Septiembre

Aka oraqenkkäna ukhajja, Jesusajj wali musparkañwa jaqenakar yatichäna, ukhamarus yaqhepajj jukʼampinak lurañapwa munapjjäna. Ukampis alajjpachat mä señal jan uñachtʼayañ munapjjepan Jesusat pächasjjapjjänwa, janiw Mesiasarjam katoqapkänti (Mat. 16:4). Mesiasat parlkasin Isaías profetajj akham sänwa: ‘Janiw arnaqaskaniti, janiw jachʼats arskaniti, jupan arupajj janirakiw callenakansa istʼaskaniti’ sasa (Is. 42:1, 2). Jesusajj predickäna ukhajja, janiw mayninakamp jachʼañchayasiñ thaqkänti. Janiw templonak lurañaru uchaskänti, janirakiw religión pʼeqtʼirinakjamas isiskänti, ni wali aytat sutimpi aruntayasiñsa munkänti. Jupar juzgasipkäna ukhajja, jakäwip aptʼasirjamäkasas janiw Herodes reyir musparayañatakejj mä milagro lurkänti (Luc. 23:8-11). Cheqas Jesusajj mä qhawqha milagronak luränwa, ukampis predicañaw jupatakejj jukʼamp wakiskirïna, “ukatakiw nayajj jutta” sasaw discipulonakapar säna (Mar. 1:38). w21.05 pág. 4 párrs. 9, 10

‘Wiñay jakañatak suma chuymanïpki’ ukanakaruw thaqtanjja (Hech. 13:48). Yateqerinakan Jesusan discipulopar tukupjjañapatakejja, akanak lurapjjañapatakiw yanaptʼañasa: 1) kuntï Bibliat yateqapki uk amuyapjjañapataki, 2) uk creyipjjañapataki, 3) ukarjam sarnaqapjjañapataki (Col. 2:6, 7; 1 Tes. 2:13). Congregacionanjja, taqeniw yateqerinakar munasiñamp uñjas yanaptʼsna, tantachäwinakar jutapkani ukhajj sum katoqtʼasaw yanaptʼaraksna (Juan 13:35). Yatichirejja inas yateqerir yanaptʼañatakejj walja tiempo apsusiñapächini, chʼamachasiñaparakïchini, ukhamat “wali suma saytʼayatäki” uka pantjat amuyunakapa, jan wali luräwinakap apanukuñapataki (2 Cor. 10:4, 5). Yateqerin taqe uka cambionak lurañapatakisa, bautisasiñatak wakichtʼatäjjañapatakisa, walja phajjsinak yanaptʼañaw munasispa. Ukampis chʼamachasitasajj janiw inamayäkaniti. w21.07 pág. 3 párr. 6

¿Jehová Diosan Testigonakapakiw kunatï cheqäki uk yatichtan, kunjamtï adorktan ukakiw jupar gusti sasat confiytan? ¿Cheqapunit ukanakat jan pächasksna? Pablojja creykäna ukat janiw pächaskänti (1 Tes. 1:5). Janiw kusisitätap laykukejj ukham creykänti, antisas Diosan Arupatwa yatjjatäna. Jupajj “taqpach Qellqatajj Diosan amuytʼayatawa” sasaw creyïna (2 Tim. 3:16). Diosan Arupat yatjjatkasajja, Jesusajj jutañapäkäna uka Mesiasätap kunanakas uñachtʼayäna ukwa jikjjatäna. Ukampis religión pʼeqtʼirinakajja ukanak yatkasas janiw ukar creyipkänti, Diosat cheq yatichasipkta sasaw sapjjäna, ukampis janiw ukarjam lurapkänti (Tito 1:16). Pablojj janiw jupanakjamäkänti, Diosan Arupan qellqatäki ukanakat kawkïrsa creyini, kawkïrsa jan creykarakini uk janiw ajllkänti. “Diosan taqe amtanakap” yatichañatakisa, ukarjam sarnaqañatakis dispuestokïnwa (Hech. 20:27). w21.10 pág. 18 párrs. 1, 2

Jiwasas maynirojj predickstan ukat yaticharakstanjja, ‘Diosaw juparojj jiltayi’ (1 Cor. 3:6, 7). Jehová Diosatakejj taqe jaqenakaw wali valorani. Akapacha janïr tukuskipanjja, Jesusamp chika trabajiñajj mä suma bendicionawa (Ageo 2:7). Predikir sarktan ukhajja, kunjamtï mä minan allintat jaqenakar salvir sarapki uka jaqenakar uñtasitätanwa. Jupanakat inas mä qhawqhaniki jaqenakar jakkiri jikjjatapjjchini, ukampis taqenin yanaptʼapjjatapaw jukʼamp wakiskirejja. Predicañampejj ukhamarakiwa: Supayan akapachapatjja, qhawqha jaqenakarus salvasiñapatak yanaptʼañäni uk janiw yatktanti, ukampis Diosajj jiwasanakat mayniruw jupanakar yanaptʼayistaspa. Bolivian jakasiri, Andreas jilatajj akham siwa: “Maynin Diosar uñtʼañapatakisa bautisasiñapatakis taqeniw yanapttʼanjja” sasa. Ukhamajj jan qarjtasa kusisita yatiyañatak chʼamachasiskakiñäni. Ukhamatwa Jehová Diosajj bendisistani, wali kusisitaw yatiyarakiñäni. w21.05 pág. 19 párrs. 19, 20

Animalanak katurejja, mä animal katuña jan ukajj jiwayañwa muni. Ukatakejj kunayman trampanakwa apnaqe, Bibliansa uka kasta trampanakat parlarakiwa (Job 18:8-10). ¿Kunsa animalan trampar jaltʼañapatakejj luri? Kawkjanakansa sarnaqe, kunas gusti, kunjamatsa jan amuyaskipan katjaspa, taqe ukanakwa yatjjati. Supayajj ukhamarakiw kunanaksa lurasktan, kunas gustistu ukanak sum yatjjati. Ukatsti jan amuyaskasin jaltʼañasatakiw mä trampa uchi. Ukampis trampanakapar jan jaltʼañasatakejj kunsa lursna uk Bibliaw sistu, jaltʼsna ukhajj kunsa mistuñatakejj lursna uksa sarakistuwa. Supayajj aka pä trampanakampiw waljanir jan waltʼayi: jachʼa jachʼa tukuñampi, maynitakik taqe kuns munañampi. Ukanakampejj nayratpachaw waljanir jan waltʼayaski. Kunjamtï jamachʼinak katurejj kunatï jamachʼinakar gustki ukampi trampar jaltʼaykejja, ukhamarakiw Supayajj lurañ munistu (Sal. 91:3). Ukampis janiw engañjayasiñasäkiti, kunattejj janïräkipanwa Jehová Diosajj yatiyjjestu (2 Cor. 2:11). w21.06 pág. 14 párrs. 1, 2

Diosar jan jitheqtas serviri edadani jilat kullakanakajja, wali valoranïpjjewa. Janqʼo ñikʼutanakapajj mä coronjamawa sasaw Bibliajj qhanañchi (Prov. 20:29). Ukampis qhawqha valoranïpjjesa uk amuyañajj chʼamakïspawa. Jupanakar valoranit uñjiri wayn tawaqonakajja, jukʼamp sumanakwa yateqapjje. Diosajj wali valoranitwa uka jilat kullakanakar uñji, kunjam suma chuymanïpjjesa uksa valoranitwa uñjaraki. Jupar walja maranak jan jitheqtas servisajj kunanaktï yateqapki ukanak wayn tawaqonakar yatichir uñjasas wal kusisiraki (Job 12:12; Prov. 1:1-4). Walja maranak aguantapjjataps valoranitwa uñji (Mal. 3:16). Jan walinakansa jupanakajj uñjasiwayapkchejja, Diosar confiyasipkakiwa. Diosar uñtʼañ qalltapkäna ukat sipansa, jichhajj jukʼamp confiyasaw jutïr uru suytʼapjje. Diosan sutipatsa ‘awkëjjapjje ukhakam’ parlasipkakiwa, ukatwa Diosajj jupanakar wal munasi (Sal. 92:12-15). w21.09 pág. 2 párrs. 2, 3

Jiwasajj kunjamäsktansa uk sapa mä qhawqha tiempotwa uñakiptʼasiñasa. Kunjamäsktansa uk yatiñatakejja, akham sasaw jisktʼassna: “¿Mayninakat jilankkiristsa ukham amuyasta ukhakit sum jikjjatastjja? ¿Kunatsa congregacionan wal trabajtjja? ¿Mayninakat jilankañ layku, jan ukajj mä jilataru mä kullakaru atipañ laykucha? ¿Jan ukajj Jehová Diosar kusisiyañ laykuch ukham trabajtjja?” sasa. Bibliajja janiw mayninakamp igualayasiñasäkiti sasaw ewjjtʼistu. ¿Kunatsa? Mayninakamp igualayasisin jupanakat jilanksnas ukham amuyassna ukhajj jachʼa jachʼaw tukjjsna. Maysa toqetjja, igualayasisin jupanakat minusäksnas ukham amuyassna ukhajj aynachtʼjjsnawa (Rom. 12:3). Jehová Diosajj janiw suma uñnaqtʼanïtasata, sum parltʼañ yatitasata, wali uñtʼatätasat markapar irpankistuti, jan ukasti jupar munasitasata, Yoqapar istʼatasatwa irpanistu (Juan 6:44; 1 Cor. 1:26-31). w21.07 págs. 14, 15 párrs. 3, 4

Amuyus machaqar tukuyañakejja orasiñasawa, Biblia liyiñasawa, kuntï liyktan ukat lupʼiñasarakiwa. Ukanak luraskakiñäni, Diosarus chʼam mayiskakiñäni ukhajja, jupajj espíritu santopampiw mayninakamp jan igualayasiñatak yanaptʼistani. Diosarakiw jachʼa jachʼat tukjjtan jan ukajj envidiasirëjjtañcha uk amuyasiñatak yanaptʼistani, ukhamächi ukhajj jankʼak cambiañatakis yanaptʼarakistani (2 Crón. 6:29, 30). Kunjamas jikjjatastan uk Jehová Diosajj yatiwa. Akapachan espiritup contra, pantjasitanakas contra nuwasiskatas yatirakiwa. Ukanakar atipjañatak wal chʼamachasiskatas uñjasajj jukʼampiw munasistu. Diosajj qhawqsa munasistu uk amuyasiñatakejj mä taykajj wawapar qhawqsa munasi uka toqetwa parli (Is. 49:15). Jupar taqe chuyma serviñatak chʼamachasitas uñjasajja, ukhamarakiw Jehová Diosajj wal munasistu, uk yatiñajj wali chuymachtʼkiriwa. w21.07 págs. 24, 25 párrs. 17-19

Jehová Diosar serviñan kuna luräwsa katoqkchiñänejja, uk phoqañatak chʼamachasisajj kusisitäñäniwa. Diosan arunakap ‘jan tiemponi’ yatiyapjjañäni, congregacionan kuna luräwinakatï utjki ukans taqe chuyma trabajipjjañäni (Hech. 18:5; Heb. 10:24, 25). Tantachäwinakan arstʼatanakasampi mayninakar chʼamañchtʼañatakejj sum wakichtʼasipjjañäni. Semanan apaski uka tantachäwitak asignación churapkistu uks wali importantet uñjapjjañäni. Congregacionan mä kun lurañatak yanaptʼa mayipjjestani ukhajj horasapar puripjjañäni, confiykayäpjjarakiñäni. Yaqhep luräwinakajj janis importantëkaspa ukham jan amuyapjjañäniti. Trabajos jukʼamp sum lurañatak chʼamachasipjjañäni (Prov. 22:29). Jehová Diosatak wal trabajiñäni ukhajja, ratukiw nayrar sartañäni, wali kusisitarakiñäniwa (Gál. 6:4). Ukatjja kuna luräwtï katoqañ munkayätan uk mayninakajj katoqapjjani ukhas wal kusisirakiñäni (Gál. 5:26). w21.08 pág. 22 párr. 11

Janiw jachʼa jachʼa tukuñasäkiti, Jehová Diosampiw yatichayasiñasa. Kunjamtï mä usojj maynin lloqopar jan waltʼaykaspajja, ukhamarakiw jachʼa jachʼa tukuñajj chuymasar qalarayasin Jehová Diosar istʼañat jarkʼistaspa. Fariseonakajj ukhamarakiw chuymap qalarayasipjjäna, ukatwa Jesusajj Diosan Yoqapätapsa, espíritu santon yanaptʼatätapsa jan creyiñ munapkänti (Juan 12:37-40). Jachʼa jachʼa tukurïpjjatapajj janipuniw walïkänti, ukhamatwa wiñay jakañsa aptʼasipjjäna (Mat. 23:13, 33). Suma jaqëñatakisa, amuyunakas cambiañatakisa, suma amtanakar puriñatakisa, Diosan Arupampi, espíritu santopampi yanaptʼayasiskakiñajj wali importantewa. Humilde chuymanïtap laykuw Santiagojj Jehová Diosamp yatichayasïna, ukaw suma yatichirïñatak yanaptʼäna. w22.01 pág. 10 párr. 7

Orasiñäni ukhajja alajjpachankir Awkisajj istʼistaniwa (Col. 4:2). Diosajj janis jankʼak jayskistaspa ukham inas amuystan, ukampis jupajj ‘horasaparuw’ jaysapjjäma sasaw arsuwayi (Heb. 4:16). Ukhamajja oracionanakasar jankʼak jaysañap munktan ukarjam Diosajj jan jayskistani ukhajja, jupajj pantjaskaspas ukham janipuniw amuyañasäkiti. Sañäni, yaqhepanakajj walja maranakaw kunjamsa Diosan Reinopajj aka jan wali pachar tukjani uk uñjañatak mayisipki. Jesusajja Diosan Reinop mayipjjam sasaw yatichawayistu (Mat. 6:10). Ukampis suykayätan ukarjam akapachar jan tukjasitapat Diosar jan confiyjjsna ukhajja, jan amuytʼasir jaqjamäsnawa (Hab. 2:3; Mat. 24:44). Antisas Jehová Diosar suytʼaskakiñasawa, taqe chuymaw jupar confiyas mayiskakiñasa. Akapachan tukusiñapajj “kuna urünisa kuna horasänisa” uk Jehová Diosajj amtawayjjewa, horasaparuw purinini. Ukajj taqe jiwasatakiw wali askïni (Mat. 24:36; 2 Ped. 3:15). w21.08 pág. 10 párrs. 10, 11

Edadani jilat kullakanakajja, marat maratjamajj janiw nayrjam lurañ puedjjapjjaniti. Superintendente de circuito jilatanakat amuytʼañäni, jupanakajj 70 maranëjjapjje ukhajj yaqha asignacionwa katoqjjapjje. Inas uk phoqañajj qalltan jupanakatak chʼamakïchispa, kunattejj jilat kullakanakar serviñaw jupanakar wal gustäna. Ukampis ‘waynäsipki ukanakan encargasipjjañapaw walïspa’ sasaw amuyapjje. Jupanakajj nayra Israel markankir levitanakjamaw amuyapjje, levitanakajj 50 maranëjjasajj tabernaculon serviñ jaytjjapjjänwa, yaqha asignación katoqasas kusisitäpjjänwa. Taqe chuymaw qhawqtï lurañ puedipkäna uk lurapjjäna, waynanakarus yanaptʼapjjarakïnwa (Núm. 8:25, 26). Superintendente de circuitot nayrajj servipkäna uka jilatanakajja janis jichhajj congregacionanakar visitjjapjjchejja, congregacionapanwa wal yanaptʼapjje. w21.09 págs. 8, 9 párrs. 3, 4

Jesusajja herencia tukuntiri mä waynan sarnaqäwipatwa cuenttʼäna, ukjja Lucas 15:11-32 textonwa liytʼsna. Mä waynajj tatap contraw saytʼäna, utapat sarjjasajj ‘jaya markaruw viajïna’. Ukansti kunayman jan walinakwa luräna. Jan walinakan uñjasjjasajja, papitupan utapan kunja sumas jakasiskäna ukanakatwa amuytatasïna. Kunjamtï Jesusajj siskänjja uka waynajj ‘amuytatasïnwa’. Ukatsti utapar kuttʼjjaña, papitupar perdón mayisiñwa amtäna. Jan wali sarnaqatapat amuytʼasitapajj wali wakiskirïnwa, ukampis janiw ukak lurañapäkänti, jupajj cambiañapänwa. Ukatwa herencia tukuntir waynajj cheqpachapun arrepentisitap uñachtʼayäna. Ukhamajj uka waynan sarnaqäwipajja, janiw chuymar purtʼkir uñachtʼäwikïkiti, jan ukasti maynejj jachʼa juchar purtʼasi ukhajj cheqpachapunit arrepentisi janicha uk yatiñatakiw ancianonakar yanaptʼaspa. w21.10 pág. 5 párrs. 14, 15

¿Kunas jan thaljatäkani, jan ukajj jan tukjatäkani? Apóstol Pablojj akham sänwa: “Ukhamajj niyakejjay jan thaljatäkaspa uka Reino katoqchiñänejja, Diosan wali khuyapayasiñap katoqasipkakiñäni” sasa (Heb. 12:28). Qhepa thaljäwi tukuyatarojja, Diosan Reinopakiw wiñayatak suma saytʼata utj-jjani (Sal. 110:5, 6; Dan. 2:44). Jukʼa tiempokiw utj-jje. Jaqenakajj kunsa lurapjjani ukwa ajllipjjañapa. Jupanakatï akapachar apoyaskakiñ ajllipjjani ukhajja, tukjatäpjjaniwa. Ukampis Jehová Diosar serviñ ajllipjjani, voluntädap lurañatak cambionak lurapjjani ukhajja, wiñay jakañwa katoqapjjani (Heb. 12:25). Predicación toqew jaqenakarojj uka wakiskiri amtar puripjjañapatak yanaptʼtanjja. Jesusan arunakap amtapjjapuniñäni, jupajj akham sänwa: “Reinon aka suma yatiyäwinakapajja, aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani” sasa (Mat. 24:14). w21.09 pág. 19 párrs. 19, 20

Ancianonaka, congregacionat jaqsutanakan familianakapar chʼamañchtʼapjjapunim. Jupanakar chuymachtʼañatakiw Diosajj jaytapjjtam (1 Tes. 5:14). Tantachäwi qalltarusa tukuyarusa chʼamañchtʼañatakiw jupanakar jakʼachasipjjañama. Visittʼapjjam, jupanakatakis orapjjarakim. Jupanakampiw predicapjjarakisma, jan ukajj familiamampi Bibliat yatjjatapkta ukarus awisajj invittʼapjjarakismawa. Ancianonakajja, llakitäpki ukanakarojj khuyaptʼayasiñampi, munasiñampiw uñjapjjañapa, kunantï yanaptʼatäñ munapki ukans yanaptʼapjjañaparakiwa (1 Tes. 2:7, 8). ‘Diosajj janiw khitin jiwañapsa munkiti, jan ukasti taqenin arrepentisipjjañapwa muni’ (2 Ped. 3:9). Maynejj jachʼa juchsa lurkchejja, Diosatakejj valoranikïskiwa. Jupajj jupar jaytawayjjapjje ukanakan kuttʼanipjjañap wal suyaski. Jesusajj herencia tukuntir waynat parlkäna uka uñachtʼäwiw uk amuyayistu (Luc. 15:11-32). w21.09 págs. 30, 31 párrs. 17-19

Inas usutäsina jan ukajj edadanëjjatam layku jan nayrjam predicañ puedjjstati. Ukampis kuntï jumajj lurañ puedkta uk lurasajj kusisitäsmawa. Uk amuytʼañatakejja, Davidampi jupamp chikäpkäna uka chachanakampejj saqueyjir amalequitanakar atipjasin familianakapa ukat kuntï lunthatapkäna ukanak aparasinipjjäna ukhajj kunas pasäna uk uñjañäni. 200 chachanakajja, qaritäjjasajj janiw nuwasirejj sarjjapjjänti, qʼepinak uñjañatakikiw quedasjjapjjäna. Davidampi mayni chachanakampejj amalequitanakar atipjasin kuttʼanipjjäna ukhajja, aparanipkäna uk mä igualak jaljasiñapwa Davidajj mayïna (1 Sam. 30:21-25). Jesusan discipulopar tukuyañampejj niya uka pachparakiwa. Inas jukʼamp predicañsa yatichañsa jan puedkstati. Ukampis qhawqtï lurañ puedkta ukarjam chʼamachasiskakim, ukhamatwa maynejj bautisasini ukhajj wal kusisïta. Diosajj qhawqsa chʼamachastan, jupar munasiraktan uk uñjasaw bendisistu. Puedktan ukarjam predicasin kusisitäñasatakiw yanaptʼarakistu (Juan 14:12). Jiwasatï jan qarjtkañänejja Diosajj wal kusisini. w21.10 pág. 28 párrs. 15-17

Edadanëjjasajja, Jehová Diosar janiw nayrjam serviñ puedjjäti sasaw ajjsarayassna. Cheqas janiw wayn tawaqökayätan ukham chʼamanëjjtanti, ukampis yateqatasampisa experienciasampisa wayn tawaqonakaruw yanaptʼsna, ukhamat Diosan markapan jukʼamp luräwinak katoqasin yanaptʼapjjañapataki. Wayn tawaqonakar yanaptʼañ munstan ukhajja, humildëñasawa. Humilde chuyman jaqejja, mayninakajj jupat sipansa jilankkaspas ukhamwa amuyi (Filip. 2:3, 4). Humilde chuymani edadani jilat kullakanakajja, mä kunajj kunayman toqetwa Biblian ewjjtʼanakap jan pʼakintasajj sum lurasispa sasaw amuyapjje. Ukatwa kunjamtï jupanakajj lurapjjerïkäna ukham taqenin lurapjjañap jan suyapkiti (Ecl. 7:10). Experiencianakapampejj wayn tawaqonakar walsa yanaptʼapkchispajja, ‘kunanakatejj aka mundon pasaski ukanakan mayjtʼaskatapwa’ yatipjje, ukatwa kunjamtï jichhajj lurasjje ukar yatinoqtañatak chʼamachasipjje (1 Cor. 7:31). w21.09 pág. 8 párrs. 1, 3

Jehová Diosajj janipuniw kunatï ajjtaskañäki uk lurañas maykistuti, jupajj wali santo Diosawa. Israelitanakar uk amtayañatakejja, jachʼa jilïr sacerdoten turbantepanwa mä qori placan qellqantat aka arunakajj utjäna: “Jehová Diosajj santo Diosawa” sasa (Éx. 28:36-38). Uka placa uñjasajja, Jehová Diosajj wali santo Diosätapwa jaqenakajj amuyapjjäna. Ukampis yaqhep israelitanakajj jachʼa jilïr sacerdoter jan jakʼachasiñ puedisajja janiw kunatï uka placan qellqatäkäna uk uñjapkaspänti, ukhampachas Jehová Diosan santo Diosätap yatipjjaspänwa. Moisesajj katoqkäna uka Leyejja, chachanaka, warminaka, wawanak nayraqatanwa liytʼasirïna (Deut. 31:9-12). Ukankasäna ukhajj akwa istʼasäna: “Nayaw jumanakan Jehová Diosamätjja [...]. Nayasti santo Diosätwa, jumanakajj santo jaqëpjjañamarakiwa”, “naya Jehová Diosajj santo Diosätaj layku” sasa (Lev. 11:44, 45; 20:7, 26). w21.12 pág. 3 párrs. 6, 7

Yaqhep jilat kullakanakajja, manqʼañata, isita, kawkjansa jakasipjjani uka toqenakat wal llakisipjjaspa. Inas kawkjantï jakasipki uka markan jaqenakajj wali pobrëpjjchi, janirak trabajos utjkchiti. Inas qollqe jikjjatañajj chʼamakïchi, jan ukajj khititï qollqe gankäna ukajj jiwjjchi, ukhamatwa uka familiajj gastonakapatak jan qollqenëjjaspati. Llakisiñat sipansa Jehová Diosar confiyañaw yanaptʼistani. Amtapuniñäni, Diosan promesaparjamajja, jupar serviñatï jakäwisan nayrankani ukhajj kunatï jakañatak wakiski ukanak janiw faltaykistaniti (Mat. 6:32, 33). Jehová Diosajj promesanakap phoqapuniwa (Deut. 8:4, 15, 16; Sal. 37:25). Niyakejjay Jehová Diosajj jamachʼinakarus panqaranakarus sum uñjchejja, kunsa manqʼañäni kunsa isisiñäni ukanakat janiw jiwasajj llakisiñasäkiti (Mat. 6:26-30; Filip. 4:6, 7). Kunjamtï mä awk taykajj munasiñat wawanakapar jan kuns faltaykejja, alajjpachankir Awkisajj ukhamarakiw servirinakaparojj munasiñat jan kuns faltaykiti. w21.12 pág. 17 párrs. 4, 5; pág. 18 párr. 8

Inas mä jilatasa jan ukajj mä kullakas jan wal lurchistu. Josearojj ukhamarakiw jilanakapajj ina chʼusat tʼaqesiyapjjäna. Ukampis jupajj Jehová Diosar serviñwa nayrar uchäna, ukatwa Jehová Diosajj jupar bendisïna. Tiempompejja Joseajj jilanakapar perdonjjänwa, Diosan bendicionapsa uñjarakïnwa (Gén. 45:5). Jiwasajj Diosar jakʼachastan, jupan askichañapatak mä kuns jayttan ukhajja, chuymachtʼataw jikjjatasiraktanjja (Sal. 7:17; 73:28). Ina chʼusat tʼaqesiyat uñjasstan, jan ukajj mä jan walin uñjasis tʼaqesstan ukhajja, Jehová Diosajj ‘chuyma pʼakintatäpki’ ukanakan jakʼapankaskatapwa amtañasa (Sal. 34:18). Diosajj jupar llakinakas katuyatasata, paciencianïtasat wal munasistu (Sal. 55:22). Jupaw oraqpachan Juezapajja, taqe kunwa jupajj uñjaskaraki (1 Ped. 3:12). Ukhamajja jan walinakan uñjasstan ukhajja, Diosan askichañapkamaw suyañasa. w21.08 pág. 12 párrs. 14, 16

Jehová Diosajj jiwasar munasiñapatakejja, kunanakatï kusisiykaspa ukwa vidasan lurañasa. Jan ina chʼusar tiempos aptʼasiñatakejja, kuna lurañanakatï utjkistu ukanakajj walikïskchisa, ukanakat may ajlliñasaw wakisi. Uk amuytʼañatakejja, Jesusajj Mariampir Martampir visitir sarkäna ukhajj kunas pasäna uk amtañäni. Niyakejjay Martajj wali katoqtʼasirïchïnjja, Jesusajj jupan utapankatapat wal kusisïna, ukatwa walja manqʼanak phayäna. Ukampis María kullakapajj Jesús jakʼar qontʼasisaw yatichäwinakap istʼäna. Kuntï Martajj lurkäna ukajj walikïskchïnsa, “Mariajj kunatï sumäki uk ajllisi” sasaw Jesusajj säna (Luc. 10:38-42). Kuntï ukapachajj manqʼapkäna uk inas Mariajj tiempompejj armasjjchïna, ukampis kuntï Jesusat yateqkäna uk janipuniw armaskpachänti. Mariajja Jesusamp chikäñatak tiempo apsusitap wali valoranitwa uñjäna, jiwasas Jehová Diosampïñatak tiempo apsusktan uk valoranitwa uñjaraktanjja. w22.01 pág. 27 párrs. 5, 6

Acab reyejj Jehová Dios nayraqatan humillaskchïnsa, kuntï qhepat lurkäna ukajj jan cheqpachapun arrepentisitapwa uñachtʼayäna. Israel markan Baal diosar adorañ janiw chhaqtayañ amtkänti, janirakiw Diosar adorapjjañapatakis markar chʼamañchkänti. Acab reyejj jiwjjäna uka qhepatjja, Jehová Diosajj Jehú profetap toqejj ‘jan wali jaqewa’ sasaw säna (2 Crón. 19:1, 2). Acab reyitï cheqpachapun arrepentisispäna ukhajja, Jehú profetajj ‘Jehová Diosar uñisiri jan wali jaqe’ sasin janiw jupat siskaspänti. Ukhamajja jan wali luratanakapat Acab reyejj janiw taqe chuym arrepentiskänti. ¿Kunsa Acab reyin sarnaqäwipat yateqtanjja? Familiamajj jan walinwa uñjasini sasin Elías profetajj yatiykäna ukhajja, qalltan humillasïnwa. Ukham luratapajj walikïnwa. Ukampis kunanaktï qhepat lurkäna ukajja jan taqe chuyma arrepentisitapwa uñachtʼayäna. Ukhamasti cheqpachapuni arrepentisiñajj janiw jan wali luratanakasat llakita jikjjatasiñakïkiti, ukwa yateqsna. w21.10 pág. 3 párrs. 4, 5, 7, 8

Isaías chachajj profetänwa, esposapasti niya uka pachparakwa lurarakpachäna, kunattejj “profetisa” sasaw Biblian jupat qhanañchi (Is. 8:1-4). Jupanakatakejj Diosar adorañaw nayrankäna. Isaías profetampit esposapampit yateqasisajja, casarat chacha warminakajj Diosar serviñ nayrar uchañatakipuniw chʼamachasipjjarakispa. Jehová Diosar jukʼamp confiyañatakejja, panpachaniw Biblian profecianakapat yatjjatapjjaspa, kunjamsa ukanakajj phoqasipuni uksa uñjapjjarakispawa (Tito 1:2). Biblian profecianakapat yaqhepajj jichha tiemponwa phoqasiski, uka phoqasïwin kunjamsa yanaptʼapjjaspa uka toqetsa lupʼipjjarakispawa, uka profecianakat maynïritjja Jesusaw parläna, janïr akapacha tukuskipan Reinon suma yatiyäwinakapajj aka oraqpachanwa yatiyasini sasaw säna. Casarat chacha warminakatï Biblian profecianakapajj kunjamsa phoqasiski ukat jan payachasipkani ukhajja, jukʼampiw Diosar serviñ nayrar uchañ munapjjani. w21.11 pág. 16 párrs. 9, 10

Jesusajj mamitapatwa llakisïna, amuyatajj viudäjjpachänwa. Mamitapar wal munasisajja, Juanaruw Diosar serviñan yanaptʼañapatak mayïna. Ukhat uksarojja, Mariajj yoqaparjamaw Juanarojj uñjäna, Juanasti mamitaparjamaw cuidarakïna. Jesusajj mamitapar wal munasïna, kunattejj jupaw naski ukhatpach wali munasiñampi uywäna, jiwjje ukhas Mariaw jupamp chikäskarakïna. ¿Kunsa yateqsna? Familianakasat sipansa, jilat kullakanakampiw jukʼamp sum apassna. Yaqhep familiaranakasajj jiwas contraw saytʼapjjaspa, jan ukajj jaytanukupjjestaspawa. Ukampis kunjamtï Jesusajj siskänjja, jiwasatï Diosaru, markaparu jakʼachasiñäni ukhajja, kuntï aptʼawayktan ukat sipansa, “patak ukhampwa” katoqañäni. Walja jilat kullakanakaw jiwasan yoqasjama, phuchasjama, mamitasjama jan ukajj papitusjamäpjjani (Mar. 10:29, 30). Jilat kullakanakampejj Diosar servitasat wali mayachtʼatäpjjtanwa, munasiraktanwa, uka familia taypinkasajj kusisitätanwa (Col. 3:14; 1 Ped. 2:17). w21.04 págs. 9-11 párrs. 7, 8

Munasiñat jan jaytjasirïñäni ukhajja, mayninakar yanaptʼañatakiw jiwasajj chʼamachasiñäni. Kunjamtï Diosan nayra servirinakapajj lurapkänjja, ukhamarakiw jichha tiempon Diosan walja servirinakapajj taqenir munasiñat jan jaytjañ amtapjje. Sañäni, oraqen jan waltʼäwinak utjatap yatisajja, kunjamsa yanaptʼapjjaspa uk jankʼakiw jisktʼapjje. Congregacionapankir mä jilatana jan ukajj mä kullakana qollqet pistʼatäskatap yatipjje ukhajja, kunan yanaptʼatäñsa muni uk yatisajj jankʼakiw yanaptʼapjje. Jupanakajj nayra patak maranakan jakir macedonio cristianonakjamaw lurapjje, uka cristianonakajja “qhawqhatï jupanakan utjkäna ukat sipansa jukʼamp churapjjäna” (2 Cor. 8:3). Ancianonakajj kawkïr jilat kullakanakatï munasiñampi mayninakar yanaptʼapki ukanakarojj felicittʼapjjewa. Ukaw chʼamañchtʼiri jilat kullakanakarojj jan qarjtañatak yanaptʼi (Is. 32:1, 2). w21.11 pág. 11 párr. 14; pág. 12 párr. 21

Taqeniw awisajj ewjjtʼatäñ muntanjja, awisasti khitirutï respetktan ukarojj jiwasaw ewjjtʼa maytanjja. Yaqha horasanakajj mä jilataw jiwasat llakisisajj ‘jan wali thakir saranukuñampïsktawa’ sasin amuytʼayistaspa, kun luratasattï qhepat arrepentisksna ukatwa amuytʼayistaspa (Gál. 6:1). Juchar purtʼasitasat cheqañchapkistu ukhaw ewjjtʼapjjarakistaspa. Kunjamsay ewjjtʼapkchistojja, uka ewjjtʼanakarojj istʼañasawa, kuna laykutejj jiwasan askisatakiwa, jakañ vidassa salvaspawa (Prov. 6:23). Jichhürutak ajllit textojja, ‘khitinakatï yatiñanïpki ukanakar istʼañasatakiw’ chʼamañchtʼistu. Janiw taqe kunsa yatkapuntanti, jiwasat sipans jukʼamp yatiñani, experiencianejj utjapuniwa (Prov. 12:15). Ewjjtʼanak istʼktan ukhajja, humilde chuymanïtaswa uñachtʼaytanjja. Jiwas sapak jan kuns lurañ pueditasa, amtanakas phoqañatak yanaptʼa munataswa uñachtʼayaraktanjja. Salomón reyejj akham sasaw qellqäna: “Walja ewjjtʼirinakampejja taqe kunas sumaruw sari” sasa (Prov. 15:22). w22.02 pág. 8 párrs. 1, 2

Jucha lurirejj cheqapuni arrepentisitap uñachtʼayañatakejj janiw aleq llakisitapak uñachtʼayañapäkiti, jan ukasti amuyupansa chuymapansa cambiatapwa uñachtʼayañaparaki. Kuna jan waltï lurki ukjja jaytjjañapawa, Jehová Diosan leyinakaparjamaw wasitamp sarnaqjjañapa (Ezeq. 33:14-16). Jehová Diosamp wasitat sum apasjjañaw jupatak jukʼamp wakiskirïñapa. Ukhamajj ¿mä amigosan jachʼa jucha luratap yatstan ukhajj kunsa lurañasa? Jiwasatï juchap imtʼañ munsna ukhajja, jukʼampikiw amigosarojj jan waltʼayjjsna. Cheqas inamayakiw uk imtʼañ munsna, Alajjpachankir Jehová Diosajj taqe kunwa uñji (Prov. 5:21, 22). ¿Ukhamajj kunsa lursna? Ancianonakajj yanaptʼañwa munapjjtam sasaw amigosarojj sissna. Jupatï jan awisañ munkani ukhajja, jiwasaw ancianonakar yatiyañasa. Ukhamatwa jupar cheqapun yanaptʼañ munatas uñachtʼayañäni. w21.10 pág. 7 párrs. 19-21

Mayninakat llakisiñjja taqeniw Jesusat yateqsna. Jupajj ‘mä esclavoruw tuküna’ sasaw Bibliajj qhanañchi (Filip. 2:7). Mä suma esclavosa jan ukajj mä suma servirisa, uywiripar kusisiyañatakiw chʼamachasi. Jiwasanakajj Jehová Diosan esclavopätanwa, jilat kullakanakan serviriparakïtanwa, ukhamajj Diosatak valoranïñwa muntanjja, jilat kullakanakatakis mä suma yanaptʼäñwa munaraktanjja. Akhamwa jisktʼassna: “¿Naya pachpat llakisiñat sipansa mayninakar yanaptʼañatakejj dispuestokïtti? ¿Kawkjantï asambleajj apaskani uka lugar qʼomachañataki jan ukajj Tantachasiñ Uta askichañatakejj jankʼakit sartjja?” sasa. Mä kunan chʼamachasiñas wakisitap amuyasstan, ukampis uk lurañatak jan ganasajj utjkchistu ukhajja, Jehová Diosaruw taqe chuyma mayisiñasa. ‘Munañam lurañ munañatakisa phoqañatakis chʼam churita’ sasaw jupar mayiñasa (Filip. 2:13). w22.02 págs. 22, 23 párrs. 9-11

Jan walinakan uñjaskasas Jesusajj munasirïtapwa uñachtʼayäna, janirakiw munañaparjamak lurirïkänti (Mat. 11:29, 30). Sañäni, fenicia warmejj imill wawapar qolltʼarapiñapatak wal ruwtʼaskäna ukhajja, Jesusajj janiw qalltan munkänti. Ukampis Diosar wal confiyatap laykojj munasiñampiw uka warmir uñjäna, wawaparus qollarakïnwa (Mat. 15:22-28). Ewjjtʼañajj wakiskäna ukhajj ewjjtʼirïnwa. Awisajja munaskäna ukanakarojj qhanwa ewjjtʼirïna. Sañäni, Pedrojj Diosan munañap jan lurañapatak Jesusar jarkʼañ munkäna ukhajja, mayni discipulonakap nayraqatanwa Pedror toqenoqäna (Mar. 8:32, 33). Janiw Pedror jiskʼachañ laykojj ukham lurkänti, jupar yatichañatakïnwa. Ukatjja mayni discipulonakapajj jupar apoyapjjañapataki, Diosan munañap lurañat jan jarkʼapjjañapatakiw ukham lurarakïna. Uka ratojj Pedrojj mä jukʼa phenqʼachatas uñjaskchïnjja, askipatakïnwa. Munasktan ukanakar munasiñamp uñjañatakejja, awisajj qhanwa jupanakar ewjjtʼañasa. Ukham lurkasajj Jesusatwa yateqasiñasa, Bibliarjamaw ewjjtʼañasaraki. w22.03 pág. 11 párrs. 12, 13

Jachʼañchasaw Jehová Diosar adortanjja (Sal. 34:1). ¿Kunjamsa Diosarojj jachʼañchtanjja? Jupajj kunjam chuymanisa, kunanaksa lurawayi uka toqet munasiñamp parlasaw jachʼañchtanjja. Diosar yuspärasirïñäni ukhajja, wali sumanakwa jupat parlañäni. Jehová Diosan munasiñapat lupʼiñatak tiempo apstʼasiñäni ukhajja, jupar jachʼañchañatakejj razonanakajj utjapuniniwa. Predikir sarasaw ‘jachʼañchir sacrificio Diosar loqttanjja, mä arunjja lakasat mistur arunakampiw jachʼañchtanjja’. Kunjamtï Jehová Diosar janïr oraskasajj kamsañänisa uk wali sum amuytʼasiñasäkejja, ukhamarakiw predikir sarasajj kuna toqetsa jaqenakamp parltʼañäni uk wali sum amuytʼasiñasa. ‘Diosar jachʼañchir sacrificiosajj’ wali sumäñapwa muntanjja, ukatwa cheqa yatichäwinak yatiyir sarasajj chuymatpach parltanjja. w22.03 pág. 21 párr. 8