Zeremin

36 Kɛ Zoziasi i wa Zozakimun+ yoli Zida famiɛn’n i afuɛ nnan su’n, Zoova kan ndɛ kleli Zeremin. Ɔ seli i kɛ: 2 “Fa fluwa* kun naan klɛ Izraɛlifuɛ mun nin Zidafuɛ mun+ nin nvle’m be kwlaa+ be wun ndɛ nga n kan kleli wɔ’n fluwa sɔ’n su. Kɛ ɔ fɛ i cɛn mɔ n boli ɔ ndɛ kan klelɛ bo Zoziasi blɛ su lele mɔ w’a fa ju yɛ’n, klɛ i kwlaa.+ 3 Kɛ Zidafuɛ’m bé wá tí ɲrɛnnɛn kwlaa nga m’an gugu kɛ ń fá yí be su’n, atrɛkpa’n, bé wlá be nzuɛn tɛ’n i ase. Ɔ maan ń yáci be fɔnlɛ’n nin be sa tɛ’n ń cɛ́ be.”+

4 Kpɛkun Zeremin flɛli Bariki+ m’ɔ ti Neria i wa’n. Ndɛ kwlaa nga Zoova kan kleli Zeremin’n, Zeremin kusu kan kleli Bariki. Kɛ ɔ́ kán’n, nn Bariki klɛ́ be fluwa* kun su.+ 5 Yɛ Zeremin seli Bariki kɛ: “Be seli min kɛ nán n wlu Zoova i sua’n nun lɔ. 6 Ɔ maan wɔ yɛ ɔ fata kɛ a wlu lɔ-ɔ. Zoova i nuan ndɛ nga kɛ ń kán’n nn á klɛ́ i fluwa kun su’n, man ɔ nɛn’n su naan kɛnngɛn i kwlaa. Kanngan nun cɛn nga nvlefuɛ’m bé cí nglɛmun Zoova i sua’n lɔ’n naan be ti. I liɛ’n, Zidafuɛ nga be fin be klɔ’m be su bali’n, bé tí ndɛ nga a kanngan’n wie. 7 Atrɛkpa’n, Zoova tíe kpatalɛ nga be kpɛtɛli i kɛ ɔ si be aunnvɔɛ’n, yɛ be kwlaa bé wlá be sa tɛtɛ’m be ase. Afin nvlefuɛ’m be wun ya nga Zoova w’a fa’n, ɔ ti dan.”

8 Neria i wa Bariki yoli like kwlaa nga Ɲanmiɛn nuan ijɔfuɛ Zeremin seli i kɛ ɔ yo’n. Ɔ mɛnnin i nɛn’n su kanngannin Zoova i nuan ndɛ kwlaa ng’ɔ o fluwa’n nun’n Zoova i sua’n nun lɔ.+

9 Kɛ Zoziasi i wa Zozakimun+ yoli Zida famiɛn’n i afuɛ nnun su’n, i anglo ngwlan su’n, Zerizalɛmunfuɛ’m be kwlaa nin be kwlaa nga be fin Zida klɔklɔ’m be su mɔ be bali Zerizalɛmun lɛ’n, be cili nglɛmun Zoova i ɲrun lɛ.+ 10 Bariki ɔli Zoova i sua’n nun lɔ, Safan+ i wa Gemaria+ m’ɔ ti fluwa klɛfuɛ’n* i sua ba liɛ’n* nun lɔ, awlo ng’ɔ o nglo lɔ lika’n nun’n i nun, Zoova i sua’n i anuan uflɛuflɛ’n i ɲrun lɛ.+ Yɛ ndɛ nga Zeremin kannin m’ɔ o fluwa’n nun’n, ɔ mɛnnin i nɛn’n su ɔ kanngannin nun kleli nvlefuɛ’m be kwlaa.

11 Kɛ Safan i wa Gemaria i klun ba liɛ Mikaya tili Zoova i nuan ndɛ kwlaa ng’ɔ o fluwa’n nun’n, 12 ɔ jra ɔli famiɛn’n i awlo lɔ, fluwa klɛfuɛ’n i sua ba’n nun lɔ. Kɛ ɔ́ yó sɔ’n, nn sran dandan’m* be kwlaa be titi lɛ. Be yɛle Elisama+ m’ɔ ti fluwa klɛfuɛ’n, nin Semaia i wa Delaya, nin Akbɔɔ+ i wa Ɛlnatan,+ nin Safan i wa Gemaria, nin Anania i wa Sedesiasi, ɔ nin sran dandan onga’m be kwlaa. 13 Kɛ Bariki kanngannin fluwa’n nun kleli nvlefuɛ mun’n, ndɛ nga Mikaya tili’n, ɔ wa kɛnnin i kwlaa kleli be.

14 Yɛ sran dandan’m be kwlaa be sunmannin Kusi i wa Selemia i klun ba ng’ɔ suan Netania’n i wa liɛ Zeidi naan ɔ ko se Bariki kɛ: “Fa fluwa nga a kanngannin nun kleli nvlefuɛ mun’n naan bla.” Neria i wa Bariki fali fluwa’n, yɛ ɔ toli be lɔ-ɔ. 15 Be seli i kɛ: “Yaci, tran ase naan man ɔ nɛn’n su kanngan nun kle e.” Yɛ Bariki kanngannin nun kleli be-ɔ.

16 Kɛ be tili ndɛ kwlaa sɔ’m be cɛ’n, srɛ m’ɔ kunnin be’n ti’n, be niannin be wiengu siin. Kpɛkun be seli Bariki kɛ: “Ɔ fata kɛ e kan ndɛ kwlaa sɔ mun e kle famiɛn’n.” 17 Yɛ be usali Bariki kɛ: “?A yoli sɛ yɛ a klɛli ndɛ kwlaa sɔ mun-ɔn? ?Zeremin yɛ ɔ kannin yɛ a klɛli-ɔ? Yaci, di e nanwlɛ.” 18 Bariki tɛli be su kɛ: “I yɛ ɔ kannin ndɛ kwlaa sɔ mun kleli min-ɔn. Kɛ ɔ́ kán’n, n fali ayre nzue nga be fa klɛ fluwa’n naan m’an klɛ ndɛ’n fluwa nga su.” 19 Yɛ sran dandan’m be seli Bariki kɛ: “Kɔ naan a nin Zeremin amun ko fia. Nán maan sran fi si lika nga amun o’n.”+

20 Be fali fluwa’n be ko sieli i Elisama m’ɔ ti fluwa klɛfuɛ’n i sua ba liɛ’n nun lɔ. Kpɛkun be ko toli famiɛn’n awlo’n i klun lɔ naan b’a kan ndɛ kwlaa nga be tili’n b’a kle i.

21 Famiɛn’n sunmannin Zeidi+ naan ɔ ko fa fluwa’n. Ɔ ɔli Elisama m’ɔ ti fluwa klɛfuɛ’n i sua ba’n nun lɔ, ɔ ko fali fluwa’n bali. Kpɛkun ɔ kanngannin nun famiɛn’n nin sran dandan kwlaa nga be jinjin famiɛn’n i wun lɛ’n, be ɲrun lɛ. 22 Anglo ngwlan’n su* yɛ sa sɔ’n juli-ɔ. Kɛ ɔ́ yó sɔ’n, nn famiɛn’n wo sua nga ayrɛ blɛ nun’n ɔ kɔ lɔ’n nun, ɔ su tɔn sin nga be trɔli’n. 23 Kɛ Zeidi kanngan ndɛ akpasua nsan annzɛ nnan kun nun’n, famiɛn’n fa fluwa klɛfuɛ’n i laliɛ’n, kpɛkun ɔ kpɛ fluwa’n i bue sɔ’n fa yi i sin nga be trɔli m’ɔ su jue’n nun. Ɔ yoli sɔ lele fluwa wunmuan’n yrali kɔlikɔli. 24 I famiɛn’n nin-o, i famiɛn’n i sufuɛ mun-o, be klun w’a timan be kaan sa. Be tili ndɛ kwlaa sɔ mun, sanngɛ be nun wie fi w’a titimɛn i wun tralɛ’n nun. 25 Ɛlnatan+ nin Delaya+ ɔ nin Gemaria+ be srɛli famiɛn’n kɛ nán ɔ wɔ fluwa’n nun. Sanngɛ w’a siemɛn i su be nuan bo. 26 I sin’n famiɛn’n seli i wa Zerameɛli nin Azriɛli i wa Seraya nin Abdeɛli i wa Selemia be kɛ be ko tra Ɲanmiɛn nuan ijɔfuɛ Zeremin nin Bariki m’ɔ ti fluwa klɛfuɛ’n. Sanngɛ Zoova fa be fiali.+

27 Fluwa nga kɛ Zeremin kán ndɛ’n nn Bariki klɛ́’n,+ kɛ famiɛn’n wɔli nun’n, Zoova wa kannin ndɛ kleli Zeremin ekun. Ɔ seli i kɛ: 28 “Fa fluwa uflɛ naan ndɛ kwlaa ng’ɔ o fluwa klikli nga Zozakimun m’ɔ ti Zida famiɛn’n wɔli nun’n i nun’n, klɛ i kunngba’n ekun.+ 29 Se Zozakimun m’ɔ ti Zida famiɛn’n kɛ: ‘Zoova waan yoo: “A wɔli fluwa nga nun, kpɛkun a usali kɛ: ‘?Ngue ti yɛ a klɛli i kɛ: “Babilɔnin famiɛn’n wá núnnún nvle nga naan ɔ su yaciman sran fi nin nnɛn fi lɛ-ɔ”?’+ 30 I sɔ’n ti’n, Zozakimun m’ɔ ti Zida famiɛn’n i wun ndɛ nga Zoova kan’n yɛ: ‘I osu’n nunfuɛ wie fi su tranman Davidi i famiɛn bia’n su.+ Bé fɛ́ i fuɛn’n nánnán wia nun naan wia’n bo su lele, naan kɔnguɛ kusu’n ayrɛ’n ti’n ɔ jɔ rɛkɛkɛkɛ.+ 31 Ń fá sa tɛ nga i bɔbɔ nin i osu’n nunfuɛ mun nin i sufuɛ’m be yoli’n, ń úsa be nun. Ɲrɛnnɛn kwlaa nga n kannin kɛ ń fá yí be bɔbɔ nin Zerizalɛmunfuɛ mun nin Zidafuɛ’m be su’n, ń fá yí be su.+ Afin b’a nantiman min ndɛ’n su.’”’”+

32 Zeremin fali fluwa uflɛ fa mannin Neria i wa Bariki m’ɔ ti fluwa klɛfuɛ’n.+ Kɛ Zeremin kán ndɛ kwlaa ng’ɔ o fluwa nga Zozakimun m’ɔ ti Zida famiɛn’n wɔli nun’n i nun’n, nn Bariki klɛ́.+ Kpɛkun be klɛli ndɛ kɛ ngalɛ’n sa wie mun ekun i kpanngban kpa fa ukali su.