2 Be Ɲoliɛ

26 Kɛ ɔ yoli sɔ’n, Zidafuɛ’m be kwlaa be sieli Oziasi+ famiɛn i si Amazia i osu.+ Blɛ sɔ’n nun’n, nn ɔ le afuɛ blu-nin-nsiɛn (16). 2 Kɛ famiɛn’n* wuli’n,*+ ɔ kplannin Elɔti klɔ’n i uflɛ+ kpɛkun ɔ fa mannin Zidafuɛ mun ekun. 3 Kɛ Oziasi+ káci famiɛn’n, nn ɔ le afuɛ blu-nin-nsiɛn (16). Ɔ dili famiɛn afuɛ ablenun-nin-nɲɔn (52) Zerizalɛmun lɛ. Be flɛ i nin’n kɛ Zekolia, ɔ fin Zerizalɛmun.+ 4 Ɔ yoli sa ng’ɔ ti kpa Zoova ɲrun’n titi kɛ i si Amazia fa yoli’n sa.+ 5 Zakari blɛ su’n, ɔ kpɛli Ɲanmiɛn i sin atin titi. Zakari kleli i kɛ ɔ fata kɛ ɔ sro Ɲanmiɛn Kpli. I nun nga ɔ kpɛli Zoova i sin atin’n, Ɲanmiɛn Kpli yoli maan i sa nun ninnge kwlaa yoli ye.+

6 Ɔ nin Filistifuɛ’m be ko kunnin.+ Ɔ fitifitili Gati klɔ’n i talɛ’n,+ nin Zabune klɔ’n i talɛ’n,+ ɔ nin Asdɔdu klɔ’n i talɛ’n.+ Kpɛkun ɔ kplannin klɔ wie mun Asdɔdufuɛ mun nin Filistifuɛ’m be mɛn’m be nun. 7 Ɲanmiɛn Kpli suɛnnin i bo. Ɔ maan ɔ kwlali Filistifuɛ mun nin Arabu+ nga be tran Gubaali’n. Ɔ kwlali Meinimun mun wie. 8 Amɔnfuɛ’m+ be wa tuali lapo mannin Oziasi. I dunman’n truli kpa lele ɔ juli Ezipti mɛn’n nun lɔ. Afin i kwlalɛ’n yoli dan. 9 Asa ekun’n, Oziasi kplannin sua fleiin+ wie mun Zerizalɛmun lɔ Cɔnjɔ su Anuan’n+ i wun lɛ, nin Kongo Anuan’n+ i wun lɛ, nin Talɛ Ja’n i wun lɛ. Kpɛkun ɔ yoli maan be jrannin cinnjinnjin. 10 Asa kusu’n, ɔ kplannin sua fleiin+ wie mun aawlɛ flɛnnɛn’n nun lɔ. Yɛ ɔ kpɛli* gbo kpanngban kpa (afin ɔ le nnɛn kpanngban kpa). Ɔ yoli i sɔ kunngba’n Sefela nin lika kpɛtɛkplɛɛ’n be nun lɔ. Ɔ le fie difuɛ mun ɔ nin viɲin fie sunianfuɛ mun oka’m be su lɔ nin Kaamɛli lɔ, afin ɔ klo fie dilɛ.

11 Oziasi ɲannin sonja yɛ alɛ ninnge o be sa nun. Be bubuli i sonja’m be nun akpasuaakpasua. Zeiɛli m’ɔ ti fluwa klɛfuɛ’n+ nin sonja’m be su kpɛn kun m’ɔ suan Maazeya’n, be ka be yɛ be klɛ be dunman.+ Anania m’ɔ ti famiɛn’n i sran dan kun’n yɛ ɔ nian be junman’n su-ɔ. 12 Awlobo kpɛn nga be o safuɲrɛn sɔ’m be su’n, be ti sran akpi nɲɔn ya nsiɛn (2.600). 13 Yɛ sonja nga be o be sa nun’n, be ti akpiakpi ya nsan akpi nso ya nnun (307.500). Sonja sɔ’m be si alɛ kun kpa, yɛ be le wunmiɛn. Kɛ famiɛn’n i kpɔfuɛ’m be fa alɛ wlɛ i sin’n, sonja sɔ’m be uka famiɛn’n.+ 14 Oziasi mannin sonja’m be kwlaa be ɲrɛn mun, nin cua mun,+ nin kle mun, nin like kokloko nga be fa kata be wue’n su’n,+ nin ta mun nin kpafloko mun.+ 15 Asa ekun’n, Zerizalɛmun lɔ’n, Oziasi yoli maan be nga be yi ninnge mun’n, be yili alɛ kunlɛ mannzin mun. Be fa be sieli i sua fleiin’m be su+ nin talɛ’m be cɔnjɔ’m be su. Oziasi i dunman’n fu ɔli mmua kpa afin be ukɛli i dan, yɛ i kwlalɛ’n yoli dan.

16 Sanngɛ kɛ i kwlalɛ’n wa yoli dan’n, ɔ tuli i wun. Ɔ maan i bo’n guali tɛ mɛnnin i. Cɛn kun’n, ɔ wluli Zoova i sua’n nun naan ɔ́ yrá ansan, ansan yrawlɛ’n su.+ I lɛ nun’n, ɔ nin Zoova m’ɔ ti i Ɲanmiɛn’n b’a nantiman klanman. 17 Kɛ ɔ yoli sɔ cɛ’n, Ɲanmiɛn ɲrun jranfuɛ Azaria ɔ nin Zoova ɲrun jranfuɛ ablaɔcuɛ (80) ekun mɔ be ti yakpafuɛ’n, be wluli i sin lɔ. 18 Be ko jrannin famiɛn Oziasi i ɲrun lɛ naan b’a se i kɛ: “Oziasi, a leman atin yraman ansan manman Zoova!+ Ɲanmiɛn ɲrun jranfuɛ’m be ngunmin yɛ ɔ fata kɛ be yra ansan-ɔn. Afin be ti Aarɔn i osu’n nunfuɛ,+ yɛ be kpali be sieli be ngunmin. Fite, jaso Ɲanmiɛn i lika’n nun. Afin a nin Ɲanmiɛn b’a nantiman klanman. Ɔ maan Ɲanmiɛn Zoova su yiman ɔ ayɛ sa sɔ’n ti.”

19 Sanngɛ Oziasi fali ya dan kpa.+ Kɛ ɔ́ yó sɔ’n, nn kpongbo nga be fa yra ansan’n wo i sa nun. Ɔ fali Ɲanmiɛn ɲrun jranfuɛ’m be wun ya dan kpa. Be ja nun lɛ’n, kokowe+ fiteli i ngban su Ɲanmiɛn ɲrun jranfuɛ’m be ɲrun lɛ Zoova i sua’n nun, ansan yrawlɛ’n i wun lɛ. 20 Kɛ Azaria m’ɔ ti Ɲanmiɛn ɲrun jranfuɛ’m be su kpɛn’n nin Ɲanmiɛn ɲrun jranfuɛ’m be kwlaa be kpɛli be ɲin i wun lɔ’n, bé nían-ɔn, kokowe yɛ ɔ tɛ i ngban su yɛ! I sɔ’n ti’n, be fɛ i fiteli ndɛndɛ. I kusu kɛnnin i wun fiteli, afin Zoova tuli i fɔ.

21 Famiɛn Oziasi kali kokowefuɛ lele ɔ fa wuli. I kokowe’n ti’n, ɔ trɛnnin i liɛ ngunmin sua kun nun.+ Afin be kɛnnin i bo Zoova i sua’n nun. Famiɛn’n i sua’n kali i wa Zotamun i sa nun, i yɛ ɔ di nvle’n nunfuɛ’m be jɔlɛ-ɔ.+

22 Oziasi i su ndɛ’n i onga’n, kɛ ɔ fɛ i i bo bolɛ’n nun lele m’ɔ́ fá wíe’n, Amɔzu i wa Ezai m’ɔ ti Ɲanmiɛn nuan ijɔfuɛ’n+ klɛli i kwlaa. 23 I sin’n, Oziasi wuli.* Be sieli i i nannan’m be wun lɛ. Sanngɛ i liɛ’n, be sieli i famiɛn’m be asieliɛ’n su lɛ. Afin be seli kɛ: “Ɔ ti kokowefuɛ.” Yɛ i wa Zotamun+ sinnin i osu kacili famiɛn.