Panguhum
1 Dung mate si Josua,+ didok halak Israel ma tu Jahowa,+ “Ise do sian hami na parjolo mangalo halak Kanaan?” 2 Didok Jahowa ma tu nasida, “Marga Juda ma na parjolo lao.+ Lehonokku do* tano i tu nasida.” 3 Dung i didok marga Juda ma tu akka abangna marga Simeon, “Dongani ma hami mangalo halak Kanaan tu tano parbagianannami.+ Hudongani hami pe hamu tu tano parbagiananmuna.” Dung i borhat ma marga Simeon rap dohot nasida.
4 Tikki marporang marga Juda, dipasahat Jahowa do halak Kanaan dohot halak Perisi tu nasida.+ Jala ditaluhon nasida do 10.000 halak di Besek. 5 Tikki ditaluhon nasida halak Kanaan+ dohot halak Perisi+ di Besek, pajuppang ma nasida dohot si Adoni-besek jala dialo nasida ma ibana. 6 Tikki lari si Adoni-besek, dilele nasida ma ibana jala ditakkup. Diponggol nasida ma jempol ni tanganna dohot jempol ni patna. 7 Dung i didok si Adoni-besek ma, “Adong 70 raja na huponggol jempol ni tanganna dohot jempol ni patna. Dijopputi nasida do sisa-sisa ni sipanganon di toru ni mejakku. Laos songon na hubahen i do dibaloshon Debata tu au.” Diboan nasida ma ibana tu Jerusalem+ jala disi ma ibana mate.
8 Dung i marporang ma muse marga Juda mangalo Jerusalem+ jala ditaluhon ma i. Dipamate nasida ma akka halak na disi mamakke podang jala ditutung ma kota i. 9 Dung i marporang ma muse marga Juda mangalo halak Kanaan na maringanan di huta na mardolok-dolok, di Negeb, dohot di Syefela.+ 10 Marporang ma muse marga Juda mangalo halak Kanaan na di Hebron (Kiriat-arba do najolo goar ni Hebron). Jala ditaluhon nasida do muse si Sesai, si Ahiman, dohot si Talmai.*+
11 Sian i, lao ma nasida mangalo halak Debir.+ (Najolo Kiriat-seper do goar ni Debir.)+ 12 Dung i didok si Kaleb+ ma, “Manang ise na boi manaluhon Kiriat-seper, lehonokku ma tu ibana borukku si Aksa.”+ 13 Ditaluhon si Otniel+ anak ni si Kenas,+ anggi ni si Kaleb ma huta i. Dung i dilehon si Kaleb ma boruna i gabe istri ni si Otniel. 14 Tikki mulak si Aksa, didok ma tu suamina asa dipangido tano tu bapakna si Kaleb. Dung i turun ma si Aksa sian halodena.* Didok si Kaleb ma tu ibana, “Aha do na dipangido ho?” 15 Didok si Aksa ma, “Lehon ma tu au hadiah. Ai nungnga dilehon bapak tu au tano na di sabola selatan,* lehon ma muse tu au Gulot-maim.”* Dung i, dilehon si Kaleb ma tu ibana Gulot na di ginjang dohot Gulot na di toru.
16 Borhat ma pinoppar ni simatua ni si Musa+ halak Keni i+ rap dohot halak Juda. Borhat ma nasida sian kota hau palem*+ tu Gurun Juda na di sabola selatan ni Arad.+ Jala rap tinggal ma nasida dohot akka halak na disi.+ 17 Alai marporang do muse marga Juda dohot akka abangna marga Simeon mangalo halak Kanaan na di Zepat. Ditaluhon nasida do kota i+ jala dibahen ma goar ni kota i Horma.*+ 18 Ditaluhon marga Juda ma muse kota Gasa+ dohot huta na di sakalilingna, kota Askelon+ dohot huta na di sakalilingna, kota Ekron+ dohot huta na di sakalilingna. 19 Didongani Jahowa do marga Juda jala ditaluhon nasida do akka kota na di dolok. Alai, dang tolap nasida mangusir pangisi ni huta na di rura ni dolok i. Ai mamakke sasabi na ganjang do kareta porang* ni pangisi ni huta i.+ 20 Dilehon nasida ma kota Hebron tu si Kaleb, songon janji ni si Musa.+ Jala dipalao si Kaleb ma sian i tolu anak ni si Enak.+
21 Alai, dang dipalao marga Benjamin halak Jebus na di Jerusalem. Rap tinggal do nasida dohot halak Jebus di Jerusalem sahat tu sadari on.+
22 Asing ni i, lao do pinoppar ni si Josep+ marporang mangalo kota Betel. Jala didongani Jahowa do nasida.+ 23 Disuru nasida ma mata-mata mamareso kota Betel. (Lus do najolo goar ni kota Betel.)+ 24 Dung i diida akka mata-mata i ma adong sahalak bawa kaluar sian kota i. Didok nasida ma tu ibana, “Tolong jo patudu tu hami dalan lao masuk tu kota i, asa hupatudu hami asi ni roha* tu ho.” 25 Dipatudu bawa i ma dalan lao tu kota i. Dipamate nasida ma sude pangisi ni kota i mamakke podang. Alai dang dipamate nasida bawa i dohot sude keluargana.+ 26 Dung i lao ma bawa i tu huta ni halak Het. Dipajongjong ibana ma disi sada kota jala dibahen ma goarna Lus. Gabe i ma goar ni kota i sahat tu sadari on.
27 Alai dang ditaluhon marga Manasse kota Bet-sean dohot akka huta di sakalilingna, kota Taanak+ dohot akka huta na di sakalilingna, pangisi ni kota Dor dohot akka huta na di sakalilingna, pangisi ni kota Ibleam dohot akka huta na di sakalilingna, pangisi ni kota Megiddo dohot akka huta na di sakalilingna.+ Ai dang olo halak Kanaan lao sian luat i. 28 Dung lam gogo halak Israel, dipaksa nasida ma halak Kanaan gabe hatoban.+ Ai dang dipalao nasida sude halak Kanaan i.+
29 Halak Epraim pe, dang dipalao nasida halak Kanaan na maringanan di Gezer. Toktong do nasida rap maringanan dohot halak Kanaan di Gezer.+
30 Dang dipalao marga Zebulon pangisi ni kota Kitron dohot kota Nahalol.+ Toktong do rap maringanan nasida dohot halak Kanaan jala dipaksa nasida do halak Kanaan i gabe hatoban.+
31 Dang dipalao marga Aser pangisi ni kota Akko, Sidon,+ Ahlab, Aksib,+ Helba, Apik,+ dohot kota Rehob.+ 32 Alani i, toktong ma rap maringanan marga Aser dohot halak Kanaan di luat i. Ai dang dipalao nasida halak Kanaan sian i.
33 Dang dipalao marga Naptali pangisi ni kota Bet-semes dohot kota Bet-anat.+ Toktong do nasida maringanan disi rap dohot halak Kanaan.+ Dipaksa nasida ma pangisi ni kota Bet-semes dohot kota Bet-anat gabe hatoban ni nasida.
34 Dipaksa halak Amori do marga Dan tinggal di inganan na mardolok-dolok. Jala dang diloas halak Amori nasida maringanan di rura.+ 35 Alani i, toktong ma maringanan halak Amori di Dolok Heres, Ayalon,+ dohot Salabim.+ Alai dung lam balga huaso* ni pinoppar ni si Josep, dipaksa nasida ma halak Amori gabe hatoban. 36 Mulai sian Tanjakan Akrabim+ ma luat ni halak Amori. Mulai ma i sian kota Sela sahat tu ginjang.