16 Asa kusu’n, nian ɔ bɔbɔ ɔ wun su kpa, yɛ fa ɔ ɲin sie i like nga a kle’n su kpa.+ Fa ninnge sɔ’m be yolɛ’n cici ɔ ti. Afin sɛ a yo sɔ’n, á dé ɔ bɔbɔ ɔ wun, yɛ á dé be nga be tie ɔ ndɛ’n.+

3 Sɛ sran kun kle like uflɛ’n, m’ɔ nin like kpakpa nga e Min Zezi Klisi kleli’n be kɔman likawlɛ’n,+ mɔ kusu i ndɛ ng’ɔ kan’n ɔ nin wafa ng’ɔ fata kɛ e nin Ɲanmiɛn e nanti’n i su like nga be kleli e’n be timan kun’n,+ 4 i sɔ sran liɛ’n, ɔ ti wun tufuɛ, yɛ ɔ wunman sa fi wlɛ.+ Akplowa silɛ’n nin ndɛ ngbɛnngbɛn’m be su utre dilɛ’n yɛ ɔ lo i-ɔ.+ I kwlaa sɔ’n yo maan sran’m be fa be ɲin blo be wiengu wun, be bubu be wun nun, be saci be wiengu wun,* yɛ be lafiman be wiengu su.