Fluwa klikli nga Pɔlu klɛli Timote’n

5 Nán ijɔ kpɛnngbɛn mun.+ Sanngɛ kle be like amanniɛn su, bu be ɔ si. Bu gbanflɛn mun ɔ niaan. 2 Bu bla kpɛnngbɛn mun ɔ nin, yɛ bu talua mun ɔ niaan bla, maan a nin be tran kpa.*

3 Bu angbeti bla nga be leman sran’n* be sran, yɛ nian be lika.+ 4 Sanngɛ sɛ angbeti bla wie le ba annzɛ anunman’n, maan ba sɔ’m be bɔbɔ be awlo lɔ’n be kle kɛ be ti Ɲanmiɛn sufuɛ kpa.+ Yɛle kɛ like nga be si nin be nin, ɔ nin be nannan’m be yo mannin be’n, maan be yo i wunsu man be.+ Afin i sɔ’n ti kpa Ɲanmiɛn ɲrun.+ 5 Angbeti bla ng’ɔ leman sran yɛ ɔ leman like fi’n, Ɲanmiɛn su yɛ ɔ fɛ i wla’n gua-ɔ.+ Ɔ maan ɔ sun flɛ i titi, yɛ ɔ srɛ i titi kɔnguɛ nin wia nun.+ 6 Sanngɛ angbeti bla nga mɛn dilɛ’n yɛ ɔ yo i fɛ’n, kannzɛ ɔ o nguan nun’n, sanngɛ w’a wu. 7 I sɔ’n ti’n, kan ndɛ nga kle be titi naan sa tɛ fi w’a tranman be wun. 8 Sran ng’ɔ niɛnmɛn i fuɛ’m be lika’n, i li sɛ ɔ niɛnmɛn i awlofuɛ’m be lika’n, nn ndɛ nga e lafi su’n, ɔ lafiman su kun, yɛ i tɛ liɛ’n tra sran ng’ɔ lafiman Ɲanmiɛn su’n.+

9 Angbeti bla nga w’a ɲan afuɛ ablesiɛn (60), mɔ w’a kunndɛman bian i wun bo’n,* yɛ ɔ fata kɛ be klɛ i dunman fluwa’n nun-ɔn. 10 Maan sran’m be kan kɛ ɔ yoli sa kpakpa.+ Yɛle kɛ ɔ tɛli i mma’m be kpa,+ ɔ sɔli sran’m be nun titi,+ ɔ wunnzinnin Ɲanmiɛn i sran’m be ja wun,+ ɔ ukali be nga be wla w’a bo’n,+ yɛ ɔ yoli sa kpakpa kwlaa.

11 Sanngɛ nán klɛ angbeti bla nga be te yo talua’n be dunman. Afin kɛ be konvi ko sɔ bian’n, kpɛkun Klisi’n i junman’n i dilɛ’n w’a yo kekle w’a man be. Ɔ maan be kunndɛ kɛ bé já bian. 12 Like nga bla sɔ’m be dun mmua seli kɛ bé yó mɔ b’a yoman’n ti’n, bé wá bú be fɔ. 13 Asa ekun’n, be yoman like fi, awloawlo’m be nun yɛ be wlanwlan be sin-ɔn. Nán like mɔ be yoman’n i ngunmin-ɔn, be kan sran’m be wun ndɛ be sin, yɛ ndɛ ng’ɔ timan be ndɛ’n be fa be nuan wla nun.+ Kpɛkun ndɛ ng’ɔ fataman kɛ be kan’n, yɛ be kan-ɔn. 14 I sɔ’n ti’n, n kunndɛ kɛ angbeti bla nga be te yo talua’n be ja bian.+ Maan be wu ba,+ be nian be awlobo’n i lika kpa naan ɲrun tanndanfuɛ’n w’a kanman be wun ndɛ. 15 I kpa bɔbɔ’n, be nun wie’m be yacili atin kpafuɛ’n, be suli Satan su. 16 Sɛ Klisifuɛ bla wie i osufuɛ ti angbeti bla’n, maan ɔ niɛn i lika naan w’a kaciman asɔnun’n i ti su trɔ. I liɛ’n, asɔnun’n nían angbeti bla nga be leman sran’n* be lika.+

17 Maan sran’m be ɲin yi asɔnun kpɛnngbɛn’m be kpa,+ afin be nian asɔnun’n su kpa.+ I li be nga be tu be klun kpa be kan Ɲanmiɛn ndɛ mɔ be kle like’n+ yɛ ɔ fata kɛ be ɲin yi be kpa-ɔ. 18 Afin Ɲanmiɛn ndɛ’n se kɛ: “Nán cici nannin tola ng’ɔ su bo ble’n annzɛ i wunsu like’n i nuan’n.”+ Asa ekun’n, ɔ se kɛ: “Junman difuɛ’n nin i akatua’n fata.”+ 19 Sɛ a ti asɔnun kpɛnngbɛn* wie i wun ndɛ’n, sɛ w’a timɛn i lalofuɛ nɲɔn annzɛ nsan be nuan nun’n, nán fa su.+ 20 Tu sa tɛ yofuɛ’m be fɔ+ sran’m be kwlaa be ɲrun+ naan be onga’m be fa tu be wun fɔ.* 21 Ń kán klé wɔ Ɲanmiɛn nin Klisi Zezi ɔ nin Ɲanmiɛn i anzi m’ɔ kpali be’n be ɲrun kɛ a nian afɔtuɛ nga’m be su. I sɔ yolɛ nun’n, nán kpli di sran jɔlɛ, yɛ nán kpa sran nun.+

22 Nán kpli fa ɔ sa sie sran kun su.*+ Nán maan ɔ sa tran sran wie i sa tɛ’n nun. Nian ɔ wun su naan w’a yoman sa tɛ.

23 Nán nɔn nzue kun,* sanngɛ nɔn duvɛn kan ɔ klun m’ɔ yo ɔ ya’n nin tukpacɛ mɔ a tɔ i tikatika’n ti.

24 Sa tɛ nga sran wie’m be yo’n, ɔ fiaman. Ɔ maan be ka lɛ tu be fɔ. Sanngɛ sran wie’m be liɛ’n, ɔ cɛ kan ka naan w’a tɛ nglo.+ 25 I wafa kunngba’n, kɛ sran kun yo sa kpa’n sran kwlaa ti nun.+ Yɛ nga kusu mɔ sran w’a timan nun bɔbɔ’n, ɔ su kaman bui bo.+