2 Famiɛn Mun

2 Kɛ Zoova wá fá Eli+ aunmuan dan kun nun kɔ́ ɲanmiɛn su’n,+ Eli nin Elize+ be jasoli Gilgali lɛ.+ 2 Eli seli Elize kɛ: “Yaci, ka wa, afin Zoova seli min kɛ n wɔ Betɛli.” Sanngɛ Elize seli kɛ: “N kan Zoova, yɛ n kan ɔ bɔbɔ, n su kpɔciman wɔ.” Ɔ maan be ɔli Betɛli.+ 3 I sin’n, Ɲanmiɛn nuan ijɔfuɛ’m be mma* nga be o Betɛli lɔ’n be bali Elize i wun lɛ, kpɛkun be seli i kɛ: “?A si kɛ andɛ’n Zoova wá fá ɔ min’n naan ɔ su yoman ɔ min kun?”+ Ɔ tɛli be su kɛ: “N si sɔ. Amun muan amun nuan.”

4 Eli seli i kɛ: “Elize, yaci, ka wa, afin Zoova seli min kɛ n wɔ Zeriko.”+ Sanngɛ ɔ seli kɛ: “N kan Zoova, yɛ n kan ɔ bɔbɔ, n su kpɔciman wɔ.” Ɔ maan be ɔli Zeriko. 5 I sin’n, Ɲanmiɛn nuan ijɔfuɛ’m be mma nga be o Zeriko lɔ’n be bali Elize i wun lɛ, kpɛkun be seli i kɛ: “?A si kɛ andɛ’n Zoova wá fá ɔ min’n naan ɔ su yoman ɔ min kun?” Ɔ tɛli be su kɛ: “N si sɔ. Amun muan amun nuan.”

6 Eli seli i kɛ: “Yaci, ka wa, afin Zoova seli min kɛ n wɔ Zurdɛn’n su lɔ.” Sanngɛ ɔ seli kɛ: “N kan Zoova, yɛ n kan ɔ bɔbɔ, n su kpɔciman wɔ.” Ɔ maan be nɲɔn’n be ɔli. 7 Ɲanmiɛn nuan ijɔfuɛ’m be mma’m be nun ablenun (50) be ɔli wie. Be jinjin mmua lɔ yɛ be nian be-ɔ. Kɛ ɔ́ yó sɔ’n, nn be nɲɔn’n be jinjin Zurdɛn’n i nuan lɛ. 8 I sin’n, Eli yili i tralɛ’n,+ ɔ ɲɔnɲɔnnin i, kpɛkun ɔ fa finnin nzue’n su. Nzue’n nun kpacili, i bue su ɔli bɛ su yɛ i bue su ɔli fama su. Ɔ maan be sran nɲɔn’n be nantili asiɛ kee’n su be kpɛli.+

9 Kɛ be kpɛli nzue’n cɛ’n, Eli seli Elize kɛ: “Srɛ like nga a klo kɛ n yo man wɔ’n ka naan b’a fa min ɔ wun wa b’a wɔ.” Ɔ maan Elize seli kɛ: “?Yaci, n kwla ɲan ɔ wawɛ’n+ i wunsu sɔ nɲɔn?”+ 10 Ɔ tɛli i su kɛ: “Like nga a srɛli’n ti kekle. Kɛ bé wá fá min ɔ wun wa kɔ́’n, sɛ a wun min’n, ɔ́ yó kɛ nga a fa kannin’n sa, sanngɛ sɛ w’a wunman min’n, ɔ su yoman sɔ.”

11 Kɛ bé nánti kɔ́ mɔ bé kókó yalɛ’n, kakaklolo kun m’ɔ ti sin ngunmin’n ɔ nin nnɛn kpanngɔ wie mɔ be ti sin ngunmin’n+ be wa tili be nɲɔn’n be nun, kpɛkun aunmuan dan’n fali Eli ɔli ɲanmiɛn su.+ 12 Kɛ Elize níɛn i’n, ɔ kpan se kɛ: “Min si, min si! Izraɛli kakaklolo’n nin i nnɛn kpanngɔ su fufuɛ mun!”+ Kɛ ɔ wunmɛn i kun’n, ɔ trɛli i bɔbɔ i tralɛ mun, kpɛkun ɔ tili be nun nɲɔn.+ 13 I sin’n, ɔ fali Eli i tralɛ+ m’ɔ floli i wun guali’n, kpɛkun ɔ sɛli i sin ko jrannin Zurdɛn’n i nuan lɔ. 14 Ɔ fali Eli i tralɛ’n m’ɔ floli i wun guali’n ɔ fa finnin nzue’n su, kpɛkun ɔ seli kɛ: “?Eli i Ɲanmiɛn Zoova’n wo nin?” Kɛ ɔ fa finnin nzue’n, nzue’n i nun kpacili, i bue su ɔli bɛ su yɛ i bue su ɔli fama su. Ɔ maan Elize sinnin.+

15 Kɛ Ɲanmiɛn nuan ijɔfuɛ’m be mma nga be o Zeriko lɔ’n be wunnin i mmua lɔ’n, be seli kɛ: “Eli i wawɛ’n w’a jra Elize su.”+ Ɔ maan be ɔli be ko kpɛli i atin, be kotoli asiɛ wun i ɲrun lɛ. 16 Be seli i kɛ: “Sran ablenun (50) be nin ɔ sufuɛ’m be o wa, be ti yakpafuɛ. Yaci, maan be wɔ be ko kunndɛ ɔ min’n. Atrɛkpa’n, Zoova i wawɛ’n* mɛnnin i su ko yili i oka wie su annzɛ kongo wie nun.”+ Ɔ tɛli be su kɛ: “Nán amun sunman be.” 17 Sanngɛ be jrɛnnin i wun lele ɔ yoli i kɛnsrɛn. Ɔ maan ɔ seli be kɛ: “Amun sunman be.” Be sunmannin sran ablenun (50) mun, be kunndɛli i lele cɛn ba nsan, sanngɛ b’a wunmɛn i. 18 Ɔ maan be sali be sin kpɛkun be ko toli i. Kɛ ɔ́ yó sɔ’n, nn ɔ o Zeriko.+ Ɔ seli be kɛ: “?M’an seman amun kɛ nán amun wɔ?”

19 Kɛ ɔ́ kɔ́ i ɲrun’n, klɔ’n sufuɛ’m be seli Elize kɛ: “E min, ɔ bɔbɔ a wun kɛ lika nga klɔ’n wo’n ti kpa,+ sanngɛ nzue’n timan kpa, yɛ asiɛ’n yoman like ye.”* 20 Ɔ tɛli be su kɛ: “Amun fa kpongbo ba uflɛuflɛ kun be blɛ min, amun gua nun njin.” Ɔ maan be fa blɛli i. 21 I sin’n, ɔ fite ɔli nzue ti’n su lɔ, ɔ fa njin guali nun,+ kpɛkun ɔ seli kɛ: “Ndɛ nga Zoova kan’n yɛ: ‘M’an yo nzue nga i kpa. Be nɔn-ɔn, be su wuman kun, yɛ be klun su yoman kpan* kun.’” 22 Kɛ ɔ fɛ i cɛn sɔ’n nun’n, nzue’n yoli kpa, kɛ nga Elize fa kannin’n sa.

23 Ɔ fɛ i lɛ ɔli Betɛli. Kɛ ɔ́ kɔ́’n, gbanflɛn kanngan wie’m be fin klɔ’n nun fiteli kpɛkun be srili i.+ Be seli i kɛ: “Ti kpawa, kɔ! Ti kpawa, kɔ!” 24 I agualiɛ su’n, ɔ kpɛli i wun, ɔ niannin be, kpɛkun ɔ fali Zoova i dunman’n boli be sannzan. I sin’n, ursu bla nɲɔn+ be fin bo’n nun lɔ fiteli, kpɛkun be titili ba kanngan sɔ’m be nun ablanan-nin-nɲɔn (42) be nun.+ 25 Elize fɛli i lɛ ɔli Kaamɛli Oka’n+ su lɔ, kpɛkun ɔ sɛli i sin ɔli Samari.