Daniɛli

12 Blɛ sɔ’n nun’n, Misɛli*+ m’ɔ ti siefuɛ danfuɛ’n,+ m’ɔ kan ɔ nvle’n nunfuɛ’m be ti ndɛ’n, ɔ́ wá jáso. Yɛ ɲrɛnnɛn blɛ kun wá jú. Kɛ ɔ fin cɛn mɔ be kpɛli like nga be flɛ i nvle’n i ba lele’n, ɲrɛnnɛn blɛ kɛ ngalɛ’n sa’n nin-a juman le. Blɛ sɔ’n nun’n, ɔ nvle’n nunfuɛ mun, yɛle kɛ be kwlaa nga be dunman klɛ fluwa’n nun’n,+ bé ɲán be ti.+ 2 Be nga be wuli’n be nun kpanngban kpa* bé wá tínnge. Wie’m bé ɲán nguan m’ɔ leman awieliɛ’n, yɛ wie’m be ɲin gúa ase, be ɲrun ɲannzuɛn liɛ’n su wieman le.

3 “Ngwlɛlɛfuɛ’m bé kpája kɛ ɲanmiɛn su lɔ’n fa kpaja’n sa. Yɛ be nga be uka sran kpanngban naan be yo sa i nuan su sɛsɛ’n, bé kpája kɛ nzraama mun sa tititi.

4 “Sanngɛ Daniɛli, ɔ liɛ’n, fia ndɛ sɔ’m be su kpa. Yɛ fa like tra fluwa’n i nuan’n i ase lele blɛ’n i awieliɛ.+ Sran kpanngban kpa bé kɔ́ wa kɔ́ wa.* Kpɛkun sa silɛ’n i kpafuɛ’n ɔ́ trú.”+

5 Min Daniɛli, n wunnin sran nɲɔn ekun, be jinjin lɛ. Kun o nzue’n i bue kun wa, yɛ kun o i bue kun lɔ.+ 6 Yɛ be nun kun seli sran nga lɛn tralɛ wlɛ i wun’n,+ m’ɔ o nzue’n su’n kɛ: “?Blɛ benin nun yɛ abonuan sa sɔ’m bé wíe-ɔ?” 7 Kpɛkun n tili sran nga lɛn tralɛ wlɛ i wun’n, m’ɔ o nzue’n su’n i ngan. Kɛ ɔ mannin i sa fama’n su nin i sa bɛ’n su kleli ɲanmiɛn’n, ɔ tali nda Sran m’ɔ o lɛ tititi’n i dunman nun.+ Ɔ seli kɛ: “Blɛ nga be kleli’n kun, nin blɛ nga be kleli’n wie mun, nin blɛ kun i sin* bé sín. Kɛ be ko yi fanngan ng’ɔ o Ɲanmiɛn i sran’m be nun lele mɔ i sɔ liɛ’n ko wie cɛ’n,+ yɛ sa kwlaa sɔ’m bé wíe-ɔ.”

8 Min liɛ’n, n tili, sanngɛ m’an wunmɛn i wlɛ.+ I sɔ’n ti’n, n usali kɛ: “?Min min, sa kwlaa sɔ’m be bo’n gúa sɛ?”

9 Yɛ ɔ seli min kɛ: “Daniɛli, kɔ. Afin ɔ fata kɛ be fia ndɛ sɔ’m be su kpa, yɛ be kata be su lele fa ju blɛ’n i awieliɛ.+ 10 Sran kpanngban kpa bé yó be wun sanwun kpɛkun bé yó sa ng’ɔ ti kpa’n, yɛ bé kpló be wun fiɛn’n.+ Klunwifuɛ’m be liɛ’n, klunwi’n yɛ bé yó-ɔ. Yɛ klunwifuɛ’m be nun wie fi su wunmɛn i wlɛ. Sanngɛ akunndanfuɛ’m be liɛ’n, bé wá wún i wlɛ.+

11 “Kɛ ɔ fɛ i cɛn nga bé yáci tɛ nga be yi man Ɲanmiɛn titi+ i yilɛ’n, mɔ tete like m’ɔ saci like kwlaa’n ɔ́ wá trán lɛ’n,+ ɔ́ dí cɛn ba akpi kun ya nɲɔn ablangwlan (1.290).

12 “Sran ng’ɔ tran minndɛ lele fa ju cɛn ba akpi kun ya nsan ablasan-nin-nnun’n (1.335) i awieliɛ’n i liɛ su ti ye!

13 “Sanngɛ ɔ liɛ’n, tra ɔ awlɛn lele fá jú i awieliɛ. Á wá ló wunmiɛn, sanngɛ blɛ’n i awieliɛ lɔ’n, á wá jáso, yɛ á ɲán ɔ like liɛ’n.”*+