1 Be Ɲoliɛ

28 Davidi yiali Izraɛli lɔ sran dandan’m be kwlaa naan be bla Zerizalɛmun. Sran sɔ mun yɛ: Akpasua’m be su kpɛnngbɛn mun,+ nin sran nga be bubuli be nun akpasuaakpasua naan be di junman be man famiɛn’n be su kpɛn mun, nin sran akpi su kpɛn mun, nin sran ya su kpɛn mun,+ nin kpɛnngbɛn nga be nian famiɛn’n i ninnge kpakpa’m be kwlaa nin i nnɛn mun+ ɔ nin i mma’m+ be liɛ’m be su’n, nin famiɛn’n i awlo lɔ junman difuɛ mun, nin yasua sran nga be kwla lafi be su’n be kwlaa.+ 2 I sin’n, Famiɛn Davidi jaso jrannin naan w’a se be kɛ:

“Min niaan mun, min nvle’n nunfuɛ mun, amun sie amun su. Min waan ń kplán sua kun naan Zoova i alaka’n ka nun tititi, naan ɔ yo e Ɲanmiɛn’n i ja takatakawlɛ.+ Yɛ n siesieli ninnge nga bé fá kplán’n.+ 3 Sanngɛ Ɲanmiɛn Kpli seli min kɛ: ‘A ti alɛ kunfuɛ, yɛ a guali mmoja ase dan.+ I sɔ’n ti’n, nán wɔ yɛ á kplán sua nga min dunman’n trán su’n niɔn.’+ 4 Kɛ Zoova m’ɔ ti Izraɛli Ɲanmiɛn’n niannin min si i awlo’n nun’n, min yɛ ɔ fali min naan n yo Izraɛli nvle’n su famiɛn tititi-ɔ.+ Afin sran ng’ɔ kpɛli i kɛ ɔ yo ɲrun dinfuɛ’n yɛle Zida.+ Yɛ Zida i awlo’n nun kusu’n, min si i awlobo liɛ’n yɛ ɔ kpɛli i-ɔ.+ Kɛ ɔ niannin min si i mma’m be nun’n, i waan min yɛ i klun jɔ min wun naan n yo Izraɛli nvle wunmuan’n i su famiɛn-ɔn.+ 5 Yɛ min wa yasua’m be nun’n, (afin Zoova mannin min ba yasua kpanngban kpa)+ ɔ kpali min wa Salomɔn+ kɛ ɔ tran Zoova i famiɛn bia’n su naan ɔ sie Izraɛli nvle’n.+

6 “Ɔ seli min kɛ: ‘Ɔ wa Salomɔn yɛ ɔ́ wá kplán min sua’n nin min awlo klun mun-ɔn. Afin n kpɛli i kɛ ɔ kaci min wa, yɛ n kusu ń káci i si.+ 7 Sɛ ɔ nian min mmla mun nin min afɔtuɛ’m be kwlaa be su nanti+ kɛ ng’ɔ fa yo i dɔ nga su’n sa’n, ń yó maan i famiɛn dilɛ’n ká lɛ tititi.’+ 8 I sɔ’n ti’n, ndɛ nga n ko kɛn i Izraɛlifuɛ mɔ be ti Zoova i sran’n be kwlaa be ɲrun’n, nin e Ɲanmiɛn’n i ɲrun’n yɛ: Amun kunndɛ Zoova m’ɔ ti amun Ɲanmiɛn’n i mmla’m be kwlaa naan amun nian be su nanti kpa. I liɛ’n, amún ká mɛn klanman nga nun wa.+ Kpɛkun sɛ amun nunman nun kun’n, ɔ́ yó amun mma’m be aja like tititi.

9 “Min wa Salomɔn, kplin ɔ ɲin naan si ɔ si i Ɲanmiɛn’n kpa. Fa ɔ awlɛn’n kwlaa su i,+ yɛ maan i sulɛ’n yo ɔ fɛ. Afin Zoova niannian sran’m be kwlaa be awlɛn’n nun.+ Ɔ wun akunndan kwlaa nga be bu’n i wlɛ.+ Sɛ a kunndɛ i’n, ɔ́ yó maan á wún i.+ Sanngɛ sɛ a kpɔci i’n, ɔ́ yí ɔ blo mlɔnmlɔnmlɔn.+ 10 Zoova kpali wɔ naan a kplan sua kun naan ɔ yo i sulɛ sua. Yo yakpafuɛ, ko di junman’n.”

11 I sin’n, Davidi fali sua’n i jajalɛ ng’ɔ jɛjɛli i fluwa su’n+ mɛnnin i wa Salomɔn. Ɔ jajali sua’n i lika ng’ɔ ti fleiin kpa’n,+ nin sua ba mun, nin ninnge siewlɛ mun, nin sua ba nga be o nglo lɔ’n, nin sua ba nga be o i klun lɔ’n, nin sua ba nga i nun yɛ Alaka’n i tre’n wo’n.*+ 12 Ninnge kwlaa nga Ɲanmiɛn fa kleli i aolia nun m’ɔ jɛjɛli i fluwa su’n, ɔ fa mɛnnin i. Wafa nga be ko kplan Zoova i sua’n i awlo klun mun’n,+ nin sua ba nga be bo sin yiɛ i mɔ be nun yɛ be di like’n, nin Ɲanmiɛn Kpli i sua’n nun ninnge’m be siewlɛ mun, nin ninnge nga be yoli be sanwun’n*+ be siewlɛ mun’n, ɔ klekleli i. 13 Asa ekun’n, ɔ klekleli i Ɲanmiɛn ɲrun jranfuɛ mun nin Levifuɛ’m be akpasuaakpasua mun,+ nin Zoova i sua’n nun junman kwlaa, ɔ nin ninnge kwlaa nga be o Zoova i sua’n nun mɔ be fa su i’n. 14 Sika ɔkwlɛ ng’ɔ fata kɛ be fa yo ninnge kwlaa nga bé fá dí junman fanunfanun mun’n i nɔnninnɔnin’n, nin sika ng’ɔ fata kɛ be fa yo ninnge nga bé fá dí junman fanunfanun mun’n i nɔnninnɔnin’n, ɔ kleli be i nuan. 15 Asa ekun’n, ɔ kleli kannin siewlɛ nga sika ɔkwlɛ yɛ be fa yoli’n+ nin be su kannin mɔ sika ɔkwlɛ yɛ be fa yoli’n, be nɔnninnɔnin’n i nuan. Ɔ kleli kannin siewlɛ fanunfanun mun nin be su kannin mun, nin kannin siewlɛ nga sika yɛ be fa yoli’n, be nɔnninnɔnnin’n i nuan. Like nga be fa kannin siewlɛ kun nin i su kannin’m be yo’n, i su yɛ ɔ niannin naan w’a klekle i sɔ liɛ’n niɔn. 16 Ɔ kleli sika ɔkwlɛ nga bé fá yó tabli nga be sie su kpanwun nga be tian be wiengu su’n,*+ nin sika nga bé fá yó tabli mun’n, be nɔnninnɔnnin’n i nuan. 17 Ɔ kleli sika ɔkwlɛ jrɛiin nga bé fá yó atiɛ je mun nin kpongbo mun nin ondoman mun’n, nin sika ɔkwlɛ kpongbo ba+ kunngunngun’m be nɔnninnɔnnin’n, nin sika kpongbo ba kunngunngun’m be nɔnninnɔnin’n be nuan. 18 Asa ekun’n, sika ɔkwlɛ jrɛiin nga bé fá yó ansan yrawlɛ’n,+ nin nga bé fá yó kakaklolo’n i nzɔliɛ+ mɔ yɛle sika ɔkwlɛ seribɛn+ mɔ be trɛtrɛ be ndɛwa’n nun’n, mɔ be ndɛwa’n kata Zoova i aenguɛ’n i alaka’n su’n, ɔ klekleli be nɔnninnɔnnin’n i nuan. 19 Davidi seli kɛ: “Sua’n nin i nun ninnge tɛkɛtɛkɛ kwlaa+ nga m’an jɛjɛ i fluwa su yɛ’n,+ Zoova bɔbɔ yɛ ɔ kleli min-ɔn. Yɛ ɔ mannin min i sɔ yolɛ’n i wun ngwlɛlɛ.”

20 I sin’n, Davidi seli i wa Salomɔn kɛ: “Yo yakpafuɛ yɛ jran kekle naan ko di junman’n. Nán srɛ kun wɔ, nán ɔ wun usu wɔ. Afin Ɲanmiɛn Zoova m’ɔ ti min Ɲanmiɛn’n, ɔ jin ɔ sin.+ Ɔ su yaciman ɔ sin jranlɛ, yɛ ɔ su kpɔciman wɔ.+ Ɔ́ jrán ɔ sin lele Zoova i sua’n i su junman wunmuan’n wíe. 21 Ɲanmiɛn ɲrun jranfuɛ mun+ nin Levifuɛ+ nga bé dí be junman’n Ɲanmiɛn Kpli i sua’n nun’n, be akpasuaakpasua mun yɛ. Junman difuɛ nga be o ɔ sa nun’n, be si junman wafawafa kwlaa di,+ yɛ be klo kpa kɛ bé dí junman’n. Asa ekun’n, nvle’n nun sran dandan mun+ nin nvle’n nunfuɛ’m be kwlaa mɔ bé wá fá ndɛ kwlaa nga á kán klé be’n su’n, be jin ɔ sin.”