Miércoles 27 de marzo
Diosan Reinopsa nayraqat thaqasipkakim (Mat. 6:33).
Jesusajj jiwjjäna ukhajja, discipulonakapajj walpun llaktʼasipjjäna. Wali munat amigopajj janiw jupanakampëjjänti, kunanaktï suyapkäna ukanakajj janiw phoqasjjaniti sasaw amuyapjjäna (Luc. 24:17-21). Ukampis qhepatjja, Jesusajj jupanakar uñstänwa, Biblian profecianakap phoqaskatap qhanañchtʼañatakiw tiempo apstʼasirakïna. Ukhamarus wali importante mä luräwi jupanakar jaytäna (Luc. 24:26, 27, 45-48). Jesusan alajjpachar sarjjatapatjja, discipulonakapajj llakisiñat sipans wali kusisitäjjapjjänwa. Jesusan jakaskatap yatisajj wal kusisipjjäna, kuna lurañtï jaytawaykistu ukamp phoqañatakejj jupaw yanaptʼistani sasaw wal kusisipjjarakïna. Uka kusisiñaw jupanakarojj Jehová Diosar jachʼañchaskakiñatakejj yanaptʼäna (Luc. 24:52, 53; Hech. 5:42). Jesusan discipulonakapat yateqasiñatakejja, Diosan Reinopaw jakäwisan nayrankañapa. Cheqas Jehová Diosar serviskakiñatakejj wal chʼamachasiñasaw wakisi, ukampis ukhamtï lurañänejja, jupajj bendisipunistaniwa (Prov. 10:22). w23.01 págs. 30, 31 párrs. 15, 16
Jesusan jiwatap amtañataki: (16 de nisán urun kunanakas pasäna) Marcos 16:2-8
Jueves 28 de marzo
Laqʼarurakiw kuttäta (Gén. 3:19).
Janiw Adán ukat Eva chacha warmjam lurañ munktanti. Jupanakjam jan pantjasiñatakejj sapürutjamaw Jehová Diosar jukʼamp sum uñtʼañasa, kunja suma chuymanisa uk valoranitwa uñjañasa, kunjamsa jupajj amuyi uk entiendiñatakiw chʼamachasiñasaraki. Ukhamtï lurañänejja, jukʼampiw Jehová Diosar munasiñäni. Diosar wal munasir Abrahán chachat parltʼañäni. Kuntï Diosajj lurañ amtkäna uk janis sum amuykchïnjja, janiw Dios contra saytʼaskänti, jan ukasti Diosar jukʼamp sum uñtʼañatakiw chʼamachasïna. Jehová Diosajj Sodoma, Gomorra markanak tʼunjañ amtatap Abrahanajj yatïna ukhajja, jan wali jaqenakarojj cheqapar sarnaqer jaqenakamp chikaw “oraqpachan Juezapajj” tʼunjpachäni sasaw qalltan ajjsarayasïna. Ukampis Diosajj janipuniw uk lurkaspati sasaw amuyjjäna. Ukatwa humilde chuymamp Jehová Diosar jisktʼäna. Diosasti pacienciampiw jisktʼanakapar qhanañchäna. Jehová Diosamp parlañ tukuyjjäna ukhajja, Diosajj taqe jaqenakan chuymanakap sum yatitapa, jan wali jaqenakarojj cheqapar sarnaqer jaqenakamp chik janipun castiguirïtapwa Abrahanajj amuyäna (Gén. 18:20-32). w22.08 pág. 28 párrs. 9, 10
Viernes 29 de marzo
Confiykañ jaqejja kuntï jan yatiyañapatak confiyapki ukanak janiw yatiykiti (Prov. 11:13).
455 antes de Cristo maranjja, Nehemías gobernadorajj Jerusalenan murallanakap wasitat saytʼayasajj confiykañ mä qhawqha chachanakaruw uka markat encargasiñapatak uttʼayäna. Jupanakat maynïrejj Hananiasänwa, jupajj Soldadonakatak Jachʼa Utan mä pʼeqtʼirïnwa. Hananiasat parlkasajj Bibliajj akham siwa, “jupajj wali confiykañ chachänwa, yaqhanakat sipansa jupaw cheqpach Diosarojj ajjsartʼarakïna” sasa (Neh. 7:2). Mä responsabilidad katoqasinjja, uk phoqañatakejj Jehová Diosar munasiñampi jupan chuymap jan ustʼayañ munañampiw yanaptʼäna. Ukham chuymanïñarakiw Diosan wali confiykañ serviripäñasatak yanaptʼistani. Jichhajj Tíquico chachat parltʼarakiñäni, jupajj apóstol Pablon confiykañ compañeropänwa. Jupat parlkasajja, ‘jan jitheqtas Tatitur serviriwa’ sasaw Pablojj säna (Efes. 6:21, 22). Tiquicorojj janiw Éfeso ukat Colosas markanakankir jilat kullakanakatak cartanak apañapatakik confiykänti, jan ukasti jupanakar chʼamañchtʼañapataki chuymachtʼañapatakiw confiyarakïna. Tíquico chachat parltʼañajja, jichhürunakan Diosat jan jitheqtas servipki confiykañäpkaraki uka jilatanakatwa amtayistu, jupanakaw Diosar serviñan yanaptʼapjjestu (Col. 4:7-9). w22.09 págs. 9, 10 párrs. 5, 6