Panguhum
8 Dung i didok halak Epraim ma tu si Gidion, “Boasa songon i dibahen ho tu hami? Boasa dang dijou ho hami tikki mangalo halak Midian?”+ Posi ma hata ni nasida tu si Gidion.+ 2 Alai didok si Gidion ma tu nasida, “Dang sadia na hubahen i martimbakkon na binahenmuna. Haru sisa panen anggur ni Epraim+ pe dumenggan do sian panen anggur ni pinoppar ni si Abi-eser.+ 3 Tu tanganmuna do dipasahat Debata pamimpin ni halak Midian, si Oreb dohot si Seb.+ Tung sadia ma na hubahen i martimbakkon na binahenmuna?” Dung didok si Gidion songon i, dang muruk be nasida.
4 Dung sahat di Sunge Jordan, manaripar ma si Gidion dohot 300 tentarana sian i. Nang pe nungnga loja, torus do dilele nasida musu ni nasida. 5 Dung sahat nasida di Sukot, didok si Gidion ma tu pangisi ni kota i, “Tolong ma jo hami. Lehon hamu ma jolo roti tu akka tentarakki. Nungnga loja nasida. Na mangalele si Sebah dohot si Salmunna raja ni halak Midian i do hami.” 6 Alai didok akka pamimpin ni Sukot i ma, “Boasa ikkon lehononnami roti tu akka tentaram? Ai so ditakkup hamu dope si Sebah dohot si Salmunna.” 7 Didok si Gidion ma, “Alani hatamuna i, molo dung dipasahat Jahowa si Sebah dohot si Salmunna tu tanganku, lissingokku ma hamu mamakke suga-suga na sian gurun.”+ 8 Lao ma si Gidion sian i tu Penuel. Dibahen ibana ma pangidoan tu halak na di Penuel dos songon pangidoanna tu halak na di Sukot. Alai dos do alus ni halak Penuel songon alus ni halak Sukot. 9 Didok si Gidion ma muse tu pangisi ni huta Penuel, “Molo monang hami, ruppakkononnami ma menara on.”+
10 Tikki i, di Korkor do si Sebah dohot si Salmunna rap dohot akka tentarana. Hira-hira 15.000 halak ma tentarana i. Holan nasida nama na tinggal sian akka tentara na ro sian Timur.+ Ai nungnga mate 120.000 tentara na asing na marsinjata. 11 Dung i, torus ma si Gidion mardalan sian dalan na di sabola timur ni Nobah dohot Jogbehat,+ i ma dalan na jotjot dibolus akka halak na maringanan di kemah. Ditaluhon si Gidion ma akka halak na di kemah i di na so panagaman ni nasida. 12 Tikki lari si Sebah dohot si Salmunna raja ni halak Midian i, dilele jala ditakkup si Gidion ma nasida. Gabe gaor ma akka halak na di perkemahan i.
13 Dung sae marporang, mulak ma si Gidion anak ni si Joas sian dalan nakkok-nakkohan na tu Heres. 14 Tikki di pardalanan, ditakkup si Gidion ma sahalak doli-doli na sian Sukot. Disukkuni ibana ma doli-doli i. Dung i, disuratton doli-doli i ma goar ni 77 pamimpin dohot pangituai* ni Sukot. 15 Lao ma si Gidion mandapotton pangisi ni kota Sukot. Didok ma, “Diingot hamu do tikki direhei hamu au? Didok hamu do, ‘Boasa ikkon lehononnami roti tu akka tentaram? Ai so ditakkup hamu dope si Sebah dohot si Salmunna.’ Saonari, on ma si Sebah dohot si Salmunna.”+ 16 Ditakkup ibana ma akka pangituai ni kota i. Dilissingi ma nasida mamakke suga-suga na sian gurun lao mamissang pangisi ni kota Sukot.+ 17 Diruppakkon ibana ma muse menara ni kota Penuel+ jala dipamate ma pangisi ni kota i.
18 Dung i disukkun si Gidion ma si Sebah dohot si Salmunna, “Halak na songon dia do na dibunu hamu di Tabor?” Dialusi nasida ma, “Songon ho do nasida. Songon anak ni raja do nasida idaon.” 19 Didok ibana ma tu nasida, “Haha anggikku do nasida, donganku saina. Songon pastina Jahowa mangolu,* autsugari dang dipamate hamu nasida, dang pamateonku hamu.” 20 Dung i didok si Gidion ma tu si Jeter anak siakkanganna, “Hehe ma ho. Pamate ma nasida.” Alai dang barani ibana manarik podangna. Ai poso hian dope ibana. 21 Gabe didok si Seba dohot si Salmunna+ ma tu si Gidion, “Ho sandiri ma pamatehon hami. Molo na tutu do ho bawa, ho ma na pamatehon hami.” Dung i dipamate si Gidion ma nasida. Jala dibuat ibana ma kalung na songon bulan sabit sian rukkung ni unta ni nasida.
22 Di pudian ni ari, didok halak Israel ma tu si Gidion, “Ho ma na gabe pamimpinnami. Gabe pamimpinnami ma ho, anakmu, dohot pahoppum. Ai nungnga dipalua ho hami sian tangan ni halak Midian.”+ 23 Alai didok si Gidion ma tu nasida, “Dang au manang anakku na gabe pamimpinmuna. Jahowa ma na gabe pamimpinmuna.”+ 24 Didok si Gidion ma muse, “Adong sada pangidoakku tu hamu: Ganup ma sian hamu mangalehon tu au sada anting-anting na binuatna sian musu, i ma anting-anting na dipakke tu igung.” (Mamakke anting-anting mas do igung ni musu nasida. Ai pinoppar ni si Ismael do musu ni nasida i.)+ 25 Dialusi nasida ma, “Hulehon hami pe.” Dipahembang nasida ma sada jubah. Jala sude ma nasida mambahen tusi sada anting-anting na binuatna sian musu, i ma anting-anting na dipakke tu igung. 26 Borat ni anting-anting mas na pinangidona i hira-hira 20 kilogram.* Asing ni i, dilehon do muse perhiasan na songon bulan sabit, kalung, abit wol na ungu na dipakke akka raja ni halak Midian, dohot kalung ni unta ni nasida.+
27 Dipakke si Gidion ma akka mas i lao mambahen baju epod.+ Dipatuduhon ibana ma i di hutana, i ma di kota Opra+ jala sude ma halak Israel manomba i.*+ Gabe jorat ma baju epod i tu si Gidion dohot tu keluargana.+
28 Songon i ma halak Midian+ ditaluhon di jolo ni halak Israel. Dang barani be halak Midian mangalo* nasida. Jala dame ma ngolu ni halak Israel saleleng 40 taon tikki mangolu dope si Gidion.+
29 Dung i mulak ma si Jerubbaal+ anak ni si Joas tu jabuna jala tinggal disi.
30 Adong do 70 anak* ni si Gidion, ala godang do istrina. 31 Adong do gundik ni si Gidion di Sikem. Ditubuhon ibana ma sada anak di si Gidion, jala dibahen ma goarna si Abimelek.+ 32 Dung matua si Gidion anak ni si Joas i, mate ma ibana. Dikuburhon ma ibana di kuburan ni bapakna, i ma na di Opra di kota ni pinoppar ni si Abi-eser.+
33 Dung mate si Gidion, disomba halak Israel ma muse* Baal.+ Dibahen do Baal-berit gabe debata ni nasida.+ 34 Dang diingot halak Israel be Jahowa Debata ni nasida,+ naung paluahon nasida sian sude musu na di humaliang ni nasida.+ 35 Jala dang dipatudu nasida be holong* tu keluarga ni si Jerubbaal, i ma si Gidion. Dang dibalos nasida akka na denggan na binahenna tu halak Israel.+