Ezekiɛli

40 Kɛ be trali e ɔli’n+ i afuɛ ablaɔn-nin-nnun (25) su’n, afuɛ’n i bo bolɛ nun’n, anglo’n i cɛn ba blu su’n, kɛ klɔ’n tɔli’n i afuɛ blu-nin-nnan (14) su’n,+ cɛn kunngba sɔ nun’n Zoova i tinmin’n wluli min nun,* kpɛkun ɔ fali min ɔli klɔ’n nun lɔ.+ 2 Aolia nun like nga Ɲanmiɛn fa kleli min’n nun’n, ɔ fali min ɔli Izraɛli nvle’n nun lɔ, kpɛkun ɔ fali min ko sieli i oka fleiin kpa kun su.+ Oka sɔ’n i bue ng’ɔ kaci ngua lɔ lika’n nun’n i su lɔ’n like kun o lɔ, ɔ ti kɛ klɔ sa.

3 Kɛ ɔ fali min ɔli lɔ’n, n wunnin sran kun, i wafa’n ti kɛ aaba sa,+ lɛn ɲanman kun o i sa nun, yɛ ndɛma nga be fa sunnzun like’n* i kun o i sa nun.+ Yɛ ɔ jin anuan’n nun lɛ. 4 Sran’n seli min kɛ: “Sran wa, like kwlaa nga n fa kle wɔ’n niɛn i kpa, sie ɔ su kpa, yɛ fa ɔ ɲin sie su kpa.* Afin i ti yɛ be fa wɔ bali wa-ɔ. Kan like kwlaa nga a wun i’n i ndɛ kle Izraɛli nvle’n nunfuɛ mun.”+

5 N wunnin talɛ kun, ɔ bo sin yia Ɲanmiɛn sua’n.* Like sunnzunlɛ ndɛma kun mɔ i tɛnndɛn nun’n ti kude nsiɛn’n ɔ o i sa nun (be uka kude kwlaa su palmun kun).* Ɔ boli talɛ’n i sunnzunlɛ bo, i kpikplikpi nun’n ti ndɛma kun, yɛ i nglonglo su’n ti ndɛma kun.

6 I sin’n, ɔ ɔli anuan* nga i ɲin kaci wia afiliɛ lɔ’n i wun lɔ,+ kpɛkun ɔ fuli asikalie’n su. Kɛ ɔ sunnzunnin anuan’n i ɲrun lɛ’n, i tɛtrɛ nun’n ti ndɛma kun. Kpɛkun anuan’n i ɲrun kunfuɛ’n i tɛtrɛ nun’n ti ndɛma kun wie. 7 Gladi difuɛ’m be sua ba’m be kwlaa be tɛnndɛn nun’n ti ndɛma kun, yɛ be tɛtrɛ nun’n ti ndɛma kun. Gladi difuɛ’m be sua ba’m+ be afiɛn’n nun ti kude nnun. Anuan’n i ɲrun lɛ lika fleiin nga be sin i bo’n, mɔ i ɲin kaci Ɲanmiɛn sua’n su lɔ’n i wun lɛ anuan ng’ɔ o lɛ’n ɔ ti ndɛma kun.

8 Ɔ sunnzunnin anuan nga i ɲin kpɛ Ɲanmiɛn sua’n i lika ng’ɔ ti fleiin kpa’n su lɔ’n, ɔ ti ndɛma kun. 9 I sin’n, ɔ sunnzunnin anuan’n i ɲrun lɛ lika fleiin nga be sin i bo’n, ɔ ti kude mɔcuɛ. Kpɛkun ɔ sunnzunnin i ja mlomlo mun, be ti kude nɲɔn. Anuan’n i ɲrun lɛ lika fleiin nga be sin i bo’n, i ɲin kpɛ Ɲanmiɛn sua’n su lɔ.

10 Anuan ng’ɔ o wia afiliɛ lɔ’n i bue kwlaa su’n, gladi difuɛ’m be sua ba nsan o lɛ, be nsan’n be sɛ. Yɛ anuan’n i ja mlomlo nga be o i bue nɲɔn’n su’n be ti kun.

11 I sin’n, ɔ sunnzunnin anuan’n i tɛtrɛ nun’n, ɔ ti kude blu. Yɛ anuan’n i tɛnndɛn nun’n ti kude blu-nin-nsan (13).

12 Gladi difuɛ’m be sua ba’m be kwlaa be ɲrun lɛ lika kan wie o lɛ, i wun ti sisiwa, i bue’n kwlaa ti kude kun. Gladi difuɛ’m be sua ba nga be o anuan’n i bue nɲɔn’n su’n be tinuntinun be ti kude nsiɛn.

13 I sin’n, ɔ sunnzunnin anuan’n, ɔ fɛ i gladi difuɛ’m be sua ba kun i ti su lɔ* lele fa ju uflɛ i ti su lɔ, i tɛtrɛ nun’n ti kude ablaɔn-nin-nnun (25). Sua ba kun i anuan’n nin sua ba uflɛ liɛ’n be lɔngɔ su.+ 14 I sin’n, ɔ sunnzunnin anuan’n i ja mlomlo mun, be tɛnndɛn nun’n ti kude ablesiɛn (60). Ɔ sunnzunnin anuan nga be o awlo klun’n i wun’n be ja mlomlo mun wie. 15 Kɛ ɔ fɛ i anuan’n i lika nga be wlu lɛ’n i ɲrun lɛ m’ɔ́ fá jú anuan nga i ɲin kpɛ Ɲanmiɛn sua’n su lɔ’n i ɲrun lika fleiin nga be sin i bo’n, ɔ ti kude ablenun (50).

16 Gladi difuɛ’m be sua ba mun, ɔ nin be ja mlomlo nga be o anuan’n i klun lɔ i bue nɲɔn’n su’n, be le fenɛtri wie mun, kɛ fenɛtri sɔ’m bé wlú talɛ’n nun bé kɔ́’n nn bé yó kaan.*+ Anuan’n i lika nga be sin lɛ’n, fenɛtri’m be o i bue nɲɔn’n su. Kpɛkun be yili nglesia waka desɛn+ i ja mlomlo’m be wun.

17 I sin’n, ɔ fali min ɔli awlo klun dan’n nun lɔ. Kpɛkun n wunnin like diwlɛ mun,*+ yɛ n wunnin kɛ dalasi o awlo klun’n i wun. Like diwlɛ ablasan (30) be o dalasi sɔ’n su. 18 Dalasi ng’ɔ o anuan’m be bue nɲɔn’m be su’n, be nin anuan’m be tɛnndɛn nun’n sɛ. Dalasi ng’ɔ o ngua’n yɛ ɔ o lɛ-ɔ.

19 I sin’n, ɔ sunnzunnin lika ng’ɔ o ngua lɔ anuan’n i ɲrun lɛ m’ɔ́ fá jú awlo klun kaan’n i awɛ’n su lɔ’n.* I bue nga i ɲin kpɛ wia afiliɛ lɔ’n, nin i bue nga i ɲin kpɛ nglo lɔ lika’n su’n, be ti kude ya kun (100).

20 Awlo klun dan’n i anuan kun i ɲin kpɛ nglo lɔ lika’n nun, ɔ sunnzunnin i tɛnndɛn nun’n nin i tɛtrɛ nun’n. 21 Gladi difuɛ’m be sua ba nsan o anuan’n i bue kun su, yɛ nsan o i bue uflɛ su. Anuan’n i ja mlomlo mun nin i lika fleiin nga be sin i bo’n, ɔ nin anuan klikli’n i liɛ’m be sɛ. I tɛnndɛn nun’n ti kude ablenun (50), yɛ i tɛtrɛ nun’n ti kude ablaɔn-nin-nnun (25). 22 I fenɛtri mun, ɔ nin i lika fleiin nga be sin i bo’n, nin i wun nglesia waka desɛn’n,+ ɔ nin wia afiliɛ lɔ anuan’n i liɛ’m be ti kun. Be fu asikalie nso su naan b’a ju lɔ. Anuan’n i ɲrun lɛ lika fleiin nga be sin i bo’n ɔ o asikalie’m be ɲrun ndɛnman su.

23 Awlo klun kaan’n i anuan’n kun nin nglo lɔ anuan’n be ɲin wɔ su, kpɛkun kun nin wia afiliɛ lɔ anuan’n be ɲin wɔ su. Ɔ sunnzunnin anuan’m be afiɛn’n nun’n, ɔ ti kude ya kun (100).

24 I sin’n, ɔ fali min ɔli ngua lɔ lika’n nun, kpɛkun n wunnin anuan kun ngua lɔ lika’n nun.+ Ɔ sunnzunnin i ja mlomlo mun, ɔ nin i lika fleiin nga be sin i bo’n. Be nin anuan kun’m be liɛ’m be ti kun. 25 Anuan’n ɔ nin i lika fleiin nga be sin i bo’n be le fenɛtri mun, be ti kɛ fenɛtri kun mun sa. Anuan’n i tɛnndɛn nun’n ti kude ablenun (50), yɛ i tɛtrɛ nun’n ti kude ablaɔn-nin-nnun (25). 26 Be fu asikalie nso su naan b’a ju lɔ.+ I lika fleiin nga be sin i bo’n ɔ o asikalie’m be ɲrun ndɛnman su. Nglesia waka desɛn o i ja mlomlo’m be wun, kun o bue kun su, yɛ kun o bue uflɛ su.

27 Awlo klun kaan’n i anuan’n kun i ɲin kpɛ ngua lɔ lika’n su. Ɔ sunnzunnin ngua lɔ lika’n nun anuan’m be afiɛn’n nun’n, ɔ ti kude ya kun (100). 28 I sin’n, ɔ fali min sinnin ngua lɔ anuan’n nun kpɛkun ɔ fali min ɔli awlo klun kaan’n nun lɔ. Ɔ sunnzunnin ngua lɔ anuan’n, anuan sɔ’n nin anuan kun mun be ti kun. 29 Anuan’n i nun gladi difuɛ’m be sua ba mun, nin i ja mlomlo mun, ɔ nin i lika fleiin nga be sin i bo’n, ɔ nin anuan kun’m be liɛ’m be ti kun. Fenɛtri’m be o i bue nɲɔn’n su, yɛ i lika fleiin nga be sin i bo’n ɔ le fenɛtri mun wie. Anuan’n i tɛnndɛn nun’n ti kude ablenun (50), yɛ i tɛtrɛ nun’n ti kude ablaɔn-nin-nnun (25).+ 30 Sinwlɛ’m be o i wun, be tɛnndɛn nun’n ti kude ablaɔn-nin-nnun (25), yɛ be tɛtrɛ nun’n ti kude nnun. 31 I lika fleiin nga be sin i bo’n i ɲin kpɛ awlo klun dan’n su lɔ. Kpɛkun nglesia waka desɛn o i ja mlomlo’m be wun.+ Be fu asikalie nso su naan b’a ju lɔ.+

32 Kɛ ɔ fali min sinnin wia afiliɛ lɔ lika’n nun m’ɔ fali min ɔli awlo klun kaan’n nun lɔ’n, ɔ sunnzunnin anuan’n, anuan sɔ’n nin anuan kun mun be sɛ. 33 Anuan’n i nun gladi difuɛ’m be sua ba mun, nin i ja mlomlo mun, ɔ nin i lika fleiin nga be sin i bo’n, anuan sɔ’n nin anuan kun mun be liɛ’m be sɛ. Fenɛtri’m be o i bue nɲɔn’n su, yɛ i lika fleiin nga be sin i bo’n ɔ le fenɛtri mun wie. Anuan’n i tɛnndɛn nun’n ti kude ablenun (50), yɛ i tɛtrɛ nun’n ti kude ablaɔn-nin-nnun (25). 34 I lika fleiin nga be sin i bo’n i ɲin kpɛ awlo klun dan’n su lɔ. Kpɛkun nglesia waka desɛn o anuan’n i ja mlomlo nɲɔn’m be wun. Be fu asikalie mɔcuɛ su naan b’a ju lɔ.

35 I sin’n, ɔ fali min ɔli nglo lɔ anuan’n+ i wun lɔ, kpɛkun ɔ sunnzunnin, ɔ nin anuan kun mun be sɛ. 36 Anuan’n i nun gladi difuɛ’m be sua ba mun, nin i ja mlomlo mun, ɔ nin i lika fleiin nga be sin i bo’n, anuan sɔ’n nin anuan kun mun be liɛ’m be sɛ. Fenɛtri’m be o i bue nɲɔn’n su. I tɛnndɛn nun’n ti kude ablenun (50), yɛ i tɛtrɛ nun’n ti kude ablaɔn-nin-nnun (25). 37 I ja mlomlo’m be ɲin kpɛ awlo klun dan’n su lɔ. Kpɛkun nglesia waka desɛn o anuan’n i ja mlomlo nɲɔn’m be wun. Be fu asikalie mɔcuɛ su naan b’a ju lɔ.

38 Anuan’n i ja mlomlo’m be wun lɛ’n, like diwlɛ kun nin i anuan’n be o lɛ. Lɛ yɛ be wunnzin nnɛn nga be fa yi tɛ nga kɛ bé yí’n be yra nnɛn’n i kɔlikɔli’n niɔn.+

39 Tabli nɲɔn o anuan’n i ɲrun lɛ lika fleiin nga be sin i bo’n i bue nɲɔn’n be su. Tabli sɔ’m be su yɛ be kun nnɛn nga be fa yi tɛ nga kɛ bé yí’n be yra nnɛn’n i kɔlikɔli’n,+ nin sa tɛ’n i ti tɛ’n,+ ɔ nin sa tɛ’n i ti kpatalɛ tɛ’n+ niɔn. 40 Nglo lɔ anuan’n i lika nga be sin lɛ’n tabli nɲɔn be jinjin i ɲrun lɛ. Yɛ tabli nɲɔn be jinjin anuan’n i lika fleiin nga be sin i bo’n i bue kun lɔ. 41 Anuan’n i bue nɲɔn’n su’n tabli nnan be jinjin lɛ. Be kwlaa be ti tabli mɔcuɛ. Be su yɛ be kun nnɛn nga be fa yi tɛ mun-ɔn. 42 Yɔbuɛ yɛ be sɛli be fa yoli tɛ nga kɛ bé yí’n be yra nnɛn’n i kɔlikɔli’n i tabli nnan mun-ɔn. Be tɛnndɛn nun’n ti kude kun nin sin, be tɛtrɛ nun’n ti kude kun nin sin, yɛ be nglonglo su’n ti kude kun. Ninnge nga be fa kpɛ nnɛn nga be fa yi tɛ nga kɛ bé yí’n be yra nnɛn’n i kɔlikɔli’n nin nnɛn nga be fa yi tɛ onga’m be kɔmin’n, tabli sɔ’m be su yɛ be sie be-ɔ. 43 Be fali tɛbua wie mun be siesieli be sua’n i klun lɔ talɛ’n i wun, be tɛtrɛ nun’n ti palmun kun. Be fa nnɛn nga be fa man’n be sie i tabli’m be su.

44 Jue tofuɛ’m+ be like diwlɛ’m be o awlo klun kaan’n i anuan’n i wun lɛ. Be o awlo klun kaan’n nun lɔ nglo lɔ anuan’n i wun koko lɛ, be ɲin kpɛ ngua lɔ lika’n su. Like diwlɛ uflɛ o wia afiliɛ lɔ anuan’n i wun koko lɛ, i ɲin kpɛ nglo lɔ lika’n su.

45 Ɔ seli min kɛ: “Like diwlɛ nga i ɲin kpɛ ja ngua lɔ lika’n su’n, ɔ ti Ɲanmiɛn ɲrun jranfuɛ nga be di junman Ɲanmiɛn sua’n nun’n be liɛ.+ 46 Like diwlɛ nga i ɲin kpɛ nglo lɔ lika’n su’n, ɔ ti Ɲanmiɛn ɲrun jranfuɛ nga tɛ yiwlɛ’n i wun junman’n wo be sa nun’n be liɛ.+ Zadɔku i mma+ mun-ɔn. Levifuɛ nga be ba Zoova ɲrun be wa di junman be mɛn i’n be nun wie mun-ɔn.”+

47 I sin’n, ɔ sunnzunnin awlo klun kaan’n. I tɛnndɛn nun’n ti kude ya kun (100), yɛ i tɛtrɛ nun’n ti kude ya kun (100), i bue nnan’m be sɛ. Tɛ yiwlɛ’n wo Ɲanmiɛn sua’n i ɲrun ndɛnman su.

48 I sin’n, ɔ fali min ɔli Ɲanmiɛn sua’n i lika ng’ɔ ti fleiin kpa’n i nun lɔ.+ Kpɛkun ɔ sunnzunnin sua’n i lika ng’ɔ ti fleiin kpa’n i ja mlomlo mun, i bue kun ti kude nnun yɛ i bue uflɛ ti kude nnun. Anuan’n i bue kun i tɛtrɛ nun’n ti kude nsan, yɛ i bue uflɛ’n ti kude nsan.

49 Ɲanmiɛn sua’n i lika ng’ɔ ti fleiin kpa’n i tɛnndɛn nun’n ti kude ablaɔn (20), yɛ i tɛtrɛ nun’n ti kude blu-nin-kun (11).* Sran’m be fa asikalie’n yɛ be ju lɔ-ɔ. Sua ja mlomlo wie’m be o anuan’n i ja mlomlo’m be wun lɛ, kun o i bue kun su yɛ kun o i bue uflɛ su.+