Ɲanndra Mun

29 Sran nga b’a tu i fɔ lele mɔ ɲin kekle yɛ i waan ɔ́ yó’n,*+

bé ká lɛ búbú i nun, yɛ ɔ su kwlá yoman juejue kun.+

 2 Kɛ be nga be yo sa i nuan su’n be sɔn’n, nvle’n nunfuɛ’m be di aklunjɔɛ,

sanngɛ kɛ klunwifuɛ’n sie nvle’n, sran’m be fɛfɛ.+

 3 Kɛ sran kun klo ngwlɛlɛ’n, i si i klun jɔ,+

sanngɛ sran ng’ɔ nin tekle bla’m be san nun’n, ɔ saci i aɲanbeun ninnge mun.+

 4 Kɛ famiɛn kun yo sa i nuan su’n, i nvle’n nun ti fɔuun,+

sanngɛ sran ng’ɔ kunndɛ adi ninnge’n, ɔ saci nvle’n.

 5 Sran ng’ɔ lɛkɛlɛkɛ i wiengu’n,

ɔ ti kɛ w’a sua aya kun naan i ja’n tɔ nun sa.+

 6 Sa tɛ nga sran tɛ’n yo’n, ɔ ti kɛ aya wie yɛ w’a trɛ i sa,+

sanngɛ sran ng’ɔ yo sa i nuan su’n, ɔ bo sro yɛ ɔ di aklunjɔɛ.+

 7 Yalɛfuɛ’m be ndɛ’n ti sran ng’ɔ yo sa i nuan su’n i cinnjin,+

sanngɛ klunwifuɛ’n i ndɛ nunman be ndɛ nun.+

 8 Nuan difuɛ’m be wɔ klɔ nun,+

sanngɛ ngwlɛlɛfuɛ’m be yo maan sran’m be gua be ya’n i ase.+

 9 Sɛ ngwlɛlɛfuɛ’n nin sinnglinfuɛ’n be si akplowa’n,

ɔ́ yó kpankpanlɛ nin srilɛ ngunmin, ngwlɛlɛfuɛ’n klé i wun yalɛ ngbɛn.+

10 Sran kunfuɛ’m be ɲin ci sran nga w’a yoman sa’n,*+

yɛ like nga be kunndɛ’n yɛle sran ndɛnmanfuɛ’n i kunlɛ.*

11 Sinnglinfuɛ’n yi wafa nga i wun yo i’n* i kwlaa nglo,+

sanngɛ ngwlɛlɛfuɛ’n trɛn i liɛ lɛ diin, ɔ niɛn i wun su.+

12 Kɛ be kpɛ gblɛ be kle kpɛnngbɛn kun m’ɔ

fa su’n,

i sa nun sran’m be kwlaa bé káci klunwifuɛ.+

13 Yalɛfuɛ’n nin sran ng’ɔ mianmian sran’n be sɛ.*

Yɛle kɛ Zoova yo maan be nɲɔn’n be ɲinma’n gua kannin’n i wun.*

14 Kɛ famiɛn kun di yalɛfuɛ’m be ndɛ klanman’n,+

i famiɛn bia’n taka kpa tititi.+

15 Ɲantiaan* nin ijɔlɛ nga be ijɔ sran’n be kle ngwlɛlɛ,+

sanngɛ bakan nga be yaci i lɛ m’ɔ yo like kwlaa ng’ɔ klo’n, ɔ guɛ i nin’n i

ɲin ase.

16 Kɛ klunwifuɛ’m be sɔn’n, sa tɛtɛ’n kusu sɔn wie,

sanngɛ kɛ bé wá tɔ́’n, be nga be yo sa i nuan su’n bé wún nun.+

17 Tu ɔ wa’n i fɔ. I liɛ’n, ɔ́ yó maan á ló wunmiɛn.

Yɛ ɔ́ yó maan ɔ klun jɔ́

dan kpa.+

18 Kɛ Ɲanmiɛn yiman sa nglo kleman sran fi’n,* sran’m be yo like kwlaa nga be klo’n,+

sanngɛ be nga be nanti mmla’n su’n, be liɛ

su ti ye.+

19 Sɛ be kan ndɛ fa tu junman difuɛ’n i fɔ’n, ɔ ti ngbɛn,

afin kannzɛ ɔ wun i wlɛ bɔbɔ’n, ɔ faman su.+

20 ?W’a wun sran kun m’ɔ buman ndɛ sin naan w’a kan’n i le?+

Sinnglinfuɛ’n bɔbɔ i ukalɛ’n ti pɔpɔ tra sran sɔ’n.+

21 Sɛ a saci ɔ junman difuɛ’n i kaan nun’n,

cɛn wie lele’n ɔ su siman ye.

22 Sran nga i awlɛn’n ti fufu’n, ɔ kpɛ ndɛnngan ba.+

Sran ng’ɔ fa ya ndɛndɛ’n, ɔ yo sa tɛ sunman.+

23 Wun tulɛ’n gua be ɲin ase,+

sanngɛ sran ng’ɔ ti wun ase kanfuɛ’n, ɔ́ ɲán ɲrun.+

24 Sran ng’ɔ uka awiefuɛ kun’n, ɔ kpɔ i bɔbɔ wun.

Ɔ ti i kɛ be kunndɛ lalofuɛ,* sanngɛ ɔ kanman ndɛ fi.+

25 Srongble’n* ti kɛ aya sa,+

sanngɛ sran ng’ɔ fɛ i wla guɛ i Zoova su’n, ɔ́ ɲán fiawlɛ.+

26 Sran sunman be kunndɛ kɛ bé wún siefuɛ’n i wun,*

sanngɛ Zoova yɛ ɔ bu sran kun i ndɛ klanman-ɔn.+

27 Sran ng’ɔ yo sa i nuan su’n, ɔ kloman sran ng’ɔ ti tɛ’n,+

klunwifuɛ’n kusu kloman sran ng’ɔ nanti seiin’n.+