2 Famiɛn Mun

25 Kɛ Sedesiasi kacili famiɛn’n i afuɛ ngwlan su’n, i anglo blu’n i cɛn ba blu’n su’n, Nebikadnezaa+ m’ɔ ti Babilɔnin famiɛn’n, ɔ nin i sonja mun be bali kɛ be nin Zerizalɛmunfuɛ’m bé kún.+ Ɔ boli nanmue klɔ’n i sin lɛ, kpɛkun ɔ kplannin talɛ bo sin yiali klɔ’n.+ 2 Be kali lɛ lele fa juli Sedesiasi i famiɛn dilɛ’n i afuɛ blu-nin-kun’n (11) su. 3 Anglo nnan’n i cɛn ba ngwlan su’n, awe’n yoli dan+ klɔ’n nun, sran’m be ɲanman aliɛ be diman.+ 4 Be kpɛli klɔ’n i wun talɛ’n nun toklo.+ Kpɛkun sonja’m be kwlaa be wanndili kɔnguɛ. Be sinnin anuan ng’ɔ o famiɛn’n i fie klanman’n i wun lɛ’n nun, ɔ o talɛ nɲɔn’m be afiɛn’n nun. Famiɛn’n fali Araba atin’n.+ Kɛ ɔ́ yó sɔ’n nn Kaldefuɛ’m b’a sin b’a yia klɔ’n. 5 Sanngɛ Kaldefuɛ’m be sonja’m be suli famiɛn’n su, be ko trɛli i Zeriko lika kpɛtɛkplɛɛ’n nun lɔ. I sonja’m be kwlaa be yacili i lɛ be bo sanndili. 6 Be trali famiɛn’n,+ be fɛ i ko mannin Babilɔnin famiɛn’n Ribla lɔ, kpɛkun be dili i jɔlɛ. 7 Be kunnin Sedesiasi i mma mun i ɲin bo lɛ. I sin’n, Nebikadnezaa boboli Sedesiasi i ɲinma mun, ɔ fali aaba jrɔkɔ cili i, kpɛkun ɔ fɛ i ɔli Babilɔnin.+

8 Anglo nnun su’n, i cɛn ba nso su’n, yɛle kɛ, kɛ Nebikadnezaa kacili famiɛn’n, i afuɛ blu-nin-ngwlan (19) su’n, Babilɔnin famiɛn’n i sufuɛ Nebizaradan+ m’ɔ ti gladi difuɛ’m be su kpɛn’n, ɔ bali Zerizalɛmun lɛ.+ 9 Ɔ wɔli Zoova i sua’n+ nin famiɛn’n i sua’n,+ ɔ nin sua nga be o Zerizalɛmun lɔ’n be kwlaa be nun.+ Asa ekun’n, ɔ wɔli be kwlaa nga be le ɲrun’n be sua’m be nun.+ 10 Kpɛkun Kaldefuɛ’m be sonja nga be su gladi difuɛ’m be su kpɛn’n i su’n be kwlaa be bubuli Zerizalɛmun klɔ’n i wun talɛ mun.+ 11 Nebizaradan m’ɔ ti gladi difuɛ’m be su kpɛn’n fali nvlefuɛ nga be kali klɔ’n su lɛ’n, ɔ nin be nga be fali be wun mannin Babilɔnin famiɛn’n, ɔ nin sran onga mun ɔli.+ 12 Sanngɛ gladi difuɛ’m be su kpɛn’n yacili nvle’n nunfuɛ nga be ti yalɛfuɛ kpa’n be nun wie’m be lɛ naan be di junman viɲin fie’m be nun, yɛ be di fie su junman wie mun ekun kekle nun.+ 13 Kaldefuɛ’m be bubuli Zoova i sua’n i ja mlomlo nga be fali aaba yoli be’n,+ nin kakaklolo mun,*+ ɔ nin aaba Jenvie’n*+ mɔ be o Zoova i sua’n nun’n. Kpɛkun be fali aaba’n be ɔli Babilɔnin.+ 14 Asa ekun’n, be fali nzuɛn guawlɛ mun, nin peli mun, nin ninnge wie mɔ be ti kɛ sizo sa’n, ɔ nin klowa mun, ɔ nin ninnge kwlaa nga be fali aaba be yoli mɔ be fa di junman Ɲanmiɛn sua’n nun lɔ’n. 15 Gladi difuɛ’m be su kpɛn’n fali sin guawlɛ mun, ɔ nin kpongbo ba mɔ be fali sika ɔkwlɛ jrɛiin+ nin sika jrɛiin+ be yoli be’n. 16 Sua ja mlomlo nɲɔn mun nin Jenvie’n, ɔ nin kakaklolo mɔ Salomɔn yoli be fa sieli Zoova i sua’n nun lɔ’n be liɛ’n, aaba nga be fa yoli ninnge kwlaa sɔ mun’n, be kwlá simɛn i nɔnnin’n i nuan.+ 17 Sua ja mlomlo kun i nglonglo su’n ti kude* blu-nin-mɔcuɛ (18).+ I ti su like kukluku’n ti aaba, i nglonglo su’n ti kude nsan, tɛ’n nin grenadie mma nga be o like kukluku’n i wun’n, aaba yɛ be fa yoli be kwlaa-ɔ.+ Sua ja mlomlo nɲɔn mun nin be wun tɛ’n be wafa’n ti kun.

18 Asa ekun’n, Gladi difuɛ’m be su kpɛn’n trali Seraya+ m’ɔ ti Ɲanmiɛn ɲrun jranfuɛ’m be su kpɛn’n, nin Sofonin+ m’ɔ ti Ɲanmiɛn ɲrun jranfuɛ’m be nɲɔn su’n, ɔ nin anuan sunianfuɛ nsan mun ɔli.+ 19 Klɔ’n su lɛ’n, ɔ trali famiɛn’n i awlo lɔ junman difuɛ kun m’ɔ nian sonja’m be su’n, ɔ nin famiɛn’n i mantanfuɛ nnun mɔ be wunnin be klɔ’n nun’n, ɔ nin sonja’m be su kpɛn’n i fluwa klɛfuɛ m’ɔ fa nvle’n nun sran mun wla sonja nun’n, ɔ nin nvle’n nun sran ablesiɛn (60) ekun mɔ be wunnin be klɔ’n nun’n. 20 Nebizaradan+ m’ɔ ti gladi difuɛ’m be su kpɛn’n fali be ko mannin Babilɔnin famiɛn’n Ribla lɔ.+ 21 Babilɔnin famiɛn’n kunnin be Ribla lɔ, Amati asa’n su lɔ.+ Kɛ be fali Zidafuɛ mun be mɛn’n nun ɔli kɛ ngalɛ’n sa.+

22 Nebikadnezaa m’ɔ ti Babilɔnin famiɛn’n fali Gedalia+ m’ɔ ti Aikamun+ i wa’n, mɔ i kusu ti Safan+ i wa’n sieli i be ng’ɔ yacili be Zida mɛn’n nun lɔ’n be su.+ 23 Kɛ sonja su kpɛn’m be kwlaa nin be sonja’m be tili i kɛ Babilɔnin famiɛn’n w’a fa Gedalia w’a sie i nvlefuɛ’m be su’n, be ka lɛ bali Gedalia i sin Mizpa lɛ. Sran sɔ mun yɛle Netania i wa Ismaɛli, nin Karea i wa Zoanan, nin Tanumɛti m’ɔ ti Netofafuɛ’n i wa Seraya, ɔ nin Maakatifuɛ’n i wa Zaazania. Be nin be sonja mun yɛ be bali-ɔ.+ 24 Gedalia tali sonja’m be su kpɛn mun nin be sonja’m be nda. Yɛ ɔ seli be kɛ: “Nán Kaldefuɛ’m be sulɛ’n kun amun srɛ. Amun tran nvle’n nun, yɛ amun su Babilɔnin famiɛn’n. Sɛ amun yo sɔ’n, i bo’n gúa kpa mán amun.”+

25 Anglo nso su’n, Ismaɛli+ m’ɔ ti Netania i wa’n, mɔ i kusu ti Elisama i wa’n, m’ɔ ti famiɛn’n i osu’n nunfuɛ’n, ɔ nin sran blu ekun be bali be wa kunnin Gedalia, nin Zifu nin Kaldefuɛ nga be nin i be o Mizpa lɛ’n.+ 26 Kɛ ɔ yoli sɔ’n, i bakan-o, i kpɛnngbɛn-o,* i sonja su kpɛn-o, be kwlaa be ɔli Ezipti,+ Kaldefuɛ’m be wun srɛ ti.+

27 Kɛ be trali Zozakinin+ m’ɔ ti Zida famiɛn’n ɔli’n, i afuɛ ablasan-nin-nso (37) su’n, i anglo blu-nin-nɲɔn’n (12) i cɛn ba ablaɔn-nin-nso (27) su’n, Evili-Merodaki m’ɔ ti Babilɔnin famiɛn’n yili Zozakinin m’ɔ ti Zida famiɛn’n bisua lɔ fiteli. Afuɛ kunngba nga Evili-Merodaki kacili famiɛn’n i nun yɛ ɔ yili i-ɔ.+ 28 Ɔ kannin ndɛ amanniɛn su kleli i. Kpɛkun ɔ yoli maan ɔ ɲannin ɲrun trali famiɛn onga nga be nin i o Babilɔnin lɔ’n.* 29 Ɔ maan Zozakinin yili i wun bisua tralɛ mun. Yɛ ɔ nin famiɛn’n be dili like titi lele naan wie’n w’a fa kun i. 30 Cɛn kwlakwla’n famiɛn’n mɛn i aliɛ. Ɔ mɛnnin i aliɛ lele ɔ fa wuli.