4 Musa
27 Ro ma akka boru ni si Zelapehat,+ anak ni si Heper. Si Heper i ma anak ni si Gilead, si Gilead i ma anak ni si Mahir, si Mahir i ma anak ni si Manasse, jala si Manasse i ma anak ni si Josep. Goar ni akka boru ni si Zelapehat i ma si Mala, si Noah, si Hoglah, si Milka, dohot si Tirza. 2 Jongjong ma nasida di jolo ni si Musa, Malim Eleasar, akka pamimpin ni bangso i,+ dohot di jolo ni sude bangso i di pintu ni kemah parpunguan. Didok ma, 3 “Nungnga mate bapaknami di gurun. Alai dang ala na dohot ibana mangalo Jahowa rap dohot akka na mangihutton si Kora.+ Alai alani dosana sandiri do ibana mate. Jala dang adong anakna bawa. 4 Alai unang ma ala dang adong bawa anak ni bapaknami i, gabe mago goarna sian tonga-tonga ni keluargana. Lehon ma tu hami parbagianan ni bapaknami i dos songon haha anggi ni bapaknami.” 5 Dung i dipaboa si Musa ma parsoalan i tu Jahowa.+
6 Songon on ma didok Jahowa tu si Musa, 7 “Sittong do na nidok ni boru ni si Zelapehat i. Ikkon lehononmu do parbagianan di nasida songon parbagianan ni akka haha anggi ni bapak ni nasida. Lehon ma parbagianan ni bapak ni nasida i tu nasida.+ 8 Jala paboa ma songon on tu halak Israel, ‘Molo mate sahalak ama alai dang adong anakna bawa, ikkon lehononmuna do parbagiananna i tu akka boruna. 9 Jala molo dang adong boruna, lehon hamu ma parbagiananna i tu haha anggina. 10 Molo dang adong haha anggina, lehon hamu ma parbagiananna i tu haha anggi ni bapakna. 11 Molo dang adong haha anggi ni bapakna i, lehon hamu ma parbagiananna i tu keluarga na samudar dohot ibana. Lok ma gabe appuna ni keluargana parbagiananna i. On ma aturan na ditottuhon tu sude halak Israel, songon na diparettahon Jahowa tu si Musa.’”
12 Dung i didok Jahowa ma tu si Musa, “Nakkok ma ho tu Dolok Abarim+ on, asa tatap luat na lao lehonokki tu halak Israel.+ 13 Dung ditatap ho luat i, mate ma ho songon abangmu si Aron+ jala dikuburhon songon akka ompumuna.*+ 14 Ai tikki marsoal bangso i tu Au di Gurun Zin, dilanggar hamu do parettakku. Dang dipasangap hamu Au di jolo ni bangso Israel marhite patuduhon na badia Au, tikki na hulehon i aek+ tu nasida di Mual Meriba+ na di Kades,+ di Gurun Zin.”+
15 Dung i didok si Musa ma tu Jahowa, 16 “Ale Jahowa, Debata Silehon ngolu tu sude jolma, Ho ma na mamillit sahalak bawa na gabe pamimpin ni bangso on. 17 Bawa i ma na mamimpin nasida di sude ulaon ni nasida jala na manogu-nogu nasida, asa unang songon biru-biru na so adong parmahanna bangso ni Jahowa i.” 18 Didok Jahowa ma tu si Musa, “Pillit ma si Josua anak ni si Nun, sahalak bawa na boi dihaporseai gabe pamimpin.* Appehon ma tanganmu tu ibana.+ 19 Suru ma ibana jongjong di jolo ni Malim Eleasar dohot di jolo ni sude halak Israel i. Ikkon di jolo ni nasida do ditugasson ho ibana gabe pamimpin.+ 20 Ikkon lehononmu do deba huasomi* tu ibana,+ asa ditangihon bangso Israel ibana.+ 21 Ikkon jongjong do ibana di jolo ni Malim Eleasar. Ai si Eleasar do na mamakke Urim*+ lao mangido tudu-tudu sian Jahowa, asa diboto si Josua songon dia keputusan ni Debata. Molo dung dijalo paretta i, ikkon ulahonon ni nasida ma i. Ikkon ulahononna ma i dohot sude bangso Israel.”
22 Diulahon si Musa ma i dos songon paretta ni Jahowa. Diboan ibana ma si Josua jongjong di jolo ni Malim Eleasar dohot di jolo ni bangso i. 23 Diappehon ibana ma tanganna tu si Josua jala dipillit ma ibana gabe pamimpin,+ dos songon na diparettahon Jahowa tu si Musa.+