Fluwa klikli nga Pɔlu klɛli Tesalonikifuɛ mun’n

4 Ɔ maan aniaan mun, e kleli amun wafa ng’ɔ fata kɛ amun nanti naan Ɲanmiɛn i klun w’a jɔ amun wun’n.+ I sɔ kusu yɛ amun yo-ɔ. I sɔ’n ti’n é srɛ́ amun, yɛ é wlá amun fanngan e Min Zezi dunman nun kɛ amun yo i sɔ tra laa’n. 2 Afin ndɛ nga e Min Zezi i dunman nun e kan kleli amun’n, amun si be.

3 Like nga Ɲanmiɛn kunndɛ’n yɛle kɛ amun yo sanwun,+ nán amun kunndɛ bla nin bian sukusuku yɛ nán amun yo i wunsu ɲannzuɛn sa.*+ 4 Maan amun si amun bɔbɔ amun wun su nian+ naan amun yo sanwun+ naan Ɲanmiɛn i klun jɔ amun wun.* 5 Nán maan amun wun yrayra amun bla nin bian kunndɛlɛ nun+ kɛ be nga be timan Zifu mɔ be siman Ɲanmiɛn’n be sa.+ 6 Sa sɔ’n nun’n, nán amun nun wie fi yo sa ng’ɔ timan su’n naan ɔ bu i niaan wie lufle. Afin kɛ nga e kan kleli amun laa mɔ e wlali amun su nun kpa sa’n, Zoova* wá tú be nga be yo ninnge kwlaa sɔ mun’n be fɔ. 7 Afin Ɲanmiɛn w’a flɛman e kɛ e yo sa kainkain mun, sanngɛ ɔ flɛli e kɛ e yo sanwun.+ 8 I sɔ’n ti’n, sran ng’ɔ bumɛn i sɔ’n i like fi’n, nán sran yɛ ɔ bumɛn i sran-ɔn. Sanngɛ Ɲanmiɛn m’ɔ fɛ i wawɛ’n man amun’n+ yɛ ɔ bumɛn i sran-ɔn.+

9 Sanngɛ amun wiengu klolɛ+ i su ndɛ liɛ’n, ɔ nunman nun kɛ n klɛ amun i su fluwa. Afin Ɲanmiɛn kle amun kɛ ɔ fata kɛ amun klo amun wiengu.+ 10 I sɔ bɔbɔ yɛ amun yi i nglo aniaan nga be o Maseduanin lɔ’n be kwlaa be lika-ɔ. Sanngɛ aniaan mun, é srɛ́ amun kpa kɛ amun yo sɔ tra su. 11 Kɛ nga e kan kleli amun sa’n, an mian amun ɲin yo wɛtɛɛfuɛ,+ nán amun fa amun nuan wla sran ndɛ nun,+ yɛ amun di junman kekle.+ 12 Sɛ amun yo sɔ’n, be nga be o gua su lɔ’n, bé wún kɛ amun nzuɛn’n ti kpa,+ yɛ kusu amun sa su mianman like fi wun.

13 Asa kusu aniaan mun, e kunndɛ kɛ amun wun be nga be wuli’n be su ndɛ’n i wlɛ.+ I liɛ’n, amun wla su boman kɛ be nga be leman like fi naan b’a fa be wla b’a gua su’n, be sa.+ 14 Afin sɛ e lafi su kɛ Zezi wuli naan ɔ cɛnnin’n,+ é láfi su kusu kɛ Zezi dunman nun’n, Ɲanmiɛn wá cɛ́n be nga be wuli’n, naan be nin i tran.+ 15 Zoova* i ndɛ nga é kán klé amun’n, yɛle kɛ e nga kɛ e Min’n sɛ́ i sin’n* nn e ɲin te o su’n, e su dunman mmua be nga be wuli’n be ɲrun. 16 Afin kɛ e Min’n bɔbɔ ɔ́ wá fín ɲanmiɛn su lɔ ɔ́ jrá’n, ɔ́ kpán kekle kpa, i nɛn’n tɛ́ kɛ anzi’m be su kpɛn+ sa. Kɛ ɔ́ yó sɔ’n, nn Ɲanmiɛn i awɛ’n wo i sa nun. Kpɛkun be nga be nin Klisi be o nun’n, bé dún mmua bé cɛ́n.+ 17 I sin’n, e nga e te o nguan nun’n, e nin be é fú ɲanmiɛn ble’n su,+ yɛ é kó tó e Min’n+ nglo lɔ. Ɔ maan e nin e Min’n é trán tititi.+ 18 I sɔ’n ti’n, an fa ndɛ sɔ mun fɔnvɔ amun wiengu titi.