Fluwa klikli nga Zan klɛli’n

1 Like ng’ɔ o lɛ i bo bolɛ nun’n, mɔ e tili i ngan’n, mɔ e bɔbɔ e ɲinma wunnin i’n, mɔ e fali e ɲin e sieli su’n, mɔ e sa kɛnnin i’n, yɛle ndɛ m’ɔ man nguan’n.+ 2 (Be yili nguan’n i nglo, e wunnin nguan m’ɔ leman awieliɛ’n,+ kpɛkun e kɛnnin i ndɛ,+ yɛ e boli su e kleli amun. Laa’n, ɔ o Siɛ’n i wun lɔ, kpɛkun be yili i nglo kleli e.) 3 Like nga e wunnin i’n nin ndɛ nga e tili’n yɛ e su kan be ndɛ e kle amun-ɔn.+ E yo sɔ naan amun kusu amun nin e kaci sran wunmuan. Afin e liɛ’n, e nin Siɛ’n nin i Wa Zezi Klisi e ti sran wunmuan.+ 4 E su klɛ ndɛ sɔ mun e blɛ amun naan amun klun jɔ kpa.

5 Ndɛ ng’ɔ kannin mɔ e tili’n, mɔ e su kan kle amun’n yɛ: Ɲanmiɛn kpaja kɛ kannin sa,+ yɛ ɔ nin aosin’n be mantanman kaan sa. 6 Ɔ maan sɛ e se kɛ: “E nin i e ti sran wunmuan,” kusu nn e te nanti aosin’n nun’n, nn e ti ato buafuɛ, yɛ e nantiman ndɛ nanwlɛ’n su.+ 7 Sanngɛ sɛ e nanti lika m’ɔ kpaja’n nun kɛ nga i bɔbɔ ɔ o lika m’ɔ kpaja’n nun sa’n, i sɔ’n kle kɛ e nin e wiengu mun e ti sran wunmuan, naan i Wa Zezi i mmoja’n w’a nunnun e sa tɛ’n kwlaa.+

8 Sɛ e se kɛ: “Sa tɛ kaan sa nunman e wun’n,” nn e su laka e bɔbɔ e wun,+ yɛ nn e timan nanwlɛfuɛ. 9 Sɛ e di sa tɛ nga e yo’n i nanwlɛ’n, kɛ m’ɔ ti nanwlɛfuɛ m’ɔ yo sa’n i nuan su’n ti’n, ɔ́ yáci e wun sa tɛ’n kwlaa cɛ́ e. Yɛ ɔ́ wúnnzin e, ɔ maan e sa tɛ’m be kwlaa bé wíe.+ 10 Sɛ e se kɛ: “Y’a yoman sa tɛ’n,” nn e su se kɛ ɔ ti ato buafuɛ, yɛ nn i ndɛ’n nunman e awlɛn’n nun.