Sa nga Akoto’m be yoli’n

4 Kɛ be nɲɔn’n bé kán ndɛ klé sran mun’n, Ɲanmiɛn ɲrun jranfuɛ mun nin Ɲanmiɛn sua’n nun gladi difuɛ’m be su kpɛn’n, ɔ nin Sadisefuɛ’m+ be wa toli be lɛ. 2 B’a fa ya kpa. Afin akoto’m be kle sran’m be like, kpɛkun be kɛn i weinwein kɛ Zezi w’a cɛn.+ 3 Ɔ maan be trali be, be sieli be bisua lɔ+ lele aliɛ cɛnnin. Afin kɛ bé trá be’n, nn lika w’a san. 4 Sanngɛ be nga be tili ndɛ’n, be sunman lika be fali su. Yasua nga be fali su’n, be kwla ju sran akpi nnun (5.000).+

5 Kɛ aliɛ cɛnnin’n, be mɛn siefuɛ mun nin be kpɛnngbɛn mun nin mmla klɛfuɛ mun be yiali Zerizalɛmun lɛ. 6 Anin+ m’ɔ ti Ɲanmiɛn ɲrun jranfuɛ’m be su kpɛn’n, nin Kaifu,+ nin Zan, nin Alɛzandri, ɔ nin Ɲanmiɛn ɲrun jranfuɛ’m be su kpɛn’n i osufuɛ’m be kwlaa be yiali lɛ wie. 7 Be fali Piɛli nin Zan be jrannin be afiɛn lɛ. Kpɛkun be usali be kɛ: “?Wan yɛ ɔ mannin amun atin mɔ amun yoli sa sɔ’n niɔn? ?Yɛ wan dunman nun yɛ amun yoli sa sɔ’n niɔn?” 8 Yɛ Piɛli mɔ Ɲanmiɛn wawɛ’n wo i su’n,+ ɔ seli be kɛ:

“Mɛn siefuɛ mun, kpɛnngbɛn mun, 9 sɛ amun kunndɛ kɛ amún sí wafa nga bian mɔ i ja’m be timan kpa’n+ yoli juejue’n, ɔ nin sran ng’ɔ yoli bian sɔ’n i juejue’n, 10 maan amun nin Izraɛlifuɛ’m be kwlaa amun si kɛ Zezi Klisi m’ɔ fin Nazarɛti’n, i dunman nun+ ti yɛ bian nga w’a yo juejue m’ɔ jin amun ɲrun wa yɛ’n niɔn. Amun kunnin i waka kun su,+ sanngɛ Ɲanmiɛn cɛnnin i.+ 11 I yɛ ɔ ti ‘yɔbuɛ nga amun mɔ amun ti sua kplanfuɛ’n amun a bumɛn i like fi’n niɔn. Yɔbuɛ sɔ’n w’a kaci sua’n i cɔnjɔ su yɔbuɛ cinnjin kpafuɛ’n.’+ 12 Asa kusu’n, sran uflɛ fi kwlá deman sran mun.+ Afin sran fi nunman ɲanmiɛn’n i bo wa mɔ i dunman nun’n, klɔ sran kwla fite nun-ɔn.”+

13 Kɛ be wunnin kɛ Piɛli nin Zan be kannin ndɛ’n yakpa su’n, mɔ kusu be wunnin kɛ b’a diman suklu* naan be timan sran dan’n,+ i sɔ’n boli be nuan. Ɔ maan be wunnin i wlɛ kɛ be nin Zezi be sannin nun.+ 14 Kɛ be niannin bian nga be yoli i juejue’n m’ɔ jin be wun lɛ’n,+ b’a ɲanman ndɛ ba kun sa b’a kanman.+ 15 Ɔ maan be seli be kɛ be fin lika nga Zifu’m be Jɔlɛ Difuɛ Dandan’m* be di sran’m be jɔlɛ lɛ’n be fite. Kpɛkun be kokoli yalɛ be afiɛn lɔ. 16 Be seli kɛ: “?Ngue yɛ é fá yó minniɛn nga mun-ɔn?+ Afin nanwlɛ, be yoli abonuan sa sakpa. Zerizalɛmunfuɛ’m be kwlaa be si sɔ weiin.+ Ɔ maan e kwlá seman kɛ ɔ ti ato. 17 Kɛ ɔ ko yo naan ndɛ sɔ’n w’a truman ekun’n ti’n, maan e wlanwlan be naan e se be kɛ nán be bo dunman sɔ’n be kan ndɛ kle sran fi kun.”+

18 I sin’n, be flɛli be naan b’a wla be su nun kɛ nán be bo Zezi i dunman be kan ndɛ, yɛ nán be fɛ i dunman kle sran’m be like. 19 Sanngɛ Piɛli nin Zan be tɛli be su kɛ: “Sɛ Ɲanmiɛn ɲrun’n ɔ ti su kɛ e fa amun ndɛ’n su naan e yaci Ɲanmiɛn i liɛ’n lɛ’n, amun bɔbɔ amun bu i sin be nian. 20 E liɛ’n, like nga e wunnin i’n, ɔ nin ndɛ nga e tili’n, e kwlá yaciman be ndɛ kanlɛ.”+ 21 I sɔ’n ti’n, be wlanwlannin be ekun, kpɛkun be yacili be nun. Afin b’a ɲanman ndɛ fi naan b’a jran su b’a tu be fɔ. Asa ekun’n be sro nvlefuɛ mun.+ Afin sa ng’ɔ juli’n ti’n, sran’m be kwlaa be su manman Ɲanmiɛn. 22 Bian nga be yoli abonuan sa be yoli i juejue’n, ɔ le afuɛ ablanan (40) tra su.

23 Kɛ be yacili be nun’n, be ɔli be wiengu’m be sin. Kpɛkun ndɛ nga Ɲanmiɛn ɲrun jranfuɛ’m be su kpɛn mun nin kpɛnngbɛn’m be kan kleli be’n, be boli su kleli be. 24 Kɛ be tili ndɛ sɔ’n, be bo yoli kun be srɛli Ɲanmiɛn. Be seli kɛ:

“E Min, wɔ mɔ a Sie Like Kwlakwla’n, wɔ yɛ a yili nglo nin asiɛ’n nin jenvie’n nin ninnge kwlaa nga be o lɛ’n niɔn.+ 25 Ɔ wawɛ’n maan e nannan Davidi+ m’ɔ ti ɔ sufuɛ’n seli kɛ: ‘?Ngue ti yɛ nvlenvle’m be keje-ɔ? ?Yɛ ngue ti yɛ sran’m be bu ninnge ngbɛnngbɛn’m be su akunndan-ɔn? 26 Asiɛ’n su famiɛn’m b’a jaso, yɛ mɛn siefuɛ’m be kwlaa be bo w’a yo kun Zoova* nin i sran m’ɔ kpɛli i’n* be wun.’+ 27 Afin nanwlɛ, Erɔdu nin Pɔnsu Pilati,+ nin mɛn’n nunfuɛ mun, ɔ nin Izraɛlifuɛ’m be kwlaa be yiali klɔ nga su wa. Be yiali ɔ sufuɛ Zezi m’ɔ ti ɔ liɛ klonglo’n, mɔ a kpɛli i’n+ i wun. 28 Be yiali kɛ bé yó like nga a kɛnnin i ndɛ’n. Ɔ tinmin’n* nin ɔ klun sa’n ti yɛ sa sɔ’m be juli-ɔ.+ 29 Zoova,* siɛn’n fa ɔ ɲin sie i wlanwlanlɛ mɔ be wlanwlan e’n su naan uka ɔ sufuɛ mun naan be kan ɔ ndɛ’n yakpa su titi. 30 Tinngɛ ɔ sa’n nun yo sran’m be juejue, kpɛkun yo abonuan sa mun+ ɔ sufuɛ Zezi m’ɔ ti ɔ liɛ klonglo’n, i dunman nun.”+

31 Kɛ be srɛli Ɲanmiɛn tankaan kpa wieli’n, lika nga be o nun’n kejeli, kpɛkun Ɲanmiɛn wawɛ’n jrali be kwlaa be su.+ Ɔ maan be kannin Ɲanmiɛn i ndɛ’n yakpa su.+

32 Asa ekun’n, sran kpanngban nga be kacili Zezi i sɔnnzɔnfuɛ’n, be kwlaa be bo yoli kun. Be nun wie fi w’a seman kɛ like ng’ɔ le i’n ti i ngunmin i liɛ. Sanngɛ sɛ sran kun le like’n, ɔ ti be kwlaa be liɛ.+ 33 Akoto’m be kannin e Min Zezi i cɛnlɛ’n i ndɛ titi.+ Be nuan tɔli ndɛ sɔ’n i kanlɛ nun kpa. Kɛ ɔ yoli sɔ’n, ye nga be kwlaa be ɲɛnnin i Ɲanmiɛn sa nun’n, ɔ yoli dan. 34 Be nun wie fi i sa w’a mianman like wun.+ Afin be nga be le fie annzɛ sua’n, be yo be atɛ, like nga be ɲɛn i’n, be fa ba, 35 kpɛkun be fa man akoto mun.+ Be kusu be cɛcɛ nun man be. Like nga sran kun i sa miɛn i wun’n, yɛ be fa mɛn i-ɔ.+ 36 Zozɛfu mɔ akoto’m be flɛ i ekun kɛ Baanabasi’n+ (i bo’n yɛle “Sran Fɔnvɔfuɛ”), m’ɔ ti Levifuɛ’n, m’ɔ fin Sipri’n, 37 ɔ le asiɛ kun. Kɛ ɔ yoli i atɛ’n, ɔ fali sika’n bali, kpɛkun ɔ fa mannin akoto mun.+