Zɔbu

33 “Sanngɛ siɛn’n, Zɔbu, yaci, sie ɔ su tie min ndɛ’n.

Tie ndɛ kwlaa nga ń kán’n.

 2 Yaci, sie ɔ su! Ɔ fata kɛ n uke min nuan.

Ɔ fata kɛ ndɛ fin min nuan* fite.

 3 Min ndɛ’m be kle kɛ min awlɛn ti kpa+

yɛ like nga n si i’n yɛ ɔ fin min nuan fite-ɔ.

 4 Ɲanmiɛn fɛli i wawɛ’n yili min,+

Sran m’ɔ Kwla Like Kwlaa Yo’n i aunmuan’n ti yɛ n wo nguan nun-ɔn.+

 5 Sɛ a kwla tɛ min su’n, tɛ su.

Yiyi ɔ ndɛ’n nun kle min. Buabua ɔ wun sie.

 6 Nian, Ɲanmiɛn Kpli i ɲrun’n, n ti kɛ ɔ sa.

Fa yɛ ɔ fa yili min wie-ɔ.+

 7 Ɔ maan min dunman nun ti’n, nán usu sa tututu,

yɛ nán maan min ndɛ’m be bo ɔ wla.

 8 Sanngɛ a kannin ndɛ wie mun min ɲrun,

nanwlɛ, n tili ndɛ nga mun kpɛ sunman:

 9 ‘N ti sanwun, m’an yoman sa tɛ.+

Fiɛn nunman min wun, m’an fɔnman sa fi nun.+

10 Sanngɛ Ɲanmiɛn waan saan ɔ nin min kún.

Ɔ bu min kɛ i kpɔfuɛ sa.+

11 Ɔ fali min ja mun wlɛli i kpanwun nun.

Yɛ ɔ bo i ɲin ase nian atin kwlaa nga n fa’n.’+

12 Sanngɛ i sɔ ndɛ liɛ mɔ a kan’n, ɔ timan su. I sɔ’n ti’n, ń má tɛ́ ɔ su:

Ɲanmiɛn ti dan tra klɔ sran lelele.+

13 ?Ngue ti yɛ a kɛn i kɛ w’a yo wɔ sa-ɔ?+

?Kɛ mɔ w’a tɛman ɔ ndɛ’m be wie fi su’n ti-ɔ?+

14 Afin Ɲanmiɛn ijɔ kpɛ kun, kpɛ nɲɔn,

sanngɛ sran fi siemɛn i nzɔliɛ,

15 ɔ yo sɔ laliɛ nun, kɛ be wun aolia nun ninnge mun kɔnguɛ’n,+

kɛ lafilɛ’n ko fa sran’m be kpa pɔɔ’n,

kɛ bé láfi be bɛ’m be su’n.

16 Kpɛkun ɔ tike be sukpɔ’n,+

yɛ ɔ klɛ i ndɛ’n gua* be akunndan’n nun,

17 kɛ ɔ ko yo naan sran kun w’a yoman sa tɛ’n ti,+

yɛ kɛ ɔ ko yo naan sran kun w’a tumɛn i wun’n ti.+

18 Ɲanmiɛn sasa sran’n naan w’a ɔman kunman’n* nun.+

Ɔ sɛsɛ i nguan’n, be su faman tokofi* kunmɛn i.

19 Kɛ sran kun lɛ i bɛ’n su m’ɔ́ wún i ɲrun’n,

mɔ i owie’m be nun yo i ya sa fiaan trilili’n, ɔ fɛ i sɔ’n tu i wun fɔ,

20 ɔ maan kpanwun’n su yomɛn i nuan nun fɛ,

yɛ i konvi’n tú aliɛ kpakpa’m be su bɔbɔ.+

21 I bɔbɔ ba’n wiewie lele,

yɛ i owie mɔ be ti fiawa laa’n, be gua su ɲɛnglɛɛn.*

22 I bɔbɔ ba’n w’a mantan kunman’n* koko.

I nguan’n w’a mantan be nga be yo maan sran wu’n be koko.

23 Sɛ ngaliɛ kanfuɛ* kun bɛ i sin’n,

sɛ sran akpi (1.000) nga be kpli sran’m be ti’n be nun kun ba’n,

naan ɔ kan sa ng’ɔ ti su’n i ndɛ kle i’n,

24 Ɲanmiɛn si i aunnvɔɛ, yɛ ɔ se kɛ:

‘Nán kplin su naan ɔ jra kunman’n* nun!+

N ɲannin like nga bé fá kpɔ́ i ti’n!+

25 Maan i wunnɛn ba’n yo mɔnnɛn* trɛ i gbanflɛn nun’n.+

Maan ɔ sɛ i sin yo kpinndinkpinndin kɛ i gbanflɛn nun’n sa.’+

26 Ɔ́ kpáta Ɲanmiɛn,+ yɛ i kusu tɛ́ i su klanman,

yɛ ɔ́ wún Ɲanmiɛn i ɲrun’n, kpɛkun ɔ́ bó sró,

yɛ Ɲanmiɛn wá yó naan klɔ sran yo sa i nuan su sɛsɛ i bɔbɔ i ɲrun.

27 Sran sɔ’n wá sé* i wiengu mun kɛ:

‘N fɔnnin.+ M’an yoman sa ng’ɔ ti su’n,

sanngɛ b’a faman like nga n yoli’n i nuan su sa b’a yoman min.*

28 Ɔ kpɔli min ti, kɛ ɔ ko yo naan m’an jraman kunman’n* nun lɔ’n+ ti,

yɛ min nguan’n wún kannin’n.’

29 Ɔ maan Ɲanmiɛn yo sa kwlaa sɔ mun

i kpɛ nɲɔn, i kpɛ nsan fa man sran kun,

30 naan ɔ́ yí i kunman’n* nun fíte,

i liɛ’n, nguan’n i kannin’n kpɛ́jɛ i su.+

31 Zɔbu, sie ɔ su kpa. Tie min ndɛ’n.

Muan ɔ nuan naan n kan wie n gua su ekun.

32 Sɛ a le ndɛ wie kan’n, kan kle min.

Kan, afin n kunndɛ kɛ ń klé kɛ ɔ ndɛ yo fɛ.

33 Sɛ kusu a leman wie kanman’n, sie ɔ su min nuan bo.

Muan ɔ nuan naan n kle wɔ ngwlɛlɛ.”