İnsanlarla mülahizə yürütmək məharətini inkişaf etdir
1. Biz Müqəddəs Kitabdan hansı parçanı nəzərdən keçirəcəyik və nəyə görə?
1 Həvarilərin işləri 13:16-41 ayələrində yazılıb ki, Pavel Pisidiyanın Antakya şəhərindəki sinaqoqda mülahizə yürüdürdü. O, mülahizə yürütmək tərzi ilə bizə gözəl nümunə qoydu. Pavel dinləyicilərinin mənşəyini, düşüncə tərzini nəzərə alır və xoş xəbəri onlara uyğun şəkildə təqdim edirdi. Müqəddəs Kitabın bu parçasını nəzərdən keçirərkən, gəlin aldığımız dərsləri təbliğdə necə tətbiq edə biləcəyimiz haqda düşünək.
2. Pavelin söhbəti necə başlamasından nə öyrənirik?
2 Söhbəti qurmaq üçün ümumi təməl axtarın. Pavel, əsasən, İsa Məsihin Allahın niyyətlərindəki rolu haqda təbliğ etsə də, söhbətini bununla başlamadı. O, dinləyicilərinin çoxunun yəhudi olduğuna diqqət yetirdi. Buna görə də söhbətini ibrani xalqının onlara tanış olan tarixi ilə başladı (Həv. iş. 13:16-22). Sözlərimizin insanların ürəyinə yol tapmasını istəyiriksə, biz də ümumi təməl axtarmalıyıq. Bunun üçün insanları öz fikirlərini bölüşməyə təşviq etməliyik. Bunu nəzakətlə suallar verməklə və həmsöhbətimizi dinləməklə edə bilərik.
3. Pavelin dinləyicilərinə İsanı Məsih kimi qəbul etməkdə nə əngəl törədirdi?
3 Pavel ibranilərin tarixi haqda danışanda onlara xatırlatdı ki, Allah Davudun nəslindən bir Xilaskar törətmək niyyətindədir. Lakin bir çox ibranilər onları romalılardan azad edəcək və Yəhuda xalqını digər xalqların üzərində yüksəldəcək bir qəhrəman gözləyirdilər. Şübhəsiz ki, onlar İsanın yəhudi din rəhbərləri tərəfindən inkar olunduğunu, romalıların əlinə verildiyini və öldürüldüyünü bilirdilər. Bəs Pavel məhz həmin adamın və’d olunmuş Məsih olduğuna onları necə əmin edə bilərdi?
4. Pavel öz dinləyiciləri ilə məharətlə necə mülahizə yürüdürdü?
4 Təqdiməni vəziyyətə uyğunlaşdır. Pavel dinləyicilərinin düşüncə tərzini və onların nəyi qəbul edib-etmədiklərini bilirdi. Bunları nəzərə alaraq və Müqəddəs Yazılardan istifadə edərək Pavel onlarla mülahizə yürüdürdü. Məsələn, Pavel İsa Məsihin Davudun nəslindən olduğunu və bunu Vəftizçi Yəhyanın da təsdiq etdiyini xatırlatdı, çünki o, hamının Yəhyanı Allahın peyğəmbəri kimi qəbul etdiyini bilirdi (Həv. iş. 13:23-25). Pavel həmçinin qeyd etdi ki, din rəhbərləri İsanı inkar edib ölümə məhkum etməklə «peyğəmbərlərin... sözlərini yerinə yetirdilər» (Həv. iş. 13:26-28). Sözünü davam edərək o, izah etdi ki, bir çox insanlar İsanın dirilməsinin şahidi olmuşdur. Yəhudilər Məsihin dirilməsinə aid olan peyğəmbərliklərlə tanış idilər və Pavel ona qulaq asan yəhudilərin diqqətini məhz bu peyğəmbərliklərə yönəltmişdir (Həv. iş. 13:29-37).
5. a) Pavel yunanlı dinləyicilərinə ünvanladığı nitqini necə qurmuşdu? b) Sahəmizdə təbliğ edərkən Pavelin nümunəsini necə təqlid edə bilərik?
5 Digər tərəfdən, Pavel Afina şəhərindəki areopaqda yunanlı dinləyicilərə ünvanladığı nitqini başqa cür qurmuşdu (Həv. iş. 17:22-31). Burada da həmin müjdəni təqdim edərək yaxşı nəticələrə nail ola bildi (Həv. iş. 13:42, 43; 17:34). Bu gün biz də təbliğdə ümumi təməlin əsasında söhbət etməklə, dinləyicilərimizin mənşəyini və düşüncə tərzini nəzərə almaqla və təqdimələrimizi uyğunlaşdırmaqla, yaxşı nəticələr əldə edə bilərik.