Manang aha pe na tabahen, dang boi hita paulakkon hangoluan na dipamago si Adam dohot si Hawa. (Ps. 49:​7-9) Molo dang diurupi Jahowa hita, dang adong harapanta di ari na naeng ro manang dang boi hita dipahehe. Gabe sarupa ma hita songon binatang, na mate jala dang boi mulak mangolu muse. (Pjm. 3:19; 2 Ptr. 2:12) Dilehon Jahowa do bantuan lao mambayar utang dosa na diwarisson si Adam tu hita. Didok Jesus, “Songon on do balga ni holong ni roha ni Debata tu portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.” (Joh. 3:16) Asing ni i, ala adong bantuan on, gabe dapotta ma manfaat sian bantuan na dilehon Jahowa i. Gabe boi ma hita marale-ale muse tu Jahowa. w25.02 3 ¶3-6

Aha do na mangurupi si Saulus asa boi tardidi? Tikki dipataridahon Jesus dirina tu si Saulus, gabe mapitung ma si Saulus. (Ul. 9:​3-9) Dung i, marpuasa ma si Saulus saleleng tolu ari jala dirimangi ibana do na masa tu ibana. Alani i gabe pos do roha ni si Saulus, Jesus i Messias jala akka sisean ni Jesus do na mangihutton agama na sittong. Adong do na boi taparsiajari sian si Saulus. Nang pe sangap ibana, alai dipaserep ibana do rohana jala dang mabiar ibana tu jolma. Buktina, olo do ibana tardidi. Hape diboto ibana do molo gabe halak Kristen ibana, pasti dianiaya do ibana. (Ul. 9:​15, 16; 20:​22, 23) Alai torus do diandalhon ibana Jahowa. Alani i, boi ma ibana tetap setia tu Jahowa nang pe godang tantangan. (2 Kor. 4:​7-10) Jadi sian on taboto molo gabe Saksi Jahowa hamu, pasti diadopi hamu do godang tantangan na manguji haporseaonmuna. Alai pos ma rohamuna, pasti urupan ni Debata dohot Kristus do hamu.—Plp. 4:13. w25.03 4 ¶8-9

Massai denggan do molo tabahen tujuanta lao manjaha Bibel. Alai, holan permulaan dope na manjaha Bibel i. Adong dope na ikkon taulahon asa boi mandapot manfaat sian i. Pikkirhon ma on: Porlu do aek di suan-suanan asa boi denggan tubu. Misalna sian udan. Alai molo toppu doras udan nang pe satokkin, pasti dang denggan tano i menyerap aek jala boi do gabe sega suan-suanan i. Molo ro pe muse udan, dang adong be guna ni i. Alai molo dang pola doras udan, boi ma denggan tano i menyerap aek, jala gabe denggan ma partubu ni suan-suanan i. Songon i ma hita. Unang ma pahatophu hita tikki manjaha Bibel. Alana molo songon i tabahen, dang adong be tikki lao mangarimangi na tajaha. Gabe maol ma hita mangingot aha na tajaha jala mangulahon na taparsiajari i. (Jak. 1:24) Terbiasa do hamu pahatophu manjaha Bibel? Molo ido, aha do na ikkon diulahon hamu? Nanget-nanget ma jaha. Berupaya ma hamu mangarimangi aha na dijahamuna. Boi do dipaganjang hamu tikki na manjaha Bibel i, dohot tikki lao mangarimangi na dijaha i. w24.09 4 ¶7-9