Daniɛli

8 Kɛ Bɛlsazaa yoli famiɛn’n+ i afuɛ nsan su’n, min Daniɛli n wunnin like kun aolia nun n ukali nga n wunnin i laa’n su.+ 2 Aolia nun’n, n wunnin kɛ n wo sua* ng’ɔ o Sizi+ lɔ’n nun, Elamun+ asa’n su lɔ. N wunnin like’n aolia nun. N wunnin kɛ n wo nzue nga be flɛ i Ilai’n i wun lɛ. 3 Kɛ n mannin min ɲin su’n, ń nían-ɔn, bua ɲin kun+ jin nzue’n i nuan lɛ. Ɔ le wɛ nɲɔn,+ yɛ i wɛ nɲɔn sɔ’m be ti tɛnndɛn kpa. Sanngɛ kun ti tɛnndɛn tra kun. Yɛ kɛ ɔ́ kɔ́ i ɲrun’n, tɛnndɛnfuɛ’n wa ɲinnin ekun.+ 4 N wunnin kɛ bua ɲin’n tru kɔ wia atɔliɛ lɔ, nin nglo lɔ, ɔ nin ngua lɔ naan ɔ́ sí i kpɔfuɛ mun. Blo nnɛn wie fi kwlá jrɛnmɛn i ɲrun. Yɛ sran fi kwlá deman be i sa nun.+ Like ng’ɔ klo kɛ ɔ́ yó’n yɛ ɔ yo-ɔ. Kpɛkun ɔ yo i wun dandan.

5 N wo lɛ ń nían-ɔn, kpɛkun n wunnin boli yasua kun.+ Ɔ fin wia atɔliɛ lɔ su ba. Ɔ sin asiɛ wunmuan’n su ndɛndɛ ti’n i ja’m be kanman asiɛ’n. Kpɛkun n wunnin kɛ boli yasua’n i wɛ kun tɛ i ɲinma nɲɔn’n be afiɛn’n nun.+ 6 Ɔ su kɔ bua ɲin ng’ɔ le wɛ nɲɔn mɔ n wunnin kɛ ɔ jin nzue’n i nuan lɔ’n i su. Ɔ wanndi ɔli i su ya su.

7 Ń wún i-ɔ, ɔ su mantan bua ɲin’n i koko kpa. I wun ya nga w’a fa’n, ɔ timan blɛblɛ. Ɔ tu sili bua ɲin’n, yɛ ɔ bubuli i wɛ nɲɔn mun. Kpɛkun bua ɲin’n w’a ɲanman fanngan kun naan w’a jrɛn i ɲrun. Ɔ yili bua ɲin’n i ase, kpɛkun ɔ tiɛtiɛli i su. Sran fi w’a kwlá deman bua ɲin’n i sa nun.

8 “Kpɛkun boli yasua’n wa yoli i wun dandan. Sanngɛ kɛ ɔ wa ɲannin wunmiɛn cɛ’n, be buli i wɛ danfuɛ’n. Kpɛkun wɛ nnan be wa fili i osu’n nun, be fiteli weiin . Be ɲin kaci kɔ asiɛ’n i bue nnan’m be su.+

9 Wɛ kaan kun wa fili be nun kun nun. Kpɛkun ɔ ɲinnin dan kpa ɔli ngua lɔ lika’n nun, nin wia afiliɛ lɔ lika’n nun, nin Lika Klanman’n i bue liɛ’n su lɔ.+ 10 Ɔ yoli tɛnndɛn lele toli ɲanmiɛn su lɔ sonja’m be lɔ. Kpɛkun ɔ yoli maan sonja wie mun nin nzraama wie mun be tɔli asiɛ’n su. Kpɛkun ɔ tiatiali be su. 11 Ɔ yoli i wun dandan Sran ng’ɔ o sonja’m be ti su’n i su bɔbɔ. Ɔ maan tɛ nga be yi mɛn i titi’n, b’a yimɛn i kun. Yɛ lika nga be wlɛli i bo ase kpa lika ng’ɔ ti i liɛ klonglo’n nun’n, be yili i ase.+ 12 Sa tɛ’n ti’n, be yili sonja akpasua kun mannin. Kpɛkun tɛ nga be yi i titi’n, b’a yimɛn i kun. Ɔ toli nanwlɛ’n yili i ase, yɛ like kwlaa ng’ɔ yo’n ɔ yo ye i sa nun.

13 N tili aolia nun sran kun nɛn. Yɛ aolia nun sran kun ekun seli ng’ɔ su ijɔ’n kɛ: “?Tɛ nga be yi i titi’n, ɔ nin sa tɛ nga be yo m’ɔ saci ninnge mun’n,+ nin Ɲanmiɛn i lika’n ɔ nin sonja’m be su tiatialɛ nga be tiatiali’n, be su ndɛ’n ɔ́ dí le nɲɛ?” 14 Yɛ ɔ seli min kɛ: “Ɔ́ dí cɛn ba* akpi nɲɔn ya nsan (2.300). Kpɛkun Ɲanmiɛn i lika’n yó kpa kɛ laa’n sa ekun.”

15 Kɛ min bɔbɔ Daniɛli ń wún sa sɔ’n mɔ ń kúnndɛ i bo’n, kpɛkun ń nían-ɔn, sran kun m’ɔ ti kɛ klɔ sran sa’n wa jrannin min ɲrun lɛ. 16 Kpɛkun n tili sran kun nɛn Ilai’n+ i afiɛn lɔ. Ɔ kpan seli kɛ: “Gabliɛli,+ ukɛ i naan ɔ si like ng’ɔ wunnin i’n i bo.”+ 17 Ɔ bali lika nga n jin lɛ’n i wun koko. Sanngɛ kɛ ɔ wa toli min lɛ’n, srɛ m’ɔ kunnin min’n ti’n, n tɔli, min ɲin utuli ase. Ɔ seli min kɛ: “Wun i wlɛ kɛ sa nga a wunnin i’n, ɔ́ kpɛ́n su mɛn’n i awieliɛ blɛ’n nun.”+ 18 Sanngɛ kɛ ɔ́ kán ndɛ klé min’n, n lafili kpa sa pɔɔ. Kɛ ɔ́ yó sɔ’n, nn min ɲin utu ase. Ɔ kannin min, kpɛkun ɔ yoli maan n jrannin nglo min osu’n nun lɛ.+ 19 I sin’n, ɔ seli kɛ: “Ń má yó maan á sí sa ng’ɔ́ wá jú Ɲanmiɛn i ya’n i blɛ kasiɛn nun’n. Afin sa sɔ’n kpɛ́n su mɛn’n i awieliɛ blɛ nga be kleli’n nun.+

20 “Bua ɲin ng’ɔ le wɛ nɲɔn mɔ a wunnin i’n, ɔ ti Medi nin Pɛɛsi famiɛn mun be nzɔliɛ.+ 21 Boli yasua nga i wun ndrɛ’n ti vurɔɔ’n ti Glɛki mɛn’n i famiɛn’n i nzɔliɛ.+ Yɛ i wɛ dan ng’ɔ o i ɲinma nɲɔn’n be afiɛn’n ti famiɛn klikli’n i nzɔliɛ.+ 22 I wɛ sɔ’n buli. Kpɛkun wɛ nnan be wa fifili i osu’n nun.+ I sɔ’n kle kɛ famiɛn sɔ’n i nvle’n nun famiɛn nnan bé wá jáso su, sanngɛ be su ɲanman fanngan kɛ i sa.

23 “Be famiɛn dilɛ’n i agualiɛ su’n, kɛ sa tɛ yolɛ’n wá yó dan trátrá su’n, famiɛn kun m’ɔ yo wlɛ’n, m’ɔ wun ndɛ sukusuku’m be wlɛ’n* ɔ́ wá jáso su. 24 I kwlalɛ’n wá yó dan. Sanngɛ nɛ́n i bɔbɔ i fanngan nun ti-ɔ. Ninnge ng’ɔ́ sáci be’n, be su yoman aɔwi.* I liɛ’n yó ye, yɛ like kwlaa ng’ɔ́ yó’n ɔ́ yó ye i sa nun. Ɔ́ yó be nga be le kwlalɛ kpa’n nin Ɲanmiɛn i sran nga be ti i liɛ klonglo’n be abɔlɛ.+ 25 Gblɛ m’ɔ si i kpɛ’n yɛ ɔ́ fá ɲɛ́n i wun-ɔn. Ɔ́ bú i klun lɔ kɛ i kpa tra sran’m be kwlaa. Blɛ mɔ sran’m bé bú i kɛ be su di alaje’n,* ɔ́ núnnún be nun kpanngban kpa. Ɔ́ wá jáso wlengbi’m be Wlengbi’n i wun bɔbɔ. Kannzɛ sran sa su kɛnmɛn i’n, sanngɛ bé búbú i nun kpukpukpu.

26 “Like nga be yo i nnɔsua nin nglɛmun mɔ a wunnin i aolia nun’n, i su ndɛ nga be kannin’n ti nanwlɛ. Sanngɛ fia sa sɔ’n su. Afin blɛ ng’ɔ́ bá mmuammua kpa lɔ’n, i nun yɛ ɔ́ kpɛ́n su-ɔ.”+

27 Kɛ ɔ yoli sɔ’n, min bɔbɔ Daniɛli min fanngan’n wieli min nun. Yɛ n tɔli tukpacɛ n dili cɛn kpanngban.+ I sin’n, n jasoli n ko dili famiɛn’n i junman’n.+ Sanngɛ sa nga n wunnin i’n ti’n, n yoli sa zuu, yɛ sran fi kwlá siman sa sɔ’n i bo.+