Ɛsdrasi

4 Kɛ Zidafuɛ mun nin Bɛnzamɛnfuɛ’m be kpɔfuɛ’m+ be tili i kɛ be nga be sali be sin’n+ be su kplan sua kun be man Zoova m’ɔ ti Izraɛli Ɲanmiɛn’n, 2 be ka lɛ ɔli Zorobabɛli nin awlobo kpɛn’m be wun lɔ, be ko seli be kɛ: “Maan e nin amun e kplan sua’n. Afin e kusu e su* amun Ɲanmiɛn’n wie,+ yɛ kɛ ɔ fɛ i Eza-Adɔn+ m’ɔ ti Asiri famiɛn’n, m’ɔ fali e bali wa’n+ i blɛ su’n, e yi tɛ e mɛn i.” 3 Sanngɛ Zorobabɛli nin Zesua, ɔ nin Izraɛlifuɛ’m be si’m be awlobo kpɛn onga mun be seli be kɛ: “Amun liɛ nunman e Ɲanmiɛn’n i sua’n i kplanlɛ’n nun wie.+ E ngunmin é kplán sua’n é mán Zoova m’ɔ ti Izraɛli Ɲanmiɛn’n, kɛ nga Sirisi m’ɔ ti Pɛɛsi famiɛn’n seli e kɛ e yo’n sa.”+

4 Nvle’n nunfuɛ’m b’a yaciman Zidafuɛ’m be sa sin bubulɛ, be wlanwlannin be naan b’a kwlá kplanman sua’n.+ 5 Be wlali famiɛn’n i afɔtuɛ manfuɛ’m be sa bo like kan naan like nga Zifu’m be waan bé yó’n w’a kpɛnman su.+ Be yoli sɔ Sirisi m’ɔ ti Pɛɛsi famiɛn’n i blɛ su lele fa juli Dariisi+ m’ɔ ti Pɛɛsi famiɛn’n i blɛ su. 6 Kɛ Asierisi boli famiɛn dilɛ bo’n, be klɛli fluwa kun. Fluwa sɔ’n nun’n, be tɔnnin Zidafuɛ mun nin Zerizalɛmunfuɛ’m be suɛn. 7 Kpɛkun Atazɛɛzɛsi m’ɔ ti Pɛɛsi famiɛn’n i blɛ su’n, Bislamun nin Mitredati nin Tabeɛli, ɔ nin i wiengu junman difuɛ onga mun be klɛli Atazɛɛzɛsi m’ɔ ti famiɛn’n i fluwa. Be kacili fluwa’n i nun ndɛ’n Aramun aniɛn’n nun,+ kpɛkun be fali Aramun aniɛn’n nun fluwa mma mun be klɛli.*

8 * Reumun m’ɔ ti awa junman difuɛ’m be su kpɛn’n, ɔ nin Simisai m’ɔ ti fluwa klɛfuɛ’n be klɛli Zerizalɛmunfuɛ’m be wun fluwa ko mannin Famiɛn Atazɛɛzɛsi. Ndɛ nga be klɛli’n yɛ: 9 (Ndɛ’n fin Reumun m’ɔ ti awa junman difuɛ’m be su kpɛn’n, nin Simisai m’ɔ ti fluwa klɛfuɛ’n, ɔ nin be wiengu junman difuɛ onga mun, nin jɔlɛ difuɛ mun, nin famiɛn’n i janunfuɛ mun, ɔ nin fluwa klɛfuɛ mun, nin Erɛki lɔfuɛ mun,+ nin Babilɔninfuɛ mun, nin be nga be tran Sizi+ lɔ mɔ be ti Elamunfuɛ’n,+ 10 ɔ nin nvlefuɛ onga mɔ Asenapaa m’ɔ ti dan m’ɔ le ɲrun’n ɔ trali be ɔli m’ɔ sieli be Samari klɔ’m+ be su’n, ɔ nin be nga be tran Nzue’n i bue kun lɔ’n* be onga mun. 11 Fluwa nga be klɛ ko mɛnnin i’n i nun ndɛ’n yɛ.)

“Famiɛn Atazɛɛzɛsi, e mɔ e ti ɔ sufuɛ mɔ e tran Nzue’n i bue kun wa’n, e yɛ e klɛ fluwa nga e blɛ wɔ-ɔ: 12 E waan é sé famiɛn’n kɛ Zifu nga be fin ɔ wun lɔ’n, b’a ju e wun wa Zerizalɛmun wa. Be su kplan ɲin kekle nin klunwi klɔ’n, be su wa wie talɛ’m be kplan,+ yɛ klɔ’n i bo ase nga be wlali’n, be su siesie i ye. 13 E waan é kán klé famiɛn’n kɛ sɛ be kplan klɔ’n naan be wie talɛ’m be kplan’n, be su tuaman lapo wafawafa wie fi,+ yɛ be su yiman sika naan b’a sin. Ɔ maan famiɛn’n i sika’n i su kpɛ́. 14 Kɛ mɔ njin nga e di’n ɔ fin famiɛn’n i awlo lɔ’n,* mɔ kusu e kunndɛman kɛ sa tɛ fi ju famiɛn’n i su’n ti’n, e kunndɛ kɛ é bó sa sɔ’n su é klé famiɛn’n, 15 naan be niannian fluwa nga be kan ɔ nannan’m be ndɛ’n be nun.+ Fluwa sɔ’m be nun’n, á wá wún ndɛ wie mun, á wá wún kɛ klɔ nga ti ɲin kekle klɔ, ɔ yo famiɛn mun nin nvlenvle’m be tɛtɛ. Kɛ ɔ fɛ i laa lele’n, i su sran wie’m be wlawla sran mun naan be jaso famiɛn’m be wun. I sɔ’n ti yɛ be sacili klɔ nga’n niɔn.+ 16 E waan é sé famiɛn’n kɛ sɛ be kplan klɔ’n i uflɛ’n naan be wie talɛ’m be kplan’n, ɔ sa su sɔnman Nzue’n i bue kun lɔ lika’n su kun.”*+

17 Famiɛn’n klɛli ndɛ ko mannin Reumun m’ɔ ti awa junman difuɛ’m be su kpɛn’n, nin Simisai m’ɔ ti fluwa klɛfuɛ’n, ɔ nin be wiengu junman difuɛ mɔ be tran Samari lɔ’n, ɔ nin be onga nga be tran Nzue’n i bue kun lɔ’n. Ɔ seli be kɛ:

“Ń yó amun like! 18 Fluwa nga amun klɛli e’n, be kanngannin nun* weinwein min ɲrun. 19 N yoli maan be nianniannin fluwa’m be nun, kpɛkun be wunnin kɛ kɛ ɔ fɛ i laa lele’n, klɔ sɔ’n sufuɛ’m be jaso famiɛn’m be wun, yɛ lika sɔ’n nun lɔ’n, ɲin kekle yolɛ’n nin famiɛn’m be wun jasolɛ’n ti be nzuɛn.+ 20 Famiɛn wie mɔ be le kwlalɛ’n, mɔ be sieli Zerizalɛmun klɔ’n, be sieli Nzue’n i bue kun lɔ lika’n i wunmuan’n, yɛ be tuali lapo wafawafa mun mannin famiɛn sɔ mun, yɛ sran’m be mannin sika naan b’a sin. 21 Ɔ maan an se sran sɔ’m be kɛ be jran junman’n, nán be kplan klɔ’n i uflɛ, saan n bɔbɔ m’an man atin kɛ be yo sɔ. 22 Nán ɔ ɲin kpa sa sɔ’n i yolɛ’n su, kɛ ɔ́ yó naan sa tɛ fi w’a juman famiɛn’n i su’n ti.”+

23 Kɛ be kanngannin fluwa nga Famiɛn Atazɛɛzɛsi klɛli’n nun kleli Reumun nin Simisai m’ɔ ti fluwa klɛfuɛ’n, ɔ nin be wiengu junman difuɛ mun’n, be ka lɛ ɔli Zifu’m be sin Zerizalɛmun lɔ, be miannin be kɛ be jran junman’n. 24 Kɛ Ɲanmiɛn sua m’ɔ o Zerizalɛmun lɔ’n i kplanlɛ junman’n jrannin kɛ ngalɛ’n sa. Junman’n jrannin lele fa juli Dariisi m’ɔ ti Pɛɛsi famiɛn’n i famiɛn dilɛ’n i afuɛ nɲɔn su’n su.+