Toktong ma Marlas ni Roha Mangurus Halak na Dihaholongi Hamu

1-2. Molo hamu mangurus sasahalak saonari, boha do perasaan ni Jahowa mangida hamu? (Poda 19:17) (Ida gambar.)

ADONG ma sahalak donganta bawa sian Korea na margoar si Jin-yeol. Didok ibana, “Nungnga 32 taon hami menikah. Alai lima taon na parpudi on, marsahit do istrikku. Hona parkinson do ibana jala gabe maol bergerak. Jadi au ma na mangurus ibana. Holong hian do rohakku tu istrikki jala las do rohakku mangurus ibana. Adong do podomanna khusus di jabunami. Ganup borngin modom disi do ibana. Au modom di labbungna ma. Jala biasana hutiop do tanganna tikki modom hami.”

² Songon i do situasimuna saonari? Ra hamu do na mangurus natua-tuamuna, pasanganmuna, gellengmuna, manang donganmuna. Pasti las do rohamuna mangulahon i ala holong rohamuna tu nasida. Jala diulahon hamu pe i, ala dioloi hamu do paretta ni Jahowa. (1 Tim. 5:​4, 8; Jak. 1:27) Alai dang sai mura mangurus sasahalak. Sipata dang sai diboto halak situasi na diadopi hamu. Jala olo do ra didok rohamuna dang adong na mangattusi perasaanmuna. Ra mekkel do hamu di na patar, alai tangis do hamu di na buni. (Ps. 6:6) Alai ingot ma, sai diparrohahon Jahowa do hamu jala diattusi Ibana do perasaanmuna. (Bandingkon tu 2 Musa 3:7.) Massai arga do di Ibana ilu-ilumuna dohot pengorbananmuna. (Ps. 56:8; 126:5) Diboto Jahowa do sude na diulahon hamu lao mangurus halak na dihaholongi hamu. Bahkan dianggap Ibana do hira na marutang Ibana tu hamu, jala marjanji do Ibana lao manggarar i.—Jaha Poda 19:17.

3. Boasa dang mura di si Abraham dohot si Sara mangurus si Tera?

³ Di Bibel, dipaboa do taringot piga-piga halak na mangurus halak na dihaholongi nasida. Misalna, si Abraham dohot si Sara. Tikki lao nasida sian Ur, dohot do bapak ni nasida, i ma si Tera. Tikki i, umurna hira-hira 200 taon. Mardalan ma nasida hira-hira 960 kilometer tu Haran. (1 Mus. 11:​31, 32) Holong do roha ni si Abraham dohot si Sara tu si Tera. Alai pasti dang mura mangurus ibana, tarlumobi saleleng di pardalanan. Ra tikki i, marhalode manang marunta do nasida. Jala pasti maol do on di si Tera. Jadi wajar do molo loja hian nasida di tikki i. Alai dang soal songon dia situasina, dilehon Jahowa do gogo tu nasida. Jadi pasti dilehon Jahowa do tong gogo tu hamu, songon na dilehon Ibana tu si Abraham dohot tu si Sara.—Ps. 55:22.

4. Aha do na lao tabahas di artikel on?

⁴ Aha do kuncina asa sabar hamu mangurus halak na dihaholongi hamu? Las ni roha. (Poda 15:13) Halak na marlas ni roha boi do toktong las rohana nang pe maol situasina. (Jak. 1:​2, 3) Alai boha carana? Martangiang ma hamu tu Jahowa jala pangido ma asa diurupi Ibana hamu toktong marpikkiran positif. Di artikel on, lao tabahas ma aha do na porlu diulahon hamu asa toktong marlas ni roha. Dung i, tabahas ma aha do na boi diulahon halak na asing lao mangurupi hamu. Alai na parjolo, tabahas ma akka tantangan aha do na diadopi hamu jala boasa ikkon toktong hamu marlas ni roha.

NA BOI MAMBAHEN MAGO LAS NI ROHAMUNA

5. Aha do pengaruhna molo dang marlas ni roha hamu?

⁵ Molo dang marlas ni roha hamu, gabe mura ma hamu loja. (Poda 24:10) Molo nungnga loja hamu, boi do ra gabe dang denggan be hata manang pambahenanmuna tu halak na diurus hamu. Jadi, akka aha do na boi mambahen mago las ni rohamuna?

6. Aha do biasana na mambahen piga-piga halak gabe loja hian mangurus halak na dihaholongi nasida?

⁶ Ala palojahu. Sahalak donganta borua na margoar si Leah mandok, “Dang sai mura mangurus na matua. Biasana semangat do iba tikki manogot, alai dung botari loja hian do huhilala, hira dang adong be gogokku. Bahkan lao mambalas pesan pe, dang sanggup be iba.” Asing ni i, adong do na gabe hurang modom jala dang adong be tikkina lao istirahat. I ma na dihilala donganta na margoar si Inés. Didok ibana, “Ganup borngin, ikkon dungo do au piga-piga hali lao mangurus simatuakku boru. Gabe hurang modom ma au. Asing ni i, alani situasinami on nungnga leleng dang mardalani au dohot suamikku.” Adong do tong na so boi be dohot tu acara ramah tamah manang mangulahon tugas di huria ala ikkon mangurus halak na dihaholongi nasida. Akibatna, gabe lungun ma roha ni nasida jala kesepian.

7. Boasa sipata merasa bersalah akka donganta na mangurus keluargana?

⁷ Ala merasa bersalah. Sahalak donganta borua na margoar si Jessica mandok, “Didok rohakku, ikkon hulehon ma nian sude tikkikku lao mangurus bapakku. Alani i, gabe merasa bersalah do au molo hupakke tikkikku lao istirahat.” Adong do tong na merasa bersalah ala godang dope na hurang sian cara ni nasida mangurus halak na dihaholongi. Manang olo do sipata dihilala nasida dang sanggup be nasida mangulahon i. Ra alani lojana, dang denggan be hata dohot pambahenan ni nasida. Gabe lungun hian ma roha ni nasida jala merasa bersalah. (Jak. 3:2) Asing ni i, adong do na gabe lungun rohana ala diida ibana lam parah sahit ni halak na diurus ibana. I ma na dihilala donganta na margoar si Barbara. Didok ibana, “Haccit hian do roha mangida lam parah sahit ni donganta sian ari tu ari.”

8. Boha do perasaan ni piga-piga halak tikki adong na mandok mauliate tu nasida? Paboa ma contohna.

⁸ Ala merasa dang diargai. Ra, jarang do halak na diurus hamu mandok mauliate manang mamuji hamu. Jadi tikki adong na mandok mauliate tu hamu alani kerja kerasmuna, pasti las hian do rohamuna. (1 Tes. 5:18) I ma na dihilala donganta borua na margoar si Melissa. Didok ibana, “Sipata, sappe tangis do au alani lojana manang ala metmet rohakku. Alai tikki didok akka halak na huurus i tu au, ‘Mauliate da nga loja ho mangurus au,’ gabe las hian do rohakku! Hata sisongon i mambahen au gabe semangat muse lao mangurus nasida.” Songon i do tong pengalaman ni donganta bawa na margoar si Ahmadu. Ibana dohot istrina mangurus keponakan ni nasida na marsahit epilepsi. Didok ibana, “Memang dang diattusi keponakannami songon dia pengorbanan na dibahen hami lao mangurus ibana. Alai tikki didok ibana mauliate manang didok ibana na holong rohana tu hami, gabe las hian do rohanami.”

CARA ASA TOKTONG MARLAS NI ROHA

9. Boasa ikkon masuk akkal hamu?

⁹ Masuk akkal ma hamu. (Poda 11:2) Terbatas do tikki dohot gogotta. Alani i, ikkon tasadari do dang sude boi taulahon. Jadi molo dang boi diulahon hamu aha na dipangido halak sian hamu, unang ma segan manolak i. Molo diulahon hamu songon i, on patuduhon halak na masuk akkal do hamu. Jala molo adong na manawarhon bantuan tu hamu, jalo ma i. Sahalak donganta bawa na margoar si Jay mandok, “Ganup ari, taulahon ma akka ulaon na tolap taulahon. Alana molo taakkui keterbatasanta jala dang tapaksahon diritta, boi ma hita toktong marlas ni roha.”

10. Boasa ikkon taattusi situasi ni halak na taurus? (Poda 19:11)

¹⁰ Mangattusi ma hamu. (Jaha Poda 19:11.) Molo diattusi hamu situasi ni halak na diurus hamu, boi do hamu toktong tenang nang pe dang denggan hata dohot pambahenanna tu hamu. Jala molo songon i pe dibahen nasida tu hamu, alani sahitna do i, dang na sian rohana. (Pjm. 7:7) Misalna ala marsahit, halak na burju jala na sabar pe, olo do gabe mangamuk jala mangalo tu hamu. Manang gabe jotjot ibana marungut-ungut jala muruk. Jadi molo hamu mangurus sasahalak na marsahit na parah, lului ma informasi taringot sahitna i. Molo diattusi hamu situasina, gabe diboto hamu ma alani sahitna do i, dang na sian rohana.—Poda 14:29.

11. Aha do ulaon na urrikkot na ikkon diulahon hamu ganup ari? (Psalmen 132:​4, 5)

¹¹ Patogu ma parale-aleonmuna tu Jahowa. Biasana, asa boi diulahon hamu ulaon “na urrikkot”, ikkon diorui hamu do tikkimuna lao mangulahon ulaon na asing. (Plp. 1:10) Sada sian ulaon na urrikkot, i ma patoguhon parale-aleonmuna tu Jahowa. I ma na diulahon Raja Daud. Nang pe sibuk ibana, alai dibahen ibana do ulaonna manomba Jahowa gabe na uppetting di ngoluna. (Jaha Psalmen 132:​4, 5.) Dos songon i ma, nang pe sibuk hamu, lehon ma tikkimuna lao manjaha Bibel ganup ari jala martangiang. I ma na diulahon donganta borua na margoar si Elisha. Didok ibana, “Ala martangiang au jala hurimangi akka ayat sian bukku Psalmen, gabe boi ma au toktong marlas ni roha. Balga hian do pengaruh ni tangiang di au. Ala jotjot au martangiang di bagasan sadari i, gabe boi ma au tetap tenang.”

12. Boasa ikkon dijaga hamu kesehatanmuna?

¹² Jaga ma kesehatanmuna. Molo sibuk hita, tarlumobi molo mangurus keluarga na marsahit manang na matua, pasti maol do hita manjaga kesehatan. Alana, olo do ra dang adong be tikkitta lao manuhor manang paradehon sipanganon na bergizi tu diritta. Hape asa boi hita toktong sehat, ikkon taallang do sipanganon na bergizi jala olahraga. Alani i nang pe otik tikkimuna, alai manfaatton ma i asa boi olahraga jala mangallang sipanganon na bergizi. (Eps. 5:​15, 16) Asing ni i, ikkon cukkup tidur do hamu. (Pjm. 4:6) Akka ilmuwan na meneliti taringot otak paboahon, tikki modom hita gabe dibolokkon do akka raccun sian otakta. Jala sada artikel taringot medis mandok, molo cukkup tidur sasahalak, dang pakhawatirhu be ibana jala boi toktong tenang di situasi na maol. Asing ni i, bahen ma tikkimuna lao mardalani manang rekreasi. (Pjm. 8:15) Sahalak donganta na mangurus keluargana paboahon aha na mambahen ibana toktong marlas ni roha. Didok ibana, “Molo denggan cuaca, huusahahon do lao tu luar jala mandadang. Asing ni i, pinomatna sahali sabulan, hubahen do jadwal asa boi bergaul dohot akka dongan.”

13. Aha do manfaatna molo mekkel hamu? (Poda 17:22)

¹³ Unang ma lupa mekkel. (Jaha Poda 17:22; Pjm. 3:​1, 4) Molo mekkel hamu, balga do pengaruh ni i tu kesehatanmuna. Tikki mangurus sasahalak, jotjot do terjadi situasi na so diharappon hamu. Alai asa unang muruk hamu, lului ma na boi mambahen hamu mekkel sian situasi i. Jala molo rap mekkel hamu dohot halak na diurus hamu, gabe lam akrab ma hamu jala lam marsihaholongan.

14. Aha do manfaatna molo dipaboa hamu perasaanmuna tu donganmuna?

¹⁴ Paboa ma perasaanmuna tu donganmuna. Nang pe nungnga berupaya hamu asa toktong marlas ni roha, olo do sipata marsak muse hamu. Molo songon i do situasina, paboa ma perasaanmuna tu dongan na burju jala na mangattusi perasaanmuna. (Poda 17:17) Dongan sisongon i rade do manangihon hamu jala patoguhon rohamuna. Hasilna, boi ma marlas ni roha hamu muse.—Poda 12:25.

15. Aha do manfaatna molo dibayakkon hamu ngolumuna di Paradeiso haduan?

¹⁵ Bayakkon ma songon dia annon ngolumuna di Paradeiso. Ingot ma, dang salelengna hamu mangurus keluargamuna na matua manang na marsahit. Alana, dang sakkap ni Jahowa i tu hita jolma. (2 Kor. 4:​16-18) Satokkin nai, dapotta ma “hangoluan na saleleng ni lelengna”. (1 Tim. 6:19) Jadi molo jotjot dihatai hamu taringot Paradeiso tu halak na diurus hamu, pasti gabe marlas ni roha do hamu na dua. (Jes. 33:24; 65:21) I ma na diulahon donganta borua na margoar si Heather. Didok ibana, “Jotjot do hupaboa tu halak na huurus songon dia annon hami rap manjait, rap marlojong, jala marsepeda di Paradeiso. Dibayakkon hami ma muse annon diloppa hami sipanganon na tabo tu akka halak na dihaholongi hami naung dipahehe. Alani pakkirimon on, mandok mauliate godang do hami tu Jahowa.”

TAURUPI MA NASIDA

16. Aha do na boi taulahon lao mangurupi donganta na mangurus keluargana? (Ida gambar.)

¹⁶ Taurupi ma nasida asa boi istirahat. Tawarhon ma bantuan asa hita na manjaga halak na diurus donganta i. Molo taulahon i, boi ma ibana istirahat jala mangurus kebutuhanna sandiri. (Gal. 6:2) Adong do akka donganta na mambahen jadwal asa boi mangulahon on. Donganta si Natalya na mangurus suamina na lumpu mandok, “Adong sahalak donganta bawa na ro tu jabunami sahali manang dua hali saminggu. Rap marbarita do ibana dohot suamikku, makkata-hatai, bahkan rap manonton film do nasida. Las hian do roha ni suamikku. Jala au pe, gabe adong ma tikkikku lao istirahat dohot mangulahon ulaon na huhalomohon, misalna mardalan tu luar.” Asing ni i, asa boi donganta i cukkup tidur, tatawarhon ma asa manginap hita di jabu ni nasida.

17. Molo adong donganta na mangurus keluargana, aha do na porlu taulahon asa boi dinikmati ibana acara parpunguan?

¹⁷ Taurupi ma nasida asa boi menikmati acara parpunguan. Ala sibuk nasida mangurus halak na dihaholongi nasida, olo do ra dang boi fokus nasida tikki marpungu, tikki parpunguan wilayah, dohot parpunguan regional. Alani i, tatawarhon ma bantuan asa hita na mandongani halak na diurus nasida i. Boi do taulahon on saleleng di acara parpunguan i manang di piga-piga bagian di acara i. Alai molo ikkon sai di jabu do na diurusna i, tatawarhon ma bantuan asa hita na ro tu jabu ni donganta i. Molo taulahon on, boi ma na mangurus i marpungu tu Bale Harajaon.

18. Aha do muse na boi taulahon lao mangurupi akka donganta na mangurus keluargana?

¹⁸ Tapatogu ma roha ni nasida jala tatangiakkon. Ikkon diatur sintua do tikkina lao manjuppangi akka donganta na mangurus keluargana. Tujuanna, lao patoguhon roha ni nasida. (Poda 27:23) Jala dang soal songon dia situasitta, tapatogu ma roha ni akka dongan na mangurus keluargana. Jala tapaboa ma na holong do rohatta tu nasida. Asing ni i, tatangiakkon ma tu Jahowa asa dipatogu roha ni nasida jala diurupi nasida toktong marlas ni roha.—2 Kor. 1:11.

19. Aha do na tapaima-ima?

¹⁹ Satokkin nai, lao apusan ni Jahowa ma sude na mambahen hita marsitaonon dohot marlungun ni roha. Dang adong be sahit dohot hamatean. (Pgk. 21:​3, 4) “Boi ma halak na pakpang mangakkati songon rusa.” (Jes. 35:​5, 6) Annon dang gabe matua be hita, jala dang marsahit be akka halak na tahaholongi. “Dang ingoton be akka naung salpu i.” (Jes. 65:17) Alai huhut paimahon janji ni Jahowa i, pos ma rohatta pasti sai urupan ni Jahowa do hita. Molo toktong taandalhon Ibana, diurupi Ibana ma hita asa “martahan, sabar, jala marlas ni roha”.—Kol. 1:11.