2 Famiɛn Mun

4 Cɛn kun’n, Ɲanmiɛn nuan ijɔfuɛ’m be mma’m+ be nun kun i yi’n kpan flɛli Elize seli i kɛ: “Min wun m’ɔ ti ɔ sufuɛ’n w’a wu. Ɔ kusu a si kpa kɛ ɔ sufuɛ’n i ɲin yili Zoova titi.+ Sanngɛ sran kun mɔ i kalɛ o e su’n, ɔ bali wa fali min mma nɲɔn mun naan be yo i kanga.” 2 Elize usɛli i kɛ: “?Ngue yɛ n kwla yo man wɔ-ɔ? ?Yɛ ngue yɛ a le i ɔ awlo lɔ-ɔ?” Bla’n tɛli i su kɛ: “Min min, n leman like fi awlo lɔ, saan ngo sɛ kun.”+ 3 I sin’n, ɔ seli i kɛ: “Kɔ naan ko srɛ sɛ ɔ mantanfuɛ’m be kwlaa be sa nun, srɛ sɛ mɔ like fi nunman nun’n. Srɛ sɛ kaka. 4 I sin’n, wlu ɔ sua’n nun lɔ naan ɲin a nin ɔ mma mun amun sin anuan. Kpɛkun gua sɛ’m be nun ngo. Sɛ nga be yi’n sie be ngunmin.” 5 Ɔ maan bla’n ɔli.

Kɛ ɔ wluli sua’n nun lɔ’n, ɔ ɲinnin ɔ nin i mma’m be sin anuan. Kɛ ba’m bé fá sɛ’m bé mɛ́n i’n, nn ɔ́ gúa be nun ngo.+ 6 Kɛ sɛ’m be yili’n, ɔ seli i wa’n kun kɛ: “Fa sɛ uflɛ blɛ min.”+ Sanngɛ ba’n seli i kɛ: “Sɛ nunman lɛ kun.” Kɛ ɔ yoli sɔ’n, ngo’n yacili gualɛ.+ 7 Ɔ maan bla’n ɔli ko kan kleli Ɲanmiɛn Kpli i sran’n. Yɛ ɔ tɛli i su kɛ: “Kɔ naan ko yo ngo’n i atɛ fa tannin ɔ su kalɛ mun, yɛ a nin ɔ mma mun amun fɛ i onga’n fa nian amun wun lika.”

8 Cɛn kun’n, Elize ɔli Sunɛmun,+ bla kun m’ɔ le ɲrun kpa’n wo klɔ sɔ’n su lɔ. Ɔ srɛli Elize kpa kɛ ɔ wa di like.+ Kɛ ɔ fɛ i lɛ’n, cɛn kwlaa ng’ɔ sin lɛ’n, ɔ kɔ lɔ ko di like. 9 Bla’n seli i wun’n kɛ: “Bian ng’ɔ ba e wun wa titi lɛ’n, n si kɛ ɔ ti Ɲanmiɛn i sran, ɔ ti i liɛ ngunmin. 10 Yaci, maan e yo sua ba kaan kun sua’n i ti su nglo lɔ+ naan e sie nun bɛ nin tabli nin bia, ɔ nin kannin siewlɛ e fa mɛn i. I liɛ’n sɛ ɔ ba e wun wa’n, ɔ kwla la lɔ.”+

11 Cɛn kun’n, Elize ɔli lɔ, kpɛkun ɔ ko lali sua ba m’ɔ o sua’n i ti su nglo lɔ’n nun. 12 Yɛ ɔ seli i sufuɛ Geazi+ kɛ: “Se Sunɛmun+ bla’n kɛ ɔ bla.” Ɔ ko flɛli i, yɛ bla’n wa jrɛnnin i ɲrun lɛ-ɔ. 13 I sin’n, Elize seli Geazi kɛ: “Yaci, se bla’n kɛ: ‘E dunman nun ti’n a fɛli kpa.+ ?Ngue yɛ e kwla yo man wɔ-ɔ?+ ?A klo kɛ n kan ɔ ndɛ n kle famiɛn’n+ annzɛ sonja su kpɛn’n?’” Sanngɛ bla’n tɛli i su kɛ: “Cɛcɛ, n wo min bɔbɔ min nvlefuɛ’m be afiɛn.” 14 Ɔ maan Elize usali Geazi kɛ: “?Ngue yɛ e kwla yo mɛn i-ɔ?” Geazi tɛli i su kɛ: “Ɔ leman ba,+ yɛ i wun’n w’a yo oke.” 15 Yɛ Elize ka lɛ seli i kɛ: “Se i kɛ ɔ bla.” Ɔ maan ɔ flɛli bla’n, ɔ bali wa jrannin anuan’n nun lɛ. 16 Elize seli i kɛ: “Afuɛ ng’ɔ́ bá lɔ’n, blɛ kɛ nga sa nun’n, á wá jú ba yasua kun.”+ Sanngɛ bla’n tɛli i su kɛ: “Min min, Ɲanmiɛn Kpli i sran, nán laka min.”

17 Sanngɛ bla’n wunnzɛli, kpɛkun kɛ afuɛ nuan yiali’n blɛ kunngba’n nun’n, ɔ wuli ba yasua kun, kɛ nga Elize kan kleli i’n sa. 18 Ba’n ɲinnin, kpɛkun cɛn kun mɔ i si’n o ninnge kpɛfuɛ’m be wun lɔ’n, ɔ toli i lɔ. 19 Kpɛkun ɔ seli i si kɛ: “Min ti-o! Min ti’n yo min ya!” Yɛ i si seli i sufuɛ’n kɛ: “Fɛ i kɔ i nin sin.” 20 Ɔ maan ɔ fɛ i ɔli i nin sin. Ba’n trɛnnin i nin ja su lele mindi juli, kpɛkun ɔ wuli.+ 21 Bla’n fali ba’n ko lɛli i Ɲanmiɛn Kpli i sran’n i bɛ’n su,+ ɔ ɲinnin anuan’n i sin kpɛkun ɔ ɔli. 22 I sin’n, ɔ flɛli i wun’n, kpɛkun ɔ seli i kɛ: “Yaci, maan ɔ sufuɛ’m be nun kun fa aflunmun kun blɛ min, ń kó wún Ɲanmiɛn Kpli i sran’n i wun ndɛndɛ ń bá.” 23 Sanngɛ ɔ usali bla’n kɛ: “?Ngue ti yɛ a su ko wun i wun andɛ-ɔ? Andɛ timan anglo le kun+ annzɛ wunmiɛn-lolɛ-cɛn.” Bla’n tɛli i su kɛ: “Nán ndɛ kekle-ɔ.” 24 Ɔ maan bla’n siesieli aflunmun’n, kpɛkun ɔ seli i sufuɛ’n kɛ: “E wɔ ndɛndɛ, nán se kɛ min dunman nun ti’n á kɔ́ blɛblɛ, saan min bɔbɔ m’an se wɔ sɔ.”

25 Bla’n toli Ɲanmiɛn Kpli i sran’n Kaamɛli Oka’n su lɔ. Kɛ Ɲanmiɛn Kpli i sran’n wunnin i mmua lɔ’n, ɔ seli i sufuɛ Geazi kɛ: “Nian, Sunɛmun bla’n yɛ ɔ́ bá lɔ lɛ. 26 Yaci, wanndi ko kpɛ i atin naan usɛ i kɛ: ‘?Ɔ wun ti kpa? ?Ɔ wun’n i wun ti kpa? ?Ɔ wa’n i wun ti kpa?’” Bla’n tɛli i su kɛ: “E kwlaa e wun ti kpa.” 27 Kɛ bla’n toli Ɲanmiɛn Kpli i sran’n oka’n su lɔ’n, ɔ trɛli i ja’n.+ Geazi wunngeli lɔ naan ɔ́ kó kpálo i. Sanngɛ Ɲanmiɛn Kpli i sran’n seli i kɛ: “Yaci i nun, afin i wla w’a bo i wun dan. Sanngɛ Zoova fiali sa sɔ’n min wun, w’a kan kleman min.” 28 Bla’n seli kɛ: “?Min min, n srɛli wɔ ba? ?M’an seman kɛ nán a laka min?”+

29 Elize ka lɛ seli Geazi kɛ: “Fa ɔ tralɛ’n ci wɔ afiɛn+ yɛ fa min kpɔnman’n tra nun naan kɔ. Sɛ a nin sran yia’n, nán yo i like. Yɛ sɛ sran yo ɔ like’n, nán tɛ i su. Kɔ naan ko fa min kpɔnman’n sie i ba yasua kan’n i ɲrun lika’n su.” 30 Sanngɛ ba’n i nin’n seli kɛ: “N kan Zoova yɛ n kan ɔ bɔbɔ, sɛ w’a ɔman wie’n n su yaciman wɔ nun.”+ Ɔ maan ɔ jasoli yɛ ɔ nin bla’n be ɔli-ɔ. 31 Geazi dunnin mmua be ɲrun, kpɛkun ɔ fali kpɔnman’n sieli i ba’n i ɲrun lika’n su. Sanngɛ w’a timan like fi ngan yɛ ba’n w’a kplikpliman.+ Ɔ sɛli i sin Elize i wun lɔ, yɛ ɔ seli i kɛ: “Ba’n w’a jasoman.”

32 Kɛ Elize wlú sua’n nun lɔ’n, ba’n la bɛ’n su lɛ, w’a wu.+ 33 Ɔ wluli sua ba’n nun lɔ, ɔ ɲinnin be sran nɲɔn’n be sin anuan kpɛkun ɔ boli Zoova i srɛlɛ bo.+ 34 Ɔ fuli bɛ’n su kpɛkun ɔ lali ba’n su. Ɔ fɛli i nuan’n sieli i ba’n i nuan’n su, yɛ ɔ fɛli i ɲinma’n sieli i ba’n i ɲinma liɛ’m be su. Kpɛkun ɔ fɛli i sa ngbabua mun sieli i ba’n i sa ngbabua’m be su. Ɔ kali ba’n su lɛ, kpɛkun ba’n i wunnɛn’n loli fɛfɛfɛ.+ 35 Elize nanti kɔ ɔ nanti ba, ɔ yo i sɔ sua’n nun lɔ, kpɛkun ɔ fuli bɛ’n su ekun ko lali ba’n su. Ba’n kpɛli bɛ kpɛ nso, kpɛkun ɔ tikeli i ɲinma’n.+ 36 I sin’n, Elize flɛli Geazi, ɔ seli i kɛ: “Se Sunɛmun bla’n kɛ ɔ bla.” Ɔ ko flɛli bla’n yɛ bla’n bali-ɔ. Kpɛkun Elize seli i kɛ: “Fa ɔ wa’n.”+ 37 Bla’n wluli sua’n nun lɔ, ɔ tɔli i ja’n i wun lɛ. Kpɛkun ɔ utuli i ɲin ase i ɲrun lɛ. I sin’n, ɔ fɛli i wa’n yɛ ɔ fiteli-ɔ.

38 Kɛ Elize sɛ́ i sin Gilgali lɔ’n, nn awe w’a kpɛn mɛn’n nun.+ Ɲanmiɛn nuan ijɔfuɛ’m be mma’m+ be bali be wa trɛnnin i ɲrun lɛ, yɛ ɔ seli i sufuɛ’n kɛ:+ “Fa sɛ dan’n jin i sin’n su naan tɔn tro man Ɲanmiɛn nuan ijɔfuɛ’m be mma mun.” 39 Ɲanmiɛn nuan ijɔfuɛ’m be mma’m be nun kun ɔli blo lɔ naan ɔ́ kó títí nɲa. Ɔ wunnin towa ɲanman kun naan w’a titi i su mma’n wie w’a guɛ i tralɛ’n nun. Kpɛkun ɔ sɛli i sin, ɔ kpɛkpɛli be nun guɛli i sɛ’n nun. Sanngɛ ɔ siman like sɔ’n. 40 Kɛ ɔ cɛli kan’n, be sali wie mannin sran’m be kɛ be di. Sanngɛ kɛ be fali like’n be kannin be nuan cɛ’n, be kpan seli kɛ: “Ɲanmiɛn Kpli i sran, like ng’ɔ o sɛ nga nun’n kwla kun.” Ɔ maan b’a kwlá diman. 41 Yɛ ɔ seli kɛ: “An fa sanmlɛn be blɛ min.” I sin’n, ɔ fa guɛli i sɛ’n nun, kpɛkun ɔ seli kɛ: “An sa man sran mun naan be di.” Ɔ maan like tɛ ng’ɔ o sɛ’n nun’n, ɔ tuli nun.+

42 Bian kun m’ɔ fin Baali-Salisa’n,+ ɔ fali ɔɔzu kpanwun ablaɔn (20) blɛli Ɲanmiɛn Kpli i sran’n.+ Kpanwun sɔ’n, ɔɔzu klikli nga be kpɛli’n yɛ be fa yoli-ɔ. Kpɛkun ɔ fali ɔɔzu mɔ b’a kpɛ i uflɛuflɛ’n bajɛ kun fa sieli su.+ Elize seli kɛ: “An fa man sran mun naan be di.” 43 Sanngɛ i sufuɛ’n seli kɛ: “?Ń yó sɛ́ naan m’an fa like nga m’an sie i sran ya (100) be ɲrun?”+ Elize tɛli i su kɛ: “Fa man sran mun naan be di, afin ndɛ nga Zoova kannin’n yɛ: ‘Bé dí yɛ i wie ká.’”+ 44 Ɔ maan ɔ fa mannin sran mun, be dili yɛ i wie kali,+ kɛ nga Zoova fa kannin’n sa.