1 Famiɛn Mun

12 Roboamun ɔli Sisɛmun, afin Izraɛlifuɛ’m be kwlaa be bali Sisɛmun+ lɛ naan bé síe i famiɛn.+ 2 Nebati i wa Zeroboamun tili ndɛ sɔ’n. (Blɛ sɔ’n nun’n, nn ɔ te o Ezipti lɔ. Afin Famiɛn Salomɔn ti’n, ɔ wanndili yɛ ɔ ko trannin Ezipti lɔ.)+ 3 Be sunmannin sran i sin. I sin’n, Zeroboamun nin Izraɛlifuɛ’m be kwlaa be wa toli Roboamun naan b’a se i kɛ: 4 “Ɔ si yoli maan e kɔmin su waka’n i sualɛ yoli kekle kpa.+ Sanngɛ sɛ a yo naan junman kekle nga e di mannin ɔ si’n i su kpɛ’n, sɛ a yo naan kɔmin su waka nɔnnin* m’ɔ fa sieli e su’n yo fokofoko’n, é sú wɔ.”

5 Kɛ ɔ yoli sɔ’n, ɔ seli be kɛ: “Amun wɔ naan i cɛn nsan’n su’n, amun sa amun sin min wun wa.” Yɛ nvlefuɛ’m be ɔli-ɔ.+ 6 Famiɛn Roboamun ko wunnin kpɛnngbɛn nga be suli i si Salomɔn blɛ mɔ i ɲin o su’n be wun. Ɔ usali be kɛ: “?Afɔtuɛ benin yɛ amún mán min naan m’an tɛ nvlefuɛ’m be su-ɔ?” 7 Be tɛli i su kɛ: “Andɛ’n, sɛ a yo nvlefuɛ nga’m be sufuɛ’n, sɛ a yo like nga be srɛli wɔ’n man be’n, sɛ a tɛ be su klanman’n, bé yó ɔ sufuɛ tititi.”

8 Sanngɛ ɔ kpaloli afɔtuɛ nga kpɛnngbɛn’m be mɛnnin i’n, kpɛkun ɔ ko wunnin gbanflɛn ng’ɔ nin be ɲinnin likawlɛ mɔ be ti i sufuɛ siɛn’n, be wun.+ 9 Ɔ usali be kɛ: “Nvlefuɛ nga’m be wa seli min kɛ: ‘Yo maan kɔmin su waka nga ɔ si fa sieli e su’n ɔ yo fokofoko.’ ?Afɔtuɛ benin yɛ amún mán naan y’a tɛ be su-ɔ?” 10 Gbanflɛn ng’ɔ nin be ɲinnin likawlɛ’n be seli i kɛ: “Ndɛ ng’ɔ fata kɛ a kan kle nvlefuɛ mɔ be seli wɔ kɛ ɔ si yoli maan be kɔmin su waka’n yoli nɔnnin, naan a yo naan ɔ yo fokofoko’n yɛ. Se be kɛ: ‘Min sa mma kaan’n ɔ́ wá yó dan trá min si i afiɛn’n. 11 Min si sieli amun kɔmin su waka nɔnninnɔnnin, sanngɛ ń má úka su naan ɔ yo nɔnnin kpa. Min si fali ngble ngbɛn fa tuli amun fɔ, sanngɛ min liɛ’n, ngble nga kpɛngbɛ o i wun’n yɛ ń má fá tú amun fɔ-ɔ.’”

12 I cɛn ba nsan su’n, Zeroboamun nin nvlefuɛ’m be kwlaa be wa toli Roboamun. Afin ɔ seli be kɛ: “Wa nin cɛn ba nsan, amun sa amun sin min wun wa.”+ 13 Sanngɛ famiɛn’n kannin ndɛ yaya kleli nvlefuɛ mun. Ɔ kpaloli afɔtuɛ nga kpɛnngbɛn’m be mɛnnin i’n. 14 Gbanflɛn’m be afɔtuɛ liɛ’n su yɛ ɔ jrannin naan w’a kan ndɛ’n w’a kle be-ɔ. Ɔ seli kɛ: “Min si yoli maan amun kɔmin su waka’n yoli nɔnnin, sanngɛ ń má úka amun kɔmin su waka’n su naan ɔ yo nɔnnin kpa. Min si fali ngble ngbɛn fa tuli amun fɔ. Sanngɛ min liɛ’n, ngble nga kpɛngbɛ o i wun’n yɛ ń má fá tú amun fɔ-ɔ.” 15 Famiɛn’n w’a faman nvle nunfuɛ’m be ndɛ’n su. Afin Zoova bɔbɔ yɛ maan sa sɔ’n juli-ɔ,+ kɛ ɔ ko yo naan ndɛ nga Zoova maan Aia m’ɔ ti Silofuɛ’n kan+ kleli Nebati i wa Zeroboamun’n w’a kpɛn su’n ti.

16 Kɛ Izraɛlifuɛ’m be kwlaa be wunnin kɛ famiɛn’n waan ɔ faman be ndɛ liɛ’n su’n ti’n, be tɛli i su kɛ: “E ndɛ nunman Davidi i ndɛ nun. E aja like nunman Zese i wa’n i sa nun. Izraɛlifuɛ mun, an wɔ amun ɲanmiɛn’m be sin. Davidi, siɛn’n ɔ bɔbɔ nian ɔ awlo’n i lika!” Kɛ ɔ yoli sɔ’n, Izraɛlifuɛ’m be sali be sin be awlo’m* be nun.+ 17 Sanngɛ Roboamun yoli Izraɛlifuɛ nga be tran Zida klɔ’m be su’n be famiɛn titi.+

18 I sin’n, Famiɛn Roboamun sunmannin Adoramun+ m’ɔ nian be nga be mian be kɛ be di junman’n be su’n Izraɛlifuɛ’m be sin. Sanngɛ Izraɛlifuɛ’m be kwlaa be finfinnin i yɔbuɛ lele be kunnin i. Famiɛn Roboamun liɛ’n, ɔ yoli blɛblɛ fuli i kakaklolo’n nun naan w’a wanndi w’a wɔ Zerizalɛmun.+ 19 Kɛ ɔ fin lɛ’n, Izraɛlifuɛ’m be jasoli Davidi i awlofuɛ’m be wun.+

20 Kɛ Izraɛlifuɛ’m be kwlaa be tili i kɛ Zeroboamun w’a sɛ i sin’n, be yiɛli i sran’m be kwlaa be ɲrun. Kpɛkun be sieli i famiɛn Izraɛlifuɛ’m be kwlaa be su.+ Nvlefuɛ’m be nun wie fi w’a jranman Davidi i awlo’n i sin, saan Zida akpasua’n.+

21 Kɛ Roboamun juli Zerizalɛmun lɔ cɛ’n, ɔ yiali Zida nin Bɛnzamɛn akpasua’n nunfuɛ’m be kwlaa. Be ti safuɲrɛn akpiakpi ya akpiakpi ablaɔcuɛ (180.000), be si alɛ kun kpa. Ɔ yiali be naan be nin Izraɛlifuɛ’m be ko kun, naan famiɛn dilɛ’n sɛ i sin i bɔbɔ Roboamun m’ɔ ti Salomɔn i wa’n+ i sa nun. 22 I sin’n, Ɲanmiɛn Kpli kannin ndɛ kleli Semaia+ m’ɔ ti Ɲanmiɛn Kpli i sran’n, ɔ seli i kɛ: 23 “Se Salomɔn i wa Roboamun m’ɔ ti Zida famiɛn’n, ɔ nin Zida nin Bɛnzamɛn akpasua’n nunfuɛ’m be kwlaa ɔ nin nvlefuɛ onga’m be kɛ: 24 ‘Ndɛ nga Zoova kan’n yɛ: “Nán amun wɔ naan amun nin amun niaan Izraɛlifuɛ’m be ko kun. Amun tinuntinun amun sa amun sin amun awlo’m be nun, afin min bɔbɔ yɛ maan sa sɔ’n juli-ɔ.”’”+ Be fali Zoova i ndɛ’n su, kpɛkun be sali be sin be awlo’m be nun, kɛ nga Zoova kan kleli be’n sa.

25 Kɛ ɔ yoli sɔ’n, Zeroboamun ko sisili* Sisɛmun+ klɔ m’ɔ o Efraimun okaoka lika’n nun lɔ’n i wun, kpɛkun ɔ trannin lɔ. Ɔ fɛli i lɛ ɔli ko sisili* Peniɛli+ i wun. 26 Zeroboamun seli i klun lɔ kɛ: “Siɛn’n, famiɛn diwlɛ’n wá sɛ́ i sin Davidi i awlo’n nun.+ 27 Sɛ nvlefuɛ nga mun be kɔ titi be ko yi tɛ Zoova i sua m’ɔ o Zerizalɛmun+ lɔ’n nun’n, nvlefuɛ nga mun be awlɛn’n káci kɔ́ be min’n mɔ yɛle Famiɛn Roboamun m’ɔ ti Zida famiɛn’n i su. Kpɛkun bé kún min, yɛ bé sá be sin Famiɛn Roboamun m’ɔ ti Zida famiɛn’n i sin.” 28 Kɛ famiɛn’n wunnin i afɔtuɛ manfuɛ’m be wun’n, ɔ yoli sika ɔkwlɛ nannin ba+ nɲɔn, kpɛkun ɔ seli nvlefuɛ’m be kɛ: “Zerizalɛmun lɔ kɔlɛ’n ti kekle man amun. Izraɛli, ɔ Ɲanmiɛn’n yɛ ɔ o yɛ, i yɛ ɔ fali wɔ Ezipti mɛn’n nun fiteli-ɔ.”+ 29 I sin’n, ɔ fa kun sieli i Betɛli,+ kpɛkun ɔ fa kun sieli i Dan.+ 30 I sɔ’n yoli maan nvlefuɛ’m be yoli sa tɛ.+ Be kɔ lele Dan be ko sɔ nannin ba ng’ɔ o lɔ’n.

31 Ɔ kplannin Ɲanmiɛn sua wie mun lika nglonglo’m be su. Kpɛkun ɔ kpali be nga be timan Levifuɛ’n be nun wie mun naan be yo Ɲanmiɛn ɲrun jranfuɛ.+ 32 Zeroboamun kpɛli cɛn dilɛ kun ba kɛ Zida lɔ liɛ’n sa. Anglo mɔcuɛ’n i cɛn ba blu-nin-nnun (15) su yɛ be di cɛn sɔ’n niɔn.+ Ɔ yili tɛ tɛ yiwlɛ ng’ɔ yoli m’ɔ o Betɛli+ lɔ’n su fa mannin nannin ba ng’ɔ yoli be’n, kpɛkun ɔ sieli Ɲanmiɛn ɲrun jranfuɛ wie mun lika nglonglo ng’ɔ yoli be’n be su, Betɛli lɔ. 33 Anglo mɔcuɛ’n i le blu-nin-nnun (15) su’n, ɔ yili tɛ tɛ yiwlɛ ng’ɔ yoli m’ɔ o Betɛli lɔ’n su. I bɔbɔ yɛ ɔ kleli anglo sɔ’n niɔn. Ɔ kpɛli cɛn dilɛ kun ba mannin Izraɛlifuɛ mun, kpɛkun ɔ ɔli tɛ yiwlɛ’n su lɔ ko yili tɛ naan i wunsrɛn’n fite.