Januari

Barani do Jesus pasingotton akka pamimpin agama na munafik di tikki i. Alana uppetting do di nasida adat ni nasida taringot manussi tangan daripada pasangappon natua-tuana. (Mat. 15:1-11) Gabe muruk do akka pamimpin agama mambege hata ni Jesus i, alai nang pe songon i toktong do diulahon Jesus na sittong. Dipaboa Jesus do muse ajaran ni nasida na sala. Jala didok Jesus do dang sude agama dihalomohon Debata. Didok Jesus, godang do halak na mardalan di dalan na bidang na parohon hamagoan. Alai holan saotik do halak na mardalan di dalan na soppit na parohon hangoluan. (Mat. 7:13, 14) Jadi adong do halak na merasa manomba Debata hape sasittongna daong. Didok Jesus, “Manat ma hamu tu akka panurirang na mangajarhon na so tutu. Ai songon biru-biru do nasida ro tu hamu, alai sasittongna serigala do nasida na naeng mangaribak-ribak hamu. Alai, na lao tandaonmuna ma nasida sian pangalahona.”​—Mat. 7:15-20. w21.05 9 ¶7-8

Menikah do si Hanna tu si Elkana na sian marga Lepi. Alai adong do sada nai istri ni si Elkana, i ma si Pininna. “Adong do gelleng ni si Pininna, alai dang adong gelleng ni si Hanna.” Umholong do roha ni si Elkana tu si Hanna sian tu si Pininna. Alani i gabe sogo ma roha ni si Pininna. “Sai direhe-rehei si Pininna do si Hanna asa jut rohana.” Gabe marsak ma si Hanna. “Gabe sai tangis ma ibana jala dang olo mangan.” Alai dang adong disurat di Bibel na dibalos si Hanna sude pambahenan ni si Pininna i. Dipaboa do sude perasaanna i tu Jahowa. Jala pos do rohana, urupan ni Jahowa do ibana. (1 Sam. 1:2, 6, 7) Molo adong donganta na sai naeng bersaing dohot hamu, dang pola porlu buktihononmuna na undenggan hamu sian ibana. Unang ma tabalos na jahat tu ibana, alai berupaya ma hita mambahen na denggan. (Rom 12:17-21) Jala molo tung pe ibana dang olo muba nang pe nga berupaya hita mambahen na denggan, gabe dame ma rohatta jala marlas ni roha. w21.07 17 ¶13-14

Mulana dang halak na jahat si Judas Iskariot. Alai ala adong sifat tamak di ibana, gabe penghianat ma ibana. (Luk. 6:13, 16) Halak na malo do si Judas on. Ibana do sitiop kotak inganan ni hepeng. Lam leleng, mulai ma manakko hepeng si Judas sian kotak i, hape nga jotjot dipasingot Jesus nasida asa unang tamak. (Mrk. 7:22, 23; Luk. 11:39) Piga-piga ari sebelum mate Jesus, lam takkas ma dipatudu si Judas sifat tamakna i. Tikki i diundang si Simon na hea marsahit kusta do Jesus, akka siseanna, si Marta, dohot si Maria asa mangan di jabuna. Disi, diusehon si Maria ma miak tu ulu ni Jesus. Gabe muruk ma si Judas dohot sisean na asing. Didok akka sisean i, tumagon do dijual miak i asa boi dipakke hepengna paradehon kebutuhan ni nasida. Alai asing do molo si Judas, didok pe songon i asa boi takkoonna hepeng sian kotak i.​—Joh. 12:2-6; Mat. 26:6-16; Luk. 22:3-6. w21.06 18 ¶12-13

Hea do hamu merasa paborattu tanggung jawabmuna? Molo hea, pasti boi do diattusi hamu pakkilalaan ni si Paulus. Hea do si Paulus marsak alani “sude huria”. (2 Kor. 11:23-28) Marsahit na parah do hamu nuaeng? Marsak do hamu alani i? Si Paulus pe hea do marsahit na parah. Didok ibana ma sahitna i ‘suga di bagasan daging’. Jala ditangiakkon ibana do asa malum sahitna i. (2 Kor. 12:7-10) Hea do metmet rohamuna alani kelemahanmuna? Si Paulus pe hea do songon i. Didok ibana, “Jolma na dangol do au.” Alana ikkon berjuang do ibana asa boi mangulahon na sittong. (Rom 7:21-24) Nang pe godang tantanganna, alai toktong do setia si Paulus manomba Jahowa. Boasa boi ibana setia? Nang pe metmet rohana alani kelemahanna, alai porsea do ibana tu tobusan. w21.04 22 ¶7-8

Tikki mardosa si Adam, dang boi be ibana mangolu saleleng ni lelengna. Alai dang holan ibana, dohot do sude pinopparna. Ala sengaja do si Adam mangulahon dosa, dang disesa Jahowa dosana i. Alai boha molo akka pinopparna? Alani si Adam do nasida mardosa. (Rom 5:12, 14) Attong, boi dope halak i malua sian dosa dohot hamatean jala mandapot hangoluan na saleleng ni lelengna? Songon dia do dibahen Jahowa paluahon halak i? Disi mardosa si Adam, pittor dibahen Jahowa do rencana lao paluahon sude pinoppar ni si Adam sian dosa dohot hamatean. (1 Mus. 3:15) Alani tobusan, boi ma hita marale-ale tu Jahowa nang pe dang sempurna. Dung i boi ma dihancurhon sude karejo ni Sibolis. (1 Joh. 3:8) Jala gabe saut ma sude rencana ni Debata tu portibi on. Boi ma portibi on mulak muse gabe paradeiso. w21.04 14 ¶1; 19 ¶17

Hea do ro godang halak tu Jerusalem. Sian negara na marasing-asing do nasida, jala mamakke bahasa na marasing-asing. Adong ma kejadian na luar biasa tikki i. Piga-piga halak Jahudi gabe boi makkatai mamakke bahasa ni pengunjung i. Longang hian ma roha ni akka pengunjung i. Alai dang holan i, tamba longang do roha ni nasida mambege hata ni halak Jahudi i dohot hata ni Apostel Petrus. Dipaboa ma tu akka pengunjung i, ikkon marhaporseaon do nasida tu Jesus Kristus, asa boi nasida malua. Hona do i tu roha ni nasida. Jadi, disukkun nasida ma, “Attong aha ma na ikkon bahenonnami akka dongan?” Didok si Petrus ma, “Ikkon tardidi do hamu.” (Ul. 2:37, 38) Luar biasa do na masa di tikki i. Adong hira-hira 3.000 halak na tardidi gabe sisean ni Jesus Kristus. Mulai sian i, lam godang ma halak diurupi asa tardidi, jala torus dope i taulahon sahat tu saonari. w21.06 2 ¶1-2

Godang do ra halak na so berminat di daerahta bahkan na so marlomo ni roha tu barita na tapasahat. Molo songon i, boha do carana asa boi hita toktong semangat mangalului studi? Taingot ma, boi do hatop muba situasi ni sasahalak. Adong do na sebelumna menolak, alai ala muba situasi ni ngoluna, gabe olo do ibana mambege baritatta i. (Mat. 5:3) Adong do halak na so hea olo manjalo publikasitta. Alai ujungna gabe olo do ibana marsiajar Bibel. Jala taboto do, Jahowa do Nappuna sisabion i. (Mat. 9:38) Memang lomo do rohana asa torus hita manuan dohot maniram. Alai taingot ma, Jahowa do na mambahen i tubu. Molo nga berupaya hita mangalului studi, alai tetap dope dang adong studitta unang pola metmet rohatta. Toktong do dipasu-pasu Jahowa upayatta i! w21.07 6 ¶14

Dilean Jahowa do kesanggupan margelleng tu jolma, jala dilean do tanggung jawab mangajari gellengna i asa makkaholongi dohot manomba Jahowa. Nang pe umgogo suru-suruan sian jolma, alai dang dilean kemampuan dohot tanggung jawab i tu nasida. Sada hasangapon do di natua-tua pagodang-godangkon gellengna. Tanggung jawab na massai penting do di natua-tua “mangajar-ajari jala mamodai [anakkonna] hombar tu lomo ni roha ni Jahowa”. (Eps. 6:4; 5 Mus. 6:5-7) Lao mangurupi natua-tua mangajari akka gellengna, diparade organisasi do godang publikasi, video, musik, dohot akka artikel web di jw.org. On patuduhon holong hian do roha ni Jahowa dohot Jesus tu akka dakdanak. (Luk. 18:15-17) Molo berupaya do akka natua-tua mangajari gellengna jala Jahowa na diandalhon halak i, pasti las do roha ni Jahowa. Jala molo diulahon nasida i, na mangurupi gellengna do nasida disi asa gabe anggota keluarga ni Jahowa salelengna. w21.08 5 ¶9

Piga-piga halak mandok, dang pola porlu adong dasar ni haporseaon i jala dang porlu dilului buktina, cukkup ma holan porsea sajo. Alai menurut Bibel, dang songon i haporseaon. Misalna porsea do hita tu Jahowa, Jesus, dohot Harajaonna na adong di surgo. Alai porsea pe hita tu sudena i, ala adong do buktina. (Heb. 11:3) Sahalak ilmuwan na gabe Saksi Jahowa mandok, “Sude na dihaporseai Saksi Jahowa i adong do dasarna, jala sesuai do i tu sains.” Mungkin sukkun-sukkun do ra rohatta, ‘Molo adong do buktina na adong Debata, boasa ma godang halak dang porsea tu Debata?’ Sebenarna adong do buktina, alai na so olo do halak i mangalului i. Si Robert sahalak Saksi Jahowa mandok, “Tikki di sikkola, dang hea diparsiajari hami taringot toppaan. Jadi dang porsea au na adong Panoppa. Alai dung marumur 22 taon au, huboto ma bukti na masuk akkal sian Bibel na patuduhon na adong do Panoppa.” w21.08 15 ¶4-5

Boi do hita marsiajar taringot Jahowa marhite Bibel manang tikki tabege akka donganta marcerita songon dia Jahowa mamasu-masu nasida. Alai asa lam takkas taboto songon dia haburjuon ni Jahowa i, ikkon hita sandiri do na ‘mandai’ i. Misalna, molo naeng gabe perintis hita ikkon tasederhanahon do ngolutta. Taboto do janji ni Jesus na mandok, molo tautamahon Harajaon ni Debata pasti paradeon ni Jahowa do sude kebutuhanta. Alai dang hea dope ra tabuktihon sandiri janji ni Jesus i. (Mat. 6:33) Nang pe songon i, ala porsea hita tu Jesus gabe tasederhanahon ma ngolutta, taorui ma tikkitta karejo asa boi unggodang tikkitta marbarita na uli. Ala tabahen songon i, gabe boi ma taida songon dia Jahowa paradehon kebutuhanta. Jala boi ma ‘tadai’ haburjuon ni Jahowa. w21.08 26 ¶2

Songon i do na masa saonari? Ido. Godang do pamimpin agama saonari na las rohana mangida halak na sangap, na mora, jala na timbo sikkolana, nang pe pangalaho dohot parngoluon ni nasida dang sesuai tu prinsip ni Bibel. Alai leas do roha ni akka pamimpin agama i mangida siihutton Jesus, jala dang sangap di nasida akka siihutton Jesus i nang pe denggan pangalaho ni nasida. Songon na didok si Paulus, dipillit Debata do akka halak “na lea” sian portibi on gabe naposona. (1 Kor. 1:26-29) Alai sasittongna molo di Debata, arga do sude naposona. Aha do na ikkon taulahon asa unang terpengaruh tu pandangan ni portibi on? (Mat. 11:25, 26) Unang ma terpengaruh hita tu pandangan ni halak taringot Saksi Jahowa. Taingot ma holan akka halak na serep marroha do na dipakke Jahowa mangulahon lomo ni rohana. (Ps. 138:6) Jala pikkirhon ma sadia godang akka halak na so timbo sikkolana na dipakke Jahowa mangulahon lomo ni rohana. w21.05 8 ¶1; 9 ¶5-6

Las do roha ni Apostel Paulus tikki manjalo bantuan sian akka dongan sahaporseaonna. Misalna tikki dilean halak Kristen na di Pilippi bantuan materi tu ibana, dijalo ibana do i. Dang maila ibana manjalo bantuan sian na asing. (Plp. 2:19-22) Akka dongan na matua, patudu ma na diargai hamu akka na poso di huria. Molo adong na menawarhon bantuan menjemput manang mangantar hamu tu parpunguan, belanja, manang na asing, jalo hamu ma i. Alana, i sada cara ni Jahowa patuduhon holongna tu hamu. Molo olo hamu manjalo bantuan sian akka na poso, boi ma gabe mardongan hamu tu halak i. Asing ni i, sai urupi hamu ma nasida asa toktong semangat melayani Jahowa. Paboa ma tu nasida na las do rohamuna mangida halak i semangat melayani Jahowa. Ceritahon hamu ma akka pengalamanmuna na menarik. Molo diulahon hamuna i, berarti na “mandok mauliate” do hamu tu Jahowa ala nungnga ditarik Ibana akka na poso i tu huria.​—Kol. 3:15; Joh. 6:44; 1 Tes. 5:18. w21.09 11-12 ¶12-13

Massai holong do roha ni Jahowa tu akka donganta sahaporseaon. Alai molo hita, olo do sipata maol tahilala patuduhon holong tu nasida. Jala olo do tabahen haccit roha ni akka dongan. Alana asing be do kebudayaan dohot latar belakangta, jala sude do hita mardosa. Alai berupaya ma hita sude makkaholongi akka donganta sahaporseaon. Boha ma carana? Tatiru ma Bapakta Jahowa na sai toktong patuduhon holong tu nasida. (Eps. 5:1, 2; 1 Joh. 4:19) Molo diida halak parasi roha adong na susa, berupaya do ibana mangurupi dohot patoguhon. Songon i do na diulahon Jesus. Sian pambahenanna tu akka halak, tarida do na ditiru ibana asi ni roha ni Jahowa. (Joh. 5:19) Misalna tikki diida Jesus godang halak ro mandapotton ibana, “asi ma rohana mangida nasida. Ai disusai do nasida jala dang disarihon, dos songon biru-biru na so adong parmahanna”. (Mat. 9:36) Dipamalum ibana do muse halak na marsahit. Asing ni i, tikki diida ibana “akka na loja jala na mamboan boban na borat”, olo do Jesus mangurupi jala patoguhon nasida.​—Mat. 11:28-30; 14:14. w21.09 22 ¶10-11

Lomo do roha ni Jahowa patuduhon asi ni roha. Didok si Paulus ‘massai balga do asi ni roha’ ni Jahowa. Memang hata ni si Paulus i, tu akka halak na mandapot harapan tu surgo do. Alai sabotulna dang holan tu halak i dipatuduhon Jahowa asi ni rohana, tu sude jolma do. (Eps. 2:4-7) Si Daud mandok, “Burju do Jahowa tu sude, jala tarida do asi ni rohana di sude akka ulaonna.” (Ps. 145:9) Jadi ala holong roha ni Jahowa tu jolma, dang olo Ibana manahan asi ni rohana, selagi adong dope alasanna lao patuduhon i. Jesus do na paling mananda Jahowa. Takkas do diboto ibana na lomo do roha ni Jahowa patuduhon asi ni rohana. Sebelum ro tu portibi on, nungnga tung massai leleng Jesus rappak dohot Jahowa. (Poda 8:30, 31) Jadi nga jotjot diida Jesus, Jahowa patuduhon asi ni rohana tu jolma pardosa. (Ps. 78:37-42) Jala saleleng di portibi on Jesus, jotjot do diajarhon ibana taringot asi ni roha ni Jahowa i. w21.10 8-9 ¶4-5

Dialusi Jahowa do tangiang ni Jesus i sian surgo marhite soara na gogo, jala marjanji do Jahowa pasangappon goarna i. Dipasangap Jesus do goar ni Jahowa saleleng di tano on. (Joh. 17:26) Jadi halak Kristen na sittong, ikkon bangga do mamakke goar ni Jahowa jala paboahon i tu akka halak. Dang leleng dung dipajongjong huria Kristen di abad na parjolo, “dipillit Debata do deba sian nasida gabe bangso na pasangappon goarna”. (Ul. 15:14) Bangga do halak Kristen di abad na parjolo mamakke goar ni Jahowa jala paboahon i tu akka halak. Jotjot do dipakke nasida goar ni Jahowa tikki marbarita na uli jala tikki manurat Bibel. Jadi takkas do dipatudu nasida, holan nasida do bangso na pasangappon goar ni Debata. (Ul. 2:14, 21) Saonari, Saksi Jahowa ma organisasi na pasanggapon goar ni Jahowa. w21.10 20-21 ¶8-10

Dipatudu Jahowa do holongna na manoktong i sahat tu salelengna. Adong do 26 hali hata i diulangi di Psalmen 136. Di ayat 1 didok, “Mandok mauliate ma tu Jahowa, ai na burju do Ibana. Toktong do dipatudu Ibana holong ni rohana sahat tu saleleng ni lelengna.” (Ps. 136:1) Di ayat 2 sahat tu ayat 26 diulangi dope hata, “Toktong do dipatudu Ibana holong ni rohana sahat tu saleleng ni lelengna.” Pasti gabe dipatogu do hita manjaha akka ayat i. Gabe taboto ma torus do dipatudu Jahowa ‘holongna na manoktong i tu hita sahat tu salelengna’ jala dang muba holongna i. Jadi dang mungkin tinggalhononna hita tikki susa. Gariada lam dipatudu Ibana do holongna i tu hita. Ala taboto songon i holong ni Jahowa, gabe boi ma hita togu jala marlas ni roha nang pe godang hasusaatta. Jala i do na mambahen hita toktong di bagasan hasittongan.​—Ps. 31:7 w21.11 4-5 ¶9-10

Hea do hamu merasa khawatir mamikkiri ari na naeng ro? Misalna tikki dihancurhon agama palsu, tikki ro serangan Gog sian Magog, manang tikki ro porang Armagedon. Sukkun-sukkun do ra rohamuna, ‘Boi do au martahan tikki masa i sude?’ Hata ni Jesus di ayat sadari on boi mangurupi hita asa lam togu. Jesus mandok, “Unang pola busisaon rohamuna. Porsea ma hamu tu Debata.” Molo togu haporseaotta, i boi mangurupi hita asa martahan mangadopi aha na lao masa. Lao mamboto sadia togu do haporseaotta, tapikkirhon ma songon dia do sikapta saleleng on tikki masa hasusaan. Tikki marhasil hita martahan manaon hasusaan saonari, gabe lam togu ma haporseaotta, jala gabe rade ma hita mangadopi hasusaan di ari na naeng ro. w21.11 20 ¶1-2

Dipaingot si Paulus do si Timoteus dohot sude halak Kristen asa marhobas tu Debata sian nasa gogona. (2 Tim. 4:5) Alai adong do tantanganna. Misalna akka dongan na tinggal di negara na mangorai ulaon ni Saksi Jahowa. Olo do gabe mabiar nasida marbarita na uli. Adong do muse masalah na asing na boi mambahen metmet rohatta. Misalna ala sibuk karejo mangalului hepeng, olo do gabe palojahu dihilala lao marbarita na uli. Adong do muse akka donganta na ikkon sai di jabu ala marsahit na parah manang ala nga matua. Akka donganta na asing, sai metmet do rohana ala merasa dang mararga be ibana di Jahowa. Dang soal aha masalahta, boi do dibahen Jahowa hita margogo manaon i. Jala boi do diurupi Jahowa hita lao mangalean na undenggan tu Ibana. w21.05 20 ¶1-3

Olo do hita ditekan mangulahon akka ulaon na dihasogohon Jahowa. Boha ma carana asa boi tabahen keputusan na denggan? Taida ma prinsip na adong di 3 Musa 19:19. Didok disi, “Unang pakke hamu abit na dibahen sian dua jenis bonang.” Alani patik ni Jahowa on, gabe takkas do tarida na berbeda halak Israel sian akka bangso na di sakaliling ni nasida. Memang dang mangihutton Patik ni si Musa be hita saonari, alai adong do na boi taparsiajari sian i. Ikkon barani do hita berbeda sian halak na so manomba Jahowa. Tottu holong do rohatta tu nasida, alai ikkon tapatudu do na umholong rohatta tu Jahowa. Penting do taulahon on, asa boi hita toktong badia. Alana, nungnga dipapulik hita lao marhobas tu Debata.​—2 Kor. 6:14-16; 1 Ptr. 4:3, 4. w21.12 5 ¶14; 6 ¶16

Jesus mandok, “Molo diihutton hamu hatakku, tutu ma hamu akka siseanku. Botoonmuna ma hasittongan jala paluaon ni hasittongan i ma hamu.” (Joh. 8:31, 32) Las do rohanami tu hamu ala dang olo hamu mangihutton godang halak. Dilului hamu do ajaran na sittong. Ringgas do hamu mamparsiajari Bibel, gabe diboto hamu ma aha na dipangido Debata sian hamu. Jala ditangihon hamu do ajaran ni Jesus. Ditinggalhon hamu do agama na so sittong dohot akka perayaanna. Memang dang sai mura mambahen akka perubahan i. Dang sai mura mangulahon na dipangido Jahowa jala maninggalhon kebiasaan na so sadalan tu lomo ni rohana. (Mat. 10:34-36) Alai ala holong rohamuna tu Jahowa jala lomo rohamuna naeng mambahen las rohana, berupaya do hamu mangulahon i. Pasti las do roha ni Jahowa mangida hamu!​—Poda 27:11. w21.12 22 ¶3; 23 ¶5

Olo do si Musa manjalo sipasingot dung diulahon ibana kesalahan na serius. Di sada tikki ala muruk ibana, gabe dang dipasangap ibana be Jahowa. Ujungna dang dipaloas Jahowa si Musa masuk tu Tano na Dijanjihon i. (4 Mus. 20:1-13) Dipangido si Musa do asa diuba Jahowa keputusanna i. Alai didok Jahowa, “Unang be hatai taringot i tu Au.” (5 Mus. 3:23-27) Dang gabe muruk si Musa, dijalo ibana do keputusan ni Jahowa. Gabe toktong ma ibana dipakke Jahowa mamimpin halak Israel. (5 Mus. 4:1) Contoh na denggan do si Musa tu hita, ala olo ibana dinasehati dohot dipasingot. Toktong do ibana setia tung pe dang boi ibana dohot tu Tano na Dijanjihon i. Denggan do molo tatiru si Musa. (Poda 4:10-13) Jala nungnga godang donganta na mandapot manfaat ala maniru ibana. w22.02 11 ¶9-10

Taon 32 M tikki musim dingin, marsahit ma si Lasarus jala mate ma ibana. (Joh. 11:3, 14) Adong do dua iboto ni si Lasarus, i ma si Maria dohot si Marta. Ale-ale ni Jesus do halak i na tolu jala holong hian do roha ni Jesus tu nasida. Disi dibege si Marta naung ro Jesus, pittor lao ma ibana mandapotton Jesus. Didok ibana, “Molo dison hian ho Tuan, dang mate ibotokki.” (Joh. 11:21, 32-33) Boasa tangis Jesus di tikki i? Lungun hian rohana mangida si Maria dohot si Marta, ala na mate i si Lasarus. Molo adong keluarga manang sahabatmuna na mate, diattusi Jahowa do songon dia pakkilalaanmuna. “Suman situtu” do Jesus tu Bapakna, Jahowa. (Heb. 1:3) Jadi tikki na lungun i roha ni Jesus ala mate si Lasarus, pasti songon i do tong pakkilalaan ni Jahowa. (Joh. 14:9) Tarapul do rohatta mamboto on. Alani i pos ma rohamuna molo lungun rohamuna ala mate halak na dihaholongi hamu, diattusi Jahowa do i, jala Ibana pe lungun do rohana alani i. Lomo do roha ni Jahowa pamaluppon haccit ni rohamuna i.​—Ps. 34:18; 147:3. w22.01 15 ¶5-7

Molo taparade tikki asa boi martangiang tu Jahowa, manangihon Hatana, jala mangarimangi akka sifatna, balga do manfaatna. Na parjolo, gabe lam denggan ma hita mambahen keputusan. Didok Bibel, “Marbisuk do manang ise na mardongan tu halak na marbisuk.” (Poda 13:20) Na paduahon, lam malo ma hita mangajari. Asa boi taurupi sasahalak jonok tu Jahowa, ikkon jotjot do hita martangiang dohot mangarimangi akka parange ni Jahowa. Alana molo nungnga lam bagas holongta tu Jahowa, gabe lam mura ma hita mangajari studitta asa makkaholongi Jahowa. Songon i do na diulahon Jesus. Dipaboa ibana do taringot Jahowa dohot akka parangena tu akka siseanna, gabe dihaholongi akka siseanna ma Jahowa. (Joh. 17:25, 26) Na patoluhon, lam togu ma haporseaotta. Tikki dialusi Jahowa tangiangta asa ditogu-togu hita manang diurupi, lam togu ma haporseaotta.​—1 Joh. 5:15. w22.01 30 ¶15-17

Massai holong do roha ni Jahowa tu hita jala lomo do rohana asa marlas ni roha hita. Alani i ma, dipangido Jahowa do hita mambolokkon cara marpikkir dohot kebiasaan na sala. (Jes. 48:17, 18) Diboto Jahowa do muse molo torus taulahon keinginan na sala i, gabe susa ma hita dohot akka halak na di sakalilingta. Jala lungun do roha ni Jahowa mangida i. Bisa jadi adong do dongan manang keluarga na mangarehei hita ala berupaya hita muba. (1 Ptr. 4:3, 4) Didok nasida, bebas do hita mangulahon manang aha pe na tahalomohon, jala dang porlu hita diatur-atur. Alai akka halak na so olo mangihutton standar ni Jahowa, sasittongna dang benar-benar bebas. Gariada dirajai portibi ni Sibolis do nasida. (Rom 12:1, 2) Jadi ikkon tapillit do: Portibi ni Sibolis on do na torus membentuk pangalahotta, manang paloasson Jahowa membentuk hita gabe halak na denggan.​—Jes. 64:8. w22.03 3 ¶6-7

Molo tarimangi Hata ni Debata, diurupi ma hita padenggatton cara marpikkirta, songon pengalaman ni donganta borua naung mabalu. Dipangido sahalak sintua ma ibana manjaha bukku Job. Tikki dijaha ibana bukku i, disalahon ibana ma cara marpikkir ni si Job. Didok ibana ma di bagasan rohana, “Unang holan masalahmi pikkiri Job!” Alai ujungna disadari ibana ma songon si Job do pakkilalaanna. Alani i gabe dang sai tu masalahna i be fokusna. On ma na mambahen ibana margogo nang pe lungun dope rohana ala mate suamina. Dipatogu Jahowa do hita muse marhite akka dongan sahaporseaon. Tatiru ma si Paulus na lomo rohana “masipatoguan” dohot akka dongan sahaporseaonna.​—Rom 1:11, 12. w21.05 22 ¶10-11; 24 ¶12

Najolo didok Jahowa do tu halak Israel, “Tolu hali di bagasan sataon ikkon ro do akka bawa tu jolo ni Jahowa Debatamuna di inganan na pinillitna i.” (5 Mus. 16:16) Lao mandalatton paretta ni Jahowa i, ikkon ditinggalhon nasida do jabu dohot ladangna. Nang pe songon i marjanji do Jahowa tu nasida, “Molo ro hamu . . . tu jolo ni Jahowa, dang adong halak na lao mangarampas luatmuna i.” (2 Mus. 34:24) Jadi ikkon marhaporseaon do halak Israel tu Jahowa asa boi nasida mangihutton paretta ni Jahowa i. Molo olo nasida mangoloi Debata, godang ma pasu-pasu na dapot ni nasida. Gabe lam takkas ma diattusi nasida patik ni Debata, dirasahon nasida ma holong ni Jahowa, jala boi ma nasida masipatoguan dohot halak Israel na asing. Saonari pe, boi do tadapot godang pasu-pasu molo berupaya hita ro marpungu. Jala pasti las do roha ni Jahowa molo tapersiappon komentar na denggan. w22.03 22 ¶9

Dilatik Jahowa do Jesus gabe Sintua ni Malimta. Diloas Jahowa do Jesus manaon na haccit, asa diboto ibana songon dia maolna toktong setia tikki diuji massai borat. Alani borat ni sitaononna, hea do Jesus martangiang “marhite angguk-angguk dohot ilu-ilu”. Jala ala nungnga hea dirasahon ibana songon dia boratna manaon na haccit, gabe diattusi ibana ma pakkilalaatta. Dung i “boi ma ibana mangurupi akka halak na marsitaonon tikki diuji”. Mandok mauliate ma hita tu Jahowa, ala dipillit Ibana do Jesus gabe Sintua ni Malimta, na boi ‘mangattusi hagaleotta’. (Heb. 2:17; 4:14-16; 5:7-10) Diloas Jahowa pe Jesus marsitaonon lao mangalusi sukkun-sukkun on do: Boi do jolma toktong setia tu Debata nang pe susa ibana? Didok Sibolis, dang mungkin olo jolma mangoloi Debata molo so adong na binuatna. Menurut Sibolis songon si Adam do sude jolma i, dang holong rohana tu Jahowa. (Job 1:9-11; 2:4, 5) Ala toktong Jesus setia, gabe terbukti ma na pargabus do Sibolis. w21.04 17 ¶7-8

Ikkon diulahon sahalak parsiajar Bibel do naung diparsiajari ibana, asa boi ibana tardidi. Molo diulahon ibana i sarupa ma ibana songon “bawa na marbisuk” di tudosan ni Jesus, na manggali tano massai bagas jala mambahen fondasina di ginjang ni batu. (Mat. 7:24, 25; Luk. 6:47, 48) Jadi ikkon berupaya do hamu mangurupi studimuna asa muba. (Mrk.  10:17-22) Boi do hamu marsiajar sian Jesus. Hea do didok Jesus tu sahalak bawa na mora asa dijual sude artana jala dilehon tu na pogos. Pasti diboto Jesus do maol mangulahon i. (Mrk. 10:23) Alai boasa dipangido Jesus i? Ala holong roha ni Jesus tu ibana. Sipata olo do dang pittor tajujui studitta mangulahon na diparsiajari ibana, ala didok rohatta dang siap dope ibana mangulahon i. (Kol. 3:9, 10) Alai molo hatop tapaboa aha na ikkon dipauba studitta, lam hatop ma ibana mangulahon i. Jala on patuduhon, na parduli do hita tu ibana.​—Ps. 141:5; Poda 27:17. w21.06 3-4 ¶3, 5

Didok Apostel Petrus, sitiruon na denggan do Jesus ala martahan nang pe dianiaya. Alai dang holan i, godang nai dope na boi tatiru sian Jesus. (1 Ptr. 2:18-25) Termasuk ma i sude na dihatahon dohot na diulahon ibana. Boi do hita jolma na so sempurna maniru Jesus na sempurna? Boi. Dang adong didok si Petrus ikkon sempurna hita maniru Jesus. Na ikkon taulahon, berupaya sian nasa gogotta mangihutton teladan ni Jesus. Dung i boi ma taulahon hata ni si Johannes na mandok, ‘Ihutton ma bogas ni pat ni Jesus.’ (1 Joh. 2:6, surat na di toru) Ala sai diulahon Jesus do lomo ni roha ni Jahowa, gabe lam jonok ma hita tu Jahowa molo taihutton bogas ni pat ni Jesus. (Joh. 8:29) Dung i boi ma tabahen las roha ni Jahowa. Molo berupaya hita marale-ale tu Jahowa, gabe olo ma Bapakta na di surgo i jonok tu hita.​—Jak. 4:8. w21.04 3 ¶4-6

Akka sifat na denggan do na diparrohahon Jahowa sian hita. Diboto Ibana do aha na boi taulahon jala lomo do rohana asa jonok hita tu Ibana. Jadi torus ma hita jonok tu Jahowa, asa boi hita toktong marale-ale tu Ibana salelengna! (Joh. 6:44) Molo pos do rohatta na dihaholongi Jahowa hita, gabe semangat ma hita melayani Ibana nang pe adong tantangan. Alai molo dang pos rohatta, ‘moru ma gogotta’. (Poda 24:10) Molo nungnga gale hita, dang porsea be hita tu holong ni Debata, gabe mura ma hita diserang Sibolis. (Eps. 6:16) Adong do piga-piga donganta na ragu tu holong ni Jahowa jala merasa dang dipardulihon Jahowa ibana. Alani i, gabe gale ma haporseaonna. Molo songon i do pakkilalaatta, aha do na ikkon taulahon? Pittor hatop ma tabolokkon pikkiran sisongon i. Tapangido ma tu Jahowa, asa digatti ‘arsak ni rohatta’ i dohot ‘hadameon na so boi diattusi jolma, na boi manjaga roha dohot pikkiranta’. (Ps. 139:23; Plp. 4:6, 7) Jala ingot ma, dang holan hamu na makkilala sisongon i. w21.04 20 ¶1; 21 ¶4-6

Songon dia do hamu boi gabe Saksi Jahowa? Adong do ra sian hamu na mambege “barita na uli” sian natua-tuamuna, sian dongan sakarejo, sian dongan sasikkola, manang adong na ro marbarita tu jabumuna. (Mrk. 13:10) Dung i marsiajar Bibel ma hamu. Pasti godang do upaya dohot tikki na dilehon guru studimuna i lao mangajari hamu. Gabe holong ma rohamuna tu Jahowa, jala diboto hamu ma na dihaholongi Jahowa do hamu. Gabe diboto hamu ma hasittongan, jala saonari gabe sisean ni Jesus ma hamu. Dung i adong ma harapanmuna lao mangolu saleleng ni lelengna. (Joh. 6:44) Pasti mandok mauliate do hita tu Jahowa, ala dipakke Ibana sasahalak lao mangajarhon hasittongan tu hita. Ujungna adong ma kesempatanta gabe naposona. Saonari dapotta ma tugas na istimewa mangurupi akka halak asa mardalan di dalan tu hangoluan i. Jadi semangat ma hita marbarita na uli jala mangalului studi. w21.07 2 ¶1-2