Sa nga Akoto’m be yoli’n

16 Ɔ juli Dɛɛbe nin Listri lɔ wie.+ Zezi i sɔnnzɔnfuɛ kun o lɔ, be flɛ i Timote.+ Zifu bla kun m’ɔ ti Zezi i sɔnnzɔnfuɛ’n i wa-ɔ. Sanngɛ i si ti Glɛki. 2 Aniaan nga be o Listri nin Ikoniɔmun lɔ’n be kɛn i wun ndɛ kpa. 3 Pɔlu kunndɛli kɛ ɔ nin Timote bé kɔ́. Sanngɛ Zifu nga be o lika sɔ’m be nun lɔ’n be ti’n, ɔ wlali Timote i klɛn,+ afin be kwlaa be si kɛ i si ti Glɛki. 4 Kɛ be sinsinnin klɔ sɔ’m be su’n, mmla nga akoto mun nin kpɛnngbɛn nga be o Zerizalɛmun lɔ’n be nuan sɛli su’n, be boli be su kleli aniaan mun naan be nian su be nanti.+ 5 Ɔ maan asɔnun’m be nunfuɛ’m be lafili Ɲanmiɛn su kpa trali laa’n, kpɛkun cɛn kwlakwla sran’m be sɔn uka su.

6 Asa ekun’n, be sinnin Frizi nin Galasi mɛn’n nun.+ Afin Ɲanmiɛn wawɛ’n w’a manman be atin kɛ be kan Ɲanmiɛn ndɛ’n Azi mɛn’n nun lɔ. 7 Kɛ be bali Mizi’n, be kunndɛli kpa kɛ bé kɔ́ Bitinin,+ sanngɛ Zezi i wawɛ’n w’a manman be atin. 8 Ɔ maan be sinnin Mizi ɔli Troasi. 9 Kɔnguɛ’n, Pɔlu wunnin like kun aolia nun. Ɔ wunnin Maseduanin bian kun, ɔ jin lɛ, ɔ srɛli i kpa seli kɛ: “Sin Maseduanin wa naan uka e.” 10 Kɛ ɔ wunnin like sɔ’n aolia nun’n, e fali ajalɛ kɛ é kɔ́ Maseduanin. Afin e si kɛ Ɲanmiɛn w’a flɛ e kɛ e ko bo jasin fɛ’n e kle lɔfuɛ mun.

11 Ɔ maan e fali mmeli Troasi lɛ e ɔli Samotrasi trelele. Sanngɛ kɛ aliɛ cɛnnin’n, e ɔli Neapolisi. 12 E fɛli i lɛ e ɔli Filipu*+ m’ɔ ti Maseduanin asa’n su lɔ klɔ’m be nun cinnjin kpafuɛ’n i su lɔ. Ɔ ti Rɔmunfuɛ’m be klɔ. E dili le nɲɔn kun klɔ sɔ’n su lɛ. 13 Wunmiɛn-lolɛ-cɛn’n nun’n, e ɔli klɔ’n i anuan’n i sin lɔ, nzue ba kun nuan. E buli i kɛ sran’m bé wá yía lɛ bé srɛ́ Ɲanmiɛn. Ɔ maan e trannin ase, kpɛkun e kannin ndɛ e kleli bla nga be o lɛ’n. 14 Bla kun mɔ be flɛ i Lidi’n, ɔ sieli i su tieli ndɛ’n. Bla sɔ’n fin Tiatii,+ ɔ yo tannin ɔkwlɛ kankan atɛ,* yɛ ɔ ti Ɲanmiɛn sufuɛ. Zoova* tikeli i akunndan’n naan ɔ fɛ i ɲin sie ndɛ nga Pɔlu su kan’n su kpa. 15 Kɛ be yoli i bɔbɔ nin i awlo’n nunfuɛ’m be batɛmun’n,+ ɔ seli e kɛ: “Sɛ amun bu i kɛ n lafi Zoova* su sakpa’n, amun bla be ko sike min awlo lɔ.” Ɔ jrannin su kpa, ɔ maan e ɔli.

16 Kɛ é kɔ́ lika nga be srɛ Ɲanmiɛn lɔ’n, e nin afanniɛn talua kun mɔ mmusu kun o i su’n e yiali. Mmusu sɔ’n yo maan ɔ yi wunnzue.+ Wunnzue m’ɔ yi’n ti’n, i min’m be ɲan sika kpa. 17 Talua sɔ’n yaciman e nin Pɔlu e su sulɛ. Kpɛkun ɔ kpan se kɛ: “Bian nga’m be ti Ɲanmiɛn m’ɔ o Like Kwlaa Ti Su’n i sran mun.+ Be su kan wafa nga sran’m be kwla ɲan be ti’n i ndɛ kle amun.” 18 Ɔ yoli i sɔ dili cɛn kpanngban. I agualiɛ su’n, ɔ flannin Pɔlu. Ɔ maan ɔ kpɛli i wun naan w’a se mmusu’n i kɛ: “Zezi Klisi i dunman nun, ń kán klé wɔ kɛ a jaso i su.” Be ja nun lɛ’n, ɔ jasoli i su.+

19 Kɛ talua’n i min’m be wunnin kɛ like nga be fa ɲan be sika’n w’a saci’n,+ be trali Pɔlu nin Silasi. Kpɛkun be fa be ɔli klɔ siefuɛ’m be ja su gua’n su lɔ.*+ 20 Kɛ be fali be ɔli klɔ siefuɛ’m be ja su’n, be seli kɛ: “Bian nga’m be su sanngan e klɔ’n nun kpa.+ Be ti Zifu. 21 Like nga be kle’n, e di su-ɔ, ɔ yoman ye. Afin e ti Rɔmunfuɛ.” 22 Ɔ maan sran’m be bo yoli kun be jasoli be wun. Kpɛkun kɛ klɔ siefuɛ’m be yoli maan be yili be wun tralɛ mun’n, be seli kɛ be fa ngble bo be.+ 23 Kɛ be sa tili be kpa’n, be wlali be bisua. Kpɛkun be seli bisua sunianfuɛ’n kɛ ɔ nian be su kpa.+ 24 Kɛ mɔ be seli i sɔ’n ti’n, ɔ fa be wlɛli i bisua’n i klun mmua kpa lɔ. Kpɛkun ɔ boli be kpanwun.

25 Sanngɛ kɔnguɛ afiɛn’n, Pɔlu nin Silasi be srɛli Ɲanmiɛn, kpɛkun be toli jue mɛnmɛnnin i.+ Bisuafuɛ’m be sieli be su be tili. 26 Kpɛkun asiɛ’n ka lɛ kejeli dan kpa. Ɔ maan bisua’n kejeli, yɛ anuan’m be kwlaa be ka lɛ tiketikeli, kpɛkun ninnge nga be fa cili be’n be ɲannjili.+ 27 Kɛ bisua sunianfuɛ’n tinngeli m’ɔ wunnin kɛ bisua’n i anuan’m be la su’n, ɔ cuɛnnin i tokofi’n naan ɔ́ fá kún i wun. Afin ɔ buli i kɛ bisuafuɛ’m b’a wanndi.+ 28 Sanngɛ Pɔlu kpan seli kɛ: “Nán yo ɔ wun like, afin e kwlaa e o wa!” 29 Ɔ maan ɔ seli kɛ be mɛn i kannin. Kɛ be fa mɛnnin i’n, ɔ wanndi wluli lɔ ko kotoli Pɔlu nin Silasi be bo. Kɛ ɔ́ yó sɔ’n nn ɔ́ úsu. 30 Ɔ fa be fiteli naan w’a se kɛ: “?Nja mun, ngue yɛ ɔ fata kɛ n yo naan m’an fite nun-ɔn?” 31 Be seli i kɛ: “Lafi e Min Zezi su. I liɛ’n, a nin wɔ awlo’n nunfuɛ mun amún fíte nun.”+ 32 I sin’n, be kannin Zoova* i ndɛ’n be kleli i ɔ nin i awlo’n nunfuɛ’m be kwlaa. 33 Kɔnguɛ dɔ kunngba sɔ’n su’n, ɔ fali be ɔli, ɔ ko mianmiannin be kannin mun. Kpɛkun be ka lɛ be yoli i bɔbɔ ɔ nin i awlo’n nunfuɛ’m be kwlaa be batɛmun.+ 34 Ɔ fa be ɔli i awlo. Ɔ sieli aliɛ tabli kun su mannin be. Kpɛkun ɔ nin i awlo’n nunfuɛ’m be kwlaa be dili aklunjɔɛ dan kpa. Afin siɛn’n, ɔ lafi Ɲanmiɛn su.

35 Kɛ aliɛ cɛnnin’n, klɔ siefuɛ’m be sunmannin gladi difuɛ mun naan be ko se kɛ: “Yaci bian sɔ’m be nun.” 36 Bisua sunianfuɛ’n ko boli be ndɛ’n su kleli Pɔlu. Ɔ seli i kɛ: “Klɔ siefuɛ’m be sunmannin sran kɛ be yaci amun sran nɲɔn’n amun nun. Ɔ maan amun fite siɛn’n naan amun wɔ, nán srɛ kun amun.” 37 Yɛ Pɔlu seli be kɛ: “B’a diman e jɔlɛ,* sanngɛ be boli e sran’m be ɲrun, kpɛkun be wlali e bisua. Kusu nn e ti Rɔmunfuɛ.+ ?Ɔ yo sɛ ti yɛ siɛn’n, be kunndɛ kɛ bé yáci e nun nvialiɛ nun-ɔn? E kplinman su! Maan be bɔbɔ be bla naan be wa fa e fite.” 38 Gladi difuɛ’m be ko kannin ndɛ’n be kleli klɔ siefuɛ mun. Kɛ be tili i kɛ bian sɔ’m be ti Rɔmunfuɛ’n, srɛ kunnin be kpa.+ 39 I sɔ’n ti’n, be wa kpatali be. I sin’n, be fa be fiteli, kpɛkun be seli be kɛ be jaso klɔ’n su. 40 Kɛ be fin bisua fiteli’n, be ɔli Lidi i awlo lɔ. Kɛ be wunnin aniaan mun’n, be wlali be fanngan,+ yɛ be ɔli-ɔ.