Fəsil 89

Mərhəmətdən irəli gələrək İsa Yəhudeyaya gedir

YƏHUDİLƏR bir neçə həftə bundan qabaq, Həsr etmə bayramı zamanı Yerusəlimdə İsanı öldürmək istəmişdilər. Bu səbəbdən o, şimala, ehtimal ki, Qalileya gölünə yaxın bir bölgəyə gedib.

İndi isə o, yenidən Yerusəlimə qayıdır. İsa gedə-gedə İordan çayının şərq sahilində yerləşən Pereya bölgəsinin kəndlərində təbliğ edir. Varlı adam və Lazar barəsindəki məsəldən sonra o, şagirdlərinə əvvəllər Qalileyada öyrətdiyi şeyləri təkrar edir.

Məsələn, İsa deyir ki, insan üçün Allaha məxsus olan «bu kiçiklərdən birini büdrətməkdənsə,.. daha yaxşı olardı ki, boynuna dəyirman daşı asıb onu dənizə atsınlar». Yaxud bağışlamağın vacibliyini vurğulayaraq deyir: «Hətta bir gündə [qardaşın] sənə qarşı yeddi dəfə günah işləsə və hər dəfə yanına gəlib: “Tövbə edirəm”, — desə, onu bağışlamalısan».

Şagirdlər İsadan: «İmanımızı artır», — deyə xahiş edəndə o deyir: «Əgər sizdə bir xardal toxumu boyda iman olsaydı, bu tut ağacına: “Kökündən qop və dənizdə bit”, — deyərdiniz və ağac sizə itaət edərdi». Bəli, hətta kiçicik iman böyük işlər görməyə qadirdir.

Bunun ardınca İsa Qadir Allaha xidmət edən hər kəsdən hansı əhval-ruhiyyə gözlənildiyini göstərmək üçün adi həyatdan bir məsəl çəkir: «Tutalım nökəriniz var. O, yer şumlamaqdan və ya sürünü otarmaqdan qayıdanda hansınız ona: “Tez süfrəyə keç, əyləş”, — deyər? Məgər: “Şam yeməyimi hazırla, önlüyünü tax və mən yeyib qurtaranadək mənə qulluq et, sonra özün də yeyərsən”, — deməz? Tapşırığını yerinə yetirdiyinə görə məgər ağası nökərə minnətdar olacaq? Sizə tapşırılmış işləri görüb qurtaranda deyin: “Biz heç nəyə yaramayan nökərlərik. Biz sadəcə işimizi gördük”». Beləliklə, Allahın xidmətçiləri xidmətlərinə görə əsla Allaha minnət qoymamalıdırlar. Əksinə, həmişə yadda saxlamalıdırlar ki, Allah onları ev əhli hesab edir və Ona bu baxımdan ibadət etmək böyük şərəfdir.

Görünür, İsa bu məsəli təzəcə danışıb qurtarmışdı ki, onun yanına bir adam gəlir. Onu Yəhudeyanın Betaniya kəndində yaşayan Lazarın bacıları Marta ilə Məryəm göndərib. O xəbər verir: «Ağa, əziz dostun xəstədir».

İsa deyir: «Bu xəstəlik ölümə aparmır. O, Allaha şöhrət gətirəcək, Allahın Oğlu da bu xəstəlik vasitəsilə şöhrətlənəcək». İsa iki gün də burada qalır və sonra şagirdlərinə deyir: «Gəlin yenə Yəhudeyaya gedək». Ancaq şagirdləri ona xatırladırlar: «Müəllim, yəhudeyalılar təzəlikcə səni daşlamaq istəyirdilər, sən isə yenə ora gedirsən?»

«Məgər günün uzunluğu on iki saat deyil? — deyə İsa soruşur. — Gündüz gəzənin ayağı heç nəyə ilişmir, çünki o, bu dünyanın işığını görür. Lakin gecə gəzənin ayağı mütləq nəyəsə ilişəcək, çünki o, zülmətdədir».

Görünür, İsa bununla demək istəyir ki, «günün» saatları, yəni Allahın ona yer üzündə xidmət etmək üçün ayırdığı vaxt bitməyincə heç kəs ona xətər yetirə bilməz. İsa «gündüzdən» onun payına qalmış qısa vaxtı mütləq istifadə etməlidir, sonra düşmənləri onu öldürəndə «gecə» gələcək.

Sonra İsa deyir: «Dostumuz Lazar yuxuya gedib, mən isə onu oyatmağa gedirəm».

Şagirdlər elə bilirlər ki, Lazar yatıb və tezliklə sağalıb ayağa duracaq. Onlar deyirlər: «Ağa, yatırsa, deməli, sağalacaq».

Onda İsa açıq deyir: «Lazar ölüb və mən çox şadam ki, orada olmamışam, çünki indi sizin imanınız daha da möhkəmlənəcək. Durun, onun yanına gedək».

Tomas başa düşür ki, Yəhudeyada İsanı öldürə bilərlər və o biri şagirdlərə deyir: «Gedək, biz də onunla ölək». Beləcə, İsa mərhəmətdən irəli gələrək yenidən Yəhudeyaya yollanır və şagirdləri də həyatlarını təhlükəyə ataraq onunla gedirlər. Luka 13:22; 17:1—10; Yəhya 10:22, 31, 40—42; 11:1—16.

▪ İsa son vaxtları harada təbliğ edir?

▪ İsa hansı təlimləri təkrarlayır? O, adi həyatdan götürülmüş hansı məsəli danışır və bu məsəl nəyi açıqlayır?

▪ İsaya nə xəbər verirlər və o, «gündüz», «gecə» deyərkən nəyi nəzərdə tutur?

▪ «Gedək, biz də onunla ölək» sözləri ilə Tomas nə demək istəyir?