“Nengümnengümtuafiñ fillque troquiñche”

1, 2. ¿Chem feipi Ageo ñi rupayal fachantü?

NEPAL mapu mu 2015 tripantu mu, ruparumei quiñe fütra nüyün. Tati pu che mülelu fei mu, feipi: “Pichiñma mu müten, tati tienda ca tati edificio huecharcahui”. “Com tati pu che mülelu fei mu, müna llicalefuingün”. “Fentren che epu minuto durai ti fütra nüyün pi. Huelu iñche rupanoalu troquifiñ”. Eimi femngechi dungu mu rupalmi, ngoimalayafuimi llemai.

² Ca femngechi dungu rupamequei fachantü. Quiñe fütra nüyün no tati, huelu mai Chau Jehová nengümnengümyefi reque com ti Mapu. Ti profeta Ageo feipicünui: “Tüfa ñi feipin ta Jehová, tati ñidolcülelu pu hueichafe mu: ‘Pichiñma mu, ca quiñe rupa nengümcayafiñ tati huenu ca tati Mapu, tati lafquen ca tati anquen mapu’” (Ageo 2:6).

 3. ¿Chemu feipiafuiñ Ageo ñi feipicünuel quiñe nüyün no tati?

³ Rupan mu nüyün com huecharcaquefi. Huelu femngechi femquelai ñi feipicünuel ta Ageo, doi mai cümeque dungu rupaquei. Jehová feipicünui: “Nengümnengümtuafiñ fillque troquiñche com mapu mülelu, fei tati doi falilu ñi nieel engün conpayai tüfachi ruca meu, fei iñche ñi duam mu tüfachi ruca püramyengeai” (Ageo 2:7). ¿Chumngechi huechurpui feitachi profecia Ageo ñi antü meu? Ca ¿chumngechi huechurpui fachantü? Iñchiñ cai, ¿chumngechi quelluntucuafuiñ ñi huechurpual Ageo ñi feipicünuel? Tüfachi troquiñ mu inaduamaiñ feitachi ramtun.

 4. ¿Chemu huercüngei ta Ageo?

⁴ Pu judio rume fentren tripantu mu mülepuquefui Babilonia mu. Feichi tripantu mu, 537 mu, huiñotuingün Jerusalén mu. Ageo ca huiñopetulai. Quiñeque cüyen rupalu, pu judio deumatufingün ti ngillatuhue ruca (Esd. 3:8, 10). Huelu tati pu che inafülcüleyelu caiñetueyu, feimu tati pu judio fentecünuingün tañi cüdau engün (Esd. 4:4; Ageo 1:1, 2). Fei 520 tripantu mu, Jehová feipifi ta Ageo ñi yafültucuafiel pu judio tañi deumanentuafiel ti ngillatuhue rucab (Esd. 6:14, 15).

 5. Pu judio, ¿chemu fente yafültucufeyu Ageo ñi feipin?

⁵ Ageo huercüngei ñi quelluafiel pu judio, fei ñi doi maneluhual Jehová mu engün. Nehuen piuque mu, feipifi tati pu judio: “‘Com eimün tüfachi mapu meu mülechi pu che nehuencüleaimün ca cüdaucüleaimün’, feipi Jehová. ‘Iñche ta mülen eimün meu’, feipi Jehová ñidolcülelu pu hueichafe mu” (Ageo 2:4). Pu judio allcütulu Jehová tañi ñidolcülen pu hueichafe mu, tüngduampelaingün. ¿Chumngelu? Jehová loncolei com tati pu cümeque püllü mu. Feimu ñi cüme amuleal tati pu judio, mülefui ñi maneluhual Jehová mu.

 6. Ñi feipicünuel ta Ageo, ¿chem maneluhun elufi tati pu judio?

⁶ Jehová feipifalfi ta Ageo mu ñi nengümcayafiel com pu troquiñche. Feitachi profecia tüngduamelfi pu judio fentecünuquefilu tañi cüdau. Feitachi profecia pengeli Jehová ñi nengümcayafiel quiñe fütra gobierno, Persia pingelu. Ageo ñi feipicünuel elufi tañi maneluhual engün tati pu judio. Femngechi deumanentuafuingün ti ngillatuhue ruca ca quiñehuai quisu engün meu pu judio tuhun-ngenolu ñi poyeafiel ta Jehová. Ageo ñi huercün dungu müna yafültucupelafi pu judio (Zac. 8:9).

 7. ¿Chem cüdau mu quelluntucuafuiñ?

⁷ Chumngechi ñi feipicünuel ta Ageo, Jehová fachantü nengümcamequefi tati pu troquiñche. Iñchiñ quelluntucuafuiñ feitachi cüdau mu. Raquiduamnge: 1914 mu Jehová reycünufi ta Jesús (Sal. 2:6). Pu che tañi gobierno ayülafui ñi ngünenierpun Chau Dios tañi Gobierno. ¿Chumngelu am? Cuifi mu, ngequelafui quiñe rey no rume cüpalu Jehová mu, huelu 1914 mu mülerpui (Luc. 21:24). Feimu 1919 tripantu mu, Jehová tañi pu che feipifeipiyefi Chau Dios tañi Gobierno müten apümafi com huesaque dungu mülelu Mapu mu. Feitachi amuldungun nengümcafi reque com pu che mülelu Mapu mu (Mat. 24:14).

 8. Ñi feipin Salmo 2:1-3, ¿chumngechi llouquefi taiñ amuldungun tati pu che?

⁸ ¿Chumngechi llouquefi feitachi falinque dungu tati pu che? Epe com engün ayülafi. Pilaingün ñi llohuafiel Jehová tañi elelchi rey (papeltunge Salmo 2:1-3). Cüme dungu troquiquelafingün taiñ amuldungun cüdau. Quiñeque gobierno catrütuquefi taiñ pu peñi ca pu lamngen ñi amuldungual. Fentren gobernante feipiquei ñi poyequefiel ta Dios, huelu ayüquelaingün ta Dios tañi ngünenieaeteu. Fachantü pu gobierno caiñetuquefingün Jesús tañi pu inanieteu, femngechi chaftuquefingün ta Jesús (Hech. 4:25-28).

 9. ¿Chumquei Jehová ñi quelluafiel pu che llouquenolu taiñ amuldungun?

⁹ ¿Chumquei Jehová ñi quelluafiel pu che llouquenolu taiñ amuldungun? Biblia feipi: “Eimün pu ngünenielu, cüme raquiduamaimün. Cüme llohuaimün tamün norümtungeal, eimün pu juzgaquefilu pu che. Poyefimün ta Jehová yamün meu, ca ayüucülemün yamün mu. Püramyefimün ti fotüm, femnolmün Chau Ngünechen illcurpuai ca layaimün ti rüpü meu, quisu am eluucülelu ñi illcual. Ayühun-ngei com tati pu maneluulu Quisu meu” (Salmo 2:10-12). Chau Jehová piuqueyenquechi eluquefi ta tiempo tati pu che ñi norümtual tañi raquiduam, fei ñi eluhual tañi ngünenieaeteu Chau Dios tañi Gobierno. Huelu pichi faltalei müten ñi afal com huesaque dungu (Is. 61:2; 2 Tim. 3:1). Rume falin-ngei pu che tañi quimafiel ta Jehová, fei ñi poyeafiel.

10. Ñi feipin Ageo 2:7-9, ¿chumi chi am chi pu che nengümcangelu?

¹⁰ Ageo feipicünui ñi nengümcangen mu tati pu che, pu ñom piuquengelu conpuai Jehová ñi ruca mu ñi poyeafielc (papeltunge Ageo 2:7-9). Isaías ca Miqueas ca feipicünuingu ñi rupayal pichilehuechi antü meu (Is. 2:2-4; Miq. 4:1, 2).

11. ¿Chumi quiñe peñi nütramcangelu Jehová ñi dungu?

¹¹ Inaduamaiñ ñi rupan taiñ peñi Ken, cüdauquelu Betel Estados Unidos mapu mu. Rupafulu rume 40 tripantu, taiñ peñi petu acordaquei ñi rupan hue allcütulu ti cümeque dungu Chau Dios mu. Fei feipi: “Hue nütramcangelu iñche, quimürpun ñi pichilehuen ñi afal com huesaque dungu, feimu rume ayühun. Quimürpun tañi coneltunoal tüfachi Mapu mu mülechi dungu, femngechi müten hueniyeafun Chau Dios ca nierpuafun rumel mongen. Fei llellipufiñ Jehová, fei femün. Pürüm eluhun tañi ngünenieaeteu Chau Dios ñi Gobierno”.

12. Jehová, ¿chumngechi cümelcamequefi tañi pu che?

¹² Quimfali Jehová ñi cümelcamequefiel tañi pu che. Feitachi afaelchi antü meu, rume fentren che eluuquei ñi poyeafiel ta Jehová. 1914 tripantu mu, pichilequefuiñ müten. Fachantü doi pura millonengetuiñ. Ca fill tripantu doi milloneque che trahuluuquei iñchiñ mu taiñ acordayafiel Jesús tañi lan. Feimu rume fentren che conpuquei Jehová tañi troquiñche mu. Femngechi tati doi falilu conpuquei reque Jehová tañi ruca meu, chumngechi ñi feipicünuel ta Ageo. Feichi pu che cüme elcünutuquei tañi mongen. Tañi femün mu engün, püramyengequei Jehová tañi üi (Efes. 4:22-24).

13. Ñi tremcülerpun mu Jehová tañi pu che, ¿ca chem profecia huechurpumequei? (Inaduamnge ti adentun huenulelu).

¹³ Fente tañi tremcülerpun Jehová tañi troquiñche, ca huechurpui caquelu profecia. Por ejemplo, femtripalei ñi feipin Isaías 60:22. Feipilei: “Tati pichingelu huarancaquechingerpuai, ca quiñe nehuen-ngechi troquiñchengerpuai. Iñche tati, Jehová eluafiñ ñi alün-ngerpual puuchi antü mu”. Tüfachi fentren che ñi conquen Jehová ñi troquiñche mu, rume adümuucüleingün ca müna ayüqueingün ñi amuldungucheal. Tañi adümuhun mu engün, cüme amulngequei Jehová tañi cüdau. Femngechi femtripamequei ñi feipin Isaías ñi pütocoñmangeal “huall mapu mülechi pu che ñi lichi” (Is. 60:5, 16). Jehová ñi pu che ñi quelluntucun mu, amuldungungequei doi 240 troquiñ mapu mu, ca deumangequei publicaciones doi mil quehun dungu mu.

14. ¿Chem mülei ñi dullial ti pu che fachantü?

¹⁴ Ñi nengümcangen mu reque tati pu che, mülei ñi dullial ñi quelluntucual pu che tañi gobierno cam Chau Dios tañi Gobierno. Jehová tañi pu che inaniequei ñi feipin tati ley, huelu coneltuquelai politica dungu meu (Rom. 13:1-7). Jehová ñi pu che quimniei Jehová tañi Gobierno müten com cüme elcünutuai ti huesaque dungu. Tüfachi Gobierno coneltuquelai tüfachi Mapu mu müleyechi dungu (Juan 18:36, 37).

15. Ñi feipin Apocalipsis, ¿chumngeai Jehová tañi pu che?

¹⁵ Apocalipsis pingechi lifru pengeli ñi caiñetungequen Jehová tañi pu che ti afaelchi antü meu. Huelu cüpalechi antü meu, doyelcüleai tüfa. Pu gobierno obligayaiñmu taiñ quiñehual fei engün mu. Feimu iñchiñ tati pu rüfngechi cristiano caiñetungeaiñ taiñ quelluntucunofiel mu tati pu gobierno (Apoc. 13:12, 15). Pu gobierno obligayafi ‘ta itrocom pichiqueche ca fütaqueche, ricu ca pofre, lifrelelu ca esclavongelu, ñi tuculelngeal ta quiñe marca tañi man cuhu meu cam tañi tol meu’ (Apoc. 13:16). Cuifi mu pu esclavo marcacünungequefuingün ñi pengelal inei tañi ngen-ngen ta quisu engün meu. Ca femngechi cüpalechi antü meu, pu che marcacünungeai reque ñi pengelal inei tañi quelluntucuquefiel. Tañi raquiduam mu ca femün mu engün, pengelaingün tañi coneltuqueel pu gobierno mu.

16. ¿Chumngelu nehuentuleafuiñ taiñ püntütripanoal Jehová mu?

¹⁶ Tati pu llounolu tati marca rupayaingün huesaque dungu mu. Tati lifru Apocalipsis feipi inei no rume nienolu tati marca ‘pepi ngillacalayai ca pepi fendelayai chem rume’ (Apoc. 13:17). Jehová ñi pu che quimniei Jehová ñi chumafiel fei ti pu che nielu tati marca (Apoc. 14:9, 10). Feimu, ¿lloupeafiyiñ mai tati marca? ¿Quelluntucupeafiyiñ mai pu gobierno? ¡Femlayafuiñ llemai! Doi mai huirintucunieaiñ reque taiñ cuhu meu Jehová tañi ngen-ngen iñchiñ mu (Is. 44:5). Feula mülei taiñ nehuentuleal taiñ püntütripanoal Jehová mu. Femliyiñ, Jehová ayühunquechi feipiaiñmu quisu tañi pu chengen iñchiñ.

17. ¿Afpeai mai quiñe antü Jehová tañi paciencia?

¹⁷ Jehová fentren paciencia nielqueiñmu, quisu am ayünolu inei no rume ñi layal (2 Ped. 3:9). Jehová eluquefi ta tiempo tati pu che ñi cüme raquiduamtual fei ñi serfiaeteu engün. Huelu Jehová rumel paciencia nielayai. Com tati pu inaquenofilu ta Jehová, chumngechi ñi rupan ta Faraon ca femngechi femngeai. Jehová feipifi ta Faraon: “Iñche ayüfuli, deu langümafeyu quiñe huesa cutran meu. Fantepu meu, eimi ca tati pu egiptoche deu ngehuelayafuimün. Huelu elunieyu tami mongeleal tüfachi dungu mu: tami peal iñche tañi pepiluhun ca femngechi com pu che tañi quimal iñche tañi ineingen” (Éx. 9:15, 16). Puhuai chi antü, fei com pu che quimai Jehová tañi rüf Ngünechen-ngen (Ezeq. 38:23). ¿Chumngechi femai tüfa? Peaiñ.

18. 1) Ñi feipin Ageo 2:6, 20-22, ¿ca chem dungu rupayai? 2) ¿Chumngelu quimnieiñ ñi feipicünuel ta Ageo ñi huechurpual cüpalechi antü meu?

¹⁸ (Papeltunge Ageo 2:6, 20-22). Tati apostol Pablo feipi Ageo ñi feipicünuel huechurpuai cüpalechi antü meu. Pablo feipi: “Huelu feula feipicünui: ‘Ca quiñe rupa nengümcayafiñ tati mapu, huelu ca nengümcayafiñ tati huenu’. Feipilu ‘ca quiñe rupa’ pengeli ñi ngehuenoal feichi dungu nengümcangelu, tüfa tati deumangelu, femngechi ñi mülecayal tati nengümcangenolu” (Heb. 12:26, 27, TNM). Ñi feipin ta Pablo trürümfalngelai ñi feipin mu ta Ageo 2:7. Ñi feipin ta Pablo com pu pinolu ñi ngünenieaeteu Chau Dios, Faraon reque apümngeaingün.

19. ¿Chem nengümcangelayai? ¿Chemu feipiafuiñ?

¹⁹ ¿Chem nengümcangelayai? Chau Dios tañi Gobierno llemai. Pablo feipi: “Iñchiñ ta elungeaiñ taiñ ngünenieal, fei tüfa nengümcangelayai. Feimu llounieafiyiñ Chau Ngünechen ñi fütra cutranpiuqueyechen. Fei tüfachi fütra cutranpiuqueyechen mu serfinieafiyiñ ta Chau Ngünechen chumngechi ñi ayünieel, fütra yamün meu ca taiñ afmatufiel mu” (Heb. 12:28, TNM). Fei llemai, apümcangele com pu caiñetufilu ta Jehová, Chau Dios tañi Gobierno müten mülenagai. Chumcaunorume aflayai (Sal. 110:5, 6; Dan. 2:44).

20. 1) ¿Chem mülei ñi dullial che? 2) ¿Chumngechi quelluafuiñ tati pu che?

²⁰ Ngünamcalayafiyiñ tati tiempo. Tati pu che mülei ñi cüme dullial chem tañi chumal engün. Quisu engün eluule engün ñi coneltual tüfachi Mapu mu müleyechi dungu, apümcangeaingün. Huelu quisu engün eluule engün ñi poyeafiel ta Jehová, nierpuafuingün afnoachi mongen (Heb. 12:25). Amuldunguleliyiñ, quelluafuiñ pu che ñi cüme dullial engün. Quellunieyeafiyiñ mai alünque che ñi quelluntucual Chau Dios ñi Gobierno. Loncontucunieaiñ Jesús tañi feipin. Ti cümeque dungu Chau Dios ñi Gobierno mu “quimelngeai ta com Mapu meu, femngechi com troquiñque mapu ñi quimal engün; fei hula acuai ñi afael ta antü” (Mat. 24:14, TNM).