22 Siɛn’n, Ɲanmiɛn wawɛ’n w’a ci* min. Ɔ maan kannzɛ n siman like nga bé fá yó min Zerizalɛmun lɔ’n, sanngɛ n su kɔ lɔ. 23 Nga n si i’n yɛle kɛ klɔ kwlaa su’n, Ɲanmiɛn wawɛ’n kan kle min kpɛ sunman kɛ bé wlá min bisua naan ń wún ɲrɛnnɛn kpanngban kpa.+

10 Kɛ e dili le nɲɔn kun lɛ’n, Ɲanmiɛn nuan ijɔfuɛ kun mɔ be flɛ i Agabisi’n,+ ɔ fin Zide bali. 11 Ɔ bali e wun lɛ, kpɛkun ɔ fali Pɔlu i bo kplo’n ɔ fa cili i bɔbɔ i sa nin i ja mun, yɛ ɔ seli kɛ: “Ndɛ nga Ɲanmiɛn wawɛ’n kan’n yɛ: ‘Sran nga i liɛ yɛle kplo nga’n, Zifu’m bé wá cí i kɛ nga sa Zerizalɛmun lɔ.+ Kpɛkun bé fɛ́ i wlá be nga be timan Zifu’n be sa nun.’”+