Fluwa klikli nga Piɛli klɛli’n

4 I nun nga Klisi ti klɔ sran’n, ɔ wunnin ɲrɛnnɛn.+ I sɔ’n ti’n, maan amun kusu amun bu akunndan kunngba ng’ɔ buli’n wie.* Afin sran ng’ɔ wun ɲrɛnnɛn’n, ɔ kle kɛ w’a wla sa tɛ’n i ase.+ 2 Ɔ maan blɛ ng’ɔ́ wá dí i asiɛ’n su wa’n nun’n, ɔ su yoman ninnge nga klɔ sran konvi sɔ be’n be kun,+ sanngɛ ɔ́ yó Ɲanmiɛn klun sa.+ 3 Afin laa’n, ninnge nga mɛn’n nunfuɛ’m be yo be’n, an yoli wie lele.+ Amun fali amun wun wlali ɲin kekle ayeliɛ’m* be nun, amun konvi sɔli ninnge tɛtɛ mun, amun nɔnnin nzan boli, amun dili cɛn sinnzin su, amun sili nzan nɔnlɛ nun akplowa, yɛ amun sɔli amuin mun.+ 4 Kɛ mɔ amun nin be yoman ninnge tɛtɛ’m be kun’n ti’n, ɔ bo be nuan. I sɔ’n ti’n, be kan amun wun ndɛ tɛtɛ.+ 5 Sanngɛ sran sɔ’m bé wá kán sa nga be yoli’n i su ndɛ bé klé sran m’ɔ cɛ kan’n, ɔ́ wá dí be nga be o nguan nun nin be nga be wuli’n be jɔlɛ’n.+ 6 I sɔ’n ti yɛ be boli jasin fɛ’n be kleli be nga be wuli’n niɔn.+ I liɛ’n, kannzɛ be di be jɔlɛ kɛ nga be fa di klɔ sran kwlaa jɔlɛ sa’n, sanngɛ like kwlaa nun’n, Ɲanmiɛn wawɛ’n klé be atin.

7 Sanngɛ ninnge kwlaa be awieliɛ’n w’a mantan koko. I sɔ’n ti’n, maan amun yo ngwlɛlɛfuɛ,+ yɛ amun ɲin tran Ɲanmiɛn srɛlɛ’n su.+ 8 Like ng’ɔ ti cinnjin trɛ i kwlaa’n, yɛle kɛ an klo amun wiengu tankaan kpa.+ Afin klolɛ’n kata sa tɛ kpanngban su.+ 9 Maan amun sɔ amun wiengu nun, yɛ nán an ijɔ i sin.+ 10 Like nga Ɲanmiɛn fa man sran m’ɔ fa yo i ye’n be ti wafawafa. I sɔ’n ti’n, kɛ mɔ amun ti Ɲanmiɛn i junman difuɛ* kpa’n ti’n, an fa amun liɛ nga Ɲanmiɛn mannin amun’n yo amun wiengu ye.+ 11 Sɛ sran wie kán ndɛ’n, maan ɔ kɛn i kɛ ndɛ’n fin Ɲanmiɛn sa. Sɛ sran wie úkɛ i wiengu’n, maan ɔ lafi wunmiɛn nga Ɲanmiɛn man’n su.+ I liɛ’n sa kwlaa nun’n, Zezi Klisi ti’n, Ɲanmiɛn ɲán ɲrun.+ Maan manmanlɛ’n nin tinmin’n be yo i liɛ tititi. Maan ɔ yo sɔ.

12 Min sran kpa mun, sɛ ɲrɛnnɛn mɔ be ti kɛ sin sa’n be tɔ amun su’n, nán maan i sɔ’n bo amun nuan.+ Nán amun bu i kɛ ɲrɛnnɛn sa sɔ’m be nin-a tɔman sran uflɛ su le. 13 Sanngɛ maan amun klun jɔ titi.+ Afin ɲrɛnnɛn nga Klisi wunnin be’n, i wie yɛ amun su wun be-ɔ.+ Ɔ maan cɛn nga bé wá yí i aɲrunɲan’n i nglo’n, amun klun wá jɔ́, yɛ amun aklunjɔɛ sɔ’n ɔ́ yó dan kpa.+ 14 Sɛ Klisi i dunman nun’n, be kan amun wun ndɛ tɛtɛ’n,* amun liɛ su ti ye.+ Afin Ɲanmiɛn wawɛ m’ɔ yo ɲɛnmɛn dan’n, ɔ o amun su.

15 Sɛ amun nun wie wun ɲrɛnnɛn’n, nán maan ɔ yo kɛ w’a kun sran ti-ɔ, annzɛ w’a wua ti-ɔ, annzɛ w’a yo sa tɛ ti-ɔ, annzɛ w’a fɛ i nuan w’a wlɛ i sran uflɛ ndɛ nun ti-ɔ.+ 16 Sanngɛ sɛ Klisifuɛ mɔ sran kun ti’n i ti yɛ ɔ wun ɲrɛnnɛn’n, nán maan ɲannzuɛn kun i.+ Maan dunman sɔ’n m’ɔ o i su’n ti’n, ɔ manman Ɲanmiɛn. 17 Afin jɔlɛ m’ɔ fata kɛ be bo i dilɛ bo Ɲanmiɛn i awlo’n su’n,+ i blɛ nga be sieli’n w’a ju. ?Sɛ e su yɛ ɔ́ bó i bo’n,+ be nga be sɔman Ɲanmiɛn i jasin fɛ’n nun’n, be liɛ’n yó sɛ?+ 18 “?Yɛ sɛ sran kpa’n i delɛ’n ti kekle’n, be nga be sroman Ɲanmiɛn’n, ɔ nin sa tɛ yofuɛ’m be liɛ’n yó sɛ?”+ 19 I sɔ’n ti’n, maan be nga Ɲanmiɛn i klun sa’n ti be wun ɲrɛnnɛn’n, be fa be wun wla Ɲanmiɛn m’ɔ ti nanwlɛfuɛ’n, m’ɔ ti like kwlaa Yifuɛ’n i sa nun titi. Kɛ bé yó sɔ’n, maan be yo sa kpa.+