Nga Pɔlu klɛli Efɛzifuɛ mun’n

3 I sɔ’n ti’n, min Pɔlu, Klisi Zezi i liɛ mɔ n ti’n ti’n, ɔ nin amun mɔ amun timan Zifu’n amun ukalɛ ti’n, n ti bisuafuɛ.+ 2 N si kpa kɛ junman nga be mannin min kɛ n di’n,+ amun tili i su ndɛ. Yɛle kɛ n uka amun naan amun ɲan Ɲanmiɛn i aklunye dan’n i su mmlusuɛ. 3 Kɛ nga n dun mmua n klɛli i su ndɛ kan ko mannin amun’n sa’n, Ɲanmiɛn yili i ndɛ m’ɔ ti fiawa’n i nglo kleli min. 4 Ɔ maan kɛ amún wá kánngan ndɛ nga nun’n, amún wá wún kɛ n si Klisi i su ndɛ m’ɔ ti fiawa’n+ i kpa. 5 Siɛn’n, Ɲanmiɛn w’a yi ndɛ sɔ m’ɔ ti nvialiɛ nun ndɛ’n i nglo w’a kle Ɲanmiɛn i sran nga be ti akoto nin i nuan ijɔfuɛ’n. Sanngɛ laa’n, sran fi siman ndɛ sɔ’n nun.+ 6 Ndɛ sɔ’n yɛle kɛ be nga be timan Zifu mɔ be nin Klisi Zezi be o nun’n, be nin i bé dí aja, yɛ bé káci sran wunmuan.+ Jasin fɛ’n ti’n, bé ɲán like nga Ɲanmiɛn waan ɔ́ fá mán e’n wie. 7 Ɲanmiɛn i aklunye dan m’ɔ fɛli i tinmin’n yili i nglo min lika’n, i ti yɛ n kwla di junman sɔ’n niɔn.+

8 Min mɔ n ti Ɲanmiɛn i sran’m be kwlaa be nun kaan kpafuɛ’n,+ Ɲanmiɛn yili i aklunye dan’n i nglo min lika.+ Ɔ yoli sɔ naan n bo Klisi i aɲanbeun’n mɔ be kwlá simɛn i nuan’n i su jasin fɛ’n n kle be nga be timan Zifu’n. 9 Asa ekun’n, ɔ yoli sɔ naan n kle sran’m be kɛ Ɲanmiɛn m’ɔ yili like kwlaa’n, ɔ su yi ndɛ ng’ɔ fa fiɛli i+ sran’m be wun laa’n i nglo, yɛ ɔ su yo naan ɔ kpɛn su. 10 Ɔ yoli sɔ naan andɛ’n, asɔnun’n ti’n,+ awa mun nin kwlafuɛ nga be o ɲanmiɛn su lɔ’n be si Ɲanmiɛn i ngwlɛlɛ’n mɔ i ɲin fite ninnge fanunfanun nun’n.+ 11 I sɔ’n nin like nga Ɲanmiɛn buli i akunndan Klisi Zezi m’ɔ ti e Min’n i lika’n m’ɔ o lɛ tititi’n, be kɔ likawlɛ.+ 12 I fanngan nun ti’n, kɛ é kán ndɛ’n e klun titiman e. Asa kusu’n, i su mɔ e lafi’n ti’n e kwla fa e wun e mɛntɛn i.+ 13 Ɔ maan ń srɛ́ amun kɛ nán maan ɲrɛnnɛn mɔ amun dunman nun ti’n n wun i’n, ɔ bubu amun sa sin. Afin i sɔ’n ti’n amún ɲán ɲrun.+

14 I sɔ’n ti’n, ń kóto Siɛ’n i bo. 15 I ti yɛ ɲanmiɛn su lɔ nin asiɛ’n su wa osuosu’m be kwlaa be o lɛ-ɔ.* 16 Ń srɛ́ kpa kɛ i aɲrunɲan dan’n ti’n, ɔ fɛ i wawɛ’n tin amun kpa naan amun jran kekle+ 17 naan i su mɔ amun lafi’n ti’n, amun yo maan Klisi tran amun awlɛn’n nun klolɛ su.+ Ń srɛ́ kɛ amun yo kɛ waka mɔ i bo olui’n w’a tra ase kpa’n sa,+ yɛ amun jran kekle kpa+ 18 naan amun nin Ɲanmiɛn i sran’m be kwlaa amun wun i wlɛ kpa kɛ ndɛ nanwlɛ’n ti tɛtrɛ, ɔ ti tɛnndɛn, ɔ ti nglonglo, yɛ i bo ti kploun, 19 naan amun wun Klisi i klolɛ’n+ m’ɔ tra sa kwlaa nga klɔ sran’m be kwla si i’n i wlɛ, kɛ ɔ ko yo naan ninnge kpakpa nga Ɲanmiɛn man’n, amun a ɲan be kpanngban kpa’n ti.

20 Ɲanmiɛn m’ɔ fɛ i tinmin’n fa di junman e nun’n,+ m’ɔ kwla yo like kwlaa nga e srɛ i’n annzɛ e bu i akunndan’n man e lele tratra su bɔbɔ’n,+ 21 maan asɔnun’n nin Klisi Zezi be dunman nun’n be mɛnmɛn i tititi blɛ kwlaa nun. Maan ɔ yo sɔ.