). Ti antü petu ñi lanon Jesus, feypifi tañi pu apostol: “Eleluwayiñ iñche ñi küme tüngün”. Jesus ñi tüngün, ¿chumngechi kelluafeiñmu amuldungun mu? Amuleliyiñ taiñ amuldungun mu, tüngküleaiñ, kimnielu am taiñ ayüwülkefiel ta Jewba ka Jesus (Salmo 149:4; Romanu 5:3, 4; Kolosense 3:15). Kiñe peñi 45 tripantu wünelelu amuldungun mu, Alfredo pingelu, feypi: “Kansaken amuldunguyawlu iñche, welu tüfachi küdaw rüf ayüwülkeenew ka kelluenew ñi küme yenieal tañi mongen”. ¡Rume mañumküleiñ, nielu am iñchiñ ta tüngün!

16. 1) ¿Chem yewün pengeli Juan 15:15? 2) Pu apostol, ¿chumngechi amuleafuyngün ñi weniyefiel ta Jesus?

¹⁶ Taiñ weniyefiel ta Jesus. Feypifilu tañi pu apostol ñi nieal ayüwün, Jesus feypifi engün chumngelu ñi falin-ngen piwkeyecheal rüf piwke mu (Juan 15:11-13). Fey feypifi engün: “Iñche ñi pu weni piwayiñ”. ¿Falin yewün no am weniyeafiel ta Jesus? Feymu pu apostol, ¿chumngechi amuleafuyngün ñi weniyefiel ta Jesus? Kidu feypifi: “Werküwiyiñ [...] tamün wülael reke rume fentren fün” (papeltunge Juan 15:14-16). Femngechi yafültukufi engün ñi amuleal tañi amuldungun mu. Epu tripantu petu ñi rupanon tüfa, Jesus feypifi tañi pu apostol: “Amulelmün fey kimelaymün ñi fülkülepan Ngünechen tañi longko ülmenngeael” (Matew 10:7). Feymu ti pun petu ñi lanon, Jesus yafültukufi tañi pu disipulu ñi newenküleal amuldungun mu (Matew 24:13; Marku 3:14). Jesus kimniefuy ñi küdawngen inayal kidu ñi werkün dungu. Welu pu disipulu amuleafuyngün ñi amuldungun mu, femngechi ñi weniyeafiel Jesus. Kangelu yewün kelluafeyew engün. Inaduamafiyiñ.

17. 1) ¿Chem yewün pengeli Juan 15:7? 2) Feychi yewün, ¿chumngechi kellufi tati pu disipulu?

¹⁷ Ñi wiñoldungungeel taiñ ngillatun. Jesus feypi: “Ngillatuaymün chem rume tamün ayüel, fey iñche ñi Chaw eluaeymünmew tamün ngillatuel” (Juan 15:7, 16). Jesus ñi feypikünun, ¡müna yafültukupelafi pu apostol!b (Inaduamnge ti kimal dungu). Jesus feypifi tañi pu apostol kidu ñi layal, welu kidu engün küme longkontukulafingün. Feymu lalu wüla Jesus kidulelu trokiwpelayngün, welu tüfa feyngelafuy, Jewba am eluwkülelu ñi wiñoldungual tañi ngillatun ka ñi kelluafiel tañi amuldungual engün. Feymu pichi rupalu Jesus ñi lan mu, pu apostol llellipufingün ta Jewba ñi kelluaetew tañi fütra piwkekünuwal, fey Jewba elueyew ñi ngillatuel engün. Jesus ñi feypikünun femtripay llemay (Hecho 4:29, 31).

18. ¿Chemke yewün kellukeeiñmu famülke mew?

¹⁸ Ka femngechi rupay famülke mu. Amuleliyiñ taiñ amuldungun mu, amuleaiñ taiñ weniyefiel ta Jesus. Ka küdawtuliyiñ taiñ amuldungual, ngillatuafuiñ ta Jewba taiñ kelluaetew, ka maneluwafuiñ taiñ wiñoldunguaetew (Filipense 4:6, 7). Müna mañumküleiñ taiñ weniyekefiel ta Jesus ka taiñ wiñoldunguetew Jewba taiñ ngillatun. Tüfachi epu yewün kellukeeiñmew ñi amuleal taiñ amuldungun (Santiaw 1:17).

19. 1) ¿Chumngelu amuldungukeiñ? 2) ¿Chem kelluaeiñmu ñi dewmayal ti küdaw taiñ eluetew Jewba?

¹⁹ Tüfachi chillkatun mu kimürpuiñ meli dungu chumngelu taiñ amuldungual: ñi püramyengeal Jewba ka ñi yamniengeal tañi üy, fente taiñ piwkeyefiel ta Jewba ka Jesus, taiñ ngüfetuafiel pu che, ka fente taiñ piwkeyecheken. Ka inaduamiyiñ meli yewün: ti ayüwün, tüngün, taiñ weniyefiel ta Jesus ka ñi wiñoldungungeken taiñ ngillatun. Tüfachi meli yewün kelluaeiñmu ñi dewmayal ti küdaw taiñ eluetew Jewba. Taiñ Chaw Ngünechen müna ayüwküley, ¡amulelu am taiñ wülken “fentren fün”!