Ezekiɛli

1 Afuɛ ablasan’n su’n, anglo nnan’n i cɛn ba nnun’n su’n, blɛ mɔ n wo nvlefuɛ nga be trali be ɔli’n+ be afiɛn Kebaa nzue ba’n i nuan lɔ’n,+ ɲanmiɛn su lɔ’n tikeli, kpɛkun n wunnin aolia nun ninnge wie mɔ be fin Ɲanmiɛn’n. 2 Anglo’n i cɛn ba nnun’n su’n (yɛle kɛ, kɛ be trali Famiɛn Zozakinin+ ɔli’n i afuɛ nnun’n su’n), 3 Zoova kannin ndɛ kleli min bɔbɔ Ezekiɛli* mɔ n ti Ɲanmiɛn ɲrun jranfuɛ Buzi i wa’n, Kebaa nzue ba m’ɔ o Kaldefuɛ’m+ be mɛn’n nun’n i wun lɔ. Lika sɔ’n nun lɔ yɛ Zoova fɛli i sa’n sieli min su-ɔ.+

4 N wo lɛ ń nían, kpɛkun n wunnin kɛ aunmuan dan kun+ fin nglo lɔ lika’n nun su ba, ɔ nin ɲanmiɛn ble kpikplikpi dan kun nin sin kun m’ɔ jue vlawunvlawun’n,*+ yɛ lika m’ɔ kpaja kpa’n bo sin yia be. Kpɛkun like kun o sin’n i afiɛn lɔ, ɔ bo mianmian kɛ b’a sanngan sika ɔkwlɛ nin sika sa.+ 5 Ninnge wie’m be o sin’n nun lɔ, be ti kɛ anzi nnan sa.+ Be tinuntinun be wafa’n ti kɛ klɔ sran sa. 6 Be tinuntinun be le ɲrun nnan, ɔ nin ndɛwa nnan.+ 7 Be ja’m be ti floloflolo, yɛ be ja ngbabua’m be ti kɛ nannin ba’m be liɛ’n sa, be bo mianmian kɛ aaba mɔ be yoli i wun treketreke’n sa.+ 8 Be le sran sa be ndɛwa’m be bo be bue nnan’m be kwlaa be su. Be nnan’n be le ɲrun nin ndɛwa. 9 Be ndɛwa’m be kan be wiengu. Kɛ bé kɔ́’n be kpɛman be wun, be tinuntinun be kɔ be ɲrun ndɛnman su trele.+

10 Wafa nga be ɲrun’m be fa ti’n yɛ: Be tinuntinun be le sran ɲrun, be le asɔmɔli+ ɲrun be fama su, yɛ be le nannin tola+ ɲrun be bɛ su, be nnan’n be tinuntinun be le anunman ɲin+ ɲrun.+ 11 Kɛ be ɲrun’m be ti kɛ ngalɛ’n sa. Be trɛ be ndɛwa’m be nun kɔ nglo. Be tinuntinun be ndɛwa’m be nun nɲɔn be kan be wun, kpɛkun be nun nɲɔn kata be wun.+

12 Be tinuntinun be kɔ be ɲrun ndɛnman su trele, lika kwlaa nga wawɛ’n kle be kɛ be wɔ’n, lɔ yɛ be kɔ-ɔ.+ Kɛ bé kɔ́’n be kpɛman be wun. 13 Anzi’m be wafa’n ti kɛ sɛnmlɛn ɲannglaan wie sa. Kpɛkun like kun m’ɔ ti kɛ tɛ m’ɔ kpaja kpa’n sa’n, ɔ kɔ ɔ ba ɔ kɔ ɔ ba, anzi’m be afiɛn. Sin’n m’ɔ jue vlawunvlawun’n i nun kpa sin kɛ ɲanmiɛn m’ɔ kpa sin’n sa.+ 14 Kpɛkun anzi’m be kɔ be ba. Wafa nga be kɔ be ba’n, ɔ ti kɛ ɲanmiɛn m’ɔ kpa sin’n sa.

15 Kɛ ń nían anzi mun’n, n wunnin kondokaa kun asiɛ’n su anzi mɔ be le ɲrun nnan’n+ be tinuntinun be wun lɛ. 16 Kondokaa’m be wafa’n ti kɛ klizoliti m’ɔ bo mianmian’n sa, be nnan’n be fa be wun. Wafa nga be ti’n, ɔ ti kɛ kondokaa kun o kun klun sa.* 17 Kɛ bé kɔ́’n, be kwla kɔ be bue nnan’m be kwlaa be su, be kpɛman be wun. 18 Kondokaa’m be ti nglonglo kpa, ɔ maan be yo sro. Yɛ ɲinma’m be tata kondokaa nnan’m be kwlaa be wun tɛɛn.+ 19 Lika kwlaa nga anzi’m bé kɔ́’n, be nin kondokaa mun yɛ be kɔ-ɔ. Kɛ anzi’m bé mán be wun su nglo asiɛ’n su’n, kondokaa’m be man be wun su nglo wie.+ 20 Lika kwlaa nga wawɛ’n kle be kɛ be wɔ’n, lɔ yɛ be kɔ-ɔ. Lika kwlaa nga wawɛ’n kɔ lɛ’n, lɔ yɛ be kɔ-ɔ. Be nin kondokaa’m be man be wun su likawlɛ, afin wawɛ ng’ɔ o anzi’m be nun’n,* ɔ o kondokaa’m be nun wie. 21 Kɛ be tu be wun bo’n, be kusu be tu be wun bo wie. Yɛ kɛ be jran’n, be kusu be jran wie. Kɛ be o asiɛ’n su mɔ be man be wun su nglo’n, be nin kondokaa mun be man be wun su likawlɛ. Afin wawɛ ng’ɔ o anzi’m be nun’n, ɔ o kondokaa’m be nun wie.

22 Like tɛtrɛ kun o anzi’m be ti su nglo, ɔ bo mianmian kɛ laglasi wie m’ɔ yo ɲɛnmɛn’n sa, i nun ti trɛwa be ti su nglo.+ 23 Be ndɛwa’m be nun ti tinngɛtinngɛwa* like tɛtrɛ sɔ’n i bo, yɛ be kan be wiengu. Be tinuntinun be le ndɛwa nɲɔn m’ɔ kata be bue kun su-ɔ, kpɛkun nɲɔn kata be bue uflɛ su. 24 Kpɛkun n tili be ndɛwa’m be tɛlɛ, be tɛ kɛ nzue wie m’ɔ sonji kpuu’n sa, ɔ tɛ kɛ Sran m’ɔ Kwla Like Kwlaa Yo’n i nɛn’n sa.+ Kɛ bé kɔ́’n, ɔ tɛ kɛ sonja wie mun yɛ be su kɔ lika sa. Kɛ be jran’n, be kan be ndɛwa’m be ase.

25 Be ti sran kun i nɛn like tɛtrɛ ng’ɔ o be ti su nglo’n i su nglo lɔ. (Kɛ be jran’n, be kan be ndɛwa’m be ase.) 26 Like plaii ng’ɔ o be ti su nglo’n i su nglo lɔ’n, like kun o lɔ, ɔ ti kɛ yɔbuɛ nga be flɛ i kɛ safii’n sa,+ yɛ ɔ fa famiɛn bia.+ Sran ng’ɔ ti famiɛn bia’n su’n i wafa’n ɔ fa klɔ sran.+ 27 Kɛ ɔ fɛ i i lika ng’ɔ ti kɛ i afiɛn’n sa’n su m’ɔ́ fá kɔ́ nglo lɔ’n, n wunnin like kun m’ɔ bo mianmian kɛ sika ɔkwlɛ mɔ be sɛnngɛnnin i nin sika’n sa,+ ɔ ti kɛ sin m’ɔ ti ɲanɲan’n sa. Yɛ kɛ ɔ fɛ i i afiɛn’n m’ɔ́ fá jrá’n, n wunnin like kun m’ɔ ti kɛ sin sa’n.+ Lika m’ɔ kpaja kpa’n ɔ bo sin yiɛ i, 28 ɔ ti kɛ ɲanngondin+ mɔ kɛ nzue tɔ’n ɔ fite ɲanmiɛn ble’n nun’n sa. Kɛ lika m’ɔ kpaja m’ɔ bo sin yiɛ i’n ti kɛ ngalɛ’n sa. I wafa’n ti kɛ Zoova i aɲrunɲan’n+ sa. Kɛ n wunnin i’n, n utuli min ɲin ase, kpɛkun n tili sran kun m’ɔ su ijɔ’n i nɛn.