Ezekiɛli

3 Kpɛkun ɔ seli min kɛ: “Sran wa, di like ng’ɔ o ɔ ɲrun lɛ’n.* Di fluwa ɲɔnɲɔnwa nga naan kɔ, kɔ ko kan ndɛ kle Izraɛlifuɛ mun.”+

2 Ɔ maan n trɛli min nuan’n nun, kpɛkun ɔ yoli maan n dili fluwa ɲɔnɲɔnwa sɔ’n. 3 Ɔ seli min ekun kɛ: “Sran wa, di fluwa ɲɔnɲɔnwa nga n su fa man wɔ yɛ’n, naan ɔ yi ɔ ku.” Ɔ maan n boli i dilɛ bo, yɛ ɔ yoli fɛ min nuan nun kɛ awɛma nzue sa.+

4 Ɔ seli min kɛ: “Sran wa, kɔ Izraɛlifuɛ’m be sin, yɛ kan min nuan ndɛ’n kle be. 5 Afin nán sran mɔ be kan aniɛn mɔ a timan’n, annzɛ aniɛn mɔ a simɛn i’n be sin yɛ n su sunman wɔ-ɔ, sanngɛ Izraɛlifuɛ’m be sin yɛ n su sunman wɔ-ɔ. 6 Nán nvle kpanngban mɔ be kan aniɛn mɔ a timan’n, annzɛ aniɛn mɔ a simɛn i’n, mɔ a kwlá wunman be ndɛ’n i wlɛ’n be sin yɛ n su sunman wɔ-ɔ. Sɛ ɔ ti kɛ be sin yɛ n su sunman wɔ’n, nn bé síe be su ɔ nuan bo.+ 7 Sanngɛ Izraɛlifuɛ’m be su faman be su be sieman ɔ nuan bo, afin be kunndɛman kɛ bé fá be su bé síe i min nuan bo.+ Izraɛlifuɛ’m be kwlaa be ti sɛ’n ti kekleke, yɛ be awlɛn’n ti ketewa.+ 8 Nian! M’an yo maan ɔ ɲrun’n w’a yo kekleke kɛ be ɲrun’n sa, yɛ ɔ ngban’n w’a yo kekleke kɛ be ngban’n sa.+ 9 M’an yo maan ɔ ngban’n w’a yo kɛ diaman sa, i kekleke liɛ’n tra yɔbuɛ ng’ɔ ti kekleke kpa’n bɔbɔ.+ Nán srɛ kun wɔ be wun, yɛ nán maan be ɲrun’n kun wɔ srɛ,+ afin be ti nvle kun mɔ be ɲin su ti kekle-ɔ.”

10 Ɔ seli min kɛ: “Sran wa, ndɛ kwlaa nga n kan kle wɔ’n, sie ɔ su tie, yɛ maan ɔ awlɛn tran su. 11 Kɔ ɔ nvle’n nunfuɛ* nga be trali be ɔli’n+ be sin naan kan ndɛ kle be. Sɛ be tie-o annzɛ be tieman-o, se be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ.’”+

12 Wawɛ kun mannin min su,+ kpɛkun n tili sran kun i nɛn m’ɔ tɛ kekle kpa’n min sin lɔ. Ɔ seli kɛ: “Maan be manman Zoova i aɲrunɲan’n i lika’n nun lɔ.” 13 N tili anzi’m be ndɛwa mɔ be kpita be wiengu wun’n i tɛlɛ’n,+ ɔ nin kondokaa nga be o be wun lɛ’n+ be tɛlɛ’n, kpɛkun n tili like kun i tɛlɛ kekle kpa. 14 Yɛ wawɛ’n mannin min su, kpɛkun ɔ fali min ɔli. Kɛ ń kɔ́’n min klun timan jɔwa mlɔnmlɔn, n fali ya dan kpa, yɛ Zoova i tinmin’n ɔ dili junman min nun dan.* 15 N ɔli nvle’n nunfuɛ nga be trali be ɔli Tɛli-Abibu’n, mɔ be tran Kebaa nzue ba’n+ i wun lɛ’n be wun lɔ. N kali kan be tran lɛ’n, n dili cɛn ba nso be wun lɛ, kɛ ɔ́ yó sɔ’n nn min akunndan’n ti sannganwa.+

16 Kɛ cɛn ba nso sinnin’n, Zoova kannin ndɛ kleli min. Ɔ seli min kɛ:

17 “Sran wa, n fali wɔ kɛ a yo Izraɛlifuɛ’m be gladi difuɛ.+ Kɛ a ko ti min nuan ndɛ’n, ɔ fata kɛ a bo su kle be man min.+ 18 Sɛ n se klunwifuɛ kun kɛ: ‘Saan á wú,’ naan w’a kan klemɛn i’n, naan w’a kanman ndɛ w’a kleman klunwifuɛ’n kɛ ɔ yaci i klunwi ayeliɛ’n naan w’a kwla ka nguan nun’n,+ ɔ́ wú, i fɔnlɛ’n ti, afin ɔ ti klunwifuɛ.+ Sanngɛ ń sé kɛ ɔ ti yɛ ɔ wuli-ɔ.*+ 19 Sanngɛ sɛ a kan ndɛ kle klunwifuɛ kun naan ɔ yacimɛn i klunwi ayeliɛ’n nin i nzuɛn tɛ’n, ɔ́ wú, i fɔnlɛ’n ti. Sanngɛ ɔ liɛ’n, á fíte nun.+ 20 Sanngɛ sɛ sran kpa’n yaci sa kpa’n i yolɛ naan ɔ yo sa ng’ɔ ti tɛ’n, ń má fá like mɔ be ja kpla su’n ń síe i i ɲrun kpɛkun ɔ́ wú.+ Sanngɛ sɛ w’a kanman ndɛ w’a klemɛn i’n, ɔ́ wú, sa tɛ m’ɔ yo’n ti, yɛ sa kpa ng’ɔ yoli be’n, be wla su kpɛnman be su. Sanngɛ ń sé kɛ ɔ ti yɛ ɔ wuli-ɔ.*+ 21 Sanngɛ sɛ a se sran kpa’n kɛ nán ɔ yo sa tɛ, naan w’a yoman sa tɛ’n, ɔ́ ká nguan nun, afin a kannin ndɛ kleli i,+ yɛ ɔ kusu á fíte nun.”

22 Zoova fɛli i sa’n sieli min su lika sɔ’n nun lɛ, kpɛkun ɔ seli min kɛ: “Jaso kɔ lika kpɛtɛkplɛɛ’n nun lɔ, lɔ yɛ é nin wɔ é íjɔ-ɔ.” 23 Ɔ maan n jaso ɔli lika kpɛtɛkplɛɛ sɔ’n nun lɔ. Kpɛkun ń nían-ɔn, Zoova i aɲrunɲan’n yɛ ɔ o yɛ!+ Ɔ ti kɛ i aɲrunɲan nga n wunnin i Kebaa nzue ba’n i nuan lɛ’n+ sa, yɛ n utuli min ɲin ase-ɔ. 24 I sin’n, wawɛ’n wluli min nun, ɔ yoli maan n jaso n jrannin,+ kpɛkun ɔ kannin ndɛ kleli min, ɔ seli min kɛ:

“Kɔ ɔ sua’n nun lɔ naan to ɔ sin anuan. 25 Sanngɛ ɔ liɛ’n, sran wa, bé wá fá ɲanman bé gúa ɔ su, kpɛkun bé fá cí wɔ, kɛ ɔ ko yo naan w’a kwlá fiteman naan w’a ɔman be wun lɔ’n ti. 26 Yɛ ń yó maan ɔ taaman’n ɔ́ mántan ɔ nuan nun, á káci bobo, a su kwlá ijɔman be, afin be ti nvle kun mɔ be ɲin su ti kekle-ɔ. 27 Sanngɛ kɛ ń má kán ndɛ ń klé wɔ’n, ń tíke ɔ nuan’n, yɛ ɔ fata kɛ a se be kɛ:+ ‘Ndɛ nga Miɛn Zoova m’ɔ Sie Like Kwlakwla’n, ɔ kan’n yɛ.’ Sran nga i waan ɔ́ tíe’n maan ɔ tie,+ yɛ sran nga i waan ɔ tieman’n, nán maan ɔ tie. Afin be ti nvle kun mɔ be ɲin su ti kekle-ɔ.+